.jpg)
លោក ហ៊ុន សែន ក្នុងជំនួបជាមួយឯកអគ្គរដ្ឋទូតសហរដ្ឋអាមេរិកកាលពីថ្ងៃទី ២១ ខែវិច្ឆិកា។ រូបថត SPM
ភ្នំពេញៈ ប្រធានាធិបតីសហរដ្ឋអាមេរិក ដូណាល់ ត្រាំ បានផ្ញើលិខិត ២ ច្បាប់ជូនលោកនាយករដ្ឋមន្ត្រី ហ៊ុន សែន ដោយបញ្ជាក់ពីជំហរ និងកិច្ចសហប្រតិបត្តិការរវាងប្រទេសទាំង ២ និងអញ្ជើញលោកនាយករដ្ឋមន្ត្រីទៅចូលរួមប្រជុំ ពិសេសសហរដ្ឋអាមេរិក-អាស៊ាន នៅឆ្នាំ ២០២០។
ទំព័រហ្វេសប៊ុករបស់លោកនាយករដ្ឋមន្ត្រី ហ៊ុន សែន កាលពីថ្ងៃព្រហស្បតិ៍កន្លងទៅបានបញ្ជាក់ថា លោក ដូណាល់ ត្រាំ បានផ្ញើលិខិតជូនលោកនាយករដ្ឋមន្ត្រីចំនួន ២ ច្បាប់នៅខែវិច្ឆិកានេះដោយលិខិតទី ១ លោក ត្រាំ បានថ្លែងអំពីទំនាក់ទំនង និងសហប្រតិបត្តិការរវាងសហរដ្ឋអាមេរិក និងកម្ពុជា និងលិខិតទី ២ គឺជាការអញ្ជើញលោក ហ៊ុន សែន ទៅចូលរួមជំនួបកំពូលអាមេរិក-អាស៊ាននៅឆមាសទី ១ នៃឆ្នាំ ២០២០ ខាងមុខ។
ការបញ្ជាក់អំពីខ្លឹមសារលិខិតរបស់លោក ត្រាំ ធ្វើឡើងបន្ទាប់ពីលោកនាយករដ្ឋមន្ត្រីបានជួបជាមួយលោក Patrick Murphy ឯកអគ្គរដ្ឋទូតអាមេរិកប្រចាំកម្ពុជាកាលពីរសៀលថ្ងៃព្រហស្បតិ៍កន្លងទៅ។
ទំព័រហ្វេសប៊ុករបស់លោក ហ៊ុន សែន ឲ្យដឹងថា សហរដ្ឋអាមេរិកមានការប្ដេជ្ញាខ្ពស់ក្នុងការគាំទ្រដល់ប្រទេស កម្ពុជា ជាពិសេសគោរពអធិបតេយ្យភាពរបស់ប្រទេស កម្ពុជា និង «មិនមានការគាំទ្រឲ្យមានការផ្លាស់ប្តូររបបនៅក្នុងប្រទេសកម្ពុជានោះទេ។ ជាពិសេសទៀតនោះ គឺសហរដ្ឋអាមេរិកនឹងជួយការពារអធិបតេយ្យភាពកម្ពុជាផងដែរ ហើយសហរដ្ឋ-អាមេរិកនឹងបន្តជួយកម្ពុជាឲ្យមានប្រព័ន្ធគ្រប់គ្រងហិរញ្ញវត្ថុរឹងមាំប្រកបដោយតម្លាភាព ទប់ស្កាត់ការលាងលុយកខ្វក់ដែលធ្វើឲ្យប៉ះពាល់ដល់ប្រទេសជាតិ»។
លើសពីនេះទៀតសហរដ្ឋអាមេរិកនឹងគាំទ្រផ្ដល់ជំនួយបច្ចេកទេសជាច្រើនទៀតដែលកម្ពុជាត្រូវការ ដើម្បីជំរុញមិត្តភាព និងកិច្ចសហការឲ្យកាន់តែល្អនឹងជឿទុកចិត្តគ្នាទៅវិញទៅមកកាន់តែខ្លាំង។
យោងតាមលិខិតរបស់លោក ត្រាំ ដែលមន្ត្រីរដ្ឋាភិបាលមួយចំនួនបានបង្ហោះចុះកាលបរិច្ឆេទថ្ងៃទី ១ ខែវិច្ឆិកា លោក ត្រាំ បានសរសេរលិខិតទាំង ២ ក្នុងឱកាសជំនួបកំពូលអាមេរិក-អាស៊ានលើកទី ៧ ដែលធ្វើឡើងនៅទីក្រុងបាងកកកាលពីដើមខែវិច្ឆិកានេះ។
លិខិតលោក ត្រាំ សរសេរថា៖ «ក្នុងរយៈពេលប៉ុន្មានឆ្នាំកន្លងទៅថ្មីៗនេះ ទំនាក់ទំនងរវាងសហរដ្ឋអាមេរិកជាមួយព្រះរាជាណាចក្រកម្ពុជាបានពើបប្រទះនឹងការលំបាក ប៉ុន្តែភាពរកាំរកូសនេះមិនបម្រើឲ្យប្រយោជន៍នៃប្រជាជនអាមេរិក និងកម្ពុជាទេ។ ក្នុងហេតុផលនេះខ្ញុំសូមឆ្លៀតយកឱកាសនេះ គូសបញ្ជាក់ជូនសម្ដេចថា សហរដ្ឋអាមេរិក គោរពឆន្ទៈ អធិបតេយ្យរបស់ប្រជាជនកម្ពុជា ហើយសហរដ្ឋអាមេរិកមិនស្វែងរកឲ្យមានការប្ដូររបបនោះទេ។ រដ្ឋបាលរបស់ខ្ញុំ ស្វះស្វែងធ្វើឲ្យទំនាក់ទំនងជាមួយរដ្ឋាភិបាលរបស់សម្ដេចដោយផ្អែកលើការគោរពគ្នាទៅវិញទៅមក»។
លិខិតរបស់លោក ត្រាំ បន្តថា វាមានសារៈសំខាន់សម្រាប់អនាគតនៃទំនាក់ទំនងទ្វេភាគីដែលលោកនាយករដ្ឋមន្ត្រី ហ៊ុន សែន ត្រូវនាំកម្ពុជាត្រឡប់ទៅរកមាគ៌ាអភិបាលកិច្ចតាមបែបប្រជាធិបតេយ្យវិញ។
លិខិតដដែលសរសេរថា៖ «ជាជំហានដំបូង ខ្ញុំសង្ឃឹមថាសម្ដេចនឹងពិនិត្យឡើងវិញនូវការសម្រេចមួយចំនួនដែលរដ្ឋាភិបាលសម្ដេចបានប្រកាន់យក ហើយដែលការសម្រេចទាំងនោះសហរដ្ឋអាមេរិកជឿជាក់មុតមាំថាវានឹងនាំឲ្យមានគ្រោះថ្នាក់ខ្លាំងដល់ការអភិវឌ្ឍសេដ្ឋកិច្ចស្ថិរភាព និងអធិបតេយ្យភាពយូរអង្វែងរបស់ព្រះរាជាណាចក្រកម្ពុជា»។
លោក Patrick Murphy បានបង្ហោះសារនៅលើទំព័រហ្វេសប៊ុករបស់ស្ថានទូតអាមេរិកដោយថ្លែងថា លោកបានជួបជាមួយលោក ហ៊ុន សែន «ដើម្បីបន្តការពិភាក្សារបស់យើងអំពីការគាំទ្ររបស់អាមេរិក ចំពោះពលរដ្ឋកម្ពុជា និងប្រជាធិបតេយ្យ ព្រមទាំងបន្តជំហានលើបញ្ហាសិទ្ធិមនុស្សដែលនឹងជួយពង្រឹងទំនាក់ទំនងទ្វេភាគី»។ លោកក៏បានសាកសួរលោកនាយករដ្ឋមន្ត្រីអំពីលិខិតអញ្ជើញទៅចូលរួមក្នុងកិច្ចប្រជុំពូល អាមេរិក-អាស៊ានពិសេសនៅឆ្នាំ ២០២០។
ឆ្លើយតនឹងលិខិតរបស់លោក ដូណាល់ ត្រាំ លោក ហ៊ុន សែន បាន អរគុណសហរដ្ឋអាមេរិកដែលបានគាំទ្រកម្ពុជាតាំងពីកម្ពុជាមិនទាន់ទទួលបានឯករាជ្យក្នុងឆ្នាំ ១៩៥៣។
លោកបន្តថា ការគាំទ្រនេះបង្ហាញពីចំណងមិត្តភាព និងសហប្រតិបត្តិការល្អជាមួយគ្នាដែលមានរយៈពេលយូរលង់មកហើយ។ លោកបានបញ្ជាក់ពីជំហររបស់កម្ពុជាក្នុងការបង្កើនមិត្តភាពល្អជាមួយសហរដ្ឋ- អាមេរិក ហើយរីករាយនឹងចូលរួមកិច្ចប្រជុំពិសេសដែលរៀបចំដោយសហរដ្ឋអាមេរិកនៅឆ្នាំក្រោយនេះ។ លោក ហ៊ុន សែន ក៏បានថ្លែងថា លោកនឹងចាត់មន្ត្រីក្រសួងការបរទេស ឲ្យរៀបចំលិខិតឆ្លើយតបជាផ្លូវការទៅសេតវិមានវិញឆាប់ៗនេះ។
លោក សុខ ទូច ប្រធានរាជបណ្ឌិត្យសភាកម្ពុជាយល់ឃើញថា លិខិតរបស់លោក ត្រាំ បង្ហាញពីភាពកក់ក្ដៅឡើងវិញ បន្ទាប់ពីប្រទេសទាំង ២ បានឆ្លងកាត់ការលំបាកខ្លះ។ លោកថា លិខិតនេះធ្វើឡើងកាលពីដើមខែវិច្ឆិកាគឺមុនពេលការកំណត់ថ្ងៃវិលត្រឡប់របស់លោក សម រង្ស៊ី ដែលបានប្រកាសថា នឹងចូលមកកម្ពុជាជាមួយអ្នកគាំទ្ររាប់លាននាក់។ វាបញ្ជាក់ថា ការបោះឆ្នោតឆ្នាំ ២០១៨ គឺធ្វើឡើងដោយត្រឹមត្រូវដោយមានប្រជាពលរដ្ឋចូលរួមបោះឆ្នោតជាង ៨៣ ភាគរយ។
លោកបន្តថា៖ «លោក ដូណាល់ ត្រាំ បានបញ្ជាក់ច្បាស់ណាស់ថានឹងមិនមានបំណងដូររបប ហើយគោរពអធិបតេយ្យភាពកម្ពុជា។ នេះជាចំណុចសំខាន់ដែលធ្វើឲ្យកម្ពុជា និងសហរដ្ឋអាមេរិកចាប់ដៃគ្នានៅពេលខាងមុខនេះ»។ លោកបានបញ្ជាក់ថា៖ «ដោយសារសម្ដេចនាយករដ្ឋមន្ត្រីមានឥទ្ធិពល ឬគេហៅថា ភាពរឹងមាំលើគោលនយោបាយការបរទេស ដូច្នេះហើយបានលោក ដូណាល់ ត្រាំ មានការចាប់អារម្មណ៍ច្រើនលើនយោបាយរបស់សម្ដេចនាយកហើយបើសិនអាចអញ្ជើញសម្ដេចចូលរួមក្នុងកិច្ចប្រជុំអាមេរិក-អាស៊ានខាងមុខនេះបាន វាហាក់ដូចជាស្រូបយកសមាជិកអាស៊ានផ្សេងទៀតបានដែរ»៕
