The Phnom Penh Post Search

Search form




Logo of Phnom Penh Post newspaper Phnom Penh Post - លោក តាំង ស៊ុនឡាយ ត្រូវ​តែង​តាំង​ជា​ប្រធាន​តុលាការ លោក អាំង មាលតី ឲ្យ​ស្ថិត​ក្រោម​អធិការកិច្ច

លោក តាំង ស៊ុនឡាយ ត្រូវ​តែង​តាំង​ជា​ប្រធាន​តុលាការ លោក អាំង មាលតី ឲ្យ​ស្ថិត​ក្រោម​អធិការកិច្ច

លោក​រដ្ឋ​មន្ត្រី​ក្រសួង​យុត្តិធម៌ ប្រគល់​ត្រា​ទៅ​ប្រធាន​សាលា​ដំបូង​រាជធានី​ភ្នំពេញ​ថ្មី។
លោក​រដ្ឋ​មន្ត្រី​ក្រសួង​យុត្តិធម៌ ប្រគល់​ត្រា​ទៅ​ប្រធាន​សាលា​ដំបូង​រាជធានី​ភ្នំពេញ​ថ្មី។ ហុង មិនា

លោក តាំង ស៊ុនឡាយ ត្រូវ​តែង​តាំង​ជា​ប្រធាន​តុលាការ លោក អាំង មាលតី ឲ្យ​ស្ថិត​ក្រោម​អធិការកិច្ច

ភ្នំពេញៈ លោក​ចៅ​ក្រម តាំង ស៊ុនឡាយ កាល​ពី​ថ្ងៃ​ពុធ​មិ្សល​មិញ​នេះ ត្រូវ​បាន​ប្រកាស​តែង​តាំង​ជា​ប្រធាន​សាលា​ដំបូង​រាជធានី​ភ្នំពេញ ជំនួស​លោក​ចៅ​ក្រម អំាង មាលតី ដែល​ត្រូវ​បាន​ផ្ទេរ​ភារកិច្ច​ទៅ​បម្រើ​ការ​នៅ​ក្រសួង​យុត្តិធម៌ និង​ស្ថិត​ក្រោម​អធិការកិច្ច​របស់​ក្រសួង តាម​សេចក្តី​សម្រេច​នៃ​កិច្ច​ប្រជុំ​បន្ទាន់​របស់​ឧត្តម​ក្រុម​ប្រឹក្សា​នៃ​អង្គ​ចៅ​ក្រម កាល​ពី​ថ្ងៃ​អង្គារ បន្ទាប់​ពី​ប្រមុខ​រដ្ឋាភិបាល បាន​ស្នើ​អធិការ​កិច្ច​លើ​ស្ថាប័ន​មួយ​នេះ។

ការ​ប្រកាស​ផ្ទេរ​តំណែង និង​ផ្លាស់​ប្តូរ​តួនាទី​នេះ​ធ្វើ​ឡើង​យោង​តាម​ព្រះ​រាជ​ក្រឹត្យ​ព្រះ​មហា​ក្សត្រ ព្រះ​បាទ នរោត្តម សីហមុនី ចុះ​ថ្ងៃ​ពុធ ទី១៨ ខែ​កុម្ភៈ។ យ៉ាង​ណា​ក៏​ដោយ ក្រោយ​បញ្ចប់​ពិធី​នេះ ទាំង​លោក អំាង មាលតី និង​លោក តាំង ស៊ុនឡាយ បាន​បដិសេធ​ឆ្លើយ​តប​នឹង​សំណួរ​របស់​អ្នក​សារ​ព័ត៌មាន ពាក់​ព័ន្ធ​នឹង​ការ​ផ្លាស់​ប្តូរ​តក់​ក្រហល់​នេះ។

ថ្លែង​ក្នុង​សន្និសីទ​សារ​ព័ត៌មាន អ្នក​នាំ​ពាក្យ​ក្រសួង​យុត្តិធម៌ លោក គឹម សន្តិភាព បាន​អះអាង​ច្រាន​ចោល​ការ​លើក​ឡើង​ដែល​ថា ការ​ផ្លាស់​ប្តូរ​តួនាទី​លោក អាំង មាលតី គឺ​ដោយ​សារ​តែ​ប្រតិកម្ម​រិះគន់​ខ្លាំងៗ​របស់​លោក​នាយក​រដ្ឋ​មន្រ្តី ហ៊ុន សែន កាល​ពី​ម្សិល​មិញ​នេះ ចំពោះ​ឥរិយា​បថ​របស់​ចៅ​ក្រម​សាលា​ដំបូង​លើ​សេចក្តី​សម្រេច​ពាក់​ព័ន្ធ​នឹង​រឿង​ក្តី​ឪពុក​ម្តាយ លោក ថោង សារ៉ាត់ ដោយ​ថា នេះ​ជា​សេចក្តី​សម្រេច​របស់​ឧត្តម​ក្រុម​ប្រឹក្សា​នៃ​អង្គ​ចៅ​ក្រម។ លោក​ថា៖ «ខ្ញុំ​មិន​អាច​និយាយ​បាន​ទេ​ថា គាត់ (អំាង មាលតី) ខុស​អី​នោះ ព្រោះ​គាត់​ស្ថិត​នៅ​ក្រោម​ការ​ស៊ើប​អង្កេត​របស់​ក្រុម​អធិការកិច្ច​របស់​ក្រសួង ចាំ​មាន​លទ្ធផល​ទើប​អាច​បញ្ជាក់​បាន​ថា ខុស​អ្វី ការ​ដក​នេះ​មិន​មែន​ដោយ​សារ​សម្តេច​តេជោ​ទេ តែ​គាត់​គ្រាន់​តែ​ស្នើ អ៊ីចឹង​ការ​ផ្ទេរ​នេះ គឺ​ជា​វិធាន​ការ​របស់​ក្រុម​ប្រឹក្សា​អង្គ​ចៅ​ក្រម»។

អ្នក​នាំ​ពាក្យ​ឧត្តម​ក្រុម​ប្រឹក្សា​អង្គ​ចៅ​ក្រម លោក សំ ប្រជាមានិត បាន​បញ្ជាក់​ប្រាប់ ភ្នំពេញ ប៉ុស្តិ៍ ថា ការ​ផ្លាស់​ប្តូរ​តំណែង​របស់​លោក អំាង មាលតី ពី​ប្រធាន​តុលាការ​នេះ គឺ​មិន​មែន​ដោយ​សារ​កំហុស ឬ​ការ​បង្គាប់​បញ្ជា​អ្វី​នោះ​ទេ តែ​នេះ​គឺ​ជា​រឿង​ធម្មតា​មួយ​នៃ​ដំណើរ​ការ​គ្រប់​គ្រង​ដើម្បី​ផ្តល់​នូវ​សេវា​យុត្តិធម៌​ដល់​ប្រជាជន​ឲ្យ​កាន់​តែ​ប្រសើរ។ លោក​បាន​បន្ថែម​ថា៖ «ហើយ​ការ​ផ្លាស់​ប្តូរ​នេះ មិន​លឿន​ពេក​ទេ គឺ​យើង​ធ្វើ​តាម​ព្រះ​រាជក្រឹត្យ​របស់​ព្រះ​មហា​ក្សត្រ ការ​ប្តូរ​ប្រធាន​តុលាការ គឺ​ដើម្បី​សម្រួល​ដល់​កិច្ចការ​រដ្ឋបាល​តែ​ប៉ុណ្ណោះ»។

លោក គឹម សន្តិភាព បាន​ឲ្យ​ដឹង​ដែរ​ថា សម្រាប់​លោក​ចៅ​ក្រម លី សុខលេង ដែល​កាន់​សំណុំ​រឿង​របស់​ឪពុក​ម្តាយ​លោក ថោង សារ៉ាត់ ក៏​ស្ថិត​ក្រោម​អធិការ​កិច្ច​របស់​ក្រសួង​យុត្តិធម៌​ផង​ដែរ រួម​នឹង​អ្នក​ពាក់​ព័ន្ធ​ផ្សេង​ទៀត តែ​លោក​មិន​បាន​បញ្ជាក់​ពី​អត្ត​សញ្ញាណ​នៃ​អ្នក​ជាប់​ពាក់​ព័ន្ធ​នោះ​ទេ។

ក្នុង​ពិធី​ប្រកាស​តែង​តាំង​ម្សិល​មិញ​នេះ ប្រធាន​សាលា​ដំបូង​ថ្មី លោក តាំង ស៊ុនឡាយ ដែល​ទើប​ចូល​កាន់​តំណែង​ក៏​បាន​សំណូម​ពរ​ទៅ​កាន់​អាជ្ញាធរ​មាន​សមត្ថកិច្ច​និង​ស្ថាប័ន​ដែល​ពាក់​ព័ន្ធ​ឲ្យ​ចូល​រួម​សហការ និង​ផ្តល់​មតិ​យោបល់ ដើម្បី​រួម​ចំណែក​ផ្តល់​ដំណើរ​ការងារ​ប្រព័ន្ធ​តុលាការ​ឲ្យ​មាន​តម្លាភាព និង​បង្កើន​ការ​ទុក​ចិត្ត​ដល់​ប្រជា​ពលរដ្ឋ។ លោក​ក៏​បាន​ប្តេជ្ញា​ថា៖ «ខ្ញុំ​នឹង​ស្មោះ​ត្រង់​ចំពោះ​ជាតិ​គោរព​រដ្ឋ​ធម្មនុញ្ញ គោរព​ច្បាប់ ធានា​ការពារ​សិទ្ធិ​សេរីភាព​របស់​ប្រជា​ពលរដ្ឋ ប្រកាន់​ខ្ជាប់​នូវ​វីជ្ជាជីវៈ ដើម្បី​ធ្វើ​ឲ្យ​ប្រសើរ​ឡើង​នូវ​សេវា​យុត្តិធម៌ ពង្រឹង​សមត្ថភាព​បន្ថែម​ទៀត ជំរុញ​និង​លើក​ទឹក​ចិត្ត​ដល់​មន្រ្តី​តុលាការ​ឲ្យ​បង្កើន​សមត្ថភាព ពង្រឹង​សាមគ្គី​ផ្ទៃ​ក្នុង សហការ​គ្នា»។

មុន​មួយ​ថ្ងៃ​នៃ​ពិធី​នេះ កាល​ពី​ថ្ងៃ​អង្គារ លោក​នាយក​រដ្ឋ​មន្រ្តី ហ៊ុន សែន បាន​ប្រកាស​ស្នើ​ជា​សាធារណៈ​ទៅ​កាន់​ឧត្តម​ក្រុម​ប្រឹក្សា​នៃ​អង្គ​ចៅ​ក្រម​ត្រួត​ពិនិត្យ​លើ​សេចក្តី​សម្រេច​របស់​ចៅ​ក្រម លី សុខលេង ដែល​ដាក់​ឲ្យ​ឪពុក​ម្តាយ​លោក​ឧកញ៉ា ថោង សារ៉ាត់ នៅ​ក្រៅ​ឃុំ​កាល​ពី​ថ្ងៃ ទី​៧ ខែ​មករា ដោយ​ថា សេចក្តី​សម្រេច​នោះ មិន​មាន​មូល​ហេតុ​សមរម្យ​ប្រៀប​នឹង​បទល្មើស​តូច​តាច​ផ្សេង​ទៀត។ លោក ហ៊ុន សែន ក៏​បាន​រិះគន់​ជា​ចំហ​ទៅ​កាន់​ចៅ​ក្រម​សាលា​ដំបូង​រាជធានី​ភ្នំពេញ ដែល​បាន​ទម្លាក់​កំហុស និង​អះអាង​ថា លោក ថោង សារ៉ាត់ មិន​ពាក់​ព័ន្ធ​នឹង​រឿង​ឃាតកម្ម​ខណៈ​ដែល​តុលាការ​នៅ​មិន​ទាន់​បាន​សម្រេច​ក្ដី​នៅ​ឡើយ៕

អត្ថបទគួរចាប់អារម្មណ៍