.jpg)
លោក ត្រាំ អ៊ីវតឹក ក្នុងកម្មវិធីកាលពីថ្ងៃទី ១០ ខែមីនាថ្មីៗនេះ។ រូបថត ក្រសួងប្រៃសណីយ៍
ភ្នំពេញៈ លោក ត្រាំ អ៊ីវតឹក រដ្ឋមន្ដ្រីក្រសួងប្រៃសណីយ៍ និងទូរគមនាគមន៍ថ្លែងថា «អក្ខរកម្មឌីជីថល» មានសារៈសំខាន់យ៉ាងខ្លាំងសម្រាប់ពលរដ្ឋសិស្សានុសិស្ស និងមន្ត្រីរាជការគ្រប់កម្រិត ដើម្បីចូលរួមក្នុងដំណើរការសេដ្ឋកិច្ចព្រមទាំងសកម្មភាពនានាក្នុងយុគសម័យឌីជីថលនេះ ខណៈរដ្ឋាភិបាលកម្ពុជាកំពុងរៀបចំគោលនយោបាយស្ដីពីការដឹកនាំ និងសេដ្ឋកិច្ចឌីជីថល។
លោក ត្រាំ អ៊ីវតឹក បានថ្លែងដូចនេះកាលពីថ្ងៃទី ១០ ខែមីនានៅទីស្ដីក្រសួងប្រៃសណីយ៍ និងទូរគមនាគមន៍ ខណៈលោកចូលរួមក្នុងពិធីបិទ និងប្រគល់ពានរង្វាន់ជយលាភីនៃគម្រោង «អក្ខរកម្មឌីជីថល» ដល់សិស្សានុសិស្សចំនួន ១ ៤៦៣ នាក់ដែលក្រសួងធ្លាប់បានបំពាក់បំប៉ននាពេលកន្លងមកទាក់ទងនឹងការបង្កើតអ៊ែប (App) និងកម្មវិធីប្រើប្រាស់លើស្មាតហ្វូនផ្សេងៗ។
លោកបានបញ្ជាក់ថា៖ «ការបំពាក់បំប៉នអក្ខរកម្មឌីជីថលមិនត្រឹមតែគ្របដណ្តប់លើជំនាញឌីជីថលប៉ុណ្ណោះទេ តែថែមទាំងជាការបណ្តុះសមត្ថភាពនៃការប្រើប្រាស់បច្ចេកវិទ្យាទៅតាមតម្រូវការជាក់ស្តែងរបស់ការងារ ការចូលរួមក្នុងសង្គមឌីជីថល និងការអភិវឌ្ឍខ្លួនជាដើម»។
លោករដ្ឋមន្ដ្រីបានបន្តថា ក្រសួងបានផ្តោតជាចម្បងលើកិច្ចការបង្កើនអក្ខរកម្មឌីជីថលមន្ត្រីរាជការរបស់ក្រសួង។ ក្នុងជំហានដំបូងក្រសួងបាន និងកំពុងបង្កើតការរៀបចំវាស់ស្ទង់កម្រិតអក្ខរកម្មឌីជីថលរបស់មន្ត្រីរាជការក្រោមឱវាទតាមប្រព័ន្ធអនឡាញ ហើយស្ថិតិដែលកើតចេញពីការវាស់ស្ទង់នេះនឹងត្រូវបានប្រើប្រាស់សម្រាប់ការរៀបចំគោលនយោបាយបណ្តុះបណ្តាលបុគ្គលិកច្បាស់លាស់ ចំទិសដៅ ឆ្លើយតបនឹងការផ្លាស់ប្តូរទៅតាមបរិបទការងារ ពិសេសការគាំទ្រដល់ការកសាងរដ្ឋាភិបាល ឌីជីថល និងសេដ្ឋកិច្ចឌីជីថល។
បើតាមលោករដ្ឋមន្ដ្រី ត្រាំ អ៊ីវតឹក ក្រសួងប្រៃសណីយ៍ ក៏នឹងបន្តគាំទ្រដល់ការអភិវឌ្ឍជំនាញឌីជីថលជាមួយក្រសួងអប់រំ យុវជន និងកីឡាតាមរយៈការបន្តកសាងហេដ្ឋារចនាសម្ព័ន្ធបច្ចេកវិទ្យាថ្នាក់វិទ្យាល័យ និងអនុវិទ្យាល័យក៏ដូចជា ការជួយជ្រោមជ្រែងដល់កម្មវិធីបណ្តុះបណ្តាលផ្សេងៗផងដែរ។
លោករដ្ឋមន្ដ្រីបានស្នើដល់ក្រសួងអប់រំ យុវជន និងកីឡាពិនិត្យលទ្ធភាពដាក់បញ្ចូលទៅក្នុងប្រព័ន្ធអប់រំផ្លូវការនូវកម្មវិធីទាំងឡាយណាដែលក្រសួងយល់ថា មានភាពស៊ីចង្វាក់ជាមួយកម្មវិធីអប់រំ ដើម្បីធានានូវនិរន្តរភាព និងប្រសិទ្ធភាពនៃការអនុវត្តកម្មវិធីទាំងអស់នេះ។
ទាក់ទងនឹងបញ្ហានេះដែរលោក មាស ប៉ូ អនុរដ្ឋលេខាធិការ និងអ្នកនាំពាក្យក្រសួងប្រៃសណីយ៍ និងទូរគមនាគមន៍បានបញ្ជាក់ប្រាប់ភ្នំពេញប៉ុស្ដិ៍កាលពីថ្ងៃម្សិលមិញថា ប្រទេសកម្ពុជាកំពុងតែរៀបចំគោលនយោបាយស្ដីពីឌីជីថល និងសេដ្ឋកិច្ចឌីជីថល។ ដូច្នេះដើម្បីដើរឱ្យទាន់និន្នាការបច្ចុប្បន្នពលរដ្ឋ សិស្ស-និស្សិត រួមទាំងមន្ដ្រីរាជការគ្រប់លំដាប់ថ្នាក់ផងត្រូវខិតខំរៀនសូត្រពីបច្ចេកវិទ្យាឌីជីថលនេះបន្ថែមទៀត។
លោកបានថ្លែងថា៖ «បច្ចេកវិទ្យាឌីជីថលមានច្រើនខ្លាំងណាស់ក្នុងនោះយើងរាប់ទាំងទូរស័ព្ទស្មាតហ្វូន កុំព្យូទ័រ និងប្រព័ន្ធអេឡិចត្រូនិកផ្សេងៗជាច្រើនទៀតដែលតម្រូវឱ្យយើងចេះប្រើទៅលើកម្មវិធីបច្ចេកវិទ្យាថ្មីៗទាំងនោះទើបយើងដើរទាន់យុគសម័យឌីជីថលនេះ»។
លោក មាស ប៉ូ បានបញ្ជាក់ថា បច្ចុប្បន្នក្រសួងប្រៃសណីយ៍កំពុងសហការជាមួយក្រសួងសេដ្ឋកិច្ច និងហិរញ្ញវត្ថុកំពុងធ្វើសេចក្ដីព្រាង និងរៀបចំគោលនយោបាយស្ដីពីរដ្ឋាភិបាលឌីជីថល និងសេដ្ឋកិច្ចឌីជីថល៕
