ភ្នំពេញៈ មន្ទីរទេសចរណ៍នៅទូទាំងប្រទេសត្រូវបានត្រូវបានណែនាំឱ្យត្រួតពិនិត្យ និងរៀបចំទីតាំងដោយយោងទៅតាមស្តង់ដាសុវត្ថិភាពដែលជាវិធានសុខាភិបាល មុនពេលបើកឱ្យដំណើរការសេវាទេសចរណ៍ឡើងវិញ មួយថ្ងៃក្រោយរាជរដ្ឋាភិបាលប្រកាសបញ្ចប់ការបិទរមណីយដ្ឋានទេសចរណ៍នៅទូទាំងប្រទេស។
លោក ថោង ខុន រដ្ឋមន្ត្រីក្រសួងទេសចរណ៍បានឱ្យដឹងថា តំបន់ទេសចរណ៍នីមួយៗត្រូវកំណត់ស្តង់ដាគម្លាតសុវត្ថិភាពនិងចំនួនអ្នកទេសចរណ៍ដែលអាចចូលទៅកម្សាន្ត។
សូមរំឭកថា រាជរដ្ឋាភិបាលកម្ពុជានៅថ្ងៃទី ២៥ ខែមេសា បានចេញសេចក្តីសម្រេចមួយស្តីពី ការបញ្ចប់ការហាមឃាត់ការធ្វើដំណើរ និងការបញ្ចប់ការបិទរមណីយដ្ឋានទេសចរណ៍នៅទូទាំងប្រទេស ដើម្បីបញ្ចប់សុពលភាពរបស់សេចក្តីសម្រេចកាលពីថ្ងៃទី ៦ ខែមេសា ដែលបានហាមឃាត់ការធ្វើដំណើរឆ្លងកាត់រាជធានី-ខេត្ត ក្នុងន័យទប់ស្កាត់ការឆ្លងរាលដាលជំងឺកូវីដ១៩។
លោក ថោង ខុន រដ្ឋមន្ត្រីក្រសួងទេសចរណ៍ ថ្លែងថា៖ «គ្រប់គោលដៅទេសចរណ៍ ត្រូវពង្រឹងការគ្រប់គ្រងឲ្យបានល្អប្រសើរ ពិសេសត្រូវកំណត់ សមត្ថភាពផ្ទុកអតិបរមាដែលអាចទទួលភ្ញៀវបានក្នុងពេលតែមួយ អនុលោមតាមស្តង់ដាគម្លាតសុវត្ថិភាព»។
លោក ថោង ខុន ថ្លែងថាចំពោះការជួបជុំ ជាក្រុមតូចដែលចាំបាច់ លក្ខណៈគ្រួសារផ្ទាល់ នៅក្នុងភោជណីយដ្ឋាន អាហារដ្ឋាន ឬកន្លែងទទួលទានអាហារដែលមាននៅក្នុងគោលដៅទេសចរណ៍ទាំងអស់ចាំបាច់ត្រូវតែរក្សាគម្លាតសុវត្ថិភាពបុគ្គលឲ្យបានត្រឹមត្រូវ។
លោក ថោង ខុន ថ្លែងដោយណែនាំទៅដល់មន្ទីរទេសចរណ៍ខេត្តទាំងអស់ ត្រូវសហការជាមួយរដ្ឋបាលខេត្ត និងអាជ្ញាធរមូលដ្ឋាន ធ្វើការពិនិត្យបើកឡើងវិញនូវរមណីយដ្ឋានទេសចរណ៍ សហគមន៍ទេសចរណ៍ និងគោលដៅទេសចរណ៍ក្នុងមូលដ្ឋានរបស់ខ្លួន។
ដោយឡែក ចំពោះរមណីយដ្ឋានទេសចរណ៍ សហគមន៍ទេសចរណ៍ និងគោលដៅទេសចរណ៍ ដែលស្ថិតក្នុងរាជធានីភ្នំពេញ ក្រុងតាខ្មៅនៃខេត្តកណ្តាល និងក្នុងខេត្ត ឬតំបន់ដែលបានដាក់ចេញវិធានការបិទខ្ទប់ មន្ទីរទេសចរណ៍ ត្រូវបន្តសហការជាមួយរដ្ឋបាលរាជធានី ខេត្ត និងអាជ្ញាធរមូលដ្ឋាន ធ្វើការបិទ គោលដៅទេសចរណ៍ទាំងអស់ជាបណ្តោះអាសន្នបន្តទៀត រហូតដល់មានការសម្រេចដាក់ចេញនូវវិធានការថ្មី។
លោក ថោង ខុន បញ្ជាក់ថា មន្ទីរទេសចរណ៍ត្រូវសហការជាមួយរដ្ឋបាលខេត្ត និងអាជ្ញាធរមូលដ្ឋានចូលរួម អនុវត្តវិធានការនៃការធ្វើចត្តាឡីស័កឲ្យបានហ្មត់ចត់ ដោយមិនត្រូវអនុញ្ញាតឲ្យភ្ញៀវទេសចរ និងបងប្អូនប្រជាពលរដ្ឋ ដែលកំពុងជាប់ធ្វើចត្តាឡីស័ក ឬត្រូវផ្តល់សំណាកធ្វើតេស្តរកជំងឺកូវីដ១៩ ក្នុងខេត្ត ឬតំបន់ដែលមិនមានការបិទខ្ទប់ចូលទៅកម្សាន្តក្នុងគោលដៅទេសចរណ៍ជាដាច់ខាត។
លោក ថ្លែងថា គ្រប់គោលដៅទេសចរណ៍ត្រូវអនុវត្តឲ្យបានយ៉ាងខ្ជាប់ខ្ជួន និងម៉ឺងម៉ាត់នូវវិធានការទាំងឡាយ ដែលបានដាក់ចេញដោយក្រសួងសុខាភិបាល និងវិធានសុវត្ថិភាពទេសចរណ៍របស់ក្រសួងទេសចរណ៍ក្នុងការទប់ស្កាត់ការរីករាលដាលជំងឺកូវីដ១៩ ដោយគ្រប់គោលដៅត្រូវធ្វើការកត់ត្រាភ្ញៀវទេសចរទាំងអស់ រួមមាន អាសយដ្ឋាន លេខទូរស័ព្ទទំនាក់ទំនង ហើយគ្រប់មូលដ្ឋានទាំងអស់ត្រូវចុះឈ្មោះបង្កើត និងប្រើប្រាស់ប្រព័ន្ធ QR Code ទប់ស្កាត់កូវីដ១៩ និងតម្រូវឲ្យភ្ញៀវទេសចរត្រូវតែស្កេនជាដាច់ខាត មុនចូលទៅទីតាំងទេសចរណ៍។
គ្រប់គោលដៅទេសចរណ៍ត្រូវរៀបចំនូវការត្រួតពិនិត្យកំដៅ ការបាញ់អាល់កុលសម្លាប់មេរោគ ហើយភ្ញៀវទេសចរត្រូវតម្រូវឲ្យពាក់ម៉ាស់ស្របតាមគោលការណ៍សុខាភិបាល និង ត្រូវពង្រឹងគុណភាពផលិតផលទេសចរណ៍ ថែរក្សាបរិស្ថាន អនាម័យ និងរក្សាតម្លៃផលិតផល និងសេវាកម្មឲ្យបានសមរម្យផងដែរ៕