ភ្នំពេញៈ លោក ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ថ្លែងថា កងរាជអាវុធហត្ថលើផ្ទៃប្រទេសបានកែប្រែមុខមាត់ថ្មីតាមរយៈកំណែទម្រង់ស៊ីជម្រៅក្លាយជាស្ថាប័នគំរូ ១ ក្នុងការផ្ដល់សេវាប្រកបដោយគុណភាព គុណធម៌ក្នុងការបម្រើការពារប្រជាពលរដ្ឋ ដោយគ្រាន់តែគិតត្រឹម ១ ឆ្នាំចុងក្រោយនេះកងរាជអាវុធហត្ថបានស្រាវជ្រាវ និងបង្ក្រាបបទល្មើសបានចំនួន ២ ៨៣៧ លើក។
លោក ទៀ បាញ់ ថ្លែងបែបនេះក្នុងពេលធ្វើជាអធិបតីក្នុងពិធីប្រារព្ធខួបលើកទី ២៧ ទិវាបង្កើតកងរាជអាវុធហត្ថលើផ្ទៃប្រទេស (១៤ កក្កដា ១៩៩៣-១៤ កក្កដា ២០២០) កាលពីម្សិលមិញនៅវិទ្យាស្ថានកងរាជអាវុធហត្ថកំបូលនៅខណ្ឌកំបូល រាជធានីភ្នំពេញ។
លោកថ្លែងថា កងរាជអាវុធហត្ថបានសហការជាមួយក្រសួងស្ថាប័ន និងសមត្ថកិច្ចពាក់ព័ន្ធបានទប់ស្កាត់ និងបង្ក្រាបបទល្មើសធនធានធម្មជាតិ ដូចជាការកាប់ព្រៃឈើ ការដឹកឈើនាំចេញខុសច្បាប់ការកាប់ដុតព្រៃ ការនាំចេញសត្វព្រៃខុសច្បាប់ការកាប់រានទន្ទ្រានយកដីព្រៃរបស់រដ្ឋ ការរុករករ៉ែខុសច្បាប់ ការជួញដូរគ្រឿងញៀន និងការជួញដូរមនុស្ស។
លោកបន្តថា៖ «កងរាជអាវុធហត្ថបានចូលរួមយ៉ាងសកម្មក្នុងការការពារសង្គម និងមនុស្សធម៌តាមរយៈការជួយសង្គ្រោះគ្រោះមហន្តរាយ គ្រោះថ្នាក់ចរាចរណ៍ អគ្គិភ័យ ព្រមទាំងករណីផ្សេងៗទៀតប្រកបដោយប្រសិទ្ធភាពទទួលបាននូវទំនុកចិត្ដពីរាជរដ្ឋាភិបាល និងធ្វើឱ្យប្រជាជនមានជំនឿទុកចិត្ត ចំពោះនយោបាយដឹងនាំរបស់រាជរដ្ឋាភិបាលទៀតផង»។
លោក ទៀ បាញ់ បញ្ជាក់ថា៖ «រហូតមកដល់ពេលនេះ កងរាជអាវុធហត្ថបានកែប្រែមុខមាត់ថ្មីតាមរយៈកំណែទម្រង់ស៊ីជម្រៅក្នុងរចនាសម្ព័ន្ធ ពង្រឹងតួនាទីភារកិច្ច ការអភិវឌ្ឍធនធានមនុស្ស ការពង្រឹងសមត្ថភាពក៏ដូចជាការកែប្រែឥរិយាបថ បត់បែនការងារដ៏ឈ្លាសវៃតាមស្ថានភាពប្រទេសជាតិវិវឌ្ឍថ្មីៗ និងបានប្រែក្លាយជាស្ថាប័នគំរូមួយក្នុងការផ្ដល់សេវាប្រកបដោយគុណភាព គុណធម៌ ជាអ្នកបម្រើការពារប្រជាពលរដ្ឋ»។
លោកបន្ថែមថា ក្នុងនាមរាជរដ្ឋាភិបាល ក្រសួងការពារជាតិ ពិតជាមានមោទនភាព យ៉ាងក្រៃលែង ចំពោះនាយទាហាន និងពលទាហាននៃកងរាជអាវុធហត្ថដែលបានតស៊ូលះបង់ធ្វើពលិកម្មប្រកបដោយវីរភាព អង់អាចក្លាហានមានភក្ដីភាព និងមានមនសិការស្នេហាជាតិខ្ពស់ បង្កើននូវស្នាដៃ និងគុណសម្បត្ដិដ៏ឧត្ដុង្គឧត្ដមមិនអាចកាត់ថ្លៃបាន។
ប៉ុន្តែលោក ស៊ឹង សែនករុណា មន្ត្រីអង្កេតជាន់ខ្ពស់នៃសមាគមការពារ សិទ្ធិមនុស្ស អាដហុក ថ្លែងថា ជាគោលការណ៍ កងកម្លាំងកងរាជអាវុធហត្ថ គឺជាស្ថាប័នឯករាជ្យដែលត្រូវថែរក្សាសន្ដិសុខ សុវត្ថិភាពសង្គមជាតិ និងប្រជាពលរដ្ឋ ប៉ុន្ដែស្ថាប័ននេះនៅជាប់ពាក់ព័ន្ធទៅនឹងនិន្នាការនយោបាយនៅឡើយ។
លោកបានថ្លែងថា៖ «កងរាជអាវុធហត្ថនេះក៏មានតួនាទីសំខាន់ថែមទៀតទៅលើការត្រួតពិនិត្យលើការមិនគោរពនូវវិន័យ ការអនុវត្ដច្បាប់របស់កងកម្លាំងយោធា ឬក៏កងកម្លាំងផ្សេងៗទៀតដែលមិនបានបំពេញតួនាទីរបស់ខ្លួនបានសមស្រប គឺអាចមានការចាត់វិធានការពីលើទៅទៀត»។ លោកបញ្ជាក់ថា សរុបទៅកងរាជអាវុធហត្ថនៅមិនទាន់បានធ្វើខ្លួន ឬក៏បំពេញតួនាទីដោយឈរទៅលើឯករាជភាព ឬអព្យាក្រឹតភាពនៅឡើយទេដែល តែងតែធ្វើឲ្យមានការរិះគន់ពីប្រជាពលរដ្ឋ និងសង្គមស៊ីវិល។
យ៉ាងណាក្តីលោក សៅ សុខា អគ្គមេបញ្ជាការរង និងជាមេបញ្ជាការកងរាជអាវុធហត្ថលើផ្ទៃប្រទេសក៏បានថ្លែងក្នុងពិធីនេះដែរថា គិតត្រឹម ១ ឆ្នាំចុងក្រោយនេះលទ្ធផលសមិទ្ធផល និងស្នាដៃដែលកងរាជអាវុធហត្ថសម្រេចបានរួមមានការស្រាវជ្រាវ និងបង្ក្រាបបទល្មើសបានចំនួន ២ ៨៣៧ លើក បានរកឃើញបុគ្គល សង្ស័យចំនួន ៤ ៣៤៥ នាក់ ក្រោយពីការស៊ើបអង្កេតបានឃាត់ខ្លួនជន ដែលសង្ស័យប្រព្រឹត្តបទល្មើសចំនួន ៣ ៩៨១ នាក់ និងចាប់យកវត្ថុតាងបញ្ជូនទៅតុលាការ។ បញ្ជូនទៅមណ្ឌលកែប្រែចំនួន ២៣៦ នាក់ រីឯជនដែលគ្មានការពាក់ព័ន្ធចំនួន ១២៨ នាក់ ឱ្យវិលទៅលំនៅឋានវិញ។
លោកថ្លែងថា៖ «កងរាជអាវុធហត្ថបានចូលរួមធ្វើសកម្មភាពជួយសង្គ្រោះបានចំនួន ៦ ៣៣២ លើក មានជាអាទិ៍ជួយប្រជាពលរដ្ឋគ្រោះថ្នាក់ចរាចរណ៍ ខ្យល់កន្ត្រាក់ រន្ទះបាញ់ អគ្គិភ័យ ជំនន់ទឹកភ្លៀង បាក់រលំអគារ បាក់សាលាឆាន់ បាក់ឃ្លាំង និងករណីផ្សេងៗ។ ជួយដឹកសាកសពទៅកាន់លំនៅឋានចំនួន ៥២ សព»៕