.jpg)
លោក ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ ថ្លែងនៅក្នុងពិធីមួយ នាពេលកន្លងមក។ ហេង ជីវ័ន
ភ្នំពេញ: លោក ទៀ បាញ់ រដ្ឋមន្រ្តីក្រសួងការពារជាតិ កាលពីម្សិលមិញបានថ្លែងរិះគន់ដោយភ្ជាប់ក្រុមមនុស្សមួយចំនួនដែលបានព្យាយាមឲ្យបរទេសលុបប្រព័ន្ធអនុគ្រោះពន្ធពីកម្ពុជាគឺជាវិធានការមួយក្នុងចំណោមវិធានការបដិវត្តន៍ពណ៌ប្រឆាំងនឹងរដ្ឋាភិបាលកើតចេញពីការបោះឆ្នោត។
ក្នុងពិធីបិទវគ្គបណ្តុះបណ្តាល និងហ្វឹកហ្វឺនឆ្នាំ ២០១៨ និងបើកវគ្គសិក្សាឆ្នាំ ២០១៩ ដល់មន្ត្រីយោធា នៅសាកលវិទ្យាល័យការពារជាតិ កាលពីថ្ងៃទី៣០ ខែ មករា ឆ្នាំ ២០១៩ លោកទៀ បាញ់ ថ្លែងថា ប្រទេសមួយចំនួន បានចោទរាជរដ្ឋាភិបាលកម្ពុជាដោយគ្មានមូលដ្ឋានច្បាស់លាស់ថា មិនគោរពសិទ្ធិមនុស្ស ឬមិនមានប្រជាធិបតេយ្យ។
លោក ទៀ បាញ់ ថ្លែងថា៖ «ផ្ទាល់ខ្លួនខ្ញុំ ខ្ញុំបានសន្និដ្ឋានថា ការដាក់ទណ្ឌកម្ម ឬសម្ពាធទាំងឡាយក៏បានរួមចំណែកក្នុងការអនុវត្តបដិវត្តន៍ពណ៌ដែរ ខ្ញុំចាត់ទុកអ៊ីចឹងតែម្តង ព្រោះអីគឺថាវារួមចំណែកធ្វើយ៉ាងណាឱ្យសភាពការណ៍ឆ្លើយតបតាមបំណងរបស់ខ្លួនដែលចង់បាន គឺចង់បានអ្វី គឺការដោះលែងអ្នកជាប់ឃុំ និងអ្នកដែលតុលាការសម្រេចហាមធ្វើនយោបាយ»។
លោក ទៀ បាញ់ បានអះអាងផងដែរថា ក្រុមគណបក្សប្រឆាំងបានទៅភូត និងអំពាវនាវដល់ប្រទេសអន្តរជាតិមួយចំនួន ដែលជាប្រទេសមានចំណេះដឹងខ្ពង់ខ្ពស់ និងសម្បូរធនធានទ្រព្យសម្បត្តិ ដោយបានចោទ ប្រទេសកម្ពុជាថា ជាប្រទេសផ្តាច់ការ និងមិនគោរពសិទ្ធិមនុស្សហើយទាមទារឲ្យប្រទេសទាំងនោះត្រូវតែដាក់សម្ពាធមកលើប្រទេសកម្ពុជាសព្វគ្រប់បែបយ៉ាង។ ចំពោះអ្វីដែលមិនឆ្លើយតបនឹងតម្រូវការរបស់អ្នកមួយចំនួនហើយសំដៅគឺវិធីបន្តុះបង្អាប់ វាយប្រហារសព្វគ្រប់បែបយ៉ាងនោះហើយ ក៏ជាវិធានការក្នុងចំណោមវិធានការរបស់បដិវត្តន៍ពណ៌ដែរ។
លោក ទៀ បាញ់ ថ្លែងថា៖ «ហើយប្រទេសទាំងនោះឆោតល្ងង់ចាញ់បោកការភូតកុហករបស់ក្រុមប្រឆាំង។ ខ្ញុំយល់ម្យ៉ាងចាញ់បោកក្រុមតូច ១ បោកបាន។គេដើរបោកថា កម្ពុជាអត់មានគោរពប្រជាធិបតេយ្យ និងដើរបោកកម្ពុជាហ្នឹងអត់ចេះគោរពសិទ្ធិមនុស្សទេ។ អានោះជឿតែម្តង គេនាំគ្នាខ្សឹបខ្សៀវថា កម្ពុជាត្រូវតែមានការផ្លាស់ប្តូរ។ យើងបានធ្វើប្រជាធិបតេយ្យ ២០ ឆ្នាំ យើងបានគោរពប្រជាធិបតេយ្យយ៉ាងខ្ជាប់ខ្ជួន»។
ការធ្វើអត្ថាធិប្បាយបែបរិះគន់របស់លោក ទៀ បាញ់ បានធ្វើឡើង ខណៈពេលដែលសហភាពអឺរ៉ុបបានព្រមានដកប្រព័ន្ធអនុគ្រោះពន្ធ EBA។
លោក ទៀ បាញ់ ថ្លែងថា៖ «យើងបានគោរពសិទ្ធិមនុស្សពេញលេញទាំងអស់ តែផ្ទុយទៅវិញគេថា យើងរំលោភសិទ្ធិមនុស្សយ៉ាងធ្ងន់ធ្ងរនៅកម្ពុជា។ តើអាហ្នឹងស្អី? គេរកវិធីសព្វគ្រប់បែបយ៉ាងទាំងអស់ ដាក់សម្ពាធឲ្យធ្វើអ៊ីចេះឲ្យធ្វើអ៊ីចុះ។ ហើយអ្នកដែលល្មើសបំពានច្បាប់ធ្ងន់ធ្ងរបែរជាសង្កត់ដាក់ទណ្ឌកម្មអ្នកដែលអនុវត្តច្បាប់ត្រូវតែលុបមិនឲ្យអនុវត្តច្បាប់»។
លោកបន្តថា ការចាត់វិធានការចំពោះលោក កឹម សុខា គឺដើម្បីធានាប្រទេស កម្ពុជា បានអនុវត្តត្រឹមត្រូវតាមច្បាប់ប្រទេស កម្ពុជាដើម្បីសុខសន្តិភាព និងស្ថិរភាព។
លោក គិន ភា ប្រធានវិទ្យាស្ថានទំនាក់ទំនងអន្តរជាតិកម្ពុជា នៃរាជបណ្ឌិត្យសភាបានថ្លែងថា ក្រុមអតីតគណបក្សសង្គ្រោះជាតិតែងតែស្នើសុំឲ្យអន្តរជាតិចាត់វិធានការផ្សេងៗមកលើរាជរដ្ឋាភិបាលប្រទេសកម្ពុជា ហើយអះអាងថា ប្រទេស ណាដែលបានចូលរួមដាក់សម្ពាធឬក៏ដាក់ទណ្ឌកម្មឬក៏មានវិធានការណាមួយដែលស្របតាមសំណើពួកអតីតគណបក្សសង្គ្រោះជាតិដោយ មិនសមហេតុផលគឺមានហេតុនយោបាយរបស់ខ្លួនដើម្បីទទួលបានផលប្រយោជន៍ភូមិសាស្ត្រនយោបាយ។
លោក គិន ភា ថ្លែងថា៖ «តិចឬច្រើនគាត់មានរបៀបវារៈនយោបាយរបស់គាត់ យើងមិននិយាយថា ជាការរួមចំណែកក្នុង ការធ្វើឲ្យមានបដិវត្តន៍ពណ៌នៅកម្ពុជា តែប្រហែលជាប្រទេសនោះមានគោលដៅនយោបាយរបស់ខ្លួនចំពោះភូមិសាស្ត្រនយោបាយតំបន់។ យើងមិនអាចទទួលបញ្ជាឬការចង្អុលបង្ហាញពីប្រទេសនេះ ប្រទេសនោះដើម្បីឲ្យធ្វើបែបនេះ បែបនោះទៅតាមការចង់បានរបស់គេបានទេ ដូច្នេះហើយកាលដែលប្រទេសមួយចំនួនព្យាយាមដាក់សម្ពាធនយោបាយឬសេដ្ឋកិច្ចដើម្បីឲ្យកម្ពុជាដើរតាម ទិសដៅនយោបាយរបស់ខ្លួនមានន័យថា គាត់កំពុងតែជ្រៀតជ្រែកកិច្ចការផ្ទៃក្នុងរបស់កម្ពុជា និងធ្វើរំលោភអធិបតេយ្យភាពរបស់ប្រទេសកម្ពុជាដែលជារដ្ឋ ឯករាជ្យ និងជាសមាជិកអង្គការសហប្រជាជាតិដែលនេះផ្ទុយទៅនឹងច្បាប់អន្តរជាតិក៏ដូចជាធម្មនុញ្ញនៃអង្គការសហប្រជាជាតិ»។
លោកបន្ថែមថា រាជរដ្ឋាភិបាលកម្ពុជាត្រូវសិក្សាឲ្យបានច្បាស់លាស់ទាក់ទងនឹងការដាក់សម្ពាធដើម្បីស្វែងរកថា តើប្រទេសកម្ពុជាពិតជាធ្វើដូចការចោទប្រកាន់របស់ពួកគេដែរឬទេ ហើយប្រទេសកម្ពុជាត្រូវពង្រឹងផ្នែកផ្ទៃក្នុងរបស់ប្រទេស កម្ពុជា និងពង្រឹងឯករាជភាពទាំងសេដ្ឋកិច្ច និងនយោបាយ។
លោកថ្លែងថា៖ «ប្រសិនបើយើងអត់មានចំណុចខ្សោយខាងផ្នែកសេដ្ឋកិច្ច និងនយោបាយ ឬយើងមិនពឹងអាស្រ័យគេខ្លាំង គេមិនអាចដាក់សម្ពាធមកលើយើងបានដូច្នេះយើងត្រូវតែមានភាពខ្លាំងខាងសេដ្ឋកិច្ច នយោបាយ និងយោធាខ្លួនឯង»។
លោក ឡៅ ម៉ុងហៃ អ្នកវិភាគនយោបាយថ្លែងថា៖ «ប្រទេសឬក៏អង្គការអន្តរជាតិទាំងនោះដែលរដ្ឋមន្ត្រីការពារជាតិរបស់យើងថា គណបក្សប្រឆាំងបានអុជអាលឲ្យដាក់ទណ្ឌកម្មលើកម្ពុជា មានអ្នកតំណាងរបស់ពួកគេនៅកម្ពុជាហើយអ្នកតំណាងទាំងនោះបានយល់ដឹងគ្រប់គ្រាន់អំពីស្ថានភាពនៅក្នុងប្រទេស។ គេដឹងយ៉ាងច្បាស់មុនគេសម្រេចចិត្តដាក់ទណ្ឌកម្ម»៕
