ភ្នំពេញ: ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិលោក ទៀ បាញ់ គ្រោងនឹងដឹកនាំប្រតិភូយោធាជាន់ខ្ពស់នៃកងយោធពលខេមរភូមិន្ទ ទៅចូលរួមកិច្ចប្រជុំកំពូលសន្តិសុខអាស៊ីលើកទី១៨ (The 18 IISS Shangri-La Dialogue) នៅប្រទេស សិង្ហបុរី រយៈពេល ៣ ថ្ងៃ ដើម្បីពិភាក្សា និងផ្លាស់ប្ដូរយោបល់គ្នាពីបញ្ហាសន្ដិសុខក្នុងតំបន់។
តាមសេចក្ដីប្រកាសព័ត៌មានរបស់ក្រសួងការពារជាតិ ចុះថ្ងៃទី ២៩ ខែ ឧសភា ឲ្យដឹងថា តបតាមការអញ្ជើញរបស់ក្រសួងការពារជាតិសិង្ហបុរី លោក ទៀ បាញ់ នឹងដឹកនាំប្រតិភូយោធាជាន់ខ្ពស់នៃកងយោធពលខេមរភូមិន្ទទៅចូលរួមកិច្ចប្រជុំកំពូលសន្តិសុខអាស៊ីលើកទី១៨ (The 18 IISS Shangri-La Dialogue) ដែលនឹងប្រព្រឹត្តទៅចាប់ពីថ្ងៃទី ៣១ ខែ ឧសភា ដល់ថ្ងៃទី ២ មិថុនា ឆ្នាំ ២០១៩ នៅប្រទេស សិង្ហបុរី។
ក្រសួងការពារជាតិបញ្ជាក់ថា៖ «អំឡុងពេលបំពេញទស្សនកិច្ចការងាររយៈពេល ៣ ថ្ងៃនៅប្រទេស សិង្ហបុរី នោះគណៈប្រតិភូកម្ពុជា គ្រោងនឹងចូលរួមក្នុងកិច្ចប្រជុំទ្វេភាគី និងពហុភាគីជាមួយបណ្តាប្រទេសពាក់ព័ន្ធក្នុងតំបន់ផងដែរ»។
ក្រសួងការពារជាតិបន្ថែមថា ដូចជាឆ្នាំមុនៗដែរ កិច្ចប្រជុំកំពូលសន្តិសុខអាស៊ីលើកទី១៨ ក្នុងប្រទេសសិង្ហបុរីលើកនេះ នឹងផ្តល់ឱកាសយ៉ាងច្រើន សម្រាប់កិច្ចប្រជុំទ្វេភាគី និងពហុភាគី ដល់តំណាង និងប្រមុខការពារជាតិទាំងអស់ពីគ្រប់ប្រទេស ដើម្បីប្រជុំពិភាក្សា និងផ្លាស់ប្តូរយោបល់គ្នា ស្តីពីបញ្ហាសន្តិសុខក្នុងតំបន់។
លោក ឈុំ សុជាតិ អ្នកនាំពាក្យក្រសួងការពារជាតិ បានថ្លែងកាលពីម្សិលមិញថា កិច្ចប្រជុំនោះនឹងមានការចូលរួមពីថ្នាក់ដឹកនាំការពារជាតិនៅតំបន់អាស៊ី ដើម្បីពិភាក្សា និងផ្លាស់ប្តូរយោបល់គ្នាស្តីពីបញ្ហាសន្តិសុខក្នុងតំបន់ទាំងមូល។
លោកបញ្ជាក់ថា៖ «ខ្ញុំអត់ទាន់មានយោបល់អ្វីច្រើនទេ ប៉ុន្ដែសម្ដេចពិជ័យសេនា ទៀ បាញ់ គាត់អញ្ជើញទៅហ្នឹង គឺប្រជុំរឿងសន្ដិសុខក្នុងតំបន់អាស៊ី ហើយខ្ញុំមិនទាន់ដឹងថា សម្ដេចលើកពីបញ្ហាអ្វីទៅពិភាក្សានោះទេ»៕