ភ្នំពេញៈ លោក ទៀ បាញ់ រដ្ឋមន្ត្រីក្រសួងការពារជាតិ និងលោក ផាទ្រីក មូហ្វ៊ី (W.Patrick Murphy) ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជាបានព្រមព្រៀងគ្នាក្នុងការពង្រឹងកិច្ចសហប្រតិបត្តិការទ្វេភាគីនៃប្រទេសទាំង ២ ជាពិសេសលើវិស័យយោធាក្នុងការហ្វឹកហ្វឺន និងការចូលសំចតនាវារបស់សហរដ្ឋអាមេរិក។
លោក ទៀ បាញ់ បានថ្លែងប្រាប់កាសែតភ្នំពេញប៉ុស្តិ៍ថា ក្នុងជំនួបពិភាក្សាជាមួយលោក ផាទ្រីក មូហ្វី កាលពីថ្ងៃទី ១៣ ខែវិច្ឆិកា នៅទីស្ដីការគណៈរដ្ឋមន្ត្រី គឺភាគីកម្ពុជា និងអាមេរិក បានឯកភាពក្នុងការពង្រឹងកិច្ចសហប្រតិបត្តិការយោធា ជាពិសេសការធ្វើលំហាត់ហ្វឹកហ្វឺនយោធារួមគ្នា និងការដាក់ឲ្យដំណើរការឡើងវិញការសំចតនូវនាវារបស់សហរដ្ឋអាមេរិក។
លោក ទៀ បាញ់ បានថ្លែងថា៖ «កិច្ចការងារនេះយើងកំពុងតែស្ថិតក្នុងការពិភាក្សាគ្នាឲ្យមានដំណើរការឡើងវិញ (ហើយនឹងរៀបចំឲ្យ) មានការផ្លាស់ប្តូរគ្នាទៅលើបញ្ហាមួយចំនួន ជាពិសេសការរៀបចំឲ្យមានដំណើរការឲ្យមានសកម្មឡើងវិញ»។
លោកថ្លែងឲ្យដឹងទៀតថា៖ «តែមានបញ្ហាខ្លះ កាលៈទេសៈខ្លះ យើងជាប់រវល់ ពេលខ្លះដោយសារតែយើងអត់ទាន់មានលទ្ធភាពដំណើរការបាន ហើយក៏វាធ្វើឲ្យមានការរអាក់រអួលខ្លះដែរ តែទោះយ៉ាងណាក៏ដោយ យើងបានជួបពន្យល់គ្នាបញ្ជាក់ឡើងវិញទៅ វាគ្រាន់បើឡើងវិញហើយ និងបានយោគយល់គ្នាឡើងវិញបានច្រើន»។
បើយោងតាមគេហទំព័រហ្វេសប៊ុករបស់ស្ថានទូតអាមេរិកប្រចាំកម្ពុជាបានឲ្យដឹងថាលោកឯកអគ្គរដ្ឋទូត W.Patrick Murphy បានជួបជាមួយលោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិ ដើម្បីពិភាក្សាពីកិច្ចសហប្រតិបត្តិការរវាងអាមេរិក-កម្ពុជាក្នុងវិស័យសំខាន់មួយចំនួនលើការថែរក្សាសន្តិភាព ការដោះមីនប្រកបដោយមនុស្សធម៌ និងការស្វែងរកអដ្ឋិធាតុឈ្លើយសឹក និងអ្នកបាត់ខ្លួនក្នុងសង្គ្រាម។
លោកទូត Murphy បានឲ្យដឹងថា៖ «ជំហានជាបន្ថែមទៀតក្នុងការស្តារឡើងវិញនូវលទ្ធិប្រជាធិបតេយ្យពហុបក្ស និង សិទ្ធិពេញលេញចំពោះបុគ្គលនយោបាយនឹងរួមចំណែកដល់ស្ថិរភាព និងភាពរុងរឿងរបស់ប្រទេសកម្ពុជាពង្រឹងនូវទំនាក់ទំនងជាទូទៅរវាងអាមេរិក-កម្ពុជា និងជួយការពារនូវអធិបតេយ្យ និងឯករាជ្យរបស់កម្ពុជា»។
អ្នកវិភាគនយោបាយលោក ឯម សុវណ្ណារ៉ា បានចាត់ទុកការឯកភាពគ្នារវាងភាគីទាំង ២ ក្នុងកិច្ចខិតខំប្រឹងប្រែងពង្រឹងកិច្ចសហប្រតិបត្តិការ និងទំនាក់ទំនងវិស័យការពារជាតិរវាងប្រទេសទាំង ២ ឲ្យកាន់តែខ្លាំងថានឹងជួយឲ្យប្រទេសកម្ពុជា រក្សាបាននូវតុល្យភាពនៅកណ្តាលដែលនឹងទទួលបានការជឿទុកចិត្តពីអន្តរជាតិ និងទទួលបានផលប្រយោជន៍ទាំងវិស័យកិច្ចសហប្រតិបត្តិការ និងការទូតផងដែរ។
លោកបានបញ្ជាក់ថា៖ «បើសិនកម្ពុជាចាប់ផ្តើមមានទំនាក់ទំនងល្អជាមួយសហរដ្ឋអាមេរិក វានឹងធ្វើឲ្យប្រទេស កម្ពុជា មានលំនឹងតុល្យភាពឡើងវិញដែលធ្វើឲ្យកម្ពុជាឈរនៅកណ្តាល និងទទួលបានការជឿទុកចិត្តពីអន្តរជាតិឡើងវិញ ហើយកម្ពុជាអាចចំណេញបានច្រើនទៅលើកិច្ចសហប្រតិបត្តិការ និងការទូត ហើយវាធ្វើឲ្យទំនាក់ទំនងកាន់តែជិតស្និទ្ធ ហើយកម្ពុជាគួរតែធ្វើតាំងពីយូរមកហើយ»។
អ្នកស្រី Emily Zeeberg អ្នកនាំពាក្យស្ថានទូតសហរដ្ឋអាមេរិកប្រចាំកម្ពុជាបានឆ្លើយតបតាមអ៊ីមែលថាអ្នកស្រីមិនអាចផ្ដល់ព័ត៌មានលម្អិតលើជំនួបទ្វេភាគីនោះបានទេ៕