.jpg)
លោកទៀ បាញ់ និងក្រុមមន្ត្រីទៅទស្សនកិច្ចនៅវៀតណាម។ រូបថត សហការី
ភ្នំពេញៈ លោក ទៀ បាញ់ រដ្ឋមន្ត្រីក្រសួងការពារជាតិ និងមន្ត្រីយោធាជាន់ខ្ពស់ជាច្រើននាក់ចាប់ផ្ដើមធ្វើទស្សនកិច្ចផ្លូវការទៅកាន់ទីក្រុងហាណូយនៃប្រទេសវៀតណាមចាប់ពីថ្ងៃនេះដល់ថ្ងៃទី ២២ ខែធ្នូក្នុងគោលបំណងពិភាក្សាអំពីកិច្ចសហប្រតិបត្តិការទ្វេភាគីលើវិស័យយោធាក្នុងឆ្នាំ ២០២០។
បើយោងតាមសេចក្ដីប្រកាសព័ត៌មានរបស់ក្រសួងការពារជាតិដែលចេញផ្សាយកាលពីថ្ងៃទី ១៦ ធ្នូ ឆ្នាំ ២០១៩ ដំណើរទស្សនកិច្ចផ្លូវការនេះបានធ្វើឡើងតាមការអញ្ជើញរបស់លោក ង៉ូ ស៊ុនលិច្ស រដ្ឋមន្ត្រីក្រសួងការពារជាតិនៃសាធារណរដ្ឋសង្គមនិយមវៀតណាម។
សេចក្តីប្រកាសព័ត៌មាននេះបានឲ្យដឹងថា៖ «ក្នុងអំឡុងពេលបំពេញទស្សនកិច្ចរយៈពេល ៥ ថ្ងៃក្នុងរដ្ឋធានីហាណូយនៃសាធារណរដ្ឋសង្គមនិយមវៀតណាម សម្ដេចពិជ័យសេនា ទៀ បាញ់ ព្រមទាំងប្រតិភូជាន់ខ្ពស់ក្រសួងការពារជាតិនឹងអញ្ជើញចូលរួមកិច្ចប្រជុំទ្វេភាគីជាមួយនាយឧត្តមសេនីយ៍ ង៉ូ ស៊ុនលិច្ស រដ្ឋមន្ត្រីក្រសួងការពារជាតិវៀតណាម និងចូលរួមក្នុងពិធីចុះហត្ថលេខាលើពិធីសារឆ្នាំ ២០២០-២០២៤ និងផែនការកិច្ចសហប្រតិបត្តិការឆ្នាំ ២០២០ រវាងក្រសួងការពារជាតិទាំង ២ កម្ពុជា-វៀតណាម»។
សេចក្តីប្រកាសព័ត៌មានដដែលនេះបានឲ្យដឹងទៀតថាលោក រដ្ឋមន្ត្រី ទៀ បាញ់ នឹងគណៈប្រតិភូក្រសួងការពារជាតិកម្ពុជាក៏នឹងអញ្ជើញចូលរួមផងដែរ ក្នុងកិច្ចប្រជុំត្រីភាគី កម្ពុជា-វៀតណាម-ឡាវ និងចូលរួមក្នុងពិធីរំឭកខួបអនុស្សាវរីយ៍លើកទី ៧៥ ថ្ងៃបង្កើតកងទ័ពប្រជាជនវៀតណាមនៅទីស្តីការក្រសួងការពារជាតិវៀតណាម។
លោក ឈុំ សុជាត អ្នកនាំពាក្យក្រសួងការពារជាតិមិនអាចទាក់ទងសុំការធ្វើអត្ថាធិប្បាយពាក់ព័ន្ធនឹងដំណើរទស្សនកិច្ចនេះបានទេ។ ក្នុងខែតុលា ឆ្នាំ ២០១៩ នេះបញ្ជាការដ្ឋានកងទ័ពកម្ពុជា-វៀតណាមបានឯកភាពគ្នាពង្រឹងចំណងមិត្តភាព និងកិច្ចសហប្រតិបត្តិការឱ្យកាន់តែសកម្ម និងរឹងមាំលើវិស័យយោធា៕
