កណ្តាលៈ លោកនាយករដ្ឋ មន្ត្រី ហ៊ុន សែន បានប្រកាសថា លោក ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិនឹងទៅបំពេញទស្សនកិច្ចនៅប្រទេសតួកគី ក្នុងពេលឆាប់ៗខាងមុខនេះ ខណៈដែលរដ្ឋមន្ត្រីក្រសួងមហាផ្ទៃ ទើបតែបញ្ចប់ការបំពេញទស្សនកិច្ចនៅក្នុងប្រទេសនេះកាលពីពេលថ្មីៗនេះ។
អ្នកវិភាគមើលឃើញថា នេះគឺជាការកសាងទំនាក់ទំនងដៃគូយុទ្ធសាស្ត្រដ៏ល្អមួយ តែកម្ពុជាក៏អាចត្រូវបានគេមើលឃើញក្នុងកម្រិតភូមិសាស្ត្រនយោបាយថែមទៀត។
ថ្លែងក្នុងពិធីប្រគល់សញ្ញាបត្រ និងវិញ្ញាបនបត្រដល់និស្សិត និងសិក្ខាកាមនៃបណ្ឌិត្យសភានគរបាលកម្ពុជាកាលពីថ្ងៃចន្ទ លោក ហ៊ុន សែន បានថ្លែងថា ក្រោយពីដំណើរទស្សនកិច្ចរបស់លោកកាលពីឆ្នាំមុន គឺតម្រូវឱ្យមានដំណើរទស្សនកិច្ចតាមក្រោយដោយលោក ស ខេង។ លោក ហ៊ុន សែន ថ្លែងថា ទស្សនកិច្ចជាថ្មីម្តងទៀតគឺត្រូវធ្វើឡើងដោយលោក ទៀ បាញ់។
លោក ហ៊ុន សែន ថ្លែងថា៖ «ហើយនៅពេលដែលខ្ញុំជួបគ្នាជាមួយនឹងប្រធានាធិបតីតួកគីចុងក្រោយនៅឯប្រទេស តាជីគីស្តង់ ក៏គាត់រំឭកអំពីចំណុចដែលត្រូវធ្វើការបន្តរវាងយើងជាមួយនឹងតួកគី»។
កាលពីថ្ងៃទី ២៨ ខែ កក្កដា ដល់ថ្ងៃទី ១ ខែ សីហា លោក ស ខេង បានចេញដំណើរទៅបំពេញទស្សនកិច្ចនៅប្រទេស តួកគី។ លោកក៏បានចុះហត្ថលេខាលើកិច្ចព្រមព្រៀងស្តីពីកិច្ចសហប្រតិបត្តិការលើវិស័យសន្តិសុខរវាងកម្ពុជា និងតួកគី។
លោក ហ៊ុន សែន ថ្លែងថា ការចុះហត្ថលេខារវាងរដ្ឋមន្ត្រីមហាផ្ទៃប្រទេសទាំង ២ នេះក៏អាចឆ្លុះបញ្ចាំងអំពីភាពជាដៃគូ ដែលកម្ពុជាអាចធ្វើទៅរួចរវាងប្រទេស កម្ពុជា និងប្រទេសក្នុងតំបន់ និងរាប់ទាំងប្រទេសក្រៅតំបន់។ លោកថ្លែងថា តួកគីមិនមែនជាប្រទេសនៅក្នុងសហគមន៍អឺរ៉ុបទេ តែតួកគីស្ថិតនៅក្នុងប្រទេសនៃសន្ធិសញ្ញាអាត្លង់ទិកខាងជើង អូតង់ ឬណាតូ។
លោក ហ៊ុន សែន ថ្លែងបន្តថា៖ «ក៏ប៉ុន្តែ ដោយមើលឃើញអំពីស្ថានភាព ដែលអាចទៅរួច តួកគីមិនញញើតក្នុងការចុះហត្ថលេខារវាងកម្ពុជា និង តួកគីនោះទេ»។
លោក ឈុំ សុជាត អ្នកនាំពាក្យក្រសួងការពារជាតិបានប្រាប់ភ្នំពេញប៉ុស្តិ៍កាលពីថ្ងៃចន្ទថា លោកមិនទាន់ទទួលព័ត៌មាន បន្ថែមជុំវិញដំណើរទស្សនកិច្ចនេះទេ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃ រាជបណិ្ឌត្យសភាកម្ពុជា និងជាអ្នកវិភាគបញ្ហានយោបាយ បានប្រាប់ភ្នំពេញប៉ុស្តិ៍កាលពីថ្ងៃចន្ទថា បើមើលទំនោរចុងក្រោយនេះ កម្ពុជា និងតួកគីហាក់ដូចជាកំពុងកសាងទំនាក់ទំនងដៃគូយុទ្ធសាស្ត្រដ៏សំខាន់មួយ។
មានលក្ខណៈនយោបាយប្រហាក់ប្រហែលកម្ពុជា តួកគីកំពុងតែមានបញ្ហាជាមួយសហរដ្ឋអាមេរិកដែរ ជាពិសេសគឺក្រោយពេលមានការប៉ុនប៉ងធ្វើរដ្ឋប្រហារមិនបានសម្រេច តួកគីហាក់ដូចជាងាកចេញឆ្ងាយពីសហរដ្ឋអាមេរិក ហើយត្រឡប់មកមានសម្ព័ន្ធភាពល្អូកល្អិនជាមួយរុស្ស៊ី និងបណ្តាប្រទេសនៅអាស៊ីមួយចំនួន ហើយក៏៏មានទំនាក់ទំនងល្អជាមួយចិនដែរ។
លោក គិន ភា បានថ្លែងថា៖ «ពិតហើយ ដើម្បីក្លាយទៅជាទំនាក់ទំនងយុទ្ធសាស្ត្រមួយ លុះត្រាតែមានកិច្ចសហប្រតិបត្តិការលើគ្រប់វិស័យ ទាំងវិស័យសន្តិសុខផ្ទៃក្នុង គឺវិស័យនគរបាល វិស័យការពារជាតិ វិស័យនយោបាយ គឺ ឯកឧត្តម ប្រាក់ សុខុន (រដ្ឋមន្ត្រីក្រសួងការបរទេស) លោកបានទៅទស្សនកិច្ចហើយ ហើយមានដំណើរទស្សកិច្ចរបស់សម្តេចនាយករដ្ឋមន្ត្រី (ហ៊ុន សែន)។ មានន័យថា គឺជាការជំរុញឱ្យទំនាក់ទំនងរវាងប្រទេសទាំង ២ ហ្នឹងទៅជាទំនាក់ទំនងយុទ្ធសាស្ត្រមួយដ៏ល្អទៅខាងមុខ»។
លោក មាស នី អ្នកវិភាគនយោបាយ បានប្រាប់ភ្នំពេញប៉ុស្តិ៍កាលពីថ្ងៃចន្ទថា បើមើលពីការវិវឌ្ឍទិដ្ឋភាពនយោបាយក្នុងពិភពលោក ប្រទេស តួកគី ក៏កំពុងទទួលរងនូវការរិះគន់ ឬក៏ការគាបសង្កត់ពីបណ្តាបស្ចិមប្រទេសជាបណ្តើរៗ។ ស្ថានការណ៍នយោបាយនៅប្រទេសតួកគីពេលនេះ ដូចជាមិនខុសពីអ្វីដែលកម្ពុជាកំពុងទទួលរងនាពេលបច្ចុប្បន្ននោះទេ។
លោក មាស នី ថ្លែងថា៖ «ពីដើមមក ខ្ញុំក៏ឆ្ងល់ដែរ ឆ្ងល់ថា ហេតុអ្វីបានជាស្ងាត់ៗ កម្ពុជានឹកឃើញទាក់ទងសុំទិញ ឬក៏ជួលម៉ាស៊ីនភ្លើងពីប្រទេស តួកគី? តែឥឡូវនេះ យើងឃើញថា ដូចជាទំនាក់ទំនងរវាងតួកគី និងកម្ពុជាហ្នឹងកាន់តែមានភាពជិតស្និទ្ធជាមួយគ្នា នៅក្នុងកាលៈទេសៈដែលប្រទេស តួកគីក៏កំពុងតែទទួលរងនូវការហ៊ុមព័ទ្ធ និងការរិះគន់ពីបស្ចិមប្រទេសផងដែរ»។
លោក មាស នី បន្តថា ជាការសម្គាល់របស់លោក វាហាក់ដូចជាមានចរន្តពិភពលោកមួយដែលកំពុងធ្វើការប្រមូលផ្តុំនូវសម្ព័ន្ធមិត្តមួយដែលចែកដាច់ មិនមែនជាសម្ព័នមិត្តជាមួយបស្ចិមប្រទេស។ វានឹងអាចធ្វើឱ្យកម្ពុជាកាន់តែត្រូវបានគេមើលឃើញក្នុងកម្រិតនៃភូមិសាស្ត្រនយោបាយកាន់តែច្រើនថែមទៀត។ កាលពីឆ្នាំ ២០១៨ លោក ហ៊ុន សែន បានទៅបំពេញទស្សនកិច្ចនៅប្រទេស តួកគី និងបានចុះហត្ថលេខាលើកិច្ចព្រមព្រៀងមួយចំនួន ដើម្បីពង្រឹងកិច្ចសហ ប្រតិបត្តិការប្រទេសទាំង ២។
កាលពីខែ មិថុនា ឆ្នាំ ២០១៩ លោក ហ៊ុន សែន បានជួបជាមួយប្រធានាធិបតីតួកគី លោក Recep Tayyip Erdoan នៅប្រទេស តាហ្ស៊ីគីស្ថាន ខណៈដែលលោកចូលរួមក្នុងកិច្ចប្រជុំកំពូលលើកទី៥ នៃសន្និសីទស្តីពីអន្តរសកម្មភាព និងវិធានការកសាងទំនុកចិត្តនៅអាស៊ីនៅ ទីក្រុងឌូសាន់បេ នៃប្រទេស តាហ្ស៊ីគីស្ថាន។
កាលពីថ្ងៃទី ១ ដល់ទី ៣ ខែ តុលា ឆ្នាំ ២០១៨ លោក ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ បានទៅបំពេញទស្សនកិច្ចនៅប្រទេសតួកគីដើម្បីរឹតចំណងមិត្តភាព និងកិច្ចសហប្រតិបត្តិការឱ្យកាន់តែជិតស្និទ្ធ និងរឹងមាំថែមទៀត។ រដ្ឋមន្ត្រីការបរទេសប្រទេសទាំង ២ បានចុះហត្ថលេខាលើអនុស្សរណៈដើម្បីជំរុញកិច្ចសហប្រតិបត្តិការរវាងវិទ្យាស្ថានការទូតនៃក្រសួងការបរទេស ប្រទេសទាំង ២៕