.jpg)
លោក ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ។ ហេង ជីវ័ន
ភ្នំពេញៈ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ លោក ទៀ បាញ់ បានបញ្ជាផ្ទាល់ទៅកាន់អង្គភាពចំណុះក្រសួងការពារជាតិទាំងអស់ត្រូវប្រមូលទិន្នន័យមន្ត្រីក្នុងក្របខ័ណ្ឌរបស់ខ្លួនដែលមានងារជា «ឧកញ៉ា» ឲ្យបានឆាប់រហ័ស ដើម្បីកំណត់ថ្ងៃជួបគ្នាក្នុងការជ្រើសរើសតួនាទីមួយក្នុងចំណោមតួនាទីទាំង ២។
លោកថ្លែងបែបនេះក្នុងពិធីសម្ពោធបន្ទាយកងទ័ពថ្មីក្នុងខណ្ឌសែនសុខ កាលពីថ្ងៃម្សិលមិញ។ លោកបានបញ្ជាក់ថា៖ «ខ្ញុំនិយាយឲ្យបានច្បាស់លាស់តែម្តងគឺដើម្បីយើងទាំងអស់គ្នាឯកភាពគ្នាគឺប្រធានទាំងអស់គឺត្រូវតែចាត់ចែងឲ្យបានរួសរាន់បន្តិច។ ខ្ញុំសូមណែនាំអំពីការចាត់ចែងពិធីនេះ និងមានភាពប្រុងប្រយ័ត្ន ហើយក៏ធ្វើឲ្យបានឆាប់រហ័ស ដើម្បីធានាដល់ការកែទម្រង់របស់យើងរៀបចំតាមបំណងប្រាថ្នាដែលយើងចង់បាន។ ពិតណាស់ ខ្ញុំយល់យ៉ាងច្បាស់អំពីបរមងារហៅថា ឧកញ៉ានេះគឺមានមួយចំនួនគឺគេគួរសមដែរ បានរួមវិភាគទានក្នុងការកសាងជាតិ មាតុភូមិក្នុងកម្រិតណាមួយដែលទទួលលក្ខខណ្ឌទៅជាអ្នកឧកញ៉ា លោកឧកញ៉ាហ្នឹង»។
ទោះបីយ៉ាងណាលោក ទៀ បាញ់ សង្កត់ធ្ងន់ថា៖ «ឥឡូវនេះ យើងនិយាយគ្នាឲ្យច្បាស់តាមតម្រូវការគឺឲ្យទុកតែមួយ។ យើងឃើញថា រឿងឧកញ៉ាមួយនេះ ត្រូវតែលះបង់មុខតំណែងនៅក្នុងកងទ័ព ឬហៅថាឋានន្តរស័កិ្តក្នុងកងទ័ពដែរ។ ពីព្រោះឥឡូវហ្នឹងគឺទុកតែមួយទេ គឺត្រូវតែគិតគូរយកឲ្យមែនទែន រហូតដល់ណែនាំឲ្យរៀបចំបែបបទ បញ្ឈប់មុខតំណែងនោះរួចជាស្រេច»។
លោកនាយករដ្ឋមន្ត្រី ហ៊ុន សែន បានថ្លែងក្នុងកិច្ចប្រជុំគណៈកម្មាធិការកណ្តាលគណបក្សប្រជាជនកម្ពុជាកាលពីពាក់កណ្តាលខែសីហាដោយបញ្ជាឲ្យមន្ត្រីកងកម្លាំងប្រដាប់អាវុធណាដែលមានងារជា «ឧកញ៉ា» ត្រូវជ្រើសរើសជាបន្ទាន់ថា តើត្រូវជ្រើសយកងារ «ឧកញ៉ា» ឬយកតួនាទីជាកងកម្លាំងប្រដាប់អាវុធដែលខ្លួនកំពុងបំពេញការងារតទៅទៀត។
ជាមួយគ្នានេះលោក ទៀ បាញ់ ក៏អះអាងដែរថាលោកត្រូវតែជួបមន្ត្រីដែលមានងារ ២ ទាំងនោះ ទោះជួបតាមរបៀបណាក៏ដោយ ដើម្បីបញ្ជាក់ពួកគេឲ្យបានច្បាស់ ថាត្រូវជ្រើសរើសយកងារ ឧកញ៉ា ឬយកតំណែងនៅក្នុងកងទ័ព។ ចៀសវាងមានភាពថ្នាំងថ្នាក់ណាមួយក្នុងការសម្រេចនេះដែលនាំឲ្យកើតមានការមិនសុខចិត្ត ខណៈលោកដឹងថាការអនុវត្តគោលការណ៍នេះគឺចៀសមិនផុតពីផលប៉ះពាល់ដល់មន្ត្រីមួយចំនួនរបស់ខ្លួនដែលកំពុងមានងារ ២ ។
លោកបញ្ជាក់ថា៖ «និយាយឯកភាពគ្នា ទើបយើងរៀបចំបែបបទ ព្រោះធ្វើភ្លាមមិនបានពិគ្រោះ ក្រែងលោអ្នកដែលលោកមានងារ ២ មិនសប្បាយចិត្ត ហើយមើលងាយមើលថោកអីណាណីទៅជារឿងផ្សេង។ ដូច្នេះកុំឲ្យមានហេតុការណ៍អ្វីផ្សេង សូមអង្វរករកុំឲ្យមានហេតុការណ៍ដែលត្រូវក្លាយទៅជាថ្នាំងថ្នាក់ ហើយបែរជាថា មាន [ការ] គាបសង្កត់ជាហូរហែ»។
រហូតមកដល់ពេលនេះនៅមិនទាន់មានចំនួនជាក់លាក់ណាមួយជុំវិញមន្ត្រី ដែលកំពុងមានងារ ២ ក្នុងជួរកងទ័ពនោះទេ។ ការអះអាងកន្លងទៅគ្រាន់តែដឹងថាក្នុងក្របខ័ណ្ឌអគ្គបញ្ជាការនៃកងយោធពលខេមរភូមិន្ទ មានមន្ត្រីដែលមានងារឧកញ៉ាចំនួន ៦១ រូបដែលក្នុងនោះមាន ៤៥ រូបបានសម្រេចចិត្តបោះបង់ងារជា «ឧកញ៉ា»។ ចំណែក ១៦ រូបទៀតបានងាកទៅចាប់យកងារជា «ឧកញ៉ា» ដោយសុខចិត្តលាលែងពីក្របខ័ណ្ឌយោធា។ នេះបើតាមមន្ត្រីជាន់ខ្ពស់យោធា។
លោកឧត្ដមសេនីយ៍ទោ ថោង សូលីម៉ូ អ្នកនាំពាក្យអគ្គបញ្ជាការដ្ឋាននៃកងយោធពលខេមរភូមិន្ទក្រសួងការពារជាតិប្រាប់ភ្នំពេញប៉ុស្តិ៍ម្សិលមិញថា ពុំទាន់មានតួលេខថ្មី ឬឈ្មោះមន្ត្រីដែលមានងារជាឧកញ៉ាទាំងនេះនៅឡើយទេ ដោយរង់ចាំការប្រជុំសម្រេចពីរដ្ឋមន្ត្រីក្រសួងការពារជាតិមុនជំនួបដែលនឹងធ្វើឡើងក្នុងពេលឆាប់ៗខាងមុខ។
ប៉ុន្តែលោក សូលីម៉ូ អះអាងថានៅពេលមានការសម្រេចជ្រើសរើសមុខងារណាមួយរួចរាល់ហើយនោះ ក្រសួងការពារជាតិនឹងធ្វើបែបបទបញ្ជាក់ទៅប្រមុខរដ្ឋាភិបាល ដើម្បីឈានទៅដល់ការចេញព្រះរាជក្រឹត្យពីព្រះមហាក្សត្រ ក្នុងការបញ្ឈប់ពួកគេចេញពីងារណាមួយដែលត្រូវបានបោះបង់។
លោកបញ្ជាក់ថា៖ «យើងបានរៀបចំទិន្នន័យរួចរាល់អស់ហើយគឺអត់មានអ្វីកែប្រែទេ ហើយការជួបនេះគឺមន្ត្រីនៅក្នុងអគ្គបញ្ជាការដ្ឋានទាំង ៦១ រូបហ្នឹង ក៏ត្រូវជួបផ្ទាល់ជាមួយសម្តេច [ទៀ បាញ់] ដែរ»។
យោងតាមតួលេខចេញផ្សាយជាសាធារណៈនាពេលកន្លងទៅបានឲ្យដឹងថា ចាប់ពីឆ្នាំ ១៩៩៤ រហូតមកត្រឹមខែកុម្ភៈ ឆ្នាំ ២០១៤ កម្ពុជាមានឧកញ៉ាចំនួន ៧០៤ នាក់ស្របពេលតាមច្បាប់ថ្មីបានចែងថា អ្នកដែលទទួលបានងារជាឧកញ៉ាគឺរាល់សប្បុរសជនណាដែលបានធ្វើអំណោយដល់រដ្ឋលើសពី ៥០ ម៉ឺនដុល្លារឡើងទៅនោះនឹងត្រូវបានរដ្ឋាភិបាលស្នើទៅកាន់ព្រះមហាក្សត្រសុំព្រះរាជទានងារជាឧកញ៉ា៕
