ភ្នំពេញៈ រដ្ឋមន្រ្តីក្រសួងការពារជាតិនៅថ្ងៃព្រហស្បតិ៍នេះ នឹងប្រារព្ធខួបទី ៤២ ឆ្នាំនៃការតស៊ូរបស់លោកនាយករដ្ឋមន្រ្តី ហ៊ុន សែន ដែលបានរត់ទៅប្រទេសវៀតណាមហើយត្រឡប់មកវិញជាមួយកងទ័ពវៀតណាមដើម្បីផ្តួលរំលំខ្មែរក្រហម។
លោក ទៀ បាញ់ ឧបនាយករដ្ឋមន្រ្តីនិងជារដ្ឋមន្រ្តីក្រសួងការពារជាតិប្រារព្ធពិធីរំឭកការចងចាំតាងនាមឲ្យលោកនាយករដ្ឋមន្រ្តី ហ៊ុន សែន នៅតំបន់មួយដែលហៅថា កោះថ្ម ក្នុងឃុំទន្លូង ស្រុកមេមត់ ខេត្តត្បូងឃ្មុំ។
លោក ឌៀប សុផល ជំនួយការវិទ្យាស្ថានប្រវត្តិសាស្រ្តយោធា ដែលរៀបចំពិធីនេះ បានថ្លែងថា លោក ទៀ បាញ់ នឹងសម្ពោធផ្លូវគ្រួសក្រហម ដែលមានប្រវែង ៩,៩ គីឡូម៉ែត្រមានឈ្មោះថា «ផ្លូវប្រវត្តិសម្តេច ហ៊ុន សែន» និងប្រារព្ធពិធីគោរពម្ចាស់ទឹកម្ចាស់ដី និង ដាំដើមឈើជានិមិត្តរូបដើម្បីចងចាំការចាកចេញដំណើររបស់លោក ហ៊ុន សែន។
លោក សុផល បានបន្តថា លោក ទៀ បាញ់ នឹងធ្វើដំណើរពីសាលាបឋមសិក្សាប៊ុនរ៉ានីហ៊ុន សែន ទៅព្រំដែនកម្ពុជាវៀតណាមនៅតំបន់មួយដែលហៅថា X16 ដែលមានឈើត្រយឹងដុះនៅទីនោះ ជាទីកន្លែងដែលលោក ហ៊ុន សែន និងសមមិត្តរបស់គាត់បានឆ្លងព្រំដែនទៅប្រទេស វៀតណាម។ លោកក៏នឹងដាក់ថ្មរំឭកវិញ្ញាណក្ខន្ធនៅទីនោះផងដែរ និងយកអំណោយខ្លះៗទៅជូនពលរដ្ឋនៅមូលដ្ឋាន។
លោក សុផល បាន បញ្ជាក់ថា៖ «ទីតាំងដែលហៅថា កោះថ្ម គឺជាអតីតបញ្ជាការដ្ឋានរបស់សមមិត្ត ហ៊ុន សែន កាលពេលនោះដែលជាមេបញ្ជាការតំបន់២១នៅតំបន់ព្រំដែននោះ។ លោកបានចាកចេញពីប្រទេសកម្ពុជាជាមួយនឹងសមមិត្តជិតស្និទ្ធ និងទុកចិត្តបំផុត ដោយសារវាជាការតស៊ូសម្ងាត់»។
លោកបានបន្ថែមថា សមមិត្ត ៤ នាក់ដទៃទៀត រួមមានលោក នុច ថន, លោក ញ៉ឹក ហួន, លោក សាន សាញ់ និងលោក វ៉ា ប៉ោអ៊ាន។
លោកបន្តថា៖ «សម្តេច [ហ៊ុន សែន] បានសម្រេចចិត្តតស៊ូដោយបូជាជីវិតរបស់លោក។លោកបានឆ្លងទៅប្រទេស វៀតណាម ខណៈរបបកម្ពុជាប្រជាធិបតេយ្យ និងវៀតណាមបានមានជម្លោះជាមួយគ្នារួចហើយក៏ដោយ។ លោកត្រូវតែពុះពារគ្រោះថ្នាក់ រួមមានគ្រោះថ្នាក់នៃការប្រទះឃើញដោយ ប៉ុល ពត ការវាយប្រហារដោយវៀតណាម ការជាន់មីន និងចម្រូងឫស្សីមុតស្រួចដាក់នៅក្រោមដី»។
លោកបានបន្តថា លោក ហ៊ុន សែន មិនអង្គុយរង់ចាំការសម្លាប់ដោយខ្មែរក្រហមទេ។ ប៉ុន្តែសូម្បីតែមានក្តីសង្ឃឹមតិចតួចក៏ដោយ ក៏លោកត្រូវតែតស៊ូទៅប្រទេសវៀតណាម ខណៈក្នុងករណីអាក្រក់បំផុត លោកនឹងត្រូវចាប់ខ្លួនដោយវៀតណាម។
លោក សុផល បានពន្យល់ថា ការធ្វើដំណើរគឺធ្វើឡើងនៅថ្ងៃទី ២០ ខែ មិថុនា ឆ្នាំ ១៩៧៧ នាំទៅដល់ការបង្កើតឡើងនូវរណសិរ្សសាមគ្គីសង្គ្រោះជាតិកម្ពុជា ដែលត្រូវបានបង្កើតឡើងនៅថ្ងៃទី ២ ធ្នូ ឆ្នាំ ១៩៧៨។ លោកបន្តថា រណសិរ្សនេះបាននាំឲ្យមានការផ្តួលរំលំខ្មែរក្រហមនៅថ្ងៃទី ៧ ខែ មករា ឆ្នាំ ១៩៧៩។
លោក សុផល បានបញ្ជាក់ថា៖ «កិច្ចព្រមព្រៀងសន្តិភាពទីក្រុងប៉ារីសថ្ងៃទី ២៣ តុលា ១៩៩១ ជាការពិត មិនបានបញ្ចប់សង្គ្រាមស៊ីវិលក្នុងប្រទេសកម្ពុជាទេ សង្គ្រាមស៊ីវិលបានបញ្ចប់គឺនៅថ្ងៃទី ២៩ ខែ ធ្នូ ឆ្នាំ ១៩៩៨ ដោយសារគោលនយោបាយឈ្នះ‑ឈ្នះ របស់សម្តេច ហ៊ុន សែន»។
អ្នកវិភាគនយោបាយ លោក ឡៅ ម៉ុងហៃ បានថ្លែងថា ការរំឭកនេះគឺជា «ឥរិយាបថដើម្បីបញ្ជាក់និងលើកតម្កើងវីរភាពរបស់លោកនាយករដ្ឋមន្រ្តី»៕