.jpg)
ប្រមុខការពារជាតិលោក ទៀ បាញ់ ជួបសំណេះសំណាលជាមួយកងកម្លាំងដែលត្រៀមចេញបេសកកម្មនេះបានធ្វើឡើងនៅវិទ្យាស្ថានហ្វឹកហ្វឺន បណ្តុះបណ្តាលកងកម្លាំងរក្សាសន្តិភាព បោសសម្អាតមីន និងកាកសំណល់សង្គ្រាមនៅក្នុងស្រុកឧដុង្គ ខេត្តកំពង់ស្ពឺ។ រូបថត សហការី
កំពង់ស្ពឺៈ ប្រមុខការពារជាតិលោក ទៀ បាញ់ ក្រើនរំឭកដល់កងកម្លាំងមួកខៀវទាំងអស់ពង្រឹងសាមគ្គីភាពផ្ទៃក្នុងឲ្យបានល្អ នៅពេលបំពេញបេសកកម្មប្ដូរវេនក្នុងប្រទេសស៊ូដង់ខាងត្បូងនាពេលខាងមុខនេះ។
លោកថ្លែងបែបនេះក្នុងពិធីសំណេះសំណាលពីម្សិលមិញនៅខេត្តកំពង់ស្ពឺជាមួយកងអនុសេនាធំកងរាជអាវុធហត្ថលេខ ១៨៦ ដែលត្រៀមទៅបំពេញបេសកកម្មរក្សាសន្តិភាព ក្រោមឆត្ររបស់អង្គការសហប្រជាជាតិ។
លោក ខៀវ ឆេន នាយកខុទ្ទកាល័យ លោក ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិប្រាប់ភ្នំពេញប៉ុស្តិ៍ថា ក្រៅពីការក្រើនរំឭកលោករដ្ឋមន្ត្រីការពារជាតិក៏បានជំរុញដល់កងកម្លាំងមួកខៀវកម្ពុជាទាំងអស់ឲ្យពង្រឹង និងពង្រីកសមត្ថភាពចំណេះដឹងដែលខ្លួនមានឲ្យកាន់តែប្រសើរឡើងថែមទៀត។ ការពង្រីកសមត្ថភាពនេះធ្វើតាមរយៈការផ្លាស់ប្ដូរបទពិសោធការងារផ្នែកបច្ចេកទេសជាមួយជំនាញការនៃអង្គការសហប្រជាជាតិ (UN) និងមន្ត្រីកងកម្លាំងមួកខៀវនៃបណ្ដាប្រទេសមួយចំនួនទៀតដែលបំពេញបេសកកម្មក្រោមឆត្រ UN នៅក្នុងប្រទេសស៊ូដង់ខាងត្បូង។
លោកថ្លែងថា៖ «ដោយសារបច្ចុប្បន្ន ពិភពលោកទាំងមូលកំពុងជួបប្រឈមជំងឺរាតត្បាតកូវីដ១៩ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិបានផ្ដែផ្ដាំកងកម្លាំងមួកខៀវរបស់យើងទាំងអស់ ពិសេសកងកម្លាំងមួកខៀវដែលត្រៀមចេញបំពេញបេសកកម្មរក្សាសន្តិភាពក្រោមឆត្ររបស់ UN នៅក្រៅប្រទេសត្រូវអនុវត្តឲ្យមានប្រសិទ្ធភាពនូវគោលការណ៍ណែនាំស្ដីពីសុខភាព អនាម័យ របស់អង្គការសុខភាពពិភពលោកក្នុងការទប់ស្កាត់ការរីករាលដាលនៃជំងឺកូវីដ១៩»។
លោក ខៀវ ឆេន បន្តថា លោក ទៀ បាញ់ ក៏បានជំរុញឲ្យក្រុមកងកម្លាំងមួកខៀវត្រូវពង្រឹងកិច្ចសហប្រតិបត្តិការជាមួយ UN និងកងកម្លាំង បេសកកម្មនៃបណ្ដាប្រទេសផ្សេងទៀតឲ្យបានល្អប្រសើរ។ ជាពិសេសកងកម្លាំងរបស់រដ្ឋាភិបាលនៃប្រទេសដែលកងមួកខៀវកម្ពុជាត្រូវចេញទៅបំពេញបេសកកម្មប្ដូរវេនតាមការរៀបចំរបស់ UN ដោយចូលរួមគ្រប់សកម្មភាពការងារសង្គម ដើម្បីសន្តិភាពសម្រាប់មនុស្សជាតិក្នុងភពផែនដី។
គួរបញ្ជាក់ផងដែរថា ពិធីជួបសំណេះសំណាលជាមួយកងកម្លាំងដែលត្រៀមចេញបេសកកម្មនេះបានធ្វើឡើងនៅវិទ្យាស្ថានហ្វឹកហ្វឺន បណ្តុះបណ្តាលកងកម្លាំងរក្សាសន្តិភាព បោសសម្អាតមីន និងកាកសំណល់សង្គ្រាមនៅក្នុងស្រុកឧដុង្គ ខេត្តកំពង់ស្ពឺ។
ជាមួយគ្នានេះលោកស្រី កុសល ម៉ាលីនដា អ្នកនាំពាក្យមជ្ឈមណ្ឌលជាតិរក្សាសន្តិភាពប្រាប់ភ្នំពេញប៉ុស្តិ៍ នៅថ្ងៃចន្ទថា នៅថ្ងៃទី ១១-១២ ខែកញ្ញា ខាងមុខនេះកម្ពុជានឹងបញ្ជូនកងកម្លាំងមួកខៀវចំនួន ២១៨ នាក់បន្ថែមទៀតទៅបំពេញបេសកកម្មរក្សាសន្តិភាពក្រោមឆត្រ UN នៅប្រទេសម៉ាលី។ កាលពីដើមខែកក្កដា កម្ពុជាបានបញ្ជូនកម្លាំងមួកខៀវ ៨០ នាក់ទៅប្រទេសម៉ាលី សម្រាប់បេសកកម្មប្ដូរវេនផ្នែកកងវិស្វកម្មព្រលានយន្តហោះ។
លោកស្រី ម៉ាលីនដា បន្តថា សម្រាប់កងកម្លាំងមួកខៀវ ៨០ នាក់ដែលមកពីកងអនុសេនាធំកងរាជអាវុធហត្ថលេខ ១៨៦ កំពុងទទួលការហ្វឹកហ្វឺនផ្នែកបច្ចេកទេសនៅវិទ្យាស្ថានហ្វឹកហ្វឺន បណ្តុះបណ្តាលកងកម្លាំងរក្សាសន្តិភាព បោសសម្អាតមីន និងកាកសំណល់សង្គ្រាមនៅស្រុកឧដុង្គ ខេត្តកំពង់ស្ពឺនាពេលនេះនឹងត្រូវបញ្ជូនទៅប្រទេសស៊ូដង់ខាងត្បូងនៅខែតុលាខាងមុខនេះ ដើម្បីបំពេញបេសកកម្មប្ដូរវេនក្រោមឆត្រ UN។
លោកស្រីបញ្ជាក់ថា៖ «យើងបានទទួលព័ត៌មានបឋមពីក្រុមការងារយើង ដែលកំពុងបំពេញបេសកកម្មការងារក្នុងប្រទេសស៊ូដង់ខាងត្បូងថា កម្មវិធីប្ដូរវេននឹងត្រូវធ្វើឡើងនាដើមខែតុលាខាងមុខនេះ។ ប៉ុន្តែយើងនៅមិនទាន់ទទួលបានសេចក្ដីជូនដំណឹងពី UN នៅឡើយទេ»។
បច្ចុប្បន្នកម្ពុជាមានកងទ័ពមួកខៀវចំនួន ៥ កងកម្លាំងធំៗ និងមានកងកម្លាំងរក្សាសន្តិភាពសរុបចំនួន ៦៧៨ នាក់។ ក្នុងនោះមាននារីជិត ៨០ នាក់បាននិងកំពុងបំពេញបេសកកម្មរក្សាសន្តិភាព ក្រោមឆត្រ UN នៅប្រទេសចំនួន ៤ រួមមានប្រទេសម៉ាលី ស៊ូដង់ខាងត្បូង អាហ្វ្រិកកណ្ដាល និងប្រទេសលីបង់៕
