ភ្នំពេញៈ លោក ទៀ បាញ់ រដ្ឋមន្ត្រីក្រសួងការពារជាតិបានលើកពីគុណសម្បត្តិរបស់កងយោធពលខេមរភូមិន្ទ ដែលលោកថាបានចូលរួមការពាររបបរាជានិយម ថែរក្សាសន្តិភាព ស្ថិរភាពនយោបាយ និងទប់ស្កាត់បដិវត្តន៍ពណ៌ ព្រមទាំងសកម្មភាពប្រទូសរ៉ាយ គ្រប់បែបយ៉ាងរបស់ក្រុមប្រឆាំង និងមជ្ឈដ្ឋានអគតិនានា។
ការបញ្ជាក់បែបនេះរបស់ប្រមុខការពារជាតិបានធ្វើឡើងនៅរសៀលថ្ងៃទី ២៧ ខែ វិច្ឆិកា ឆ្នាំ ២០១៩ ក្នុងពិធីបិទសិក្ខាសាលាស្តីពីការបូកសរុបលទ្ធផលការងារបុគ្គលិករយៈពេល ៥ ឆ្នាំ (២០១៥ -២០១៩) និងលើកទិសដៅអនុវត្ត ៥ ឆ្នាំបន្ត (២០២០-២០២៤) របស់នាយកដ្ឋានបុគ្គលិកក្រសួងការពារជាតិ នៅសាកលវិទ្យាល័យការពារជាតិ។
លោក ទៀ បាញ់ បញ្ជាក់ថា នៅក្នុងរយៈពេល ៥ ឆ្នាំកន្លងមកនេះដោយសារការងារគ្រប់គ្រងចំនួនទ័ព អនុវត្តមានប្រសិទ្ធភាពទើបកងយោធពលខេមរភូមិន្ទនៅតែជាកម្លាំងមិនអាចខ្វះបាន ក្នុងការធ្វើជាបង្អែកដ៏រឹងមាំការពាររដ្ឋធម្មនុញ្ញ ការពាររបបរាជានិយម ការពារឯករាជ្យអធិបតេយ្យ និងបូរណភាពទឹកដី។ លើសពីនេះកងទ័ពបាន «ទប់ស្កាត់ឧបាយកលបដិវត្តន៍ពណ៌ និងសកម្មភាពប្រទូសរ៉ាយគ្រប់បែបយ៉ាងរបស់ក្រុមប្រឆាំង និងមជ្ឈដ្ឋានអគតិនានាដែលប៉ុនប៉ងឥតឈប់ឈរ សំដៅរាំងខ្ទប់ការអភិវឌ្ឍ និងរុញច្រានកម្ពុជាឱ្យឃ្លាតចេញពីមាគ៌ា ប្រជាធិបតេយ្យ និងនីតិរដ្ឋបានយ៉ាងទាន់ពេលវេលានៅគ្រប់កាលៈទេសៈ»។
លោកបន្តថា មេបញ្ជាការទាំងអស់ត្រូវពង្រឹងការងារគ្រប់គ្រងចំនួនទ័ព និងយន្តការត្រួតពិនិត្យឱ្យមានប្រសិទ្ធភាពតាមតួនាទីភារកិច្ចដែលក្រសួងការពារជាតិ និងអគ្គបញ្ជាការប្រគល់ជូន ដើម្បីពង្រឹងខឿនការពារជាតិកាន់តែរឹងមាំធានានូវកិច្ចការពារសន្តិភាពការពារអធិបតេយ្យ និងបូរណភាពទឹកដីកម្ពុជា និងធ្វើជាកម្លាំងស្នូលក្នុងការប្រតិបត្តិការ ថែរក្សាសុវត្ថិភាពសន្តិសុខ សណ្តាប់ធ្នាប់សាធារណៈ «ដោយមិនឱ្យក្រុមប្រឆាំងជ្រុលនិយមដែលក្បត់នឹងផលប្រយោជន៍ជាតិ និងប្រជាជន ឬមជ្ឈដ្ឋានអគតិនៅខាងក្រៅមកបំផ្លាញទៅវិញបានឡើយ ទោះបីជាត្រូវបង់ក្នុងតម្លៃណាក៏ដោយ»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាថ្លែងថា កងយោធពលខេមរភូមិន្ទមានតួនាទីការពារអធិបតេយ្យ បូរណភាពទឹកដី និងថែរក្សាសុវត្ថិភាព សន្តិសុខសណ្តាប់ធ្នាប់សាធារណៈ និងរាជរដ្ឋាភិបាលស្របច្បាប់ ហើយទប់ស្កាត់ចលនាណាមួយដែលប៉ុនប៉ងដែលបង្កឲ្យប្រទេសមានអសន្តិសុខ និងអស្ថិរភាព។ «ការលើកឡើងរបស់សម្តេច (ទៀ បាញ់) ពិតជាត្រឹមត្រូវដោយសារតែកងយោធពលខេមរភូមិន្ទគឺជាកម្លាំងស្នូល»៕