.jpg)
លោក ទៀ បាញ់ និងលោក Prayut Chan Ocha។ រូបថត សហការី
បាងកកៈ លោក ទៀ បាញ់ រដ្ឋមន្ត្រីក្រសួងការពារជាតិបានលើកឡើងពីបញ្ហាភេរវកម្ម និងអំពើហិង្សាជ្រុលនិយមទៅកាន់មេដឹកនាំយោធាប្រទេសអាស៊ាន និងអាស៊ានបូកដែលលោកថា នៅតែជាបញ្ហាប្រឈមខ្លាំងបំផុតដែលគំរាមកំហែងដល់សន្តិសុខសុវត្ថិភាព និងសុខដុមរមនានៅក្នុងសង្គមបច្ចុប្បន្ន។
ថ្លែងនៅក្នុងកិច្ចប្រជុំរដ្ឋមន្ត្រីការពារជាតិ អាស៊ាន បូកលើកទី ៦ នៅទីក្រុងបាងកក ប្រទេស ថៃ កាលពីថ្ងៃអាទិត្យលោក ទៀ បាញ់ បញ្ជាក់ថា ការគំរាមកំហែងទាំងនេះនឹងកាន់តែមានគ្រោះថ្នាក់ខ្លាំងឡើង នៅពេលដែលត្រូវបានច្របាច់បញ្ចូលជាមួយបច្ចេកវិទ្យាថ្មីៗដែលមានដូចជាបណ្តាញសង្គម ដើម្បីកេណ្ឌសមាជិកថ្មី និងបច្ចេកវិទ្យាស្មុគស្មាញដូចជាយន្ដហោះដ្រូនដែលបំពាក់ដោយអាវុធ។ នេះបើយោងតាមគេហទំព័រក្រសួងការពារជាតិកាលពីថ្ងៃអង្គារ។
យោងតាមគេហទំព័រដដែលលោក ទៀ បាញ់ ដែលជាឧបនាយករដ្ឋមន្ត្រីផងនោះថ្លែងថា៖ «បទពិសោធបង្ហាញថា គ្មានប្រទេសណាអាចដោះស្រាយបញ្ហាភេរវកម្មតែម្នាក់ឯងបានទេ។ យើងយល់យ៉ាងច្បាស់ពីតួនាទីនៃយន្តការរួមគ្នា ជាមួយដៃគូរបស់យើង និងតួនាទីរបស់វេទិកាកម្រិតតំបន់ និងអន្តរជាតិ ក្នុងការប្រយុទ្ធប្រឆាំងជាមួយការគំរាមកំហែងនេះ»។
លោក ទៀ បាញ់ បន្តថាដើម្បីពង្រឹងសមត្ថភាពប្រឆាំងភេរវកម្ម និងសង្គ្រោះមហន្តរាយ កងយោធពលខេមរភូមិន្ទកម្ពុជាបានធ្វើលំហាត់ហ្វឹកហ្វឺនជាមួយកងទ័ពរំដោះប្រជាជនចិនស្តីពីការប្រឆាំងភេរវកម្ម និងសង្គ្រោះគ្រោះមហន្តរាយ។ ទន្ទឹមនេះកម្ពុជាក៏ត្រៀមពង្រឹងសមត្ថភាព សង្គ្រោះគ្រោះមហន្តរាយនេះដោយនឹងធ្វើលំហាត់ហ្វឹកហ្វឺនជាមួយប្រទេសវៀតណាម នៅខែធ្នូខាងមុខផងដែរ។
លោកថ្លែងថាការរីកចម្រើនឥតឈប់ឈរនៃបច្ចេកវិទ្យាអ៊ីនធឺណិតកំពុងតែកែប្រែរូបរាងពិភពលោកក្នុងរូបភាពថ្មីមួយដោយបានបង្កលក្ខណៈច្នៃប្រឌិតដ៏អស្ចារ្យដែលជំរុញឱ្យមានការរីកចម្រើនសេដ្ឋកិច្ច សង្គម និងវប្បធម៌ និងជួយឱ្យសម្រេចបាននូវគោលដៅអភិវឌ្ឍន៍។ ប៉ុន្តែបច្ចេកវិទ្យានេះក៏បានជះឥទ្ធិពលអវិជ្ជមានផងដែរនៅពេលដែលរីកសាយភាយ និងធ្លាក់ដល់ដៃពួកភេរវករ។
លោក ឈុំ សុជាត អ្នកនាំពាក្យក្រសួងការពារជាតិមិនអាចទាក់ទងដើម្បីសុំការបញ្ជាក់បន្ថែមបានទេកាលពីថ្ងៃអង្គារ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជាបានប្រាប់ភ្នំពេញប៉ុស្តិ៍កាលពីថ្ងៃអង្គារថា កម្ពុជាត្រូវពង្រឹងសមត្ថភាពធនធានមនុស្សនៅក្នុងវិស័យសន្តិសុខបច្ចេកវិទ្យា និងត្រូវដើរឱ្យទាន់ភាពរីកចម្រើននៃបច្ចេកវិទ្យា។ ម្យ៉ាងទៀតការនាំចូលបច្ចេកវិទ្យាថ្មី ក៏ជារឿងចាំបាច់ដែរ សម្រាប់កម្ពុជាក្នុងការគ្រប់គ្រងសន្តិសុខ។
លោកបន្ថែមថា កម្ពុជាក៏ត្រូវពង្រឹង និងពង្រីកកិច្ចសហប្រតិបត្តិការលើវិស័យសន្តិសុខឱ្យបានកាន់តែរឹងមាំ និងស៊ីជម្រៅថែមទៀត ពីព្រោះបញ្ហាសន្តិសុខនេះ មិនមែនជាបញ្ហាឯកជន ឬឯកតោភាគីនៃរដ្ឋណាមួយនោះទេ។ វាជាបញ្ហារួមសម្រាប់តំបន់ និងពិភពលោក។
លោកថ្លែងថា៖ «យើងក៏ត្រូវតែពង្រីកនូវកញ្ចប់ថវិកាការពារជាតិដែលយើងត្រូវមានឱ្យបានប្រសើរឱ្យបានច្រើនជាងមុន ហើយយើងត្រូវពង្រឹងសមត្ថភាពកងកម្លាំងរបស់យើងទាំងចំណេះដឹង ទាំងជំនាញ ទាំងបទពិសោធ និងការហ្វឹកហាត់ជាប្រចាំ»។
បើយោងតាមសេចក្តីប្រកាសព័ត៌មានក្រសួងការពារជាតិកាលពីថ្ងៃព្រហស្បតិ៍សប្តាហ៍មុនលោក ទៀ បាញ់ បានដឹកនាំប្រតិភូយោធាជាន់ខ្ពស់ក្រសួងការពារជាតិទៅចូលរួមកិច្ចប្រជុំចង្អៀតរដ្ឋមន្ត្រីការពារជាតិអាស៊ាន និងកិច្ចប្រជុំរដ្ឋមន្ត្រីការពារជាតិអាស៊ានបូកលើកទី ៦ ចាប់ពីថ្ងៃទី ១៦ ដល់ទី ១៨ ខែវិច្ឆិកា នៅទីក្រុងបាងកក។
សេចក្តីប្រកាសព័ត៌មានបន្តថា ក្នុងកិច្ចប្រជុំចង្អៀតលោក ទៀ បាញ់ នឹងធ្វើការផ្លាស់ប្តូរទស្សនៈស្តីពីបរិស្ថានសន្តិសុខក្នុងតំបន់ និងអន្តរជាតិជាមួយរដ្ឋមន្ត្រីការពារជាតិអាស៊ានហើយនៅក្នុងកិច្ចប្រជុំរដ្ឋមន្ត្រីការពារជាតិអាស៊ានបូក លោក ទៀ បាញ់ ចូលរួមផ្លាស់ប្តូរទស្សនៈស្តីពីបរិស្ថានសន្តិសុខតំបន់ និងអន្តរជាតិជាមួយរដ្ឋមន្ត្រីការពារជាតិអាស៊ានបូក និងអនុម័តសេចក្តីថ្លែងការណ៍រួមស្តីពីការលើកកម្ពស់ភាពជាដៃគូសម្រាប់សន្តិសុខប្រកបដោយចីរភាព។ លោក ទៀ បាញ់ ក៏មានជំនួបទ្វេភាគីជាមួយរដ្ឋមន្ត្រីការពារជាតិបណ្តាប្រទេសអាស៊ានផងដែរ។
បើយោងតាមគេហទំព័រក្រសួងការពារជាតិកម្ពុជាបានឱ្យដឹងថាលោក ប្រាវីត វង្សសុវណ្ណ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិថៃបានដឹកនាំកិច្ចប្រជុំរដ្ឋមន្ត្រីការពារជាតិ អាស៊ាន បូកលើកទី ៦ និងមានការចូលរួមពីរដ្ឋមន្ត្រីការពារជាតិអាស៊ាន និងរដ្ឋមន្ត្រីការពារជាតិប្រទេសអាស៊ានបូក រួមមាន ចិន ជប៉ុន សាធារណរដ្ឋកូរ៉េ អូស្ត្រាលី នូវែលសេឡង់ ឥណ្ឌា សហព័ន្ធ-រុស្ស៊ី និងសហរដ្ឋអាមេរិក។
គេហទំព័របានបន្តថា របាយការណ៍នៃការអភិវឌ្ឍថ្មីៗរបស់អាស៊ានបានបញ្ជាក់ថា រាល់ការចូលរួមកិច្ចប្រជុំទាំងអស់មានការចូលរួមដោះស្រាយបញ្ហាប្រឈមផ្នែកសន្តិសុខបច្ចុប្បន្ន និងទៅអនាគត។ ទស្សនវិស័យរបស់អាស៊ាន គឺជំរុញឲ្យមានសន្តិភាព វិបុលភាពនៅក្នុងតំបន់។ ការជំរុញឲ្យមានសន្តិភាពស្ថិរភាពក្នុងតំបន់ គឺមានសារៈសំខាន់ដែលនឹងធ្វើឲ្យមានការអភិវឌ្ឍសេដ្ឋកិច្ច និងសង្គម៕
