.jpg)
ការធ្វើដំណើរក្នុងតំបន់គម្រោងអភិរក្សសត្វព្រៃកម្រ។ ហេង ជីវ័ន
ព្រះវិហារៈ មន្ត្រីក្រសួងបរិស្ថានបានបង្ហាញការអនុវត្តគម្រោងមិត្តភាពសង្គ្រោះសត្វព្រៃដែលជាគម្រោងមួយផ្សារភា្ជប់នឹងការលើកកម្ពស់ជីវភាពប្រជាពលរដ្ឋ និងការងារអភិរក្សដល់ក្រុមអ្នកសារព័ត៌មានមកពីស្ថាប័ននានាក្នុងដំណើរទស្សនកិច្ច ២ ថ្ងៃទៅកាន់តំបន់ដែនជម្រកសត្វព្រៃនៅខេត្តព្រះវិហារ ដោយមានការចូលរួមពីមន្ត្រីអង្គការសមាគមសង្គ្រោះសត្វព្រៃកម្ពុជា (WCS) សហគមន៍ អាជ្ញាធរខេត្ត និងមន្ត្រីគម្រោងព្រៃឡង់បៃតង និងទីភ្នាក់ងារជំនួយអាមេរិក (USAID)។
លោក នេត្រ ភក្ត្រា អ្នកនាំពាក្យក្រសួងបរិស្ថានបានឲ្យដឹងថា៖ «ការចុះមកសិក្សាស្វែងយល់នេះគឺដើម្បីពិនិត្យមើលនៃភាពជោគជ័យរបស់គម្រោងដែលបានអនុវត្តកន្លងទៅ។ គម្រោងដែលយើងមកមើលហ្នឹងគឺមានទាំងគម្រោងមិត្តភាពសង្គ្រោះសត្វព្រៃមានការចូលរួមពិនិត្យទៅលើការធ្វើជំរឿនសត្វត្មាតនៅប្រទេសកម្ពុជារបស់យើងនឹងធ្វើនៅថ្ងៃទី ១០ ខែមិថុនា ហើយនិងការចុះទៅពិនិត្យនៅតំបន់អភិរក្សសត្វខ្សឹបនៅភាគខាងជើងទំនាបបឹងទន្លេសាបនៅក្នុងខេត្តកំពង់ធំ និងខេត្តសៀមរាប»។
លោកបញ្ជាក់ថា គម្រោងមិត្តភាពសង្គ្រោះសត្វព្រៃនេះគឺផ្តោតទៅលើការអភិរក្សសត្វត្រយងយក្សដែលជាប្រភេទសត្វកម្រជិតផុតពូជតាមរយៈការបង្កើតមុខរបរ និងជម្រើសថ្មីដល់ប្រជាពលរដ្ឋ ដើម្បីឱ្យពួកគាត់មានជម្រើសក្រៅពីចូលព្រៃកាប់ឈើ និងបរបាញ់សត្វបែរមកប្រកបរបរកសិកម្ម ដាំដំណាំស្រូវ និងដំណាំរួមផ្សំផ្សេងៗវិញ។ សេចក្តីប្រកាសព័ត៌មានរួមកាលពីថ្ងៃអង្គារបញ្ជាក់ថា ទស្សនកិច្ចនេះមានរយៈពេល ២ ថ្ងៃគឺចាប់ពីថ្ងៃទី ៩ ដល់ទី ១០ ខែមិថុនា ធ្វើឡើងនៅដែនជម្រកសត្វព្រៃគូលែនព្រហ្មទេព និងដែនជម្រកសត្វព្រៃឆែប ខេត្តព្រះវិហារ និងតំបន់អភិរក្សសត្វខ្សឹបក្នុងស្រុកស្ទោង ខេត្ដកំពង់ធំ។
លោកស្រី Veena Reddy នាយកបេសកកម្មទីភ្នាក់ងារជំនួយអាមេរិក (USAID) ប្រចាំកម្ពុជា ថ្លែងក្នុងសេចក្តីប្រកាសព័ត៌មានរួមនេះថានៅក្នុងដំណើរទស្សនកិច្ចនេះក៏មានការចុះហត្ថលេខាលើការផ្តល់ជំនួយបន្ថែមដោយគម្រោង USAID ព្រៃឡង់បៃតងដល់អង្គការសន្សំម្លប់ព្រៃ ដែលជាអង្គការកសិកម្មក្នុងស្រុកមួយធ្វើការងារផ្នែកការពារបរិស្ថាន និងសត្វព្រៃតាមរយៈការជំរុញវិស័យកសិកម្មបែបជួយការពារសត្វព្រៃនៅក្នុងសហគមន៍ដែលរស់នៅក្នុង និងជុំវិញតំបន់ការពារ ធម្មជាតិក្នុងប្រទេសកម្ពុជា។
លោក កែន សេរីរដ្ឋា នាយកអង្គការ WCS បានប្រាប់ភ្នំពេញប៉ុស្តិ៍កាលពីថ្ងៃអង្គារថា ដំណើរទស្សនកិច្ចគឺជាឱកាសមួយដ៏វិសេសវិសាល ពីព្រោះអ្នកនាំពាក្យក្រសួងបរិស្ថានបានដឹកនាំប្រតិភូ និងនាំអ្នកសារព័ត៌មានមកកាន់ទីតាំងគម្រោងដើម្បីផ្តិតយករូបភាព និងការអនុវត្តជាក់ស្តែង។
លោក កែន សេរីរដ្ឋា ថ្លែងថា៖ «នេះគឺជាសញ្ញាវិជ្ជមានមួយដែលបង្ហាញអំពីការយកចិត្តទុកដាក់របស់រាជរដ្ឋាភិបាល ជាពិសេសក្រសួងបរិស្ថាន និងអាជ្ញាធរដែនដីយកចិត្តទុកដាក់ទៅដល់ការងារអភិរក្ស ធនធានជីវចម្រុះ និងការលើកកម្ពស់ដល់ជីវភាពរស់នៅរបស់ប្រជាសហគមន៍»។
គម្រោង USAID ព្រៃឡង់បៃតងគឺជាគម្រោងមួយដែលផ្តោតលើការលើកកម្ពស់ការអភិវឌ្ឍដែលមិនប៉ះពាល់ដល់បរិស្ថាន និងការគ្រប់គ្រង ប្រកបដោយនិរន្តរភាពនៃតំបន់ទេសភាពព្រៃឡង់ និងតំបន់ជុំវិញតាមរយៈការផ្តោតលើសហគមន៍ ការអភិរក្ស និងអភិបាលកិច្ច។ គម្រោង USAID ព្រៃឡង់បៃតង (USAID GPL) មានរយៈពេល ៥ ឆ្នាំ និងទទួលបានមូលនិធិពីទីភ្នាក់ងារជំនួយអាមេរិក USAID៕
