.jpg)
លោក នេត្រ ភក្ត្រា បង្ហាញរណារជាភ័ស្តុតាងបទល្មើស។ ហេង ជីវ័ន
ភ្នំពេញៈ ក្រសួងបរិស្ថានបានវាយតម្លៃខ្ពស់ចំពោះកិច្ចខិតខំប្រឹងប្រែងរបស់អង្គការសម្ព័ន្ធមិត្តសត្វព្រៃដែលបានជួយដល់កម្ពុជាក្នុងកិច្ចគាំពារបរិស្ថាន និងធនធានធម្មជាតិនៅតំបន់ជួរភ្នំក្រវាញដែលមានទំហំ ១,៤ លានហិកតា គ្របដណ្តប់ក្នុងភូមិសាស្ត្រខេត្តកោះកុង ពោធិ៍សាត់ និងកំពង់ស្ពឺ ប្រកបដោយប្រសិទ្ធភាពខ្ពស់។
លោក នេត្រ ភក្ត្រា អ្នកនាំពាក្យក្រសួងបរិស្ថានបានប្រាប់ភ្នំពេញប៉ុស្តិ៍នៅថ្ងៃម្សិលមិញថា ក្នុងរយៈពេល ១៨ ខែចុងក្រោយនេះ (ពីខែមករា ឆ្នាំ ២០១៩ ដល់ខែមិថុនា ឆ្នាំ ២០២០) មន្ត្រីឧទ្យានុរក្សនៃក្រសួងបរិស្ថាន និងមន្ត្រីនៃអង្គការសម្ព័ន្ធមិត្តសត្វព្រៃ និងស្ថាប័នពាក់ព័ន្ធបានចុះល្បាតទាំងយប់ទាំងថ្ងៃចំនួន ៧ ៦៥៤ លើក លើចម្ងាយផ្លូវ ២៤៥ ៥៣៥ គីឡូម៉ែត្រ ដែលក្នុងនោះបានទប់ស្កាត់ និងបង្ក្រាបបទល្មើសធនធានធម្មជាតិរួមមាន បញ្ឈប់ការទន្ទ្រានដីដោយខុសច្បាប់ចំនួន ១៧១ ករណី ដាក់ពាក្យបណ្តឹងទៅតុលាការចំនួន ២០៥ ករណី ពិន័យអន្តរកាលចំនួន ២៧៧ ករណី បញ្ជូនជនល្មើសចំនួន ៨៧ នាក់ទៅកាន់តុលាការ។
ជាមួយគ្នានេះក្រុមល្បាតក៏បានរុះរើខ្ទមខុសច្បាប់ចំនួន ៩៨៣ ដកហូតឈើចំនួន ២ ១៧៩ ម៉ែត្រគុប ដកហូត និងរឹបអូសរណារយន្តចំនួន ១ ៩៥៤ គ្រឿង ដោះអន្ទាក់បានចំនួន ៣២ ៣២២ អន្ទាក់ ជួយសង្គ្រោះសត្វព្រៃរស់បានចំនួន ៧៤៧ ក្បាល និងរឹបអូសសត្វព្រៃស្លាប់ចំនួន ២០៦ ក្បាល រួមទាំងរឹបអូសរថយន្តបានចំនួន ១៦៩ គ្រឿង ត្រាក់ទ័រ និងរថយន្តប៊ុលដូហ្សែរចំនួន ៤៣ គ្រឿង ម៉ូតូចំនួន ១៧៣ គ្រឿង គោយន្តចំនួន ២៧១ គ្រឿងផងដែរ។
លោក ភក្ត្រា ក៏បានសម្ដែងការកោតសរសើរចំពោះកិច្ចសហប្រតិបត្តិការ និងការអនុវត្តច្បាប់កន្លងមករបស់អាជ្ញាធរដែនដី និងភាគីដែលពាក់ព័ន្ធក្នុងតំបន់ការពារធម្មជាតិរបស់កម្ពុជាក្នុងនោះអង្គការសម្ព័ន្ធមិត្តសត្វព្រៃបានផ្តោតលើការការពារសក្តានុពលបរិស្ថាន និងធនធានធម្មជាតិក្នុងតំបន់ជួរភ្នំក្រវាញជាពិសេសក្នុងខេត្តកោះកុង ពោធិ៍សាត់ និងកំពង់ស្ពឺ។
ក្រសួងបរិស្ថាន និងអង្គការសម្ព័នមិត្តសត្វព្រៃបានចុះអនុស្សរណៈលើកិច្ចសហប្រតិបត្តិការការពារ និងអភិរក្សតំបន់ជួរភ្នំក្រវាញដែលមានទំហំដីអភិរក្ស ១,៤ លានហិកតាដែលក្នុងនោះរួមមានដែនជម្រកសត្វព្រៃតាតៃ ដែនជម្រកសត្វព្រៃពាមក្រសោប ឧទ្យានជាតិជួរភ្នំក្រវាញខាងត្បូង ឧទ្យានជាតិជួរភ្នំក្រវាញកណ្តាល ឧទ្យានជាតិបទុមសាគរជាដើម។
លោកថ្លែងថា៖ «កិច្ចសហការល្អ និងការអនុវត្តច្បាប់ប្រកបដោយប្រសិទ្ធភាពក្នុងតំបន់ការពារធម្មជាតិពិតជាមានសារៈសំខាន់ណាស់ក្នុងកិច្ចគាំពារបរិស្ថាន ការការពារធនធានធម្មជាតិ ការអភិរក្សជីវៈចម្រុះដែលកម្ពុជាមាន។ ការចូលរួមរបស់អង្គការសម្ព័ន្ធមិត្តសត្វព្រៃ គឺជាការរួមវិភាគទានមួយដ៏មានតម្លៃជាមួយនឹងរាជរដ្ឋាភិបាលកម្ពុជាក្នុងការទប់ស្កាត់បទល្មើសធនធានធម្មជាតិ និងថែរក្សាការពារ និងអភិរក្សធនធានធម្មជាតិ និងជីវចម្រុះនៅកម្ពុជា»។
«នេះគឺជាកិច្ចសហការដ៏ស្មោះត្រង់ និងប្រកបដោយផ្លែផ្កាដែលក្រសួងបរិស្ថាន និងអង្គការសម្ព័ន្ធមិត្តសត្វព្រៃបានធ្វើដើម្បីបុព្វហេតុបរិស្ថាន និងធនធានធម្មជាតិ។ កិច្ចខិតខំប្រឹងប្រែងនេះបានធ្វើឱ្យតំបន់អភិរក្សកាន់តែត្រូវបានការពារយ៉ាងល្អប្រសើរ បទល្មើសគ្រប់ប្រភេទបានថយចុះយ៉ាងច្រើននៅតំបន់ ទាំងបទល្មើសកាប់បំផ្លាញព្រៃឈើ និងបរបាញ់សត្វព្រៃ។ ការការពារបាននូវធនធានធម្មជាតិប្រកបដោយប្រសិទ្ធភាពបានធ្វើឲ្យកម្ពុជាលក់ឥណទានកាបូននៅក្នុងតំបន់ដែនជម្រកសត្វព្រៃតាតៃ និងឧទ្យានជាតិជួរភ្នំក្រវាញខាងត្បូង»។ បច្ចុប្បន្ននេះកម្ពុជាមានតំបន់ការពារធម្មជាតិចំនួន ៦៩ កន្លែងលើទំហំផ្ទៃដី ៧,៣ លានហិកតា៕
