.jpg)
លោក នេត សាវឿន អគ្គស្នងការនគរបាលជាតិ។ Neth Savoeun Page
ភ្នំពេញ៖ លោក នេត សាវឿន អគ្គស្នងការនគរបាលជាតិចេញសេចក្តីណែនាំអនុញ្ញាតឲ្យប្រើប្រាស់ជាផ្លូវការនូវប្រព័ន្ធគ្រប់គ្រងទិន្នន័យបទល្មើសព្រហ្មទណ្ឌ (E-Crime2020) ចាប់ពីថ្ងៃទី ១ ខែ ឧសភា ឆ្នាំ ២០២១ ដើម្បីធានានិរន្តរភាព និងសន្តិសុខទិន្នន័យបទល្មើសព្រហ្មទណ្ឌស្ថិតនៅក្នុងនិយាមបណ្ណសារដ្ឋានស្របតាមបច្ចេកវិទ្យាព័ត៌មានវិទ្យា។
យោងតាមសេចក្តីណែនាំចុះថ្ងៃទី ៤ ខែឧសភា ស្តីពីការអនុញ្ញាតឲ្យប្រើប្រាស់ប្រព័ន្ធនេះ បានឱ្យដឹងថា ប្រព័ន្ធនេះជួយដល់មន្ត្រីនគរបាលក្នុងការទាញយកទិន្នន័យបទល្មើសព្រហ្មទណ្ឌចេញពីប្រព័ន្ធទិន្នន័យ (Database) យកទៅប្រើប្រាស់ផ្លូវការសម្រាប់វិភាគ និងវាយតម្លៃអំពីស្ថានភាពបទល្មើសតាមភូមិសាស្ត្រតាមកាលកំណត់។
លោក នេត សាវឿន បញ្ជាក់ក្នុងសេចក្តីណែនាំនេះថា៖ «ត្រូវបានកំណត់ជាគោលការណ៍សម្រាប់រយៈពេលនៃការបញ្ចូលទិន្នន័យបទល្មើសទៅក្នុងប្រព័ន្ធអំឡុងពេល ៤៨ ម៉ោង បន្ទាប់ពីបទល្មើសបានកើតឡើង និងកំណត់ឲ្យកត់ត្រាទិន្នន័យដីកាបង្គាប់ចាប់ពីឆ្នាំ ២០០០ រហូតមកដល់បច្ចុប្បន្នព្រមទាំងត្រូវធ្វើបច្ចុប្បន្នភាពទិន្នន័យជាប្រចាំ»។
លោក នេត សាវឿន បានណែនាំឱ្យស្នងការនៃស្នងការដ្ឋាននគរបាលរាជធានី-ខេត្ត ត្រូវធានានិរន្តរភាពធនធានមន្ត្រី និងការបំពាក់ឧបករណ៍ សម្ភារបច្ចេកទេសរួមទាំងការផ្គត់ផ្គង់អ៊ីនធឺណិតសម្រាប់ផែនសេនាធិការ ឬក្រុមមន្ត្រីមានសមត្ថកិច្ច បញ្ចូលទិន្នន័យបទល្មើសរក្សាទុកក្នុងទិន្នដ្ឋាន។
លោក សាវឿន ក៏បានណែនាំឱ្យនាយកដ្ឋានសរុបផែនការ និងនាយកដ្ឋាននគរបាលព្រហ្មទណ្ឌ ត្រូវពង្រឹងកិច្ចសហការក្នុងការតាមដានត្រួតពិនិត្យទិន្នន័យបទល្មើសព្រហ្មទណ្ឌ ដែលមន្ត្រីជំនាញនៃស្នងការដ្ឋាននគរបាលរាជធានី-ខេត្ត បានកត់ត្រាបញ្ចូលរក្សាទុកក្នុងទិន្នដ្ឋាន និងណែនាំឲ្យបញ្ចូលទិន្នន័យបានត្រឹមត្រូវតាមគោលការណ៍កំណត់។
លោកថ្លែងថា៖ «ផែនព្រហ្មទណ្ឌ និងផែនសេនាធិការនៃស្នងការដ្ឋាននគរបាលរាជធានី-ខេត្ត ត្រូវសហការក្នុងការផ្តល់ឯកសារ ព័ត៌មាន រូបថត ពាក់ព័ន្ធករណីបទល្មើសតាមទម្រង់ឯកភាពគ្នា ដើម្បីធ្វើជាមូលដ្ឋានក្នុងការបញ្ចូលទិន្នន័យរក្សាទុកក្នុងទិន្នដ្ឋានឲ្យបានទាន់ពេលវេលា»។
លោក សាវឿន បន្តថា៖ «ក្នុងករណីដែលស្នងការដ្ឋាននគរបាលរាជធានី-ខេត្ត ពុំមានរូបថតជនសង្ស័យ ឬជនរងគ្រោះ សូមស្នើកិច្ចសហការពីនាយកដ្ឋាននគរបាលព្រហ្មទណ្ឌ ដើម្បីដោះស្រាយផ្តល់ជូន»។
បើយោងតាមសេចក្តីណែនាំនេះ បន្ទាប់ពីទិន្នន័យបទល្មើសដែលត្រូវបានកត់ត្រារក្សាទុកក្នុងទិន្នដ្ឋានរួចហើយ ក្នុងអំឡុងពេល ៤៨ ម៉ោង មន្ត្រីជំនាញកត់ត្រាអាចកែតម្រូវទិន្នន័យបានគ្រប់ចំណុចនៅក្នុងប្រព័ន្ធ។
សេចក្តីណែនាំបន្តថា ប៉ុន្តែបន្ទាប់ពី ៤៨ ម៉ោង ប្រព័ន្ធពុំអនុញ្ញាតឲ្យមន្ត្រីជំនាញកត់ត្រានៃស្នងការដ្ឋាននគរបាលរាជធានី-ខេត្ត កែតម្រូវកំណត់ត្រាបទល្មើសបានឡើយ។ លើកលែងតែស្នងការដ្ឋាននគរបាលរាជធានី-ខេត្ត បានធ្វើសំណើជាផ្លូវការមកប្រធាននាយកដ្ឋានសរុបផែនការ ពិនិត្យសម្រេច និងអនុញ្ញាតឲ្យក្រុមការងារបច្ចេកទេសកែតម្រូវជូន។
លោក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិបានប្រាប់ ភ្នំពេញ ប៉ុស្តិ៍ នៅថ្ងៃទី ៥ ខែឧសភាថា ប្រព័ន្ធនេះ គឺសម្រាប់កត់ត្រាទិន្នន័យបទល្មើស។ អគ្គស្នងការដ្ឋាននគរបាលជាតិបានរៀបចំ និងអនុវត្តប្រព័ន្ធនេះជាង ១០ ឆ្នាំមកហើយ តែពេលនេះអគ្គស្នងការដ្ឋាននគរបាលជាតិធ្វើបច្ចុប្បន្នភាពប្រព័ន្ធនេះឡើងវិញ។
លោកថ្លែងថា៖ «ការជួយដល់នគរបាលជាតិនោះ គឺយើងកត់ត្រាបាននូវសាវតាជាតិជនល្មើស សាវតាជាតិជនរងគ្រោះ តួលេខ និងទិន្នន័យនៃបទល្មើស ទិន្នន័យស្តីពីលទ្ធផលបង្ក្រាប រួមទាំងបណ្តាដីកាតាមចាប់ខ្លួនមួយចំនួនទៀត»៕
