.jpg)
លោក នេត សាវឿន អគ្គស្នងការនគរបាលជាតិ។ ហេង ជីវ័ន
ភ្នំពេញៈ លោក នេត សាវឿន អគ្គស្នងការនគរបាលជាតិបានធ្វើការណែនាំទៅដល់កងកម្លាំងនគរបាលឱ្យធ្វើការការពារសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គមក្នុងពិធីបុណ្យកាន់បិណ្ឌ និងភ្ជុំបិណ្ឌដែលនឹងចាប់ផ្តើមពីថ្ងៃទី ៣ ខែកញ្ញា នេះតទៅ ខណៈដែលក្រសួងសុខាភិបាលអំពាវនាវឲ្យប្រជាពលរដ្ឋត្រូវបន្តយកចិត្តទុកដាក់ការពារខ្លួនកុំឲ្យឆ្លងជំងឺកូវីដ ១៩ នៅក្នុងពិធីបុណ្យនេះ។
លោក នេត សាវឿន បានដាក់ចេញនូវសេចក្តីណែនាំមួយចំនួនក្នុងគោលបំណងធានាឲ្យបាននូវស្ថិរភាពសន្តិសុខសណ្តាប់ធ្នាប់សាធារណៈ សុវត្ថិភាពសង្គមសំដៅបង្កបរិយាកាសសប្បាយរីករាយជូនប្រជាពលរដ្ឋក្នុងឱកាសបុណ្យកាន់បិណ្ឌ បុណ្យភ្ជុំបិណ្ឌ តាមប្រពៃណី ទំនៀមទម្លាប់ដ៏រុងរឿងរបស់ជាតិដែលនឹងប្រព្រឹត្តទៅចាប់ពីថ្ងៃទី ៣ ដល់ថ្ងៃទី ១៨ ខែ កញ្ញា ឆ្នាំ ២០២០។
លោកថ្លែងថា៖ «នាយកដ្ឋានកណ្តាល នាយកដ្ឋានអង្គភាពជំនាញ និងស្នងការដ្ឋាននគរបាលរាជធានី-ខេត្តត្រូវចាត់វិធានការអនុវត្តឱ្យបានម៉ឺងម៉ាត់ដោយត្រូវយកចិត្តទុកដាក់ បង្កើនការក្តាប់នូវសភាពការណ៍ និងព័ត៌មាននានាពាក់ព័ន្ធសន្តិសុខ និងសណ្តាប់ធ្នាប់សង្គម ជាពិសេសសកម្មភាពភេរវកម្ម ឧក្រិដ្ឋកម្ម និងសកម្មភាពល្មើសច្បាប់ផ្សេងៗទៀត ដើម្បីចាត់វិធានការបង្ការ ទប់ស្កាត់ និងបង្ក្រាបឲ្យមានប្រសិទ្ធភាពទាន់ពេលវេលា»។
លោក នេត សាវឿន បានសង្កត់ធ្ងន់ថា នៅតាមបណ្តាភូមិឃុំ ត្រូវគ្រប់គ្រងវិធានការឱ្យបានហ្មត់ចត់ ដើម្បីទប់ស្កាត់មិនឱ្យមុខសញ្ញាមានឱកាសធ្វើសកម្មភាពបង្កអសន្តិសុខ ឬគ្រោះថ្នាក់ដល់អាយុជីវិត និងបង្កមហន្តរាយដល់ទ្រព្យសម្បត្តិរបស់ប្រជាពលរដ្ឋឡើយ។ លោកក៏បានបញ្ជាឱ្យដាក់កម្លាំងយាមល្បាត ការពារផ្ទះសំបែងទ្រព្យសម្បត្តិប្រជាពលរដ្ឋដែលធ្វើដំណើរទៅស្រុកកំណើត ឬទៅសម្រាកកម្សាន្តនៅតាមតំបន់នានា នាឱកាសឈប់សម្រាកនេះ។
ជាមួយគ្នានេះដែរលោកបានជំរុញឲ្យមានការយកចិត្តទុកដាក់ រឹតបន្តឹងការអនុវត្តច្បាប់ចរាចរណ៍ផ្លូវគោក ជាពិសេសត្រូវត្រួតពិនិត្យឲ្យបានហ្មត់ចត់ នៅគ្រប់គោលដៅដោយអប់រំប្រជាពលរដ្ឋឱ្យប្រុងប្រយ័ត្នចំពោះគ្រោះអគ្គិភ័យ និងគ្រោះមហន្តរាយនានា និងត្រូវពង្រឹងបន្ថែម ការងារប្រចាំបញ្ជាគ្រប់ថ្នាក់ដើម្បីត្រៀមអន្តរាគមន៍ឲ្យបានទាន់ពេលវេលា។
ក្នុងពិធីកាន់បិណ្ឌ និងភ្ជុំបិណ្ឌនេះដែរអ្នកនាំពាក្យនៃក្រសួងសុខាភិបាលលោកស្រី ឱ វណ្ណឌីន បានអំពាវនាវឱ្យប្រជាពលរដ្ឋទាំងអស់ត្រូវការពារខ្លួន ប្រុងប្រយ័ត្នកុំឱ្យមានការចម្លងជំងឺកូវីដ ១៩ និងពិសេសត្រូវរក្សាសុវត្ថិភាពអនាម័យចំណីអាហារ ឱ្យបានត្រឹមត្រូវ ដោយចៀសវាងបញ្ហាកើតមានឡើងដែលបណ្តាលមកពីម្ហូបអាហារ។
លោកស្រីថ្លែងនៅថ្ងៃពុធម្សិលមិញថា មិនត្រូវដាក់ចំណីអាហារច្របូកច្របល់ចូលគ្នា កុំទុកអាហារក្នុងរយៈពេលយូរដែលអាចធ្វើឱ្យម្ហូបនោះផ្អូមធ្វើឱ្យអ្នកបរិភោគឈឺពោះ រាករូស ក្អួតចង្អោរ ឬពុលអាហារជាដើម។
លោកស្រីថ្លែងថា៖ «មួយវិញទៀតសូមបងប្អូនចៀសវាងនូវការប្រើប្រាស់ស្រាសដែលផលិតមិនត្រឹមត្រូវ ដែលកន្លងមកមានករណីពុលស្រាសដោយសារការយកមេតាណុលមកលាយដើម្បីឱ្យទៅជាស្រា។ ដូចនេះត្រូវចៀសវាងការយកមេតាណុលមកលាយធ្វើជាស្រា ត្រូវបិតស្រាសតាមរបៀបពីបុរាណ»។
ទន្ទឹមនឹងនេះដែរ លោកស្រី វណ្ណឌីន ក៏បានអំពាវនាវទៅដល់ប្រជាពលរដ្ឋត្រូវអនុវត្តឱ្យបានខ្ជាប់ខ្ជួននូវវិធានការការពារខ្លួនកុំឱ្យមានការចម្លងជំងឺកូវីដ១៩នៅតាមទីវត្តអារាម ដោយអនុវត្តវិធានការសាមញ្ញៗដូចជា សម្អាតដៃឲ្យបានញឹកញាប់ស្អាតជានិច្ច ពាក់ម៉ាស់ជាប្រចាំពេលទៅវត្តអារាម និងរក្សាគម្លាតសុវត្ថិភាពជាដើម៕
