.jpg)
ទិដ្ឋភាពនៃការត្រួតពិនិត្យកងកម្លាំងនគរបាលនៅស្នងការដ្ឋាននគរបាលខេត្តបន្ទាយមានជ័យកាលពីថ្ងៃទី ៣០ ខែតុលា ឆ្នាំ ២០១៩។ រូបថត នគរបាលជាតិ
ភ្នំពេញៈ លោក នេត សាវឿន អគ្គស្នងការនគរបាលជាតិ និងមន្ត្រីនគរបាលជាន់ខ្ពស់ជាច្រើនរូបបានដាក់ចេញនូវបទបញ្ជាដល់នគរបាលការពារព្រំដែនទាំងអស់ឲ្យពង្រឹង និងបង្កើនការត្រួតពិនិត្យរាល់ចលនារបស់ឧទ្ទាមក្រៅច្បាប់នៅតាមបណ្ដោយព្រំដែនកម្ពុជា-ថៃ បើមានសកម្មភាពត្រូវកម្ចាត់ចោលភ្លាមៗ ដើម្បីរក្សាសន្តិភាព។
លោក ឆាយ គឹមខឿន អគ្គស្នងការរងនគរបាលជាតិបានបញ្ជាឲ្យកងកម្លាំងនគរបាលខេត្តបន្ទាយមានជ័យទាំងអស់ត្រូវចូលរួមសហការ ទន្ទឹមគ្នានេះដែរលោក ខេង សុមេធ មេបញ្ជាការនគរបាលជាតិប្រចាំទិសភូមិភាគទី ៤ និងទី ៥ ក៏បានធ្វើការណែនាំដល់នគរបាលអន្តរាគមន៍ព្រំដែន និងនគរបាលតម្រួតបទបញ្ជាទាំងអស់ត្រូវតែកម្ចាត់ចោលភ្លាមចំពោះក្រុមចលនាឧទ្ទាមក្រៅច្បាប់។
ការពង្រឹងសន្តិសុខនៅតាមព្រំដែនកម្ពុជា-ថៃធ្វើឡើងក្រោយពេលដែលលោក សម រង្ស៊ី អតីតមេដឹកនាំគណបក្សប្រឆាំងដែលត្រូវបានតុលាការកាត់ទោសឲ្យជាប់ពន្ធនាគារជាច្រើនឆ្នាំដោយករណីដោយឡែកៗពីគ្នា ព្រមទាំងជាប់ចោទទោសក្បត់ជាតិបានប្រកាសជារឿយៗថានឹងវិលត្រឡប់មកចូលកម្ពុជាវិញនៅថ្ងៃទី ៩ ខែវិច្ឆិកា ដោយអំពាវនាវដល់អ្នកគាំទ្របក្សប្រឆាំងចូលរួមធ្វើចលនា ដោយបានអះអាងថាស្ដារលទ្ធិប្រជាធិបតេយ្យនៅកម្ពុជា និងផ្ដល់សេរីភាពដល់ពលរដ្ឋវិញ ខណៈរាជរដ្ឋាភិបាលបានចាត់ទុកទង្វើរបស់លោក សម រង្ស៊ី គឺជាចេតនាធ្វើរដ្ឋប្រហារផ្ដួលរំលំបក្សដែលកំពុងកាន់អំណាចស្របច្បាប់តាមរយៈការបោះឆ្នោត។
លោក ឆាយ គឹមខឿន បានថ្លែងថា៖ «កងកម្លាំងនគរបាលខេត្តបន្ទាយមានជ័យត្រូវចូលរួមការពារសន្តិភាពឱ្យបានជាដាច់ខាត មិនតែប៉ុណ្ណោះត្រូវតែពន្យល់អប់រំប្រជាពលរដ្ឋឱ្យពួកគាត់យល់ដឹងពីតម្លៃសន្តិភាព បើបាត់បង់សន្តិភាពនោះហើយប្រទេសជាតិនឹងធ្លាក់ក្នុងគ្រោះមហន្តរាយនៃសង្គ្រាមសាជាថ្មី»។
ខណៈលោក ខេង សុមេធ អគ្គស្នងការរងនគរបាលជាតិ និងជាមេបញ្ជាការនគរបាលជាតិប្រចាំទិសភូមិភាគទី ៤ និងទី ៥ កាលពីព្រឹកថ្ងៃទី ៣០ ខែតុលា ឆ្នាំ ២០១៩ នេះនៅអង្គភាពនគរបាលអន្តរាគមន៍ រាជធានី-ភ្នំពេញបានធ្វើការអំពាវនាវដល់នគរបាល អន្តរាគមន៍ នគរបាលការពារព្រំដែនគោកទឹក និងនគរបាលតម្រួតបទបញ្ជាទាំងអស់ត្រូវតែកម្ចាត់ចោលភ្លាមចំពោះក្រុមចលនាឧទ្ទាមក្រៅច្បាប់ដែលប៉ុនប៉ងផ្តួលរំលំរបបរាជានិយម និងរាជរដ្ឋាភិបាលស្របច្បាប់ដែលកើតចេញពីការបោះឆ្នោត។
លោក ខេង សុមេធ បានថ្លែងថា៖ «នាប៉ុន្មានថ្ងៃមកនេះ ក្រុមចលនាឧទ្ទាមក្រៅច្បាប់ដែលដឹកនាំដោយលោក សម រង្ស៊ី មានការប៉ុនប៉ងផ្តួលរំលំរាជរដ្ឋាភិបាលស្របច្បាប់ និងផ្តួលរំលំរបបរាជានិយមអាស្រ័យរដ្ឋធម្មនុញ្ញដែលទង្វើទាំងនេះគឺបង្ហាញឲ្យឃើញថា ពួកទាំងនោះប្រឆាំងរដ្ឋធម្មនុញ្ញនៃព្រះរាជាណាចក្រកម្ពុជាតាមរយៈការបង្កើតចលនាសង្គ្រោះជាតិ ដើម្បីបង្កអសន្តិសុខនៅផ្ទៃក្នុងប្រទេសដូចជា ការប៉ុនប៉ងធ្វើឃាតថ្នាក់ដឹកនាំ ការគ្រោងបង្កើតតំបន់អប្បគមន៍នៅតាមព្រំដែន ការពង្រឹងខ្សែរយៈចាត់តាំង ការជ្រើសរើសសកម្មជនតាមខេត្ត ការញុះញង់ កៀរគរកងកម្លាំងប្រដាប់អាវុធ មន្ត្រីរាជការ ពលករ និងពលរដ្ឋ ការប្រើសង្គ្រាមចិត្តសាស្ត្រ ដើម្បីបំពុលព័ត៌មានតាមសង្គមអ្វីជាដើមនោះ ហើយក្នុងនាមយើងជាកងកម្លាំងប្រដាប់អាវុធដែលជាអ្នកការពារប្រជាជន និងប្រទេសជាតិនោះត្រូវតែកម្ចាត់ឲ្យបានចំពោះក្រុមក្បត់ជាតិទាំងនោះ»។
លោក សុមេធ បានឲ្យដឹងថា៖ «កងកម្លាំងប្រដាប់អាវុធ គឺត្រូវតែការពារឲ្យបានដាច់ខាតនូវសុខសន្តិភាព ជាតិ សាសនា ព្រះមហាក្សត្រ ការពាររដ្ឋធម្មនុញ្ញ ការពាររាជរដ្ឋាភិបាលស្របច្បាប់ ហើយត្រូវត្រៀមខ្លួនគ្រប់ពេលវេលា ដើម្បីទទួលបទបញ្ជារបស់ថ្នាក់ដឹកនាំដែលដាក់ជូន ខណៈក្រុមឧទ្ទាមក្រៅច្បាប់ព្យាយាមធ្វើសកម្មភាពណាមួយដែលនាំឲ្យប្រទេសជាតិមានភាពវឹកវរជាដើមនោះ»។
ដាច់ដោយឡែកពីនេះដែរ រដ្ឋបាលខេត្តបន្ទាយមានជ័យបានឲ្យដឹងថា នៅថ្ងៃទី ១ ខែវិច្ឆិកានឹងមានការចល័តកងកម្លាំងប្រដាប់អាវុធដើម្បីចូលរួមហ្វឹកហាត់រួមគ្នាជាមួយកងកម្លាំងឈរជើងក្នុងភូមិសាស្ត្រខេត្ត ដើម្បីបង្កើនការថែរក្សាសន្តិសុខ សណ្ដាប់ធ្នាប់សាធារណៈ និងសុវត្ថិភាព។
ក្នុងសេចក្ដីជូនដំណឹងមួយរបស់រដ្ឋបាលខេត្តបន្ទាយមានជ័យដែលចុះថ្ងៃទី ៣០ ខែតុលា ឆ្នាំ ២០១៩ បានឲ្យដឹងថានឹងមានការចល័តកម្លាំងចេញពីបញ្ជាការទិសទី ១ បន្ទាយមានជ័យ និងពីទីបញ្ជាការដ្ឋានកងរាជអាវុធហត្ថខេត្តឆ្ពោះទៅកាន់ស្នងការដ្ឋាននគរបាលខេត្តក្នុងភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។
ក្រោយពីមានព័ត៌មានចចាមអារ៉ាមថា មានពលរដ្ឋខ្មែរដែលកំពុងធ្វើការនៅប្រទេសថៃជាច្រើនបានចាកចេញចូលមកកម្ពុជានោះ ស្ថានទូតកម្ពុជាប្រចាំនៅប្រទេសថៃបានចេញសេចក្ដីប្រកាសព័ត៌មានកាលពីថ្ងៃទី ៣០ តុលា បានបញ្ជាក់ថា៖ «បច្ចុប្បន្ននេះបងប្អូនពលករខ្មែរនៅក្នុងប្រទេសថៃកំពុងបម្រើការងារតាមធម្មតាពុំមានការធ្វើដំណើរវិលត្រឡប់ទៅប្រទេសកម្ពុជាជាគំហុកដូចដែលសារព័ត៌មានមួយចំនួនបានធ្វើការចុះផ្សាយនោះទេ។ ជាងនេះទៅទៀតភាគីថៃក៏កំពុងតែដំណើរការបន្តទិដ្ឋាការស្នាក់នៅ និងបណ្ណអនុញ្ញាតការងារជូនដល់បងប្អូនពលករអាចស្នាក់នៅ និងធ្វើការនៅក្នុងប្រទេសថៃបន្តទៀតបានរហូតដល់ ឆ្នាំ ២០២២»។
ទូតខ្មែរនៅថៃក៏បានអំពាវនាវឲ្យពលករទាំងអស់រក្សាភាពស្ងៀមស្ងាត់ និងបន្តអនុវត្តការងារជាធម្មតា កុំជឿតាមការផ្សព្វផ្សាយ និងការញុះញង់របស់សារព័ត៌មានមួយចំនួនដែលជាហេតុបង្កឱ្យបងប្អូនខាតបង់ថវិកា ពេលវេលា និងអាចត្រូវនិយោជកបញ្ឈប់ពីការងារទៀតផង។
អតីតមន្ត្រីជាន់ខ្ពស់នៃអតីតគណបក្សសង្គ្រោះជាតិលោក អ៊ូ ច័ន្ទរ័ត្ន បានចាត់ទុកការណែនាំរបស់មន្ត្រីជាន់ខ្ពស់របស់អគ្គស្នងការរងនគរបាលជាតិ ហើយ និងការចល័តកម្លាំងថា ជាការប្រតិកម្មហួសហេតុទៅនឹងផែនការវិលត្រឡប់របស់លោក សម រង្ស៊ី ដែលធ្វើឲ្យប៉ះពាល់ដល់អារម្មណ៍ និងសិទ្ធិសេរីភាពរបស់ប្រជាពលរដ្ឋ។
លោកបញ្ជាក់ថា៖ «ការប្រឹងប្រែងរបស់រដ្ឋាភិបាលក្នុងការទប់ស្កាត់នេះវាជារឿងមួយដែលហួសហេតុ។ ការបង្ហាញកម្លាំងដើម្បីបង្ក្រាបទៅលើអ្នកគាំទ្រផែនការវិលត្រឡប់របស់លោក សម រង្ស៊ី នៅថ្ងៃទី ៩ ខែវិច្ឆិកា វាគឺការគំរាមកំហែងដល់សិទ្ធិសេរីភាពរបស់ប្រជាពលរដ្ឋហើយនឹងធ្វើឲ្យស្ថានភាពនយោបាយកាន់តែធ្ងន់ធ្ងរ»។
លោក ឯម សុវណ្ណារ៉ា សាស្ត្រាចារ្យវិទ្យាសាស្ត្រនយោបាយបានថ្លែងថា យុទ្ធនាការរបស់រដ្ឋាភិបាលនាពេលបច្ចុប្បន្ននេះបាននិងកំពុងធ្វើឲ្យស្ថានភាព នយោបាយកាន់តែធ្ងន់ធ្ងរដែលធ្វើឲ្យប្រទេសកម្ពុជាអាចប្រឈមមុខនឹងការបាត់បង់ EBA និង GSP ដូច្នេះរាជរដ្ឋាភិបាលគួរតែបង្កបរិយាកាសនយោបាយល្អប្រសើរដើម្បីថែរក្សា EBA និង GSP។
លោក ឯម សុវណ្ណារ៉ា បានបញ្ជាក់ឲ្យដឹងកាលពីម្សិលមិញផងដែរថា៖ «កាលណាបង្កើនការហ្វឹកហ្វឺន វាបញ្ជាក់នូវរូបភាពមួយមិនល្អសម្រាប់បរិយាកាសសុវត្ថិភាព សន្តិសុខ ដែលធ្វើឲ្យប្រជាពលរដ្ឋកាន់តែមានក្តីបារម្ភ ខណៈថ្ងៃទី ៩ វិច្ឆិកា ខិតជិតមកដល់មានប្រជាជនខ្លះបានធ្វើដំណើរវិលឡប់ទៅស្រុកកំណើតវិញ។ នៅក្នុងស្ថានភាពបច្ចុប្បន្ន រាជរដ្ឋាភិបាលគួរតែស្វែងរកបរិយាកាសនយោបាយល្អសម្រាប់ជាអំណះអំណាងទៅសហគមន៍អន្តរជាតិ ពិសេសសហរដ្ឋអាមេរិក និងសហគមន៍អឺរ៉ុបក្នុងការរក្សា EBA និង GSP ហើយបើកម្ពុជានៅតែបន្តបង្ហាញស្ថានភាពតានតឹងបែបនេះ EBA និង GSP អាចប្រឈមនឹងការបាត់បង់»៕
