.jpg)
អគ្គស្នងការនគរបាលជាតិ លោក នេត សាវឿន ថ្លែងនាពេលកន្លងមក។ ហេង ជីវ័ន
ភ្នំពេញៈ អគ្គស្នងការនគរបាលជាតិ លោក នេត សាវឿន បានព្រមានទៅស្នងការនគរបាលគ្រប់រាជធានី-ខេត្ត ឱ្យដកបារ៉ាស់ទាំងអស់ចេញពីតាមដងផ្លូវវិញ ខណៈដែលលោកលើកឡើងថា មានមន្ត្រីនគរបាលចរាចរណ៍នៅក្នុងខេត្តមួយចំនួនបានរឹតបន្តឹងការអនុវត្តច្បាប់ចរាចរណ៍ខុសទៅនឹងគោលការណ៍ណែនាំរបស់ថ្នាក់លើ។
សារជាសំឡេងបែកធ្លាយដែលត្រូវបានគេចែកចាយតៗគ្នាតាមបណ្តាញសង្គមកាលពីថ្ងៃម្សិលមិញ លោក នេត សាវឿន បានព្រមានថា ស្នងការគ្រប់រាជធានី-ខេត្ត ទាំងអស់នឹងទទួលខុសត្រូវចំពោះមុខច្បាប់ ប្រសិនបើក្នុងខេត្តរបស់ខ្លួននៅតែដាក់បារ៉ាស់ និងហៅយានយន្តរបស់ពលរដ្ឋមកត្រួតពិនិត្យ ទាំងដែលអ្នកបើកបរមិនបានល្មើសនឹងច្បាប់ចរាចរណ៍។
លោកបញ្ជាក់ថា៖ «ស្នងការរាជធានី-ខេត្ត និយាយគ្នាឡើងវិញចុងក្រោយ ទី១ ឈប់ដាក់បារ៉ាស់តាមផ្លូវ ទី២ បាននិយាយច្បាស់ជាមួយគ្នាហើយថា ទាល់តែល្មើសបានយើងហៅគេពិនិត្យ។ ឥឡូវហ្នឹង បងប្អូនគេរាយការណ៍មកថា នៅតាមផ្លូវ ពិសេសនៅខេត្តកំពង់ចាម ត្បូងឃ្មុំ មណ្ឌលគិរី ឡានគេអត់ល្មើសក៏ហៅគេចូលច្រកបារ៉ាស់ដែរ ហើយបានឱ្យទៅ។ ឥឡូវម៉ោងហ្នឹងព្រឹកហ្នឹង (២៦ ឧសភា) ដកបារ៉ាស់ចេញឱ្យអស់ គ្រប់ផ្លូវជាតិទាំងអស់ និងគ្រប់ខេត្ត។ ស្នងការ លោកឯងដើរមើល ហើយខេត្តណានៅមានទៀត គឺត្រូវទទួលខុសត្រូវចំពោះមុខច្បាប់»។
កាលពីថ្ងៃម្សិលមិញ លោក ឆាយ គឹមខឿន អ្នកនាំពាក្យអគ្គស្នងការនគរបាលជាតិបានសម្តែងការមិនពេញចិត្តចំពោះអ្នកដែលបានធ្វើឱ្យបែកធ្លាយសំឡេង លោក នេត សាវឿន ដោយលោកបញ្ជាក់ថា សំឡេងនោះគឺជាបទបញ្ជាផ្ទៃក្នុង។
ប៉ុន្តែលោកបញ្ជាក់ថា ការបញ្ជារបស់លោក នេត សាវឿន នេះគឺដោយសារនគរបាលចរាចរណ៍បានអនុវត្តយុទ្ធនាការ រឹតបន្តឹងចរាចរណ៍ខុសទៅនឹងគោលការណ៍របស់ថ្នាក់ដឹកនាំដែលបានកំណត់ឱ្យពិន័យអ្នកបើកបរម៉ូតូល្មើសច្បាប់ចំនួន ៧ ចំណុច និងអ្នកបើកបររថយន្តលើ្មសច្បាប់ចំនួន ៩ ចំណុចប៉ុណ្ណោះ ដោយមិនបានចេញគោលការណ៍ឱ្យឃាត់ត្រួតពិនិត្យតាមបែបរដ្ឋបាលដូចជាការដាក់បារ៉ាស់នៅតាមដងផ្លូវនោះទេ។
លោកថ្លែងថា៖ «អ៊ីចឹងបងប្អូន (នគរបាល) បានដាក់បារ៉ាស់បានធ្វើឱ្យប៉ះពាល់ដល់អារម្មណ៍របស់ប្រជាពលរដ្ឋ។ បើគេអត់ល្មើសទេ គឺឱ្យគាត់ធ្វើចរាចរណ៍ចុះ ប៉ុន្តែបើគាត់បើកឡានប្រើទូរស័ព្ទ និងអត់ដាក់ខ្សែក្រវាត់ ឬជ្រែរញ៉េញ៉ៃ ដែលគំរាមកំហែងសុវត្ថិភាពនៅតាមដងផ្លូវ អាហ្នឹងបាននគរបាលចរាចរណ៍ហៅត្រួតពិនិត្យ និងផាកពិន័យរួមទាំងមានសិទ្ធិត្រួតពិនិត្យមើលបណ្ណ ឬលិខិតឆៀកអីផ្សេងទៀត»។
ទោះជាយ៉ាងណាលោក ឆាយ គឹមខឿន អះអាងថា ថ្វីដ្បិតមានការបញ្ជាឱ្យដកបារ៉ាស់ទាំងអស់ចេញពីតាមផ្លូវក្ដី ប៉ុន្តែប៉ូលិសនៅតែត្រូវបានដាក់ពង្រាយដូចដើមនៅតាមដងផ្លូវ ដើម្បីតាមឃ្លាំមើលការបើកបរដែលល្មើសទៅនឹងច្បាប់ចរាចរណ៍។
កាលពីកន្លងមកលោក ហ៊ឹម យ៉ាន អគ្គស្នងការរងនគរបាលជាតិ និងជាអគ្គលេខាធិការគណៈកម្មាធិការជាតិសុវត្ថិភាពចរាចរណ៍ផ្លូវគោកថ្លែងថា នគរបាលចរាចរណ៍ គឺបានកំណត់បទល្មើសចរាចរណ៍ជាអាទិភាពចំនួន ៧ សម្រាប់អ្នកបើកបរម៉ូតូ និង ៩ ចំណុចសម្រាប់អ្នកបើកបររថយន្តដែលត្រូវរឹតបន្តឹងដូចជាអ្នកបើកបរម៉ូតូ មិនពាក់មួកសុវត្ថិភាព ស្រវឹង មិនគោរពភ្លើងសញ្ញា និងស្លាកសញ្ញា ល្មើសការបត់ និងវ៉ាជែង ដឹកលើសចំណុះ គ្មានស្លាកលេខ ប្រើប្រាស់ទូរស័ព្ទដោយគ្មានកាស គ្មានបណ្ណបើកបរ មិនពាក់ខ្សែក្រវាត់។
លោក ឡោ សុខា ស្នងការនគរបាលខេត្តមណ្ឌលគិរីបានថ្លែងថា លោកបានបញ្ជាឱ្យដកបារ៉ាស់ចេញពីតាមដងផ្លូវទាំងអស់ចាប់ពីថ្ងៃទី ២៦ ខែឧសភាតទៅ បន្ទាប់ពីទទួលបានបញ្ជាពីលោក នេត សាវឿន។ ប៉ុន្តែលោកបន្តថា កងកម្លាំងគឺនៅតែដាក់ពង្រាយតាមផ្លូវ ដើម្បីចាំឃាត់ក្នុងករណីមានអ្នកបើកបរល្មើសច្បាប់ចរាចរណ៍ និងដើម្បីបង្ក្រាបបទល្មើសធនធានធម្មជាតិ និងបទល្មើសព្រហ្មទណ្ឌផ្សេងៗទៀត។
លោកថា៖ «ខ្ញុំជាមន្ត្រីនគរបាលនៅក្នុងខេត្ត គឺត្រូវតែអនុវត្តតាមបទបញ្ជារបស់ថ្នាក់លើ។ ពីមុនមកមានដាក់បារ៉ាស់ ប៉ុន្តែចាប់ពីម៉ោងនេះទៅ គឺអត់មានទេ។ កាលពីមុនយើងដាក់បារ៉ាស់ហ្នឹងក៏ដើម្បីឆែក និងដើម្បីបាញ់វាស់កម្ដៅពលរដ្ឋដែលធ្វើដំណើរឆ្លងកាត់តាមខេត្តខ្ញុំដើម្បីរកកូវីដ»។
រដ្ឋាភិបាលបានចាប់ផ្ដើមអនុវត្តការរឹតបន្តឹងច្បាប់ចរាចរណ៍តាមអនុក្រឹត្យថ្មីចាប់ពីថ្ងៃទី ១ ខែឧសភា ដើម្បីផាកពិន័យអ្នកបើកបរល្មើសច្បាប់ចរាចរណ៍ ដោយការផាកពិន័យបានកើនឡើងទៅដល់ពី ៣ ទៅ ៥ ដងនៃអនុក្រឹត្យចាស់ដើម្បីធ្វើយ៉ាងណា កាត់បន្ថយគ្រោះថ្នាក់ចរាចរណ៍ស្លាប់ និងរបួសជាអតិបរមាក្នុងឆ្នាំ ២០២០ បន្ទាប់ពីបានកើនឡើងយ៉ាងគំហុកក្នុងឆ្នាំ ២០១៩។
តួលេខរបស់គណៈកម្មាធិការជាតិសុវត្ថិភាពចរាចរណ៍ផ្លូវគោកបានបង្ហាញថា ចាប់ពីថ្ងៃទី ១ ដល់ថ្ងៃទី ២៤ ខែឧសភា គ្រោះថ្នាក់ចរាចរណ៍បានកើតឡើងចំនួន ១៦៤ លើកបណ្ដាលឱ្យមនុស្សស្លាប់ចំនួន ៩០ នាក់ និងរបួសធ្ងន់ធ្ងរចំនួន ២៣០ នាក់។
កាលពីថ្ងៃទី ១៥ ឧសភាលោក ស ខេង រដ្ឋមន្ត្រីក្រសួងមហាផ្ទៃថ្លែងថា ចាប់តាំងពីមានការរឹតបន្តឹងច្បាប់រយៈពេល ២ សប្ដាហ៍ក្នុងខែឧសភា នេះគឺបានធ្វើឱ្យគ្រោះថ្នាក់ចរាចរណ៍បណ្តាលឲ្យស្លាប់ និងរបួសមានការថយចុះគួរឱ្យកត់សម្គាល់៕
