ភ្នំពេញៈ លោក នេត សាវឿន អគ្គស្នងការនគរបាលជាតិបានចេញសេចក្ដីណែនាំដល់នគរបាលទូទាំងប្រទេសឲ្យត្រៀមកម្លាំងដើម្បីរក្សាសណ្តាប់ធ្នាប់ និងសុវត្ថិភាពសង្គមក្នុងឱកាសពិធីបុណ្យចូលឆ្នាំថ្មីប្រពៃណីជាតិដែលនឹងប្រព្រឹត្តទៅនៅសប្ដាហ៍ក្រោយ ដើម្បីជាវិធានការស្ថិរភាពសន្តិសុខ និងត្រួតពិនិត្យចំនួនជាក់លាក់នៃការប្រមូលផ្ដុំដែលអាចចូលរួមទប់ស្កាត់ការរីករាលដាលនៃជំងឺកូវីដ ១៩។
ពិធីបុណ្យចូលឆ្នាំនឹងចាប់ផ្ដើមរយៈពេល ៤ ថ្ងៃពីថ្ងៃទី ១៣-១៦ ខែ មេសា ឆ្នាំ ២០២០។
លោក នេត សាវឿន បានឲ្យដឹងនៅក្នុងសេចក្ដីណែនាំថា៖ «(សេចក្ដីណែនាំនេះ) ដើម្បីចូលរួមជាមួយស្ថាប័នពាក់ព័ន្ធក្នុងការអនុវត្តវិធានការ បង្ការ ទប់ស្កាត់ ការរាតត្បាតនៃជំងឺកូវីដ១៩»។
យោងតាមសេចក្តីណែនាំរបស់អគ្គស្នងការនគរបាលជាតិចុះថ្ងៃទី ៣ ខែមេសា បានណែនាំឲ្យនាយកដ្ឋានអង្គភាពជំនាញចំណុះអគ្គស្នងការនគរបាលជាតិ និងស្នងការដ្ឋាននគរបាលគ្រប់រាជធានី ខេត្ត ទូទាំងប្រទេសទាំងអស់ត្រូវកសាងផែនការការពារសន្តិសុខ សណ្តាប់ធ្នាប់ និងសុវត្ថិភាពសង្គមតាមជំនាញ និងភូមិសាស្ត្ររៀងៗខ្លួន។
សេចក្តីណែនាំដដែលបន្តថា គ្រប់អង្គភាពទាំងអស់ត្រូវក្តាប់សភាពការណ៍ឲ្យបាន និងបង្ក្រាបរាល់សកម្មភាពភេរវកម្ម ឧក្រិដ្ឋកម្ម សកម្មភាពប៉ុនប៉ងបង្កចលាចលសង្គម និងបទល្មើសផ្សេងៗទៀតដោយហាមមិនឲ្យមានអំពើឆក់ លួច ប្លន់ ការជួញដូរគ្រឿងញៀន ក្មេងទំនើង ល្បែងស៊ីសង និងល្បែងច្រកថង់ទឹកដែលនាំឲ្យគ្រោះថ្នាក់បង្កការភ័យខ្លាចដល់ប្រជាពលរដ្ឋជាដើម។
សេចក្តីណែនាំបញ្ជាក់ថា៖ «ត្រូវត្រៀមលក្ខណសម្បត្តិទាំងកម្លាំងអន្តរាគមន៍ និងមធ្យោបាយសម្ភារសំដៅរួមចំណែកក្នុងការអនុវត្តសេចក្តីណែនាំរបស់រដ្ឋាភិបាល ស្ថាប័នជំនាញពាក់ព័ន្ធ និងគណៈកម្មការប្រយុទ្ធប្រឆាំងជំងឺកូវីដ ១៩ គ្រប់ថ្នាក់»។
លោក នេត សាវឿន អគ្គស្នងការនគរបាលជាតិបានលើកឡើងក្នុងសេចក្តីណែនាំ ថាកម្លាំងនគរបាលទូទាំងប្រទេសត្រូវទប់ស្កាត់រាល់ការប្រមូលផ្ដុំជួបជុំរៀបចំកម្មវិធីកម្សាន្ដបែបប្រពៃណី ពិធីជប់លៀងរាំកម្សាន្ដនៅតាមទីសាធារណៈ និងតាមសហគមន៍។
លោកបញ្ជាក់ថា រាល់ការជួបតាមបែបសាសនា ឬតាមរូបភាពណាក៏ដោយ ត្រូវតែធ្វើការហាមឃាត់ លើកលែងការជួបជុំជាលក្ខណៈគ្រួសារក្នុងរូបភាពតូចៗតាមគេហដ្ឋាន នោះនឹងមិនត្រូវបានហាមឃាត់នោះឡើយ។
លោកបន្ថែមថា៖ «បន្តសហការជាមួយអាជ្ញាធរមូលដ្ឋានក្តាប់អំពីវត្តមាន និងស្ថានភាពរបស់ពលករចំណាកស្រុកដែលវិលត្រឡប់មកពីក្រៅប្រទេស ដើម្បីបន្តអប់រំ និងតាមដានការអនុវត្តរបស់ក្រសួងសុខាភិបាលក្នុងការបង្ការ ទប់ស្កាត់ការឆ្លងរាលដាលជំងឺកូវីដ ១៩។ មានវិធានការសង្គ្រោះក្នុង ខណៈពេលដែលរកឃើញពលរដ្ឋណាម្នាក់មានការសង្ស័យ ឬមានសញ្ញាផ្ទុកជំងឺ កូវីដ ១៩»។
ក្រៅពីនេះលោក នេត សាវឿន ក៏បានណែនាំឲ្យត្រូវបង្កើនកិច្ចសហការជាមួយអាជ្ញាធរ និងស្ថាប័នមានសមត្ថកិច្ចគ្រប់ជាន់ថ្នាក់ ដើម្បីដោះស្រាយនូវរាល់សំណូមពររបស់គណៈកម្មការប្រយុទ្ធប្រឆាំងជំងឺកូវីដ ១៩ គ្រប់ថ្នាក់ឲ្យបានទាន់ពេលវេលា ពិសេសការដាក់កម្លាំងការពារតាមគោលដៅអាទិភាពដូចជា មណ្ឌលសុខភាព មន្ទីរពេទ្យបង្អែក មន្ទីរពេទ្យ និងគោលដៅដាក់ឲ្យនៅដោយឡែកដែលត្រូវបានកំណត់ដោយគណៈកម្មការប្រយុទ្ធប្រឆាំងជំងឺកូវីដ ១៩។
លោក ដួង តេង អធិការស្រុកពញ្ញាឮ ខេត្តកណ្តាលបានប្រាប់ភ្នំពេញប៉ុស្តិ៍ពីម្សិលមិញថា ស្រុករបស់លោកបានត្រៀមកម្លាំងប្រចាំការរួចជាស្រេច ដើម្បីចេញអន្តរាគមន៍រាល់បាតុភាពដែលកើតមានឡើងក្នុងអំឡុងពេលដែលប្រជាពលរដ្ឋកម្ពុជាចូលរួមប្រារព្ធពិធីបុណ្យចូលឆ្នាំខ្មែរ។
លោកបន្តថា៖ «ខ្ញុំបានត្រៀមកម្លាំងអន្តរាគមន៍ ៣០ នាក់ និងតាមប៉ុស្តិ៍នោះគឺត្រៀម ៥ នាក់ ដើម្បីត្រៀមចរាចរណ៍ សណ្តាប់ធ្នាប់ និងនៅពេលមានហេតុការណ៍ភ្លើងឆេះអីផ្សេងៗដោយ ២៤ ម៉ោង លើ ២៤ ម៉ោង។ ចំណែកបញ្ហាការជួបប្រមូលផ្តុំ ខ្ញុំគិតថាប្រជាពលរដ្ឋមានការយល់ច្រើនណាស់ គាត់នឹងមិនមានការប្រមូលផ្តុំអីច្រើន ក្រៅពីការជួបជុំគ្រួសារគាត់ទេ ព្រោះគាត់មានការយល់ដឹងខ្លួនឯង»។
ប៉ុន្តែយ៉ាងណាលោក ដួង តេង បានអះអាងថា ក្នុងនាមកងកម្លាំងការពារសុវត្ថិភាពសង្គមនឹងត្រៀមខ្លួនជានិច្ច និងសូមអំពាវនាវដល់ប្រជាពលរដ្ឋ គួរមានការប្រុងប្រយ័ត្នខ្ពស់ និងចៀសវាងមានការប្រមូលផ្តុំតាមរូបភាពផ្សេងៗ ហើយចូលរួមគោរពច្បាប់ចរាចរណ៍ទាំងអស់គ្នា ដើម្បីរីករាយក្នុងឱកាសចូលឆ្នាំថ្មី៕
វីដេអូ៖