កំពង់ធំ: អគ្គស្នងការនគរបាលជាតិលោក នេត សាវឿន បានសម្រេចផ្អាកការងារជាបណ្តោះអាសន្នចំពោះលោកវរសេនីយ៍ឯក រុំ សុវិជ្ជា នាយការិយាល័យចរាចរណ៍ជើងគោកនៃស្នងការដ្ឋាននគរបាលខេត្តកំពង់ធំ ពាក់ព័ន្ធការបើករថយន្តទាំងស្រវឹងបុកឲ្យខូចខាតទ្រព្យសម្បត្តិសាធារណៈ និងជេរប្រមាថអភិបាលខេត្តកំពង់ធំ។
តាមសេចក្តីសម្រេចរបស់លោក នេត សាវឿន ចុះថ្ងៃទី ១៦ ឧសភា ដែលភ្នំពេញប៉ុស្ដិ៍ទទួលបានពីម្សិលមិញឲ្យដឹងថា ត្រូវបានផ្អាកការងារបណ្តោះអាសន្នចំពោះវរសេនីយ៍ឯក រុំ សុវិជ្ជា អត្តលេខ ០៣៨៧៤។
ក៏ប៉ុន្តែមន្ត្រីនគរបាលរូបនេះត្រូវមកបង្ហាញខ្លួនរៀងរាល់ម៉ោងធ្វើការនៅការិយាល័យបុគ្គលិកនៃស្នងការដ្ឋាននគរបាលខេត្តកំពង់ធំ។
លោក ហ៊ឹម យ៉ាន អគ្គស្នងការរងនគរបាលជាតិកាលពីម្សិលមិញបានបដិសេធការធ្វើអត្ថាធិប្បាយបន្ថែមជុំវិញករណីនេះ ដោយលោកអះអាងថាកំពុងជាប់រវល់មិនអាចនិយាយទូរស័ព្ទបាន។
ប៉ុន្ដែលោក ហ៊ឹម យ៉ាន ត្រូវបាន Fresh News ដកស្រង់សម្ដីពីម្សិលមិញថា អគ្គស្នងការដ្ឋាននគរបាលជាតិបានចាត់ទុកករណីរបស់លោក រុំ សុវិជ្ជា ជាអំពើល្មើសនឹងបទបញ្ជារបស់នគរបាលជាតិដែលមិនធ្វើគំរូក្នុងការគោរពអនុវត្តច្បាប់ស្តីពីចរាចរណ៍ផ្លូវគោកដោយបានបើកបររថយន្តក្នុងស្ថានភាពស្រវឹងបង្កការខូចខាតទ្រព្យសម្បត្តិសាធារណៈ និងប្រមាថដល់អ្នកដទៃ។
លោកបន្តថា ការបានសម្រេចព្យួរការងារនេះគឺដើម្បីរង់ចាំការសម្រេចជាថ្មី។ ក្រោយចេញលិខិតនេះរួចអគ្គស្នងការនគរបាលជាតិបានត្រៀមលិខិតមួយផ្សេងទៀតគឺគ្រោងស្នើសុំទៅលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃដើម្បីដកតំណែងចោលតែម្តង។
លោក សុខ លូ អភិបាលខេត្តកំពង់ធំបានថ្លែងពីម្សិលមិញថា លោកគាំទ្រចំពោះចំណាត់ការរបស់លោក នេត សាវឿន ដែលបានអនុវត្តច្បាប់ទៅលើលោក រុំ សុវិជ្ជា ចំពោះកំហុសឆ្គងរបស់គាត់។
លោកថា៖ «ទីតាំងកើតហេតុដែលលោក រុំ សុវិជ្ជា បង្កឡើងនេះគឺមានភ្លើងបំភ្លឺគ្រប់គ្រាន់ និងមានចំណាំងប្លាតទៀតគឺមកពីគាត់ស្រវឹង បើកបរមិនប្រយ័ត្នខ្លួនគាត់ បែរជាមកជេរប្រមាថខ្ញុំទៅវិញ។ កន្លងមកនេះថ្នាក់លើក៏ធ្លាប់ព្រមានគាត់ដែរ រឿងគាត់ទៅស្រែកឡូឡាក្នុងមន្ទីរពេទ្យខេត្តកាលពី ៣ ខែមុន ពេលគាត់ប្រព្រឹត្តអ៊ីចឹង ធ្វើឲ្យបាត់បង់តម្លៃយើងជាមន្ត្រី...»។
លោក រុំ សុវិជ្ជា ពីម្សិលមិញមិនអាចស្វែងរកប្រភពទាក់ទងសុំការបញ្ជាក់ពីករណីនេះបានទេ។
ប៉ុន្ដែតាមសំឡេងបែកធ្លាយក្នុងហ្វេសប៊ុកឲ្យដឹងថា កាលពីម៉ោង ៩:១២ នាទីយប់ថ្ងៃទី ១៥ ខែឧសភាលោក រុំ សុវិជ្ជា បានផឹកស្រាស្រវឹងជោកជាំរួចបើករថយន្តទៅបុករនាំងបរិវេណរូបសំណាកលោកតាអាចារ្យលាក់ (រង្វង់មូល) បង្កឲ្យខូច។ ជាងនេះទៀតមន្ត្រីនគរបាលរូបនេះបានស្រែកជេរ និងប្រមាថធ្ងន់ៗលើលោក សុខ លូ អភិបាលខេត្តកំពង់ធំថា «នៅទីតាំងហ្នឹង មិនមានដាក់ភ្លើងបំភ្លឺ និងដាក់ចំណាំងប្លាតអ្វីទេ ទើបធ្វើឲ្យគាត់ជួបគ្រោះថ្នាក់បែបនេះ»។
គួររំឭកថាកាលពីថ្ងៃ ២៦ មីនា ឆ្នាំនេះលោក រុំ សុវិជ្ជា ធ្លាប់ត្រូវបានលោកឧបនាយករដ្ឋមន្ត្រី ស ខេង បានចេញលិខិតព្រមានជាលើកទី ១ ផងដែរ ដោយសារតែមានការធ្វេសប្រហែសលើការអនុវត្តភារកិច្ចរបស់ខ្លួន និងបានបញ្ជាក់ថា ប្រសិនបើនៅតែប្រព្រឹត្តផ្ទុយពីការណែនាំនេះទៀតនឹងចាត់វិធានការទៅតាមវិន័យរបស់កងកម្លាំងនគរបាលជាតិជាក់ជាពុំខាន។
នៅមុនពេលលោក ស ខេង ចេញលិខិតព្រមាននេះគឺកាលពីថ្ងៃទី ២៦ ខែមីនាឆ្នាំនេះលោក រុំ សុវិជ្ជា ក៏ធ្លាប់បានជេរប្រមាថ អ្នកគ្រូពេទ្យនៅខេត្តកំពង់ធំផងដែរ ខណៈរូបគាត់បានចូលទៅអុកឡុកក្នុងមន្ទីរពេទ្យ ដើម្បីចូលមើលមិត្តភក្តិផឹកស៊ីជាមួយគ្នាដែលជួបគ្រោះថ្នាក់ចរាចរណ៍ហើយបញ្ជូនមកមន្ទីរពេទ្យខេត្តកំពង់ធំ។ នេះបើតាមរបាយការណ៍របស់សមត្ថកិច្ចខេត្តកំពង់ធំ៕