.jpg)
ទិដ្ឋភាពប្រជាពលរដ្ឋ លេងសប្បាយ នៅក្នុងថ្ងៃបុណ្យចូលឆ្នាំខ្មែរ នៅវត្តមួយ កាលពីឆ្នាំមុន។ ភ្នំពេញ ប៉ុសិ៍្ត
ភ្នំពេញៈ លោក នេត សាវឿន អគ្គស្នងការនគរបាលជាតិ កាលពីម្សិលមិញ បានចេញសេចក្ដីណែនាំស្ដីពីវិធានការធានាស្ថិរភាពសន្ដិសុខសណ្ដាប់ធ្នាប់សាធារណៈ និងសុវត្ថិភាពសង្គម នៅក្នុងឱកាសនៃថ្ងៃបុណ្យចូលឆ្នាំថ្មី ប្រពៃណីជាតិខ្មែរ «ឆ្នាំកុរ» ដែលនឹងប្រព្រឹត្តទៅចាប់ពីថ្ងៃទី ១៤ ដល់ថ្ងៃទី ១៦ ខែ មេសា ឆ្នាំ ២០១៩ ខាងមុខនេះ។
លោក នេត សាវឿន បានប្រាប់ទៅកាន់នាយកដ្ឋានកណ្ដាល នាយកដ្ឋានជំនាញ អង្គភាព និងស្នងការដ្ឋាននគរបាលរាជធានី-ខេត្តទាំងអស់ តាមរយៈសេចក្ដីណែនាំដែលចុះថ្ងៃអង្គារ ទី ១៩ ខែ មីនា ថា ត្រូវកសាងផែនការ ការពារសន្ដិសុខ សណ្ដាប់ធ្នាប់ជំនាញ និងតាមភូមិសាស្ដ្ររៀងៗខ្លួន ដោយផ្ដោតលើការងារសំខាន់ៗ ចំនួន ១០ ចំណុច។
លោកបានប្រាប់ទៅស្នងការដ្ឋាននគរបាលគ្រប់រាជធានីខេត្ដទាំងអស់ថា៖ «ត្រូវយកចិត្ដទុកដាក់បង្កើនការក្ដាប់សភាពការណ៍ ពាក់ព័ន្ធសន្ដិសុខ សណ្ដាប់ធ្នាប់សង្គម ជាពិសេស សកម្មភាពភេរវកម្ម ឧក្រិដ្ឋកម្ម ចលាចលសង្គម និងសកម្មភាពល្មើសផ្សេងៗទៀត ដើម្បីចាត់វិធានការបង្ការទប់ស្កាត់ និងបង្រ្កាបឲ្យមានប្រសិទ្ធភាពទាន់ពេលវេលា»។
លោកអគ្គស្នងការ ក៏បានណែនាំទៀតថា ត្រូវជំរុញការអនុវត្ដគោលនយោបាយ «ភូមិឃុំ មានសុវត្ថិភាព» ឲ្យបានសកម្មផុសផុល និងត្រូវយកចិត្ដទុកដាក់គ្រប់គ្រងឲ្យបានហ្មត់ចត់ នូវមុខសញ្ញាគ្រប់ប្រភេទ តាមសហគមន៍ ភូមិ-ឃុំ ដោយប្រើប្រាស់គ្រប់វិធានការដើម្បីបង្ក្រាបឲ្យមានប្រសិទ្ធភាពជាមុន មិនត្រូវទុកឲ្យមុខសញ្ញាមានឱកាសធ្វើសកម្មភាពបង្កអសន្ដិសុខ ឬគ្រោះថ្នាក់ដល់អាយុជីវិត និងអន្ដរាយដល់ទ្រព្យសម្បតិ្ដប្រជាពលរដ្ឋនោះឡើយ។
លោក នេត សាវឿន ក៏បានណែនាំ អង្គភាព និងស្នងការដ្ឋាននគរបាលរាជធានី-ខេត្តទាំងអស់ ត្រូវបង្កើនវិធានការសន្ដិសុខ និងសណ្ដាប់ធ្នាប់សាធារណៈឲ្យបានម៉ឺងម៉ាត់ នៅតាមបណ្ដាគោលដៅប្រារព្ធពិធីបុណ្យ និងគោលដៅកម្សាន្ដសប្បាយរបស់ប្រជាពលរដ្ឋ ដូចជានៅទីវត្ដអារាម តំបន់ប្រាសាទ រមណីយដ្ឋាន ដើម្បីរក្សានូវសណ្ដាប់ធ្នាប់ឲ្យបានល្អប្រសើរ។
ទន្ទឹមនឹងនេះលោកក៏បានបញ្ជាឲ្យយកចិត្ដទុកដាក់យាមកាម ល្បាតការពារផ្ទះសំបែង ទ្រព្យសម្បត្ដិ ប្រជាពលរដ្ឋដែលចាកចេញទៅជួបជុំសាច់ញាតិនៅឯស្រុកកំណើត ឬទៅកម្សាន្ដនៅទីឆ្ងាយទាំងគ្រួសារផងដែរ។
លោកអគ្គស្នងការ បានស្នើឲ្យប្រធាននាយកដ្ឋានកណ្ដាល នាយកដ្ឋានជំនាញអង្គភាពនិងស្នងការដ្ឋាននគរបាលរាជធានី-ខេត្ដ ត្រូវរៀបចំផែនការការពារសន្ដិសុខ សុវត្ថិភាព និងសណ្ដាប់ធ្នាប់ សង្គមឲ្យបានសមស្របតាមលក្ខណៈភូមិសាស្រ្ដ និងការងារជំនាញជាក់ស្ដែង រួចធ្វើរបាយការណ៍មកកាន់សេនាធិការដ្ឋានយ៉ាងយូរបំផុតត្រឹមថ្ងៃសុក្រ ទី ៥ ខែ មេសា ឆ្នាំ ២០១៩ និងត្រូវចាត់តាំងឲ្យអនុវត្ដប្រកបដោយប្រសិទ្ធភាព ក្នុងស្មារតីទទួលខុសត្រូវខ្ពស់។
ទាក់ទងនឹងការអនុវត្ដនូវវិធានការការពារសន្ដិសុខ សុវត្ថិភាពសង្គម ជូនប្រជាពលរដ្ឋនារដូវកាលបុណ្យចូលឆ្នាំខ្មែរខាងមុខនេះ លោក ជួន ណារិន្ទ ស្នងការខេត្តព្រះសីហនុ បានថ្លែងថា៖ «ខេត្តព្រះសីហនុបានធ្វើផែនការ កិច្ចការពារ ហើយក្នុងបុណ្យចូលឆ្នាំខាងមុខនេះ ខេត្តព្រះសីហនុ យើងនឹងមានរៀបចំសង្ក្រាន្ដសមុទ្រផងដែរ»។
លោកបានបន្ដថា៖ «កិច្ចការពារសុវត្ថិភាព សន្តិសុខ ជូនភ្ញៀវជាតិ និងអន្តរជាតិ គ្រប់កន្លែងសប្បាយ។ ចំពោះកិច្ចការងាររបស់សមត្ថកិច្ចនគរបាលយើង យើងធ្វើទៅលើអ្វីដែលពាក់ព័ន្ធនឹងសន្តិសុខប៉ុណ្ណោះ»៕
