.jpg)
មន្ត្រីនគរបាលជាន់ខ្ពស់ប្រជុំកាលពីម្សិលមិញពិភាក្សាលើវិធានការបង្ក្រាបគ្រឿងញៀន។ នគរបាល
ភ្នំពេញៈ លោក នេត សាវឿន អគ្គស្នងការនគរបាលជាតិបានបញ្ជាឱ្យសមត្ថកិច្ចនៅតាមមូលដ្ឋាន ត្រូវធ្វើការស្រាវជ្រាវរកបទល្មើសគ្រឿងញៀននៅក្នុងដែនសមត្ថកិច្ចគ្រប់គ្រងរបស់ខ្លួន ដោយមិនត្រូវចាំបាច់រង់ចាំតែទទួលបញ្ជាពីថ្នាក់ជាតិទៀតទេ។ ការបញ្ជានេះបានធ្វើឡើងស្របពេលលោក ស ខេង រដ្ឋមន្ត្រីក្រសួងមហាផ្ទៃ បានឱ្យអាជ្ញាធរខិតខំលុបបំបាត់ការប្រើប្រាស់និងចែកចាយគ្រឿងញៀនឱ្យអស់នៅតាមក្លិបកម្សាន្តក្នុងឆ្នាំ ២០១៩ នេះ។
លោក នេត សាវឿន កាលពីថ្ងៃទី ២០ ម្សិលមិញ បានដឹកនាំកិច្ចប្រជុំមួយនៅក្រសួងមហាផ្ទៃដែលមានការចូលរួមពីមន្ត្រីនគរបាលនិងមន្ត្រីកងរាជអាវុធហត្ថគ្រប់រាជធានី-ខេត្ត ដើម្បីឱ្យមន្ត្រីតាមខេត្តទាំងនេះ បានស្វែងយល់បន្ថែមអំពីបទពិសោធ ក្រោយមានការបង្ក្រាបគ្រឿងញៀននៅតាមក្លិបកម្សាន្តមួយចំនួន ដែលអាជ្ញាធរបានអះអាងថា បានទទួលជោគជ័យ។
លោក មាស វីរិទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀនបានប្រាប់អ្នកកាសែតថា បន្ទាប់ពីកិច្ចប្រជុំនេះទៅ អាជ្ញាធរថ្នាក់ជាតិបានផ្ទេរសិទ្ធិអំណាច និងភារកិច្ចទាំងអស់ទៅឱ្យថ្នាក់ក្រោមជាតិ ដើម្បីស្រាវជ្រាវបង្ក្រាបបញ្ហាគ្រឿងញៀននៅក្នុងដែនសមត្ថកិច្ចរបស់ពួកគេ ហើយនឹងឈប់ឱ្យរង់ចាំការចង្អុលបង្ហាញពីថ្នាក់លើដូចមុនទៀត។
លោកបន្តថា កន្លងមកសមត្ថកិច្ចនៅតាមមូលដ្ឋានខ្លះដែលមិនមានម្ចាស់ការក្នុងការស៊ើបអង្កេតស្រាវជ្រាវរកបទល្មើសគ្រឿងញៀនក្នុងដែនសមត្ថកិច្ចរបស់ពួកគេ ដោយសារមានភាពស្ទាក់ស្ទើរ និងគ្មានកម្លាំងគ្រប់គ្រាន់។
លោក មាស វិរិទ្ធ បានថ្លែងថា៖ «ខ្ញុំចង់បញ្ជាក់ថា សមត្ថកិច្ចនៅមូលដ្ឋានខ្លះគាត់មិនធ្វើជាម្ចាស់ការក្នុងការស្រាវជ្រាវរកករណី (គ្រឿងញៀន) ទេ ពេលខ្លះគាត់ថា ចាំចង្អុលបង្ហាញពីថ្នាក់លើ តែឥឡូវនេះ ថ្នាក់លើលែងចង្អុលបង្ហាញហើយ ផ្ទេរអំណាចនិងសមត្ថកិច្ចទាំងអស់ទៅឱ្យថ្នាក់ក្រោមជាតិដើម្បីធ្វើសកម្មភាព នៅពេលរកឃើញមានបទល្មើស ប្រសិនបើពិនិត្យឃើញថា កន្លែងនោះមានបទល្មើស ហើយកម្លាំងរបស់ខ្លួនពុំទាន់គ្រប់គ្រាន់ក្នុងការបង្ក្រាប ចាំសុំការអន្តរាគមន៍»។
បើតាមលោក មាស វីរិទ្ធ ការស្ទាក់ស្ទើររបស់សមត្ថកិច្ចមួយចំនួនមិនធ្វើការបង្ក្រាបបទល្មើសគ្រឿងញៀនក្នុងដែនសមត្ថកិច្ចរបស់ពួកគេនាពេលកន្លងមកនេះ គឺមិនមែនជាមូលហេតុនាំឱ្យបញ្ហាគ្រឿងញៀនរីករាលដាលដល់ជនបទនោះទេ ប៉ុន្ដែដោយសារក្រុមឧក្រិដ្ឋជនជួញដូរគ្រឿងញៀន ជាអ្នករៀបចំ ដើម្បីបង្កើតឲ្យមានទីផ្សារនៃការជួញដូរនិងប្រើប្រាស់គ្រឿងញៀននៅទូទាំងប្រទេស។
លោក ស ខេង កាលពីខែមីនាកន្លងទៅនេះដោយ បានសម្ដែងក្ដីព្រួយបារម្ភអំពីបញ្ហាគ្រឿងញៀនរីករាលដល់ជនបទ និងគ្រឿងញៀនតាមក្លិបកម្សាន្ត ដោយលោកបានបញ្ជាឱ្យសមត្ថកិច្ចត្រូវដាក់ចេញវិធានការម៉ឺងម៉ាត់ចំពោះម្ចាស់ទីតាំងសប្បាយដូច ក្លិបកម្សាន្ត សណ្ឋាគារ និងផ្ទះសំណាក់ឱ្យទូទាំងប្រទេស ជាពិសេសនៅតាមតំបន់តាមព្រំដែន ដើម្បីបង្ការនិងទប់ស្កាត់ ការប្រើប្រាស់ និងចែកចាយគ្រឿងញៀន។
លោក ស ខេង ក៏បានដាស់តឿនឲ្យមន្ត្រីប៉ូលិសទាំងអស់ ត្រូវតែស្អាតស្អំ និងមិនត្រូវពាក់ព័ន្ធក្នុងករណីគ្រឿងញៀនតាមកន្លែងកម្សាន្តនានាទាំងអស់នៅក្នុងប្រទេសនោះទេ។
របាយការណ៍បានបង្ហាញថាក្នុងរយៈពេល ៥ ខែ ឆ្នាំ ២០១៩ នេះ អាជ្ញាធរបង្ក្រាបគ្រឿងញៀនបានចំនួន ៣ ៣៣៥ ករណី និងឃាត់ខ្លួនអ្នកជួញដូរ និងប្រើប្រាស់ចំនួន ៧ ០៩៧ នាក់ ដែលក្នុងនោះមានមេខ្លោងចំនួន ១២ នាក់ និងខ្សែរយៈបណ្ដាញចំនួន ៥២ នាក់ សារធាតុញៀនគ្រប់ប្រភេទចំនួន ៣១ ០៩៨ គីឡូក្រាម កញ្ឆាស្រស់ ៤៧ ១០៣ ដើម និងសម្ភារមួយចំនួនទៀត។
ក្នុងការបង្ក្រាបទាំងនេះ ក៏មានក្លិបកម្សាន្តចំនួន ៤ និងខារ៉ាអូខេ ១ ទីតាំង ដែលស្ថិតក្នុងរាជធានីភ្នំពេញនិងខេត្តសៀមរាបដែរ។
ជុំវិញកិច្ចប្រជុំដើម្បីដាក់ចេញវិធានការលុបបំបាត់គ្រឿងញៀនតាមក្លិបកម្សាន្តឲ្យអស់ត្រឹមឆ្នាំ ២០១៩ របស់អាជ្ញាធរនេះ ត្រូវបានមន្ត្រីសង្គមស៊ីវិលខ្លះបានលើកឡើងថា ដោយសារវិធានការបង្ក្រាបកន្លងមក មិនទាន់ធ្វើឡើងចំគោលដៅនៅឡើយ ជាពិសេសអ្នកមានឥទ្ធិពលដែលជាមេខ្លោងនាំចូលនិងចែកចាយគ្រឿងញៀននៅកម្ពុជា។
លោក ស៊ឹង សែនករុណា មន្រ្តីនាំពាក្យសមាគមអាដហុក បានឲ្យដឹងថា៖ «យើងសង្ឃឹមថា ការចាត់វិធានការ ការរកយុទ្ធសាស្ដ្របង្ក្រាបថ្មីៗទៀត អាចធ្វើការបានល្អប្រសើរជាងមុនហើយអាចចំគោលដៅពិសេសមេខ្លោងធំៗហ្នឹង»៕
