ភ្នំពេញៈ លោក បាន គីមូន អតីតអគ្គលេខាធិការអង្គការសហប្រជាជាតិដែលបច្ចុប្បន្នជាប្រធានវិទ្យាស្ថានកំណើនបៃតងនៅប្រទេសកូរ៉េខាងត្បូងបានស្នើដល់លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាដើម្បីជួយជំរុញបន្ថែមឱ្យមានសន្តិភាពនៅឧបទ្វីបកូរ៉េ ដោយប្រើតួនាទីរបស់កម្ពុជាជាម្ចាស់ផ្ទះនៃកិច្ចប្រជុំអាស៊ីអឺរ៉ុប (ASEM) នៅចុងឆ្នាំ ២០២០។
លោក កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រីបានថ្លែងទៅកាន់អ្នកសារព័ត៌មានក្រោយកិច្ចប្រជុំទ្វេភាគីថា សំណើរបស់លោក បាន គីមូន បានធ្វើឡើងកាលពីថ្ងៃទី ៤ ខែកុម្ភៈ ឆ្នាំ ២០២០ ក្នុងកិច្ចប្រជុំទ្វេភាគីក្នុងអំឡុងពេលលោក ហ៊ុន សែន កំពុងបំពេញបេសកកម្មនៅប្រទេសកូរ៉េខាងត្បូង។
លោក កៅ គឹមហួន បានថ្លែងថា៖ «ឯកឧត្តម (បាន គីមូន) ក៏បានគូសបញ្ជាក់ផងដែរឯកឧត្តមក៏ដូចជាកូរ៉េខាងត្បូងមានការរីករាយក្នុងការកើននូវកិច្ចសហប្រតិបត្តិការរវាងកម្ពុជា និងកូរ៉េ ហើយជាពិសេសទៀតមានការគាំទ្រពីប្រទេសកម្ពុជាចំពោះសន្តិភាព ស្ថិរភាពនៅក្នុងឧបទ្វីបកូរ៉េផងដែរ។ ឯកឧត្តមក៏បានផ្លាស់ប្តូរមតិជាមួយសម្តេចនាយករដ្ឋមន្ត្រីអំពីស្ថានភាពនៅឧបទ្វីបកូរ៉េនេះ ហើយឯកឧត្តមក៏ចង់ស្នើឲ្យប្រទេសកម្ពុជាចូលរួមចំណែកក្នុងការគាំទ្រ និងបន្តគាំទ្រការស្វែងរកសន្តិភាពនៅឧបទ្វីបកូរ៉េផងដែរ។
ឯកឧត្តមបានគូសបញ្ជាក់ផងដែរដោយកម្ពុជាជាសមាជិកមួយនៃអាស៊ានហើយកម្ពុជានឹងអាស៊ានអាចបន្តដើរតួនាទីសំខាន់នៅក្នុងការងារនៅក្នុងឧបទ្វីបកូរ៉េនេះ»។
យោងតាមហ្វេសប៊ុករបស់លោកនាយករដ្ឋមន្ត្រីបានឲ្យដឹងថា មុនក្លាយជាអគ្គលេខាធិការអង្គការសហប្រជាជាតិលោក បាន គីមូន ធ្លាប់ធ្វើទស្សនកិច្ចមកកាន់ប្រទេសកម្ពុជា និងបានរៀបចំទៅទស្សនកិច្ចនៅអង្គរឃ្យុងយូ ខេត្តសៀមរាប។
ហ្វេសប៊ុកដដែលនេះបានឲ្យដឹងថា៖ «នៅពេលវេលានោះគឺកម្ពុជាអាចចាប់ផ្ដើមបញ្ជូនកងរក្សាសន្តិភាពអង្គការសហប្រជាជាតិ បន្ទាប់មកទៀតក៏មានដំណើរការនៃការកាត់ទោសមេដឹកនាំខ្មែរក្រហមដែលពេលនោះក្នុងតួនាទីឯកឧត្តមជាអគ្គលេខាធិការអង្គការសហប្រជាជាតិ។ កម្ពុជាមិនត្រឹមតែដំណើរការនៃការកាត់ទោសមេដឹកនាំខ្មែរក្រហមទេ កម្ពុជាក៏បានរ៉ាប់រងការចំណាយនៅកម្ពុជាផងដែរ ហើយកម្ពុជាក៏បានបញ្ជូនទ័ពរបស់ខ្លួនទៅប្រទេសនានាក្នុងការងាររក្សាសន្តិភាពក្រោមឆត្ររបស់អង្គការសហប្រជាជាតិផងដែរ ហើយការបញ្ជូនកងទ័ពមួកខៀវនេះគឺបានបញ្ជូនជាប្រចាំដោយមានទាំងទ័ពនារីផងដែរ»។
លើហ្វេសប៊ុកដដែលនោះដែរ លោក ហ៊ុន សែន បានឲ្យដឹងថាលោក បាន គីមូន ក៏បានអរគុណប្រទេសកម្ពុជាដែលបានបញ្ជូនកងរក្សាសន្តិភាពជាស្ត្រីនាពេលកន្លងមក។
នៅថ្ងៃដដែលនោះលោកនាយករដ្ឋមន្ត្រីក៏បានជួបពិភាក្សាការងារជាមួយលោក មូន ជេអ៊ីន (Moon Jae-In) ប្រធានាធិបតីនៃសាធារណរដ្ឋកូរ៉េខាងត្បូង ក្នុងនោះលោក ហ៊ុន សែន បានបង្ហាញពីបំណងចង់ឱ្យសាធារណរដ្ឋកូរ៉េសាងសង់ស្ពាននៅកម្ពុជានាពេលខាងមុខនេះ ជាពិសេសស្ពានឆ្លងកាត់ទន្លេមេគង្គ ព្រោះថាបច្ចុប្បន្នកម្ពុជាមានស្ពានមិត្តភាពកម្ពុជា-ចិន ស្ពានមិត្តភាពកម្ពុជា-ជប៉ុន តែប៉ុណ្ណោះ។
លោក ហ៊ុន សែន ក៏បានអរគុណដល់រដ្ឋាភិបាលកូរ៉េដែលបានជួយក្នុងការផ្ដល់ឥណទានដល់កម្ពុជា ជាពិសេសចាប់ពីឆ្នាំ ២០១៩ ដល់ ២០២០ មានការកើនឡើងពី ៣៥០-៧០០ លានដុល្លារសហរដ្ឋអាមេរិកដែលនឹងជួយក្នុងការតភ្ជាប់នឹងពង្រឹងវិស័យហេដ្ឋារចនាសម្ព័ន្ធកម្ពុជាពីខេត្ត ១ ទៅខេត្ត ១ ដូចជាផ្លូវជាតិលេខ ២២ និងផ្លូវជាតិលេខ ២ និងផ្លូវជាតិលេខ ៤៨ ផងដែរ។
លោក អ៊ូ ច័ន្ទរ័ត្ន អតីតតំណាងរាស្ត្រនៃអតីតគណបក្សសង្គ្រោះជាតិក៏បានទទួលស្គាល់ផងដែរពីការពង្រឹង និងពង្រីកទំនាក់ទំនងការទូត និងកិច្ចសហប្រតិបត្តិការរវាងកម្ពុជា និងសាធារណរដ្ឋកូរ៉េកាន់តែរឹងមាំ និងល្អប្រសើរ ដោយសារតែប្រទេសកូរ៉េមានកំណើនសេដ្ឋកិច្ចខ្លាំងដែលអាចជួយ បង្កើនសេដ្ឋកិច្ចប្រទេសកម្ពុជាឲ្យកាន់តែរីកចម្រើនថែមទៀត៕