.jpg)
លោក ប៉ា សុជាតិវង្ស អតីតអភិបាលរាជធានី បានលាលែងពីសមាជិករដ្ឋសភា ដើម្បីទៅឈរឈ្មោះជាបេក្ខជនលេខរៀងទី ១ នៃក្រុមប្រឹក្សារាជធានីភ្នំពេញ។ ហ្វេសប៊ុក
ភ្នំពេញៈ អតីតអភិបាលរាជធានីលោក ប៉ា សុជាតិវង្ស បានលាលែងពីសមាជិករដ្ឋសភា ដើម្បីទៅឈរឈ្មោះជាបេក្ខជនលេខរៀងទី ១ នៃក្រុមប្រឹក្សារាជធានីភ្នំពេញ។ យោងតាមសេចក្តីប្រកាសព័ត៌មានចេញដោយរដ្ឋសភាពីម្សិលមិញតំណែងតំណាងរាស្រ្តរបស់លោកសុជាតិវង្ស ត្រូវបានជំនួសដោយលោកគីម សុវណ្ណា។
លោក សោម សូរីដា អគ្គលេខាធិការរង គ.ជ.ប ថ្លែងថា លោក សុជាតិវង្ស ស្ថិតនៅកំពូលនៃបញ្ជីបេក្ខជន សម្រាប់មណ្ឌលភ្នំពេញ ក្នុងការបោះឆ្នោតក្រុមប្រឹក្សារាជធានី ដែលនឹងធ្វើឡើងនៅថ្ងៃ ២៦ ឧភា។
នៅពេលទាក់ទងកាលពីម្សិលមិញលោក សុជាតិវង្ស ពន្យល់ថា គណបក្សរបស់លោកចង់ឲ្យលោក ជួយកែលម្អការអភិវឌ្ឍថ្នាក់ក្រោមជាតិ។ «ទីមួយ គឺដោយសារមានតម្រូវការដែលថ្នាក់លើចង់ឲ្យយើងនឹងនៅបន្តពង្រឹងការយកចិត្តទុកដាក់ថ្នាក់ក្រោមជាតិ។ ដោយសារតែខ្ញុំជាប្រធានគណបក្សប្រជាជនរាជធានីភ្នំពេញជារៀងរហូតមកដូច្នេះហើយខ្ញុំត្រូវតែទទួលខុសត្រូវជាទូទៅសម្រាប់បក្ស។ ប៉ុន្តែរឿងដែលសំខាន់បំផុត គឺត្រូវជួយពង្រឹងការងាររដ្ឋបាលដែនដីយើងហ្នឹងឲ្យបានល្អ។នេះជាសំណូមពរមួយ»។
លោកថា៖ «កម្រិតខេត្ត ក្រុងគឺជាថ្នាក់ក្រោមជាតិដែលរដ្ឋាភិបាល គិតគូរខ្លាំងនៅក្នុងការអនុវត្តវិមជ្ឈការ និងវិសហមជ្ឈការ ដែលជាគោលការណ៍សំខាន់ ក្នុងការពង្រឹងការអនុវត្តប្រជាធិបតេយ្យនៅថ្នាក់ក្រោមជាតិ។ អ៊ីចឹងទេការជ្រើសរើសធនធានមនុស្ស សម្រាប់កម្រិតនេះគឺចាំបាច់»។
លោកថា អ្នកកាន់តំណែងបច្ចុប្បន្ន បានកាន់តំណែងនៅកន្លែងនេះអស់រយៈពេល ២ អាណត្តិរួចហើយ ហើយការសម្រេចដាក់រូបលោកសម្រាប់តំណែងនេះ គឺមិនមែនដោយសារមានបញ្ហាណាមួយទេ។ «ខ្ញុំមានបេសកកម្មមួយតាមការចាត់តាំងរបស់សម្តេចនាយករដ្ឋមន្រ្តី ឲ្យមកក្រុងដែលខ្ញុំធ្លាប់នៅ និងជាកន្លែងដែលខ្ញុំមានចំណេះដឹង។ គ្មានអ្វីលើសពីនេះទេ»។
លោកថ្លែងថា លោកនឹងផ្តល់អាទិភាព ទៅលើការពង្រឹងសេវាសាធារណៈ ក្នុងការគ្រប់គ្រងនៅក្នុងដែនដីដែលមានចាប់ពីស្ថិរភាពនយោបាយ សន្តិសុខ សណ្តាប់ធ្នាប់សង្គម ការអភិវឌ្ឍនៅក្នុងគ្រប់វិស័យ ជាដើម។ ចំពោះអ្វីទាំងអស់នេះ វាតម្រូវឲ្យមានធនធានមនុស្ស ដែលមាន ជំនាញនិងសក្តានុពលដើម្បីរួមគ្នាធ្វើឲ្យថ្នាក់ក្រោមជាតិ ឬមូលដ្ឋាន «រឹងមាំ»។
លោកថ្លែងថា៖ «ទី២ សិទ្ធិមនុស្ស និងប្រជាធិបតេយ្យត្រូវតែចាប់ផ្តើមពីកម្រិតឃុំសង្កាត់។ យើងមានអ្វីទាំងអស់នេះនៅថ្នាក់ជាតិ។ ប៉ុន្តែការអនុវត្តនៅថ្នាក់ក្រោមដែលនៅមានចន្លោះប្រហោងមួយចំនួននឹងធ្វើឲ្យប្រជាធិបតេយ្យពហុបក្សមិន រឹងមាំ។ ដូច្នេះ ការពង្រឹងប្រជាធិបតេយ្យនៅថ្នាក់ឃុំ សង្កាត់គឺជាគោលដៅរបស់រដ្ឋភិបាល»។
លោកបានលើកឧទាហរណ៍អំពីការបណ្តេញអភិបាលរងខេត្តព្រះសីហនុ ២ នាក់ចេញពីតំណែង កាលពីពេលថ្មីៗថា ដោយសារការប្រើអំណាចខុស។ «ខ្ញុំគិតថា យើងត្រូវតែលុបបំបាត់ការរំលោភបំពានទាំងអស់។ កាលពីអតីតកាល អ្នកដែលទទួលសេវា និងអ្នកដែលផ្តល់សេវា គឺខ្វះតម្លាភាព គណនេយ្យភាព ហើយពួកគេមិនអនុវត្តច្បាប់។ ទាំងនេះធ្វើឲ្យអ្នកផ្តល់សេវា មើលឃើញខ្លួនឯងថា ជាចៅហ្វាយនាយប្រជាពលរដ្ឋ ហើយពួកគេរំលោភបំពានអំណាច»។
លោក សុខ ឥសាន អ្នកនាំពាក្យរបស់គណបក្សប្រជាជនកម្ពុជា បានថ្លែងថា ជានីតិវិធី តំណាងរាស្រ្តត្រូវតែលាឈប់ ពីមុនពេលគាត់អាចយកតំណែងណាមួយនៅក្នុងរដ្ឋាភិបាល។ «នៅពេលមានការផ្លាស់ប្តូរបែប នេះ បក្សហៅគាត់មកសួរថា តើគាត់នឹងទទួលយកឬអត់? នៅពេលគាត់យល់ព្រមនោះគាត់ត្រូវតែលាឈប់ [ពីសភា]»។
លោក ផៃ ស៊ីផាន អ្នកនាំពាក្យរដ្ឋាភិបាល បានពន្យល់ថា ប្រធានក្រុមប្រឹក្សារាជធានីភ្នំពេញ មានការទទួលខុសត្រូវ «នយោបាយ»។ លោកថ្លែងថា ក្រុមប្រឹក្សាក្រុង មើលខុសត្រូវលើការងាររបស់រដ្ឋបាលក្រុង។
លោក អ៊ូ ច័ន្ទរ័ត្ន អតីតតំណាងរាស្រ្តរបស់គណបក្សសង្គ្រោះជាតិ ថ្លែងថា ចំណាត់ការនេះ អាចដោយសារលោក សុជាតិវង្ស ដឹងរឿងច្រើនអំពីបញ្ហានៅក្នុងរាជធានី «ហើយវានឹងមានប្រសិទ្ធភាពជាងមុន ប្រសិនបើគាត់ត្រឡប់មកវិញ។ ជាធម្មតា មិនមានការត្រឡប់ពីតំណែងខ្ពស់មកតំណែងទាប ដូចជាការចុះពីតំណែងតំណាងរាស្រ្តមកធ្វើជាប្រធានក្រុមប្រឹក្សារាជធានី»។ «វាមិនផ្ទុយនីតិវិធីទេ»។
លោក ពេជ្រ ស្រស់ ប្រធានគណបក្សយុវជនកម្ពុជា ថ្លែងថា៖ «កាលពេលគាត់ជាអភិបាលក្រុងយើងឃើញថា មានការអភិវឌ្ឍតិចតួច និងដំណោះស្រាយតិចតួចចំពោះជម្លោះ។ រដ្ឋាភិបាលប្តូរគាត់ប៉ុន្តែឥឡូវនេះគាត់ត្រឡប់មកវិញ។ ដូច្នេះនឹងមិនមានការកែលម្អច្រើនទេដោយសារមនុស្សដដែលត្រឡប់មកវិញ មិនមែនមនុស្សជំនាន់ថ្មី»៕
