.jpg)
លោក ប្រាក់ សុខុន ពេលប្រជុំតាមវីដេអូពីថ្ងៃ ៧ ធ្នូ។ រូបថត ក្រសួងការបរទេស
ភ្នំពេញៈ លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិបានថ្លែងថា កម្ពុជាប្ដេជ្ញាចិត្តក្នុងការបង្កើនការជ្រើសរើសស្ត្រីឲ្យចូលបម្រើការងារ និងបង្កើតបរិយាកាសឲ្យស្ត្រីបញ្ចេញសក្ដានុពលពេញលេញក្នុងការអភិវឌ្ឍ និងការកសាងសន្តិភាព។
លោក ប្រាក់ សុខុន បានលើកឡើងដូចនេះនៅក្នុងសុន្ទរកថា បើកសន្និសីទអន្តរជាតិស្តីពី «ការពង្រឹងតួនាទីស្ត្រីក្នុងការកសាង និងការថែរក្សាសន្តិភាពពីការប្តេជ្ញាចិត្តរហូតដល់លទ្ធផល»កាលពីថ្ងៃទី ៧ ខែធ្នូ តាមរយៈប្រព័ន្ធវីដេអូ។
លោកមានប្រសាសន៍ដូច្នេះថា៖ «សរុបសេចក្តីមក ខ្ញុំសូមបញ្ជាក់ជាថ្មីនូវការប្តេជ្ញាចិត្តបន្តរបស់កម្ពុជាក្នុងការបង្កើននូវការជ្រើសរើសស្ត្រីឱ្យចូលបម្រើការងារ បង្កើតបរិយាកាសអំណោយផលសម្រាប់ស្ត្រីដើម្បីឈានទៅសម្រេចបាននូវសក្តានុពលពេញលេញរបស់ពួកគេ និងពង្រីកការចូលរួមរបស់ពួកគេនៅក្នុងការអភិវឌ្ឍប្រកបដោយចីរភាព និងដំណើរការកសាងសន្តិភាពជុំវិញពិភពលោក»។
បើតាមលោក ប្រាក់ សុខុន ស្ត្រី និងក្មេងស្រីមានអំណាចក្នុងការផ្លាស់ប្តូរ និងជំរុញការអភិវឌ្ឍប្រកបដោយវិជ្ជមាន។ ពួកគេអាចចូលរួមចំណែកជួយកសាងសង្គមប្រកបដោយភាពត្រឹមត្រូវបរិយាប័ន្ន វិបុលភាព និងសន្តិភាព។ ទោះបីជាយ៉ាងណាក៏ដោយ ផ្នត់គំនិតអំពីសក្តានុពល និងការពាក់ព័ន្ធរបស់ស្ត្រី និងក្មេងស្រីនៅតែបន្តកើតមានជាពិសេសក្នុងវិស័យកសាងសន្តិភាព និងសន្តិសុខ។
ចាប់ពីអតីតកាលដ៏មហាសោកនាដកម្មកម្ពុជាបានមើលឃើញពីថាមពល និងភាពរឹងមាំរបស់ស្ត្រីក្នុងការកសាងសង្គមជាតិឱ្យរស់ឡើងវិញព្រមទាំងបង្កើតបរិយាកាសសន្តិភាព និងសន្តិសុខដែលមានសារៈសំខាន់សម្រាប់ការអភិវឌ្ឍសេដ្ឋកិច្ច និងសង្គមរបស់ប្រទេសជាតិ។ នេះជាការលើកឡើងរបស់លោក ប្រាក់ សុខុន។
លោកបញ្ជាក់ថា រាជរដ្ឋាភិបាលកម្ពុជាបានខិតខំក្នុងការបង្កើនចំនួនស្ត្រីទៅក្នុងជួរមន្ត្រីរាជការ ដោយនៅក្នុងឆ្នាំ ២០២០ នេះ មន្ត្រីរាជការជាស្ត្រីមានចំនួន ៤១ ភាគរយ ហើយចំនួននេះកំពុងកើនឡើងក្នុងតួនាទីជាអ្នកដឹកនាំ និងក្នុងមុខតំណែងជាអ្នកធ្វើការសម្រេចចិត្ត។ បច្ចុប្បន្ននេះស្ត្រីកម្ពុជាទទួលបាននូវការគាំទ្រ និងការគាំពារសង្គមកាន់តែប្រសើរឡើងតាមរយៈការជំរុញឱ្យទទួលបានការថែរក្សា សុខភាពការការពារផ្នែកច្បាប់ និងយុត្តិធម៌ប្រឆាំងនឹងអំពើហិង្សាការជួញដូរមនុស្ស និងការកេងប្រវ័ញ្ចផ្លូវភេទ។
លោកបានបន្ថែមថា លើសពីនេះទៀត រដ្ឋាភិបាលក៏បានគាំទ្រ និងគាំពារស្ត្រីលើផ្នែកសេដ្ឋកិច្ចដូចជា តាមរយៈការពង្រីកឥណទានសម្រាប់សហគ្រាសធុនតូចបំផុត តូច និងមធ្យមដែលមានចំនួន ៦១ ភាគរយ គ្រប់គ្រងដោយស្ត្រី។ ការចូលរួមរបស់ស្ត្រីក្នុងការថែរក្សាសន្តិភាព ក៏ជាជ្រុងមួយផ្សេងទៀតនៃការប្តេជ្ញាចិត្តរបស់កម្ពុជាក្នុងការលើកកម្ពស់ការផ្តល់សិទ្ធិអំណាចដល់ស្ត្រី។
លោក ប្រាក់ សុខុន បានបញ្ជាក់ថា៖ «ចាប់តាំងពីឆ្នាំ ២០០៦ កម្ពុជាបានបញ្ជូនកងរក្សាសន្តិភាពជាស្ត្រីចំនួន ៤១៩ នាក់ ក្នុងចំណោមកងរក្សាសន្តិភាពសរុប ៧ ១២៣ នាក់ ទៅកាន់បេសកកម្មថែរក្សាសន្តិភាពរបស់អង្គការសហប្រជាជាតិនៅក្នុងប្រទេសចំនួន ៩។ ឆ្នាំនេះស្ត្រីចំនួន ៩២ នាក់ ក្នុងចំណោមកងរក្សាសន្តិភាពកម្ពុជាចំនួន ៧៨១ នាក់ កំពុងបំពេញបេសកកម្មថែរក្សាសន្តិភាពនៅ ៥ ប្រទេស»។
ប្រទេសកម្ពុជាបានជាប់ចំណាត់ថ្នាក់លេខ ២ នៅក្នុងចំណោមប្រទេសអាស៊ាន បន្ទាប់ពីប្រទេសឥណ្ឌូនេស៊ី និងជាប់ចំណាត់ថ្នាក់លេខ ១៧ ក្នុងពិភពលោក ដែលបានបញ្ជូនកងទ័ពជាស្ត្រីចូលរួមប្រតិបត្តិការថែរក្សាសន្តិភាពរបស់អង្គការសហប្រជាជាតិ។ នេះបើតាមលោក ប្រាក់ សុខុន។
លោកស្រី Pauline Tamesis អ្នកសម្របសម្រួលរបស់អង្គការសហប្រជាជាតិប្រចាំកម្ពុជាបានថ្លែងតាមអ៊ីមែលកាលពីម្សិលមិញថា អង្គការសហប្រជាជាតិលើកទឹកចិត្តឱ្យរដ្ឋាភិបាលនានាយកស្ត្រី និងក្មេងស្រីជាស្នូលនៃកិច្ចប្រឹងប្រែងរបស់ខ្លួនក្នុងការអភិវឌ្ឍប្រកបដោយចីរភាព ការសាងសន្តិភាព និងការស្ដារឡើងវិញពីកូវីដ១៩។ ទាំងនេះចាប់ផ្ដើមដោយការកំណត់យកស្ត្រីជាថ្នាក់ដឹកនាំ មានតំណាងស្មើគ្នា និងមានអំណាចក្នុងការសម្រេចចិត្តដូចគ្នា។
លោកស្រីមានប្រសាសន៍ដូច្នេះថា៖ «ការការពារ និងការពង្រីកសិទ្ធិក្នុងការចូលរួមរបស់ស្ត្រីក្នុងកិច្ចការសាធារណៈមានសារៈសំខាន់ណាស់ក្នុងការកំណត់ភាពធន់នាពេលអនាគត។ ភាពស្មើគ្នាផ្នែកយេនឌ័រ និងសិទ្ធិរបស់ស្ត្រីមានសារៈសំខាន់ណាស់ក្នុងការឆ្លងកាត់ការរាតត្បាតសកលនេះទាំងអស់គ្នា ការស្ដារឡើងវិញកាន់តែឆាប់រហ័ស ការកសាងអនាគតមួយដែលកាន់តែមានសន្តិភាព និងកាន់តែប្រសើរសម្រាប់មនុស្សគ្រប់រូប»៕
