.jpg)
លោក ប្រាក់ សុខុន ចូលរួមកិច្ចប្រជុំចង្អៀតរដ្ឋមន្ត្រីការបរទេសអាស៊ាននៅប្រទេស វៀតណាម កាលពីថ្ងៃទី ១៦ ដល់ថ្ងៃទី ១៧ ខែមករា កន្លងទៅ។ រូបថត ហ្វេសប៊ុក
ភ្នំពេញៈ លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិបានចាត់ទុកថា ការផ្សារភ្ជាប់ទំនាក់ទំនងរវាងអាស៊ានជាមួយប្រទេសដៃគូសន្ទនាអាស៊ាន គឺជាមូលដ្ឋានគ្រឹះនៃការកសាងសហគមន៍អាស៊ាន និងមជ្ឈភាពរបស់អាស៊ាន។
នេះបើតាមសេចក្ដីប្រកាសរបស់ក្រសួងការបរទេសកាលពីចុងសប្ដាហ៍មុន។
ការលើកឡើងរបស់លោក ប្រាក់ សុខុន ដូចនេះបានធ្វើឡើងខណៈលោកចូលរួមកិច្ចប្រជុំចង្អៀតរដ្ឋមន្ត្រីការបរទេសអាស៊ាននៅប្រទេស វៀតណាម កាលពីថ្ងៃទី ១៦ ដល់ថ្ងៃទី ១៧ ខែមករាកន្លងទៅ។
តាមសេចក្តីប្រកាសព័ត៌មានរបស់ក្រសួងការបរទេសកាលពីថ្ងៃសៅរ៍បានដកស្រង់សម្ដីលោក ប្រាក់ សុខុន មកបញ្ជាក់ពាក់ព័ន្ធនឹងសសរស្ដម្ភនយោបាយសន្តិសុខអាស៊ានថា ក្នុងនាមជាប្រទេសដែលផ្តួចផ្តើម និងធ្វើជាម្ចាស់ផ្ទះនៃមជ្ឈមណ្ឌលតំបន់អាស៊ានសម្រាប់សកម្មភាពមីនកម្ពុជា ជានិច្ចកាលប្តេជ្ញាចិត្តជួយមជ្ឈមណ្ឌលឱ្យដំណើរការបានពេញលេញ និងមានប្រសិទ្ធភាពក្នុងការបង្កើនការយល់ដឹងពីផលប៉ះពាល់នៃសំណល់យុទ្ធភណ្ឌពីសង្គ្រាម។
លោកបានសង្កត់ធ្ងន់ថា៖ «ការផ្សារភ្ជាប់ទំនាក់ទំនងរវាងអាស៊ានជាមួយប្រទេសដៃគូសន្ទនាអាស៊ានគឺជាមូលដ្ឋានគ្រឹះនៃការកសាងសហគមន៍អាស៊ាន និងមជ្ឈភាពរបស់អាស៊ាន»។
លោក កុយ គួង អ្នកនាំពាក្យក្រសួងការបរទេសកាលពីថ្ងៃអាទិត្យមិនបានបញ្ជាក់បន្ថែមជុំវិញកិច្ចប្រជុំនេះទេ ដោយលោកបង្វែរឱ្យយោងទៅលើសេចក្តីប្រកាសព័ត៌មាននេះវិញ។
សេចក្តីប្រកាសព័ត៌មានដដែលនេះបានបន្ថែមថា រដ្ឋមន្ត្រីការបរទេសអាស៊ានបានជជែកគ្នាក្នុងន័យស្ថាបនារវាងប្រទេសមីយ៉ាន់ម៉ា និងបង់ក្លាដែសចំពោះដំណើរការនៃការធ្វើមាតុភូមិនិវត្តន៍របស់ជនបាត់បង់លំនៅនៅរដ្ឋរ៉ាក់ឃីន។ រដ្ឋមន្ត្រីការបរទេសអាស៊ានក៏បានវាយតម្លៃខ្ពស់ដល់កិច្ចខិតខំប្រឹងប្រែងរបស់អគ្គលេខាធិការអាស៊ានក្នុងការដឹកនាំការអនុវត្តអនុសាសន៍នៃការវាយតម្លៃសេចក្តីត្រូវការ ហើយបានទន្ទឹងរង់ចាំមើលការអនុវត្តនូវការវាយតម្លៃពីតម្រូវការគ្រប់ជ្រុងជ្រោយ។
សេចក្តីប្រកាសព័ត៌មានបញ្ជាក់ថា៖ «រដ្ឋមន្ត្រីការបរទេសអាស៊ានបានបង្ហាញពីការត្រៀមរួចរាល់របស់អាស៊ានក្នុងការជួយគាំទ្រដល់ដំណើរការនៃការធ្វើមាតុភូមិនិវត្តន៍ឱ្យបានឆាប់រហ័ស មានសុវត្ថិភាព និងមានសណ្តាប់ធ្នាប់»។
បើតាមសេចក្តីប្រកាសព័ត៌មាននេះរដ្ឋមន្ត្រីការបរទេសអាស៊ានបានលើកឡើងពីវឌ្ឍនភាពនៃកិច្ចសហប្រតិបត្តិការ និងកិច្ចពិគ្រោះយោបល់រវាងអាស៊ាន និងចិន ជាពិសេសការបញ្ចប់ការពិភាក្សាជុំទី ១ និងការចាប់ផ្តើមពិភាក្សាជុំទី ២ នៃសេចក្តីព្រាងអត្ថបទចរចាតែមួយនៃក្រមប្រតិបត្តិការនៃសមុទ្រចិនខាងត្បូង។
យោងតាមសេចក្តីប្រកាសព័ត៌មានដដែលរដ្ឋមន្ត្រីការបរទេសអាស៊ានរំពឹងទុកពីការចុះហត្ថលេខាលើកិច្ចព្រមព្រៀងស្តីពីភាពជាដៃគូសេដ្ឋកិច្ចតំបន់គ្រប់ជ្រុងជ្រោយ (RCEP) នៅឆ្នាំនេះដែលនឹងរួមចំណែកបន្ថែមទៀតដល់កំណើនសេដ្ឋកិច្ច និងវិបុលភាពក្នុងតំបន់។
ដោយឡែកនៅក្នុងគេហទំព័ររបស់អាស៊ានដែលបានផ្សព្វផ្សាយកាលពីថ្ងៃទី ១៧ ខែមករាកន្លងទៅបានដកស្រង់សេចក្តីថ្លែងការណ៍របស់ប្រធានកិច្ចប្រជុំចង្អៀតរដ្ឋមន្ត្រីការបរទេសអាស៊ាននេះ ដោយបានបញ្ជាក់ជាថ្មីពីការប្តេជ្ញាចិត្តរួមគ្នាក្នុងការថែរក្សា និងលើកកម្ពស់សន្តិភាព សន្តិសុខ និងស្ថិរភាពនៅក្នុងតំបន់។
សេចក្ដីថ្លែងការណ៍នោះបានលើកយកវិធីដោះស្រាយបញ្ហាដោយសន្តិវិធីនៃជម្លោះ រួមទាំងការគោរពពេញលេញសម្រាប់ដំណើរការផ្នែកច្បាប់ និងការទូតដោយគ្មានងាកទៅរកការគំរាមកំហែង ឬការប្រើប្រាស់កម្លាំង ដោយអនុលោមទៅតាមគោលការណ៍ច្បាប់អន្តរជាតិដែលទទួលស្គាល់ជាសកល និងអនុសញ្ញានៃច្បាប់ស្តីពីលម្ហសមុទ្រ (UNCLOS) របស់អង្គការសហប្រជាជាតិក្នុងឆ្នាំ ១៩៨២ ផងដែរ៕
