ភ្នំពេញៈ រដ្ឋមន្ត្រីការបរទេសលោក ប្រាក់ សុខុន ថ្លែងប្រាប់រដ្ឋមន្ត្រីការបរទេសអាស៊ាន-រុស្សី ថា ប្រទេសទាំងអស់ចាំបាច់ត្រូវទទួលបាននូវថ្នាំបង្ការ និងវ៉ាក់សាំងជំងឺរាតត្បាតបានទាន់ពេលវេលា និងមានតម្លៃសមរម្យ ព្រោះវាជាទំនិញរួមរបស់ពិភពលោក។
លោកថ្លែងបែបនេះក្នុងកិច្ចប្រជុំពិសេសរដ្ឋមន្ត្រីការបរទេសអាស៊ាន-រុស្ស៊ីតាមរយៈប្រព័ន្ធ Video Conference ស្តីពីជំងឺឆ្លងកូវីដ ១៩ ដែលមានប្រទេសឥណ្ឌូនេស៊ី និងរុស្ស៊ីធ្វើជាសហប្រធានដឹកនាំកិច្ចប្រជុំនេះ។
លោក ប្រាក់ សុខុន ដែលជាឧបនាយករដ្ឋមន្ត្រីថ្លែងថា ដើម្បីប្រយុទ្ធប្រឆាំងនឹងការគំរាមកំហែងនៅពេលអនាគត ដូចជាជំងឺរាតត្បាតជាដើម ពហុភាគីនិយមគឺជាអ្វីដែលមិនអាចខ្វះបាន ព្រោះបណ្តាប្រទេសនានាត្រូវការ ការសម្របសម្រួល និងការឆ្លើយតបរួមគ្នាថែមទៀត ដោយផ្អែកលើទិន្នន័យវិទ្យាសាស្ត្រ និងភ័ស្តុតាង។ នេះបើយោងតាមសេចក្តីប្រកាសព័ត៌មានរបស់ក្រសួងការបរទេសកាលពីថ្ងៃទី ១៧ ខែមិថុនា។
សេចក្តីប្រកាសព័ត៌មាននេះបានដកស្រង់សម្ដីលោកថា៖ «ប្រទេសទាំងអស់ចាំបាច់ត្រូវទទួលបានទាន់ពេលវេលា និងដោយគ្មានការរារាំងនូវថ្នាំបង្ការ និងវ៉ាក់សាំងដែលប្រកបដោយគុណភាព សុវត្ថិភាព និងមានតម្លៃសមរម្យ ដែលជាទំនិញរួមរបស់ពិភពលោក»។
លោកថ្លែងបន្តថា ភាគីទាំង ២ គួរតែបន្តទាញការគាំទ្របន្ថែមទៀតពីដៃគូក្នុងតំបន់ ដើម្បីអនុវត្តប្រកបដោយប្រសិទ្ធភាពនូវផែនការសកម្មភាពទីក្រុងម៉ានីល ប្រទេសហ្វីលីពីន ដើម្បីជំរុញសេចក្តីប្រកាសទីក្រុងភ្នំពេញស្តីពីគំនិតផ្តួចផ្តើមអភិវឌ្ឍន៍កិច្ចប្រជុំកំពូលអាស៊ីបូព៌ា ឆ្នាំ ២០១៨-២០២២ ដែលផ្តល់អាទិភាពដល់កិច្ចសហប្រតិបត្តិការលើ «បញ្ហាសុខភាពពិភពលោក និងជំងឺឆ្លងរាតត្បាតនានា»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជាបានប្រាប់ភ្នំពេញប៉ុស្តិ៍កាលពីថ្ងៃព្រហស្បតិ៍ថា ប្រទេសទាំងអស់ដែលទទួលរងផលប៉ះពាល់ពីជំងឺកូវីដ ១៩ គឺសុទ្ធសឹងតែមានបំណងរួមដូចគ្នាដើម្បីឱ្យមានការអភិវឌ្ឍវ៉ាក់សាំង និងថ្នាំព្យាបាលឱ្យបានឆាប់រហ័ស និងមានតម្លៃសមស្របដែលអាចធានាថា ប្រទេសដែលមានស្ថានភាពសេដ្ឋកិច្ចទន់ខ្សោយអាចមានលទ្ធភាពប្រើប្រាស់បាន។
លោកថ្លែងថា៖ «ខ្ញុំជឿថា អ្វីដែលឯកឧត្តម ប្រាក់ សុខុន គាត់បានលើកឡើងនេះ វាគឺជាគោលបំណងរួមរបស់បណ្តាប្រទេសទាំងអស់ដែលទទួលផលប៉ះពាល់ពីកូវីដ ១៩»៕