.jpg)
លោក ប្រាក់ សុខុន ថ្លែងទៅកាន់កិច្ចប្រជុំ តាមរយៈវីដេអូ នៅថ្ងៃតី ២១ខែមករាឆ្នាំ២០២០។ រូបថត ក្រសួងការបរទេស
ភ្នំពេញៈ លោក ប្រាក់ សុខុន ឧបនាយករដ្ឋមន្រ្តីរដ្ឋមន្រ្តីការបរទេស និងសហប្រតិបត្តិការអន្តរជាតិ នៅថ្ងៃទី២១ ខែមករា បានចូលរួមកិច្ចប្រប្រជុំរដ្ឋមន្រ្តីការបរទេស នៃកិច្ចសន្ទនា សហប្រតិបត្តិការអាស៊ីលើកទី ១៧ (17thACD) តាមប្រព័ន្ធវីដេអូជាមួយរដ្ឋមន្រ្តីការបរទេស នៃរដ្ឋសមាជិកទាំង ៣៥ របស់កិច្ចសន្ទនា នៃកិច្ចសហប្រតិបត្តិការអាស៊ី ដោយបានពិភាក្សាអំពីកិច្ចសហប្រតិបត្តិការ លើវិស័យសំខាន់ៗ និងបញ្ហាប្រឈមនានា ដែលបានបង្កដោយសារជំងឺរាតត្បាតកូវីដ១៩។
ការចូលរួមកិច្ចប្រជុំរបស់លោក ប្រាក់ សុខុន គឺឆ្លើយតាបតាមការអញ្ជើញរបស់លោក លោក ម៉េវលុត ឆាវូស៊ូលុ (MevlütÇavuşoğlu) រដ្ឋមន្រ្តីការបរទេស នៃសាធារណរដ្ឋតួកគី។ កិច្ចប្រជុំនេះ ធ្វើឡើងក្រោមប្រធានបទ «ទេសចរណ៍ធម្មតា តាមបែបគន្លងថ្មី មានសុវត្ថិភាព និងសុខភាពល្អ»។
តាមសេចក្ដីប្រកាសព័ត៌មាន របស់ក្រសួងការទេសឲ្យដឹងថា៖«កិច្ចប្រជុំនេះ បានពិភាក្សាអំពីកិច្ចសហប្រតិបត្តិការលើវិស័យសំខាន់ៗ និងបញ្ហាប្រឈមនានា ដែលបានបង្កដោយសារជំងឺរាតត្បាតកូវីដ១៩ ក៏ដូចជារិះរកទស្សនវិស័យនានា ក្នុងការស្តារសេដ្ឋកិច្ច-សង្គមឡើងវិញ ដើម្បីផលប្រយោជន៍ពិតប្រាកដ របស់ប្រជាជន ដោយស្របទៅតាមចក្ខុវិស័យនៃកិច្ចប្រជុំ ACD សំរាប់ឆ្នាំ២០៣០»។
ក្រសួងការបរទេសឱ្យដឹងថា កិច្ចប្រជុំ ACD នេះ ត្រូវបានរៀបចំឡើងជាទៀងទាត់ ដែលត្រូវបានបើកកិច្ចប្រជុំជាលើកដំបូងកាលពីខែ មិថុនា ឆ្នាំ២០០២ នៅទីក្រុងឆាអាម ប្រទេសថៃ។
គោលដៅនៃកិច្ចប្រជុំ ACD គឺជំរុញការពឹងអាស្រ័យគ្នាទៅវិញទៅមក នៅក្នុងបណ្តាប្រទេសអាស៊ី លើកិច្ចសហប្រតិបត្តិការគ្រប់វិស័យ ពង្រីកទីផ្សារពាណិជ្ជកម្ម និងហិរញ្ញវត្ថុនៅអាស៊ី លើកកម្ពស់ភាពប្រកួតប្រជែងសេដ្ឋកិច្ចរបស់អាស៊ី នៅក្នុងទីផ្សារសកល និងការប្រែក្លាយតំបន់អាស៊ី ទៅជាសហគមន៍អាស៊ីមួយ ដែលអាចមានទំនាក់ទំនងជាមួយពិភពលោកទាំងមូលកាន់តែមានគោលជំហរស្មើភាពគ្នា និងចូលរួមចំណែកកាន់តែវិជ្ជមាន ដល់សន្តិភាពនិងវិបុលភាពទៅវិញទៅមក៕
