ភ្នំពេញៈ លោក ប្រាក់ សុខុន រដ្ឋមន្ត្រីក្រសួងការបរទេសបានដឹកនាំគណៈប្រតិភូទៅកាន់សាធារណរដ្ឋប្រជាធិបតេយ្យប្រជាមានិតឡាវដើម្បីពង្រឹងកិច្ចសហប្រតិបត្តិការទ្វេភាគីរួមទាំងបញ្ហាព្រំដែនដែលកាលពីខែសីហាកងទ័ពនៃប្រទេសទាំង ២ មានភាពតានតឹងដាក់គ្នាដោយប្រដាប់អាវុធនៅតំបន់ដែលមិនទាន់បោះបង្គោលព្រំដែនច្បាស់លាស់។
សេចក្ដីប្រកាសព័ត៌មានក្រសួងការបរទេស និងកិច្ចសហប្រតិបត្តិការអន្តរជាតិកាលពីម្សិលមិញបានឲ្យដឹងថា៖ «ទស្សនកិច្ចនេះមានគោលបំណងពង្រឹង និងពង្រីកវិសាលភាព និងជម្រៅនៃកិច្ចសហប្រតិបត្តិការទ្វេភាគីរួមទាំងបញ្ហាព្រំដែននៃប្រទេសទាំង ២»។
សេចក្តីប្រកាសព័ត៌មាននេះបានឲ្យដឹងថា ទស្សនកិច្ចនេះចាប់ផ្ដើមពីថ្ងៃទី ៥ ដល់ទី ៦ ខែកញ្ញា តាមការអញ្ជើញរបស់រដ្ឋមន្ត្រីការបរទេសឡាវ លោក សាលើមសៃ កុំម៉ាស៊ីត។
លោក កេត សោផាន់ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកាលពីម្សិលមិញមិនអាចទាក់ទងដើម្បីសុំអត្ថាធិប្បាយលម្អិតបានទេ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជាបានប្រាប់ភ្នំពេញប៉ុស្តិ៍កាលពីថ្ងៃពុធថា ការបំពេញទស្សនកិច្ចនេះគឺដើម្បីលើកកម្ពស់ទំនាក់ទំនងរវាងកម្ពុជា-ឡាវ។ ដំណើរទស្សនកិច្ចនេះក៏ត្រូវលើកឡើងបញ្ហាព្រំដែនដើម្បីបកស្រាយឱ្យបានយល់គ្នា ដែលជាក់ស្តែងថ្មីៗនេះមានការយល់ច្រឡំគ្នាខ្លះអំពីបញ្ហាព្រំដែននេះ។
ប៉ុន្តែបើពិនិត្យជារួម ទំនាក់ទំនងកម្ពុជា-ឡាវ គឺជាទំនាក់ទំនងជាប្រពៃណីដែលជាបងប្អូន និងជាអ្នកជិតខាងល្អ។ ប្រទេសទាំង ២ មិនសូវដែលមានបញ្ហាប្រឈមអ្វី ឬមានទំនាស់ជាមួយគ្នានោះទេ រួមទាំងបញ្ហាព្រំដែន នយោបាយ និងវប្បធម៌។ ដំណើរទស្សនកិច្ចនេះកាន់តែធ្វើឱ្យទំនាក់ទំនងរវាងប្រទេសទាំង ២ កាន់តែត្រូវបានពង្រឹង និងពង្រីកបន្ថែមទៀត។
លោក គិន ភា ថ្លែងថាជាទូទៅបញ្ហាព្រំដែនជាចំណុចរសើប ហើយដំណើរទស្សនកិច្ចរបស់លោក ប្រាក់ សុខុន ក៏មិនប្រាកដថាអាចដោះស្រាយបញ្ហាព្រំដែនបានដាច់ស្រឡះនោះទេ ពីព្រោះមានចំណុចមួយចំនួនមិនទាន់ឯកភាពគ្នាទៅលើទិដ្ឋភាពផែនទី និងទិដ្ឋភាពបច្ចេកទេសរហូតធ្វើឱ្យប្រទេសទាំង ២ បានស្នើសុំទៅភាគីប្រទេសបារាំងឱ្យជួយអន្តរាគមន៍។
លោកថ្លែងថា៖ «យើងប្រើមធ្យោបាយការទូតហ្នឹងគឺជាការប្រសើរដើម្បីឱ្យមហាជនបានឃើញថា ប្រទេសទាំង ២ អត់មានបញ្ហាអ្វីនឹងគ្នាទេ»។
លោក ឯម សុវណ្ណរ៉ា អ្នកជំនាញខាងវិទ្យាសាស្ត្រនយោបាយបានប្រាប់ភ្នំពេញប៉ុស្តិ៍កាលពីថ្ងៃពុធថា ដំណើរទស្សនកិច្ចនេះល្អ ប៉ុន្តែត្រូវធ្វើឲ្យលឿនជាងនេះ ក្រោយពេលមានព្រឹត្តិការណ៍ប្រឈមដាក់គ្នានៅព្រំដែនកម្ពុជា-ឡាវនៅកន្លែងមុំ ៣ កាលពីពេលកន្លងទៅ។
លោក ឯម សុវណ្ណរ៉ា ថ្លែងថា៖ «ខ្ញុំគិតថាមិនមានបញ្ហាអ្វីធំដុំទេ អាចដោះស្រាយបានសមិទ្ធផល និងលទ្ធផលល្អ»។
លោក ទៀ បាញ់ រដ្ឋមន្ត្រីក្រសួងការពារជាតិបានថ្លែងកាលពីខែសីហាថា ស្ថានភាពព្រំដែនកម្ពុជា-ឡាវ មិនមានភាពតានតឹង ឬការប្រឈមមុខដាក់គ្នាដូចការចុះផ្សាយរបស់សារព័ត៌មានមួយចំនួនដែលផ្សព្វផ្សាយថាមានការប្រឈមមុខដាក់គ្នាជាថ្មីរវាងកងទ័ពកម្ពុជា និងឡាវនៅចំណុចទន្លេពៅក្នុងតំបន់មុំ ៣ ក្នុងខេត្តព្រះវិហារ ហើយថាភាគីកម្ពុជាបានបង្កើនកម្លាំងកងទ័ព និងត្រៀមជម្លៀសប្រជាជនចំនួន ៤ ភូមិស្ថិតនៅក្នុងឃុំចំនួន ២ នៃស្រុកជាំក្សាន្ត ខេត្តព្រះវិហារ។
លោក ទៀ បាញ់ បានឲ្យដឹងថា បញ្ហាព្រំដែន កម្ពុជា-ឡាវ នេះកើតឡើងដោយសារតែតំបន់នោះជាតំបន់មិនទាន់បោះបង្គោលព្រំដែនដាច់ស្រេចនៅឡើយ ហើយប្រជាជនខ្មែរបានឃើញដីនោះទំនេរក៏ទៅបង្កបង្កើនផលទីនោះ ហើយកងទ័ពឡាវបានមកដកដំណាំរបស់ពួកគាត់ ទើបប្រជាជនបានរាយការណ៍ដល់កងកម្លាំងយោធារបស់កម្ពុជាដែលធ្វើឲ្យមានការយល់ច្រឡំ។ ការប្រឈមមុខគ្នាកើតមាននៅខេត្តស្ទឹងត្រែងកាលពីខែមុន៕