.jpg)
លោក ប្រាក់ សុខុន រដ្ឋមន្ត្រីក្រសួងការបរទេស ថ្លែងក្នុងសន្និសីទជាន់ខ្ពស់ស្តីពី «អនាគតដែលយើងចង់បានតួនាទីនៃពហុភាគីនិយមក្នុងពិភពលោកក្រោយកូវីដ ១៩» កាលពីម្សិលមិញ។ ហេង ជីវ័ន
ភ្នំពេញៈ លោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិថ្លែងថា គោលនយោបាយការបរទេសរបស់កម្ពុជាត្រូវបានទ្រទ្រង់យ៉ាងរឹងមាំពីស្មារតីដ៏មោះមុតនៃពហុភាគីនិយម។
លោក ប្រាក់ សុខុន ថ្លែងដូច្នេះក្នុងសន្និសីទជាន់ខ្ពស់ស្តីពី «អនាគតដែលយើងចង់បានតួនាទីនៃពហុភាគីនិយមក្នុងពិភពលោកក្រោយកូវីដ ១៩» ដែលរៀបចំឡើងកាលពីថ្ងៃអង្គារម្សិលមិញដោយអង្គការសហប្រជាជាតិប្រចាំកម្ពុជា និងវិទ្យាស្ថានជាតិការទូត និងទំនាក់ទំនងអន្តរជាតិ។
លោកបានលើកឡើងនូវប្រសាសន៍របស់លោកនាយករដ្ឋមន្ត្រី ហ៊ុន សែន ដែលបានថ្លែងកាលពីខែកញ្ញា ក្នុងកិច្ចប្រជុំជាន់ខ្ពស់ដើម្បីរំឭកខួបលើកទី៧៥ នៃការបង្កើតអង្គការសហប្រជាជាតិថា៖ «កម្ពុជាទទួលស្គាល់តួនាទីស្នូលនៃពហុភាគីនិយមក្នុងការដោះស្រាយបញ្ហាប្រឈមសកលដ៏ស្មុគស្មាញដែលយើងកំពុងប្រឈមមុខសព្វថ្ងៃ។ បញ្ហាប្រឈមរបស់យើងមានភាពពាក់ព័ន្ធគ្នា និងអាចដោះស្រាយបានតែតាមរយៈការធ្វើឱ្យសកម្មឡើងវិញនៃពហុភាគីនិយម»។
លោក ហ៊ុន សែន មានការប្ដេជ្ញាក្នុងការធ្វើជាម្ចាស់ផ្ទះនៃកិច្ចប្រជុំកំពូលអាស៊ីអឺរ៉ុប។ កម្ពុជាចង់ចូលរួមចំណែកតាមតែអាចធ្វើបានក្នុងការធ្វើឱ្យជឿនលឿនដល់ពហុភាគីនិយម។ ប្រសិនបើពហុភាគីនិយមនៅតែដើរតួនាទីរបស់ខ្លួនបានល្អ នោះពិភពលោកនឹងមានសាមគ្គីភាព មានឆន្ទៈ និងធនធានរួម ដើម្បីប្រឈមដោះស្រាយការគំរាមកំហែងលើបញ្ហាសុខភាព។ នេះបើតាមការលើកឡើងរបស់លោក ប្រាក់ សុខុន។
លោកថ្លែងដូច្នេះថា៖ «ប៉ុន្តែវាមិនមែនដូច្នេះទេ ហើយយើងទាំងអស់គ្នាក៏បានដឹងរឿងនេះដែរ។ ការប្រកួតប្រជែងភូមិសាស្ត្រនយោបាយដ៏ស្វិតស្វាញ ដែលមានរូបភាពជាសង្គ្រាមត្រជាក់បែបថ្មីបានកំពុងបន្ទុចបង្អាក់កិច្ចប្រឹងប្រែងក្នុងការដោះស្រាយការរីករាលដាលនៃវីរុសកូរ៉ូណា និងបានកំពុងធ្វើឱ្យសេដ្ឋកិច្ចពិភពលោកធ្លាក់ដុនដាបកាន់តែធ្ងន់ធ្ងរឡើង»។
លោកបន្តថា ពហុភាគីនិយមមានភាពចាំបាច់មិនមែនសម្រាប់តែដោះស្រាយលើបញ្ហាកូវីដ ១៩ ទេ ប៉ុន្តែវាចាំបាច់សម្រាប់ដោះស្រាយដល់ជោគវាសនារបស់មនុស្សដែលរងគ្រោះដោយសារបាតុភូតនានាដែលកើតឡើងជាប់ពាក់ព័ន្ធនឹងការប្រែប្រួលអាកាសធាតុ។
លោកថ្លែងថា៖ «យើងទាំងអស់គ្នាបានឃើញស្រាប់ហើយពីផលប៉ះពាល់ដ៏ធ្ងន់ធ្ងររបស់ភ្លៀងធ្លាក់ក្នុងចំនួនច្រើន និងបញ្ហាទឹកជំនន់ដែលបណ្តាលឱ្យប៉ះពាល់ដល់អាយុជីវិតប្រជាជនកម្ពុជានៅទូទាំងប្រទេសក្នុងប៉ុន្មានសប្តាហ៍ចុងក្រោយនេះ។ បញ្ហាប្រែប្រួលអាកាសធាតុគឺមានពិត និងមានគ្រោះថ្នាក់ដូចជាជំងឺកូវីដ១៩ដែរ។ គ្មានប្រទេសណាមួយអាចដោះស្រាយបញ្ហាប្រែប្រួលអាកាសធាតុនេះបានដោយខ្លួនឯងនោះទេ។ មានតែពហុភាគីនិយមដ៏រឹងមាំ និងមានប្រសិទ្ធភាពប៉ុណ្ណោះទើបយើងអាចសង្ឃឹមយកឈ្នះនូវគ្រោះមហន្តរាយធម្មជាតិទាំងនេះបាន»។
កម្ពុជាបានចូលរួមយ៉ាងសកម្ម និងក្របខ័ណ្ឌរក្សាសន្តិភាពពហុភាគីរបស់អង្គការសហប្រជាជាតិ។ ចាប់តាំងពីឆ្នាំ ២០០៦ មកកម្ពុជាបានបញ្ជូនកងកម្លាំងរក្សាសន្តិភាពចំនួន ៧១២៣ នាក់ទៅប្រទេសចំនួន ៩ ដែលហែកហួរដោយសង្គ្រាម។ ក្នុងចំនួននេះមានស្ត្រី ៤១៩ នាក់ ដែលបំពេញមុខងារជាបុគ្គលិកសុខាភិបាល និងសន្តិសុខ វិស្វករសំណង់ស៊ីវិល និងជាអ្នកជំនាញផ្នែកដោះមីន។ នេះបើតាមការលើកឡើងរបស់លោក ប្រាក់ សុខុន។
លោកបញ្ជាក់ថា៖ «កម្ពុជាជាប់ចំណាត់ថ្នាក់លេខ ១៧ ក្នុងចំណោម ១២០ ប្រទេស ដែលបញ្ជូនស្ត្រីច្រើនទៅចូលរួមក្នុងបេសកកម្មថែរក្សាសន្តិភាពរបស់ អ.ស.ប នេះ។ កម្ពុជាបច្ចុប្បន្នស្ថិតនៅចំណាត់ថ្នាក់ទី ២ ក្នុងចំណោមប្រទេសសមាជិកអាស៊ាន បើនិយាយពីចំនួនចូលរួមរបស់ស្ត្រី»។
ពាក់ព័ន្ធនឹងការប្រឈមដោះស្រាយបញ្ហាកូវីដ១៩ ពហុភាគីនិយមបានគាំទ្រដល់វិធានការរបស់កម្ពុជាក្នុងការទប់ស្កាត់ជំងឺនេះ។ នេះបើតាមការលើកឡើងរបស់លោកស្រី ឱ វណ្ណឌីន អ្នកនាំពាក្យក្រសួងសុខាភិបាលដែលជាវាគ្មិន ១ រូបនៃសិក្ខាសាលានេះ។
លោកស្រីបញ្ជាក់ថា ចាប់តាំងពីមានការផ្ទុះឡើងនៃជំងឺកូវីដ ១៩ កម្ពុជាអភិវឌ្ឍលើសមត្ថភាពឆ្លើយតបនឹងជំងឺដោយបានបណ្ដុះបណ្ដាល និងពង្រាយក្រុមឆ្លើយតបរហ័សជិត ៣ ០០០ នាក់នៅទូទាំងប្រទេស។
លោកស្រីបានបន្តថា កម្ពុជាទទួលបានភាពជោគជ័យចំនួន ៣ ក្នុងការដោះស្រាយជំងឺនេះ។ ជោគជ័យទាំងនោះរួមមានការជួយសង្គ្រោះដល់អ្នកដំណើរតាមនាវាទេសចរណ៍ Westerdam កាលពីខែកុម្ភៈ ការគ្រប់គ្រងពលករចំណាកស្រុកដែលត្រឡប់ពីបរទេសប្រមាណ ១០ ម៉ឺននាក់ និងការបន្តអនុវត្តយ៉ាងខ្ជាប់ខ្ជួននូវវិធានការសម្រាប់អ្នកធ្វើដំណើរ។
លោកស្រីថ្លែងថា៖ «ប្រសិនបើយើងចង់ទទួលបាននូវសមិទ្ធផលផ្នែកសុខភាព ជាពិសេសការដោះស្រាយមិនត្រឹមតែកូវីដ ១៩ ទេ ប៉ុន្តែសម្រាប់ហេតុការណ៍ភ័យរន្ធត់នាពេលអនាគតនោះ យើងត្រូវតែធ្វើការរួមគ្នាពីវិស័យផ្សេងៗ ទាំងវិស័យសាធារណៈ និងឯកជន ទាំងជាតិ និងអន្តរជាតិ»។
លោកស្រី Pauline Tamesis អ្នកសម្របសម្រួលអង្គការ UN ប្រចាំកម្ពុជាបានថ្លែងថា មនុស្សជាច្រើនចង់ឃើញមានការសហប្រតិបត្តិការជាមួយគ្នាបន្ថែមទៀត រវាងប្រទេសនានាដើម្បីធ្វើការជាមួយគ្នានាពេលអនាគត និងដោះស្រាយបញ្ហាដែលពួកគេមានការខ្វល់ខ្វាយ។ ការពង្រឹងវិធីដោះស្រាយដោយផ្អែកលើពហុភាគីនិយមសម្រាប់បញ្ហាប្រឈមសកល គឺជារឿងចាំបាច់៕
