.jpg)
លោក ប្រាក់ សុខុន ថ្លែងក្នុងកិច្ចប្រជុំមហាសន្និបាតរបស់ (UN) លើកទី ៧៤ កាលពីថ្ងៃសៅរ៍សប្ដាហ៍មុន។ MFA
ភ្នំពេញៈ លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិបានលើកពីវឌ្ឍនភាពរបស់កម្ពុជាប្រាប់អង្គសន្និបាតអង្គការសហប្រជាជាតិ (UN) ដោយរំលេចពីភាពរីកចម្រើនមួយចំនួនរួមទាំងធនធានមនុស្សផងដែរ។
ការថ្លែងរបស់លោក ប្រាក់ សុខុន ដូចនេះបានធ្វើឡើងក្នុងកិច្ចប្រជុំមហាសន្និបាតរបស់ (UN) លើកទី ៧៤ កាលពីថ្ងៃសៅរ៍សប្ដាហ៍មុនក្រោមប្រធានបទ «ជំរុញកិច្ចប្រឹងប្រែងពហុភាគីសម្រាប់ការលុបបំបាត់ភាពក្រីក្រ ការអប់រំប្រកបដោយគុណភាព សកម្មភាពអាកាសធាតុ និងបរិយាប័ន្ន»។
តាមរយៈ Video ដែលបានផ្សព្វផ្សាយនៅលើគេហទំព័រ UN Web TV លោក ប្រាក់ សុខុន បានថ្លែងថា៖ «សន្ទស្សន៍អភិវឌ្ឍន៍ធនធានមនុស្សបានកើនឡើងគួរឱ្យកត់សម្គាល់ក្នុងប៉ុន្មានទសវត្សរ៍ថ្មីៗនេះដែលធ្វើឱ្យយើងស្ថិតក្នុងចំណាត់ថ្នាក់នៃការអភិវឌ្ឍធនធានមនុស្សជាមធ្យម និងជាប្រទេសបំពេញការងារបានល្អបំផុតទី ៨ លើពិភពលោកក្នុងរយៈពេលនេះ» ។
លោក ប្រាក់ សុខុន បានថ្លែងថាចន្លោះឆ្នាំ ១៩៩០ និង ២០១៧ អាយុកាលរបស់ប្រជាជនកម្ពុជាបានកើនឡើងជិត ១៦ ឆ្នាំ។ មានការធ្លាក់ចុះអត្រាមរណភាពទារក និងមាតា និងការកាត់បន្ថយចំនួនអ្នកស្លាប់ដោយសារជំងឺគ្រុនចាញ់ ជំងឺអេដស៍ និងជំងឺរបេង។ ការទទួលបានការអប់រំនៅថ្នាក់បឋមសិក្សាឥឡូវនេះស្ទើរតែមានលក្ខណៈជាសកល ហើយអត្រាចុះឈ្មោះចូលរៀននៅបឋមសិក្សាគឺស្ទើរតែមានចំនួន ១០០ ភាគរយ ទាំងក្មេងស្រី និងក្មេងប្រុស។
លោក ប្រាក់ សុខុន ដែលតំណាងឱ្យលោកនាយករដ្ឋមន្ត្រី ហ៊ុន សែន បានបញ្ជាក់ថា៖ «យើងបានដាក់បញ្ចូលការប្តេជ្ញាចិត្តរបស់យើងដោយមិនទុកឱ្យនរណាម្នាក់នៅឯកោចូលទៅក្នុងគោលនយោបាយ និងសកម្មភាព។ ការអនុម័តក្របខ័ណ្ឌយុទ្ធសាស្ត្រជាតិសម្រាប់កិច្ចគាំពារសង្គមឆ្នាំ ២០១៦-២០២៥ ជាចំណុចរបត់មួយ»។
លោកបានបន្តថា កាលពីមុនប្រទេសកម្ពុជាទទួលបានអត្ថប្រយោជន៍ពីប្រតិបត្តិការថែរក្សាសន្តិភាពរបស់ UN។ ប៉ុន្តែសព្វថ្ងៃនេះកម្ពុជាបានរួមចំណែកសកម្មបំផុតមួយក្នុងបេសកកម្មនេះដោយមានទ័ពមួកខៀវជាង ៦ ៣០០ នាក់ត្រូវបានដាក់ពង្រាយនៅប្រទេសអាហ្វ្រិកចំនួន ៨ និងនៅមជ្ឈិមបូព៌ាតាំងពីឆ្នាំ ២០០៦ មក។
លោក កេត សោផាន់ អ្នកនាំពាក្យក្រសួងការបរទេសមិនអាចទាក់ទងសុំការបញ្ជាក់បានទេកាលម្សិលមិញ។
លោក ឯម សុវណ្ណរ៉ា អ្នកវិភាគនយោបាយបានថ្លែងកាលពីថ្ងៃម្សិលមិញថា ជាការកត់សម្គាល់ប្រទេសជាសមាជិក (អ.ស.ប) ដែលគាំទ្រកម្ពុជាពាក់ព័ន្ធនឹងសិទ្ធិមនុស្ស លោកសង្កេតឃើញថា មានតែប្រទេសវ៉េណេស៊ុយអេឡា និងចិនប៉ុណ្ណោះ។ ដោយឡែកប្រទេសភាគច្រើនមិនបានគាំទ្រកម្ពុជាពីរឿងនេះទេ។ លោកថាបញ្ហាប្រឈមរបស់កម្ពុជាក៏ជាឧបសគ្គមួយដែរនៅពេលសហគមន៍អឺរ៉ុបដាក់សម្ពាធរឿងដក EBA។
លោកថា៖ «អាហ្នឹងក៏ជាទឡ្ហីករណ៍មួយដែរដែលគេអាចយកមកដាក់ជាបន្ទុកលើរដ្ឋាភិបាលកម្ពុជា»៕
