.jpg)
លោក ប្រាក់ សុខុន និងលោកស្រី Donica Pottie ក្នុងជំនួបពីឆ្នាំមុន។ រូប ក្រសួងការបរទេស
ភ្នំពេញៈ រដ្ឋមន្ត្រីការបរទេសលោក ប្រាក់ សុខុន លើកទឹកចិត្តឱ្យក្រសួងមហាផ្ទៃបន្តពង្រឹង និងពង្រីកភាពជាដៃគូបន្ថែមទៀតជាមួយប្រទេសកាណាដាលើវិស័យពាក់ព័ន្ធ ដោយសារលោកមើលឃើញថា នយោបាយការបរទេសរបស់កាណាដាមានភាពអនុគ្រោះខ្លាំងជាងមុនចំពោះកម្ពុជា។
លោក ប្រាក់ សុខុន បានជម្រាបជូនលោក ស ខេង រដ្ឋមន្ត្រីក្រសួងមហាផ្ទៃថា តាមរយៈលិខិត និងការទូរស័ព្ទជាមួយភាគីកាណាដាកាលពីកន្លងទៅ ក្រសួងការបរទេសបានសង្កេតឃើញថា នយោបាយការបរទេសរបស់កាណាដាមានភាពអនុគ្រោះជាងមុនសម្រាប់កម្ពុជា។ នេះបើតាមលិខិតចុះថ្ងៃទី ៦ ខែតុលា របស់លោក ប្រាក់ សុខុន ផ្ញើជូនលោក ស ខេង។
លោក ប្រាក់ សុខុន បញ្ជាក់ថា ភាពអនុគ្រោះរបស់កាណាដានេះអាចបណ្ដាលមកពីការជួយលើផ្នែកមនុស្សធម៌របស់កម្ពុជាក្នុងការសម្របសម្រួលធ្វើមាតុភូមិនិវត្តន៍ជនជាតិកាណាដាចំនួន ២៧១ នាក់ដែលជាប់គាំងលើនាវាទេសចរណ៍ Westerdam និងការជួយគាំទ្រគ្នាលើវេទិកាពហុភាគី។ លោកបន្តថា៖ «កាណាដា បានសង្កត់ធ្ងន់លើការលើកកម្ពស់ពាណិជ្ជកម្ម និងវិនិយោគទ្វេភាគី និងតំបន់ គំនិតផ្ដួចផ្ដើមបោសសម្អាតមីន ការលើកកម្ពស់សណ្ដាប់ធ្នាប់អន្តរជាតិផ្អែកលើវិធានច្បាប់ និងការកសាងសមត្ថភាពមូលដ្ឋាន ដើម្បីឆ្លើយតបទៅនឹងការគំរាមកំហែងឧក្រិដ្ឋកម្មឆ្លងដែននៅក្នុងតំបន់»។
លោកបានយោងទៅលើលិខិតរបស់លោក Francois Philippe Champagne រដ្ឋមន្ត្រីការបរទេសកាណាដា ដែលឆ្លើយតបមកលោកក្នុងឱកាសបុណ្យជាតិកាណាដាលើកទី ១៥៣។ លោកថា៖ «អាស្រ័យហេតុនេះ ក្រសួងការបរទេស និងសហប្រតិបត្តិការអន្តរជាតិយល់ថា ក្រសួងមហាផ្ទៃគួរឆ្លៀតឱកាសដ៏ល្អនេះបន្តពង្រឹង និងពង្រីកភាពជាដៃគូបន្ថែមជាមួយកាណាដាលើវិស័យអាទិភាពខាងលើ»។
កាលពីថ្ងៃទី ២៣ ខែកញ្ញា លោក Champagne បានសរសេរលិខិតមួយផ្ញើមកកាន់លោក ប្រាក់ សុខុន ដើម្បីថ្លែងអំណរគុណដែលលោក ប្រាក់ សុខុន បានសរសេរលិខិតអបអរសាទរកាណាដាក្នុងឱកាសនៃការប្រារព្ធទិវាជាតិលើកទី ១៥៣ នៅថ្ងៃទី ១ ខែកក្កដា។
លិខិតរបស់លោក Champagne បានសរសេរថា កាណាដាវាយតម្លៃខ្ពស់ចំពោះទំនាក់ទំនងរបស់ខ្លួនរយៈពេលយូរអង្វែង និងចម្រុះវិស័យជាមួយនឹងព្រះរាជាណាចក្រកម្ពុជា។ កាណាដាទន្ទឹងរង់ចាំធ្វើឱ្យជឿនលឿនដល់កិច្ចសហការរវាងប្រទេសទាំង ២ ដើម្បីសម្រេចគោលដៅរួមលើការងារអាទិភាពកម្រិតតំបន់ និងកម្រិតសកល ជាពិសេសតាមរយៈអង្គការសហប្រជាជាតិ និងតាមរយៈសមាគមអាស៊ានដែលជាដៃគូសន្ទនាមួយ។ លោកកត់សម្គាល់ថា សមាគមអាស៊ាននៅតែជាផ្នែកសំខាន់ សម្រាប់វិបុលភាព និងសន្តិសុខរបស់កាណាដា និងសម្រាប់តំបន់។
លោកសរសេរថា៖ «លើសពីនេះទៅទៀត យើងទទូចចង់បន្តធ្វើការជាមួយកម្ពុជាលើបញ្ហាដែលមានសារៈសំខាន់រួមដូចជាការធ្វើឱ្យជឿនលឿនដល់ពាណិជ្ជកម្ម និងវិនិយោគទ្វេភាគី និងកម្រិតតំបន់ គំនិតផ្ដួចផ្ដើមក្នុងការសម្អាតមីន ការលើកកម្ពស់សណ្ដាប់ធ្នាប់អន្តរជាតិផ្អែកលើវិធានច្បាប់ និងការកសាងសមត្ថភាពមូលដ្ឋាន សម្រាប់ឆ្លើយតបទៅនឹងការគំរាមកំហែងពីឧក្រិដ្ឋកម្មឆ្លងដែននៅក្នុងតំបន់»។
លោក Champagne ក៏បានបង្ហាញការគាំទ្រពេញទំហឹង សម្រាប់ការបង្កើតការប្រឹក្សាពិគ្រោះយោបល់ទ្វេភាគី រវាងក្រសួងការបរទេស នៃប្រទេសទាំង២។ ការប្រឹក្សាពិគ្រោះយោបល់នេះ នឹងធ្វើឱ្យប្រសើរឡើងដល់កិច្ចសហប្រតិបត្តិការសេដ្ឋកិច្ច និងលើកកម្ពស់ការផ្លាស់ប្ដូរគំនិត ការបង្កើតចំណេះដឹង និងការអភិវឌ្ឍសេដ្ឋកិច្ចប្រកបដោយចីរភាព។ «ខ្ញុំទន្ទឹងរង់ចាំធ្វើការជាមួយគ្នាដើម្បីឱ្យទំនាក់ទំនងរបស់យើងទទួលបាននូវផលប្រយោជន៍រួមសម្រាប់ប្រជាជនរបស់យើង»។
ភ្នំពេញប៉ុស្តិ៍មិនអាចសុំការបញ្ជាក់បន្ថែមពីអ្នកនាំពាក្យក្រសួងការបរទេសកម្ពុជា ក៏ដូចជាស្ថានទូតកាណាដាបានទេកាលពីម្សិលមិញ។
លោក ផាត សុផានិត អ្នកនាំពាក្យក្រសួងមហាផ្ទៃបានឱ្យដឹងថា លិខិតរបស់លោក ប្រាក់ សុខុន គ្រាន់តែជាការជូនដំណឹងដល់ក្រសួង និងស្ថាប័ន ក្នុងករណីមានគោលបំណងបង្កើតកិច្ចសហប្រតិបត្តិការលើផ្នែកដែលស្ថិតក្នុងសមត្ថកិច្ចរបស់ខ្លួន ប្រសិនបើមានដោយផ្អែកលើទំនាក់ទំនងល្អប្រសើរទ្វេភាគីនេះ។ លោកថ្លែងថា៖ «មកដល់ពេលនេះក្រសួងមិនទាន់មានកិច្ចសហប្រតិបត្តិការផ្លូវការជាទម្រង់ជាអនុស្សរណៈនៃការយោគយល់គ្នា (MoU) ឬ កិច្ចព្រមព្រៀងផ្លូវការណាមួយនៅឡើយទេ។ កន្លងមកយើងមានតែទំនាក់ទំនង ឬកិច្ចសហការតាមករណីជាក់ស្តែងនីមួយៗប៉ុណ្ណោះ»។
កាលពីខែតុលា ឆ្នាំមុនលោក ប្រាក់ សុខុន បានជួបជាមួយលោកស្រី Donica Pottie ដែលពេលនោះជាឯកអគ្គរដ្ឋទូតកាណាដាប្រចាំកម្ពុជា។ ក្នុងជំនួបនោះលោក ប្រាក់ សុខុន បានថ្លែងអំណរគុណដល់កាណាដាដែលផ្ដល់ជំនួយដល់កម្ពុជាលើវិស័យកម្ចាត់មីន អប់រំ បេសកកម្មរក្សាសន្តិភាព និងការប្រែប្រួលអាកាសធាតុ។
លោកស្រី Pottie បានប្រាប់ទៅលោក ប្រាក់ សុខុន ថា ចាប់តាំងពីកាណាដាបើកស្ថានទូតនៅទីក្រុងភ្នំពេញនៅឆ្នាំ ២០១៦ ទំហំពាណិជ្ជកម្មប្រទេសទាំង ២ កើនឡើង ៨០០ ភាគរយ។ កាណាដាក៏ផ្ដល់ភាពអនុគ្រោះដល់ប្រទេសកំពុងអភិវឌ្ឍន៍ដើម្បីអភិវឌ្ឍសេដ្ឋកិច្ចរបស់ខ្លួន ដោយមិនភ្ជាប់លក្ខខណ្ឌសិទ្ធិមនុស្សឡើយ។ នេះបើតាមក្រសួងការបរទេស។
កាលពីឆ្នាំ ២០១៩ ទីស្ដីការគណៈរដ្ឋមន្ត្រីបញ្ជាក់ថា ទំហំពាណិជ្ជកម្មរវាងប្រទេសទាំង ២ បានឈានដល់កម្រិត ១ ពាន់លានដុល្លារ ដោយការនាំចេញចម្បងរបស់កម្ពុជាទៅកាណាដាគឺសម្លៀកបំពាក់។
លោក សុខ ទូច ប្រធានរាជបណ្ឌិត្យសភាកម្ពុជាថ្លែងពីម្សិលមិញថា ប្រទេសកាណាដាស្ថិតនៅយ៉ាងឆ្ងាយពីប្រទេសកម្ពុជា ហើយជាលក្ខណៈភូមិសាស្ត្រ វាត្រូវបានរាំងខ្ទប់ដោយសហរដ្ឋអាមេរិកទៀត។ ដូច្នេះទំនាក់ទំនងប្រទេសទាំង ២ មានតិចតួចប៉ុណ្ណោះ។
លោកថ្លែងដូច្នេះថា៖ «ទោះបីប្រជាជនយើងរស់នៅទីនោះច្រើន ប៉ុន្តែទំនាក់ទំនងរវាងរដ្ឋ និងរដ្ឋហាក់ដូចជាឆ្ងាយ ហើយនៅគ្រប់សម័យកាលទាំងអស់ គឺមិនមានទេ។ តែបើសិនជាយើងមានទំនាក់ទំនងល្អនឹងគ្នាបច្ចុប្បន្ននេះសម្រាប់រដ្ឋាភិបាល វាក៏ជាការល្អដែរ សម្រាប់ផលិតផល និងទីផ្សារទាំងផ្នែកវាយនភណ្ឌ និងចំណីអាហារ»៕
