.jpg)
លោក ប្រាក់ សុខុន រដ្ឋមន្ត្រីក្រសួងការបរទេស។ រូបថត ក្រសួងការបរទេស
ភ្នំពេញៈ រដ្ឋមន្ត្រីការបរទេស លោក ប្រាក់ សុខុន បានអំពាវនាវដល់រដ្ឋមន្ត្រីការបរទេសនៃប្រទេសខ្សែក្រវាត់ និងផ្លូវចំនួនជាង ២០ ប្រទេសឱ្យរិះរកមធ្យោបាយ ដើម្បីបង្កើតបរិយាកាសអំណោយផលដើម្បីស្តារសេដ្ឋកិច្ចឡើងវិញ ក្រោយវិបត្តិជំងឺកូវីដ ១៩ ខណៈស្ថានភាពប្រទេសមួយចំនួនបានធូរស្រាលពីជំងឺនេះ។
ការអំពាវនាវរបស់លោក ប្រាក់ សុខុន បានធ្វើឡើងក្នុងកិច្ចប្រជុំជាន់ខ្ពស់ក្នុងក្របខ័ណ្ឌកិច្ចសហប្រតិបតិ្តការអន្តរជាតិនៃគំនិតផ្តួចផ្តើមខ្សែក្រវាត់ និងផ្លូវស្តីពីការប្រយុទ្ធប្រឆាំងជំងឺកូវីដ ១៩ ដោយសាមគ្គីភាព តាមរយៈប្រព័ន្ធវីដេអូ (Video Conference) កាលពីថ្ងៃទី ១៨ ខែមិថុនា។ កិច្ចប្រជុំនេះផ្តួចផ្តើមឡើងដោយប្រទេសចិន និងដឹកនាំដោយលោក វ៉ាង យី ទីប្រឹក្សារដ្ឋ និងជារដ្ឋមន្ត្រីការបរទេសចិន និងចូលរួមដោយរដ្ឋមន្ត្រីការបរទេសមកពី ២៦ ប្រទេសដែលជាដៃគូកិច្ចសហប្រតិបត្តិការគំនិតផ្តួចផ្តើមខ្សែក្រវាត់ និងផ្លូវ។
លោក ប្រាក់ សុខុន ត្រូវបានដកស្រង់សម្ដីក្នុងសេចក្តីប្រកាសព័ត៌មានក្រសួងការបរទេសកាលពីថ្ងៃទី ១៩ ថា៖ «ខណៈដែលស្ថានភាពជំងឺកូវី១៩កំពុងធូរស្រាលនៅតាមប្រទេសមួយចំនួននៅលើពិភពលោក វេលានេះជាពេលត្រូវចាប់ផ្តើមរិះរករបៀប និងធានាឱ្យបាននូវមធ្យោបាយ ដើម្បីបង្កើតបរិយាកាសអំណោយផលសម្រាប់ការស្តារសេដ្ឋកិច្ចឡើងវិញ ក្រោយជំងឺកូវីដ១៩រាតត្បាតកន្លងផុត»។
លោក ប្រាក់ សុខុន ថ្លែងបន្តថា៖ «ទីផ្សារដែលកំពុងរីកចម្រើន និងប្រទេសកំពុងអភិវឌ្ឍន៍មានសារៈសំខាន់ជាអ្នកផ្គត់ផ្គង់ផង និងជាទីផ្សារផង។ ការធានាបាននូវការតភ្ជាប់ដែលគ្មានរបាំងក្នុងចំណោមយើងទាំងអស់គ្នានឹងជួយពង្រឹងសេដ្ឋកិច្ចរបស់យើង»។
លោក ប្រាក់ សុខុន ក៏បានអំពាវនាវដល់រដ្ឋមន្ត្រីជាង ២០ ប្រទេសនេះចាំបាច់ត្រូវពង្រឹងសមត្ថភាពដើម្បីដោះស្រាយវិបត្តិសុខភាពសាធារណៈនេះ តាមរយៈការផ្លាស់ប្តូរបទពិសោធ និងជំនាញបច្ចេកទេស ការចែករំលែកឧត្តម្មានុវត្តន៍ ហើយនិងរិះរកការសិក្សាស្រាវជ្រាវ និងអភិវឌ្ឍរួមគ្នាលើថ្នាំព្យាបាល និងវ៉ាក់សាំង។ «ក្នុងន័យនេះកម្ពុជាគាំទ្រដល់ការបង្កើតឱ្យមានគំនិតផ្តួចផ្តើមវិថីសុខភាព»។
លោក ប្រាក់ សុខុន ថ្លែងថាក្នុងនាមជាប្រទេសដែលមានជំនឿមុតមាំលើពហុភាគីនិយម និងជាតួអង្គសកម្មនៅក្នុងក្របខ័ណ្ឌកិច្ចសហប្រតិបត្តិការខ្សែក្រវាត់ និងផ្លូវ កម្ពុជាអំពាវនាវឱ្យមានការចូលរួមកាន់តែស៊ីជម្រៅបន្ថែមទៀតពីតួអង្គរដ្ឋ និងតួអង្គមិនមែនរដ្ឋទាំងអស់នៅក្នុងបណ្តាកម្មវិធីកិច្ចសហប្រតិបត្តិការខ្សែក្រវាត់ និងផ្លូវដើម្បីបំពេញឱ្យគ្នាទៅវិញទៅមកជាមួយគោលដៅអភិវឌ្ឍន៍ប្រកបដោយចីរភាពឆ្នាំ ២០៣០ របស់អង្គការសហប្រជាជាតិ។
លោកថ្លែងថា៖ «ប្រសិនបើគ្មានកិច្ចសហប្រតិបត្តិការ និងសាមគ្គីភាពអន្តរជាតិទេ យើងមិនអាចឈ្នះការប្រយុទ្ធប្រឆាំងនឹងជំងឺរាតត្បាតនេះទេ។ ការធ្វើនយោបាយណាមួយទៅលើការផ្ទុះឡើងនៃជំងឺរាតត្បាត ឬការលេងល្បែងស្តីបន្ទោសដាក់គ្នាគឺបានត្រឹមតែកាត់បន្ថយនូវកិច្ចខិតខំប្រឹងប្រែងអន្តរជាតិប្រឆាំងនឹងជំងឺរាតត្បាតសកលនេះតែប៉ុណ្ណោះ»។
លោក វ៉ាង យី ត្រូវដកស្រង់សម្ដីដោយគេហទំព័រក្រសួងការបរទេសចិនកាលពីថ្ងៃទី ១៩ ខែមិថុនា បានថ្លែងក្នុងកិច្ចប្រជុំនេះថា ចិនត្រៀមខ្លួនធ្វើការជាមួយដៃគូអន្តរជាតិដើម្បីធ្វើឱ្យគំនិតផ្តួចផ្តើមខ្សែក្រវាត់ និងផ្លូវក្លាយជាគំរូនៃកិច្ចសហប្រតិបត្តិការ សុខាភិបាល ការស្តារឡើងវិញ និងការរីកចម្រើន និងបើកអនាគតភ្លឺស្វាងសម្រាប់កិច្ចសហប្រតិបត្តិការខ្សែក្រវាត់ និងផ្លូវ។
លោក វ៉ាង ថ្លែងថា៖ «ប្រទេសចិននឹងផ្តោតលើការគាំទ្រដល់បណ្តាប្រទេសក្នុងការប្រយុទ្ធប្រឆាំងនឹងជំងឺកូវីដ ១៩ និងការបន្តការអភិវឌ្ឍសេដ្ឋកិច្ច និងសង្គម និងពិចារណាជាវិជ្ជមានដល់តម្រូវការរបស់ដៃគូខ្សែក្រវាត់ និងផ្លូវក្នុងការអភិវឌ្ឍ និងការប្រើប្រាស់វ៉ាក់សាំង។ ប្រទេសចិនក៏នឹងពិភាក្សាអំពីការបង្កើតផ្លូវល្បឿនលឿនសម្រាប់លំហូរមនុស្ស និងទំនិញឆ្លងកាត់ព្រំដែនជាមួយដៃគូខ្សែក្រវាត់ និងផ្លូវ»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជាបានថ្លែងថា ជំងឺកូវីដ ១៩ គឺជាគ្រោះមហន្តរាយសកលដែលធ្វើឱ្យមានផលប៉ះពាល់ដល់គ្រប់ប្រទេសទាំងអស់ ស្ទើរតែគ្រប់វិស័យ។ ជាពិសេសនោះ វិស័យសេដ្ឋកិច្ចសង្គមទទួលរងផលប៉ះពាល់ធ្ងន់ធ្ងរ។ អ្វីដែលជាតម្រូវការចាំបាច់ស្តារសេដ្ឋកិច្ចឡើងវិញ៕
