.jpg)
លោក ផែង វណ្ណៈ នៅពេលត្រូវកងរាជអាវុធហត្ថចាប់ខ្លួន ពីម្សិលមិញ។ ហុង មិនា
ភ្នំពេញៈ តុលាការនឹងបន្តសាកសួរវរសេនីយ៍ទោ ផែង វណ្ណៈ ដែលល្បីនៅលើបណ្ដាញហ្វេសប៊ុកនៅថ្ងៃនេះទៀត តាមបណ្ដឹងចោទប្រកាន់ពីបទ «ញុះញង់ឲ្យប្រព្រឹត្តបទល្មើសជាអាទិ៍» របស់មេធាវីតំណាងលោកនាយករដ្ឋមន្ត្រី ហ៊ុន សែន ពាក់ព័ន្ធនឹងការអត្ថាធិប្បាយភ្ជាប់នឹងការស្លាប់របស់លោក កែម ឡី។
លោក លី សុផាណា អ្នកនាំពាក្យអយ្យការអមសាលាដំបូងរាជធានីភ្នំពេញ បានបញ្ជាក់កាលពីល្ងាចម្សិលមិញថា លោក ផែង វណ្ណៈ ត្រូវបានតំណាងអយ្យការសួរចម្លើយ និងសម្រេចឃាត់ខ្លួនកាលពីម្សិលមិញ ហើយនឹងបន្តនីតិវិធីនៅថ្ងៃពុធនេះទៀត។
លោក ផែង វណ្ណៈ ត្រូវបានកងរាជអាវុធហត្ថលើផ្ទៃប្រទេសឃាត់ខ្លួនកាលពីម្សិលមិញ តាមដីការបស់ព្រះរាជអាជ្ញាអមសាលាដំបូងរាជធានីភ្នំពេញ។ លោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសបានថ្លែងកាលពីម្សិលមិញថា ការឃាត់ខ្លួនតាមដីកាបញ្ជានេះ មិនតម្រូវឲ្យកងរាជអាវុធហត្ថធ្វើការសាកសួរទេ គឺបញ្ជូនទៅតុលាការតែម្ដង។
លោក គី តិច មេធាវីតំណាងដោយអាណត្តិរបស់លោកនាយករដ្ឋមន្ត្រី ហ៊ុន សែន បានដាក់ពាក្យប្ដឹងទៅសាលាដំបូងរាជធានីភ្នំពេញកាលពីថ្ងៃទី ១ ខែ មេសា។ ប៉ុន្តែលោក ផែង វណ្ណៈ បានរងបណ្ដឹង ២ រួចហើយដែលប្ដឹងដោយលោក ពេជ្រ ស្រស់ ប្រធានគណបក្សយុវជនកម្ពុជា និងជាសមាជិកឧត្តមក្រុមប្រឹក្សាពិគ្រោះ និងផ្តល់យោបល់ និងអង្គភាពព័ត៌មាន Fresh News ពាក់ព័ន្ធនឹងការយកប្រាក់ ៥ ០០០ ដុល្លារពីគ្រួសារជនបង្កគ្រោះថ្នាក់ចរាចរណ៍ទៅឲ្យគ្រួសារនិស្សិត ឌុំ រីដា ដែលស្លាប់ក្នុងគ្រោះថ្នាក់ចរាចរណ៍។
ពាក្យបណ្ដឹងរបស់លោក គី តិច បញ្ជាក់ថា លោក ផែង វណ្ណៈ មានចេតនាទុច្ចរិត ប្រើប្រាស់មធ្យោបាយទូរគមនាគមន៍សោតទស្សន៍របស់ខ្លួនធ្វើការផ្សព្វផ្សាយជាសាធារណៈយ៉ាងទូលំទូលាយទៅដល់សាធារណជនទូទៅក្នុងគោលបំណងបរិហារកេរ្តិ៍ជាសាធារណៈលើលោក ហ៊ុន សែន។ ពាក្យបណ្ដឹងនេះ យោងលើសំណេរនៅលើទំព័រហ្វេសប៊ុកឈ្មោះ Pheng Vannak News ដែលបានសរសេរកាលពីថ្ងៃទី ២៩ ខែ មីនា។
ក្នុងសំណេរកាលពីថ្ងៃទី ២៩ មីនា លោក ផែង វណ្ណៈ បានបកស្រាយពីការប្តឹងលើរូបលោកពីសំណាក់លោក ពេជ្រ ស្រស់ ដោយចោទថាលោកបានប្រព្រឹត្តអំពើពុករលួយ រឿងយកប្រាក់ ៥ ០០០ ដុល្លារ ពីឪពុករបស់ក្មេងស្រីបង្កគ្រោះថ្នាក់ចរាចរណ៍ទៅឲ្យគ្រួសារជនរងគ្រោះ ឌុំ រីដា។ ក្នុងសំណេរនោះដែរលោក ផែង វណ្ណៈ បានប្រៀបធៀបការនាំយកប្រាក់នោះ ទៅនឹងការយកថវិការបស់លោកនាយករដ្ឋមន្ត្រីទៅចូលសម្រាប់ការសាងសង់ចេតិយ លោក កែម ឡី។
លោកសរសេរថា៖ «លោក លឹម ជាយុត្ថា (វុត្ថា) អគ្គនាយកអង្គភាព Fresh News តំណាងថ្នាក់ដឹកនាំ នាំយកថវិកា ៥០ ០០០ ដុល្លារទៅចូលបុណ្យដល់ក្រុមគ្រួសារលោកបណ្ឌិត កែម ឡី ដើម្បីធ្វើចេតិយ ម្ដេចលោកទេសរដ្ឋមន្ត្រី ពេជ្រ ស្រស់ មិនប្ដឹងទៅអង្គភាពប្រឆាំងអំពើពុករលួយ? ខុសគ្នាដូចម្តេចខ្លះបើកាន់លុយជាតំណាងទៅចូលបុណ្យដូចគ្នា»។
លោក គី តិច ចាត់ទុកសំណេរនេះថា៖ «មានផែនការច្បាស់លាស់និងចេតនាទុច្ចរិតពិតប្រាដកធ្វើការប្រៀបធៀបក្នុងគោលបំណងចោទប្រកាន់និងទម្លាក់កំហុសទៅលើសម្ដេចអគ្គមហាសេនាបតីតេជោ ហ៊ុន សែន ថា ជាឃាតករសម្លាប់លោកបណ្ឌិត កែម ឡី»។
លោក គី តិច បន្តថា សំណេរបែបនេះធ្វើឡើងក្នុងគោលបំណងឲ្យសាធារណជនមានការភាន់ច្រឡំ ជឿជាក់ និងទម្លាក់កំហុសលើលោក ហ៊ុន សែន ដែលជាថ្នាក់ដឹកនាំកំពូល។
លោកបញ្ជាក់ថា នៅមានអ្នកចូលទៅបញ្ចេញមតិនៅលើការបង្ហោះនោះដោយពួកគេភាន់ច្រឡំទៅលើលោក ហ៊ុន សែន ថាជាឃាតករសម្លាប់លោក កែម ឡី។ លោកថាមានភ័ស្តុតាងចំនួន ១៤ ទំព័រដែលបានដាក់ភ្ជាប់ទៅជាមួយសម្រាប់ជាមូលដ្ឋានក្នុងការពិនិត្យ និងសម្រេច។
លោក គី តិច បានស្នើឲ្យមានការចោទប្រកាន់លោក ផែង វណ្ណៈ និងផ្ដន្ទាទោសលោកឲ្យបានធ្ងន់ធ្ងរបំផុតតាមច្បាប់ពីបទបរិហារកេរ្តិ៍ និងបទញុះញង់ឲ្យប្រព្រឹត្តបទល្មើសជាអាទិ៍ តាមមាត្រា ៣០៥, ៤៩៤ និង ៤៩៥ នៃក្រមព្រហ្មទណ្ឌ។
លោកក៏បានស្នើឲ្យមានការឃាត់ខ្លួន ចាប់ខ្លួន និងឃុំខ្លួនលោក ផែង វណ្ណៈ ជាបន្ទាន់ «ដើម្បីទប់ស្កាត់ការប្រព្រឹត្តអំពើល្មើសជាបន្តបន្ទាប់ដែលអាចនាំឲ្យមានភាពវឹកវរធ្ងន់ធ្ងរដល់សន្តិសុខសង្គម»។
នាយឧត្តមសេនីយ៍ ឈុំ សុជាតិ អ្នកនាំពាក្យក្រសួងការពារជាតិប្រាប់ពីម្សិលមិញថា លោក ផែង វណ្ណៈ ជានាយទាហានរង់ចាំនៃអគ្គបញ្ជាការ នៅទីចាត់ការបុគ្គលិកក្រសួងការពារជាតិ មានឋានន្តរ ស័ក្តិជាវរសេនីយ៍ទោ (ស័ក្តិ ៤ កន្លះ)។
លោកថ្លែងថា៖ «និយាយរួមគាត់ប្រើសេរីភាពហួសព្រំដែន។ នៅក្នុងយោធាធម្មតាមានវិន័យមានមេមានកើយគេ ការងារគេបម្រើជាតិមាតុភូមិ មិនមែនទៅធ្វើការងារអ៊ីចឹងៗទេ ដែលមិនមានប្រយោជន៍ដល់សង្គម ដល់កងទ័ពផងហ្នឹង ធ្វើឲ្យតែមានទំនាស់ហ្នឹង ភារកិច្ចយើងមានច្រើនណាស់ មានពេលឯណាទៅឡាយតាមហ្វេសប៊ុកអ៊ីចឹងនោះ។ និយាយរួមយើងគាំទ្រចំណាត់ការហ្នឹង»។
លោកថ្លែងបន្តថា៖ «និយាយរួមអ្វីដែលគាត់ធ្វើកន្លងមកធ្វើឲ្យប៉ះពាល់ដល់កិត្តិយសអង្គភាពនិងកងទ័ពដែលកងទ័ពមានវិន័យរឹងប៉ឹងល្អណាស់ដើម្បីការពារជាតិ។ មិនមែនយកពេលវេលាទៅធ្វើអ៊ីចឹងទេ វាធ្វើឲ្យកងទ័ពសាបរលាបនៃសីលធម៌កងទ័ព»។
លោកថាក្នុងនាមកងទ័ព លោក ផែង វណ្ណៈ គួរតែយកពេលវេលាទៅពង្រឹងសមត្ថភាពបន្ថែម ប៉ុន្តែជាក់ស្ដែងលោកបានធ្វើផ្ទុយពីនេះ ហើយខុសនឹងច្បាប់ក៏ដូចជាលក្ខន្តិកៈកងទ័ពទៀតផង៕
