ភ្នំពេញៈ រដ្ឋមន្ត្រីក្រសួងសុខាភិបាលលោក ម៉ម ប៊ុនហេង បានលើកឡើងថា នៅកម្ពុជា វីរុសកូរ៉ូណាថ្មីអាចនឹងឆ្លងពីមនុស្សម្នាក់ទៅមនុស្សម្នាក់ទៀត ប៉ុន្តែមិនទាន់រកឃើញមានករណីថ្មីណាផ្សេងទៀតនោះទេ ខណៈមានការលើកឡើងថា វីរុសកូរ៉ូណាគឺមិនអាចរស់នៅក្នុងសីតុណ្ហភាពក្ដៅរបស់ប្រទេសកម្ពុជាបានទេ។
លោក ម៉ម ប៊ុនហេង ប្រាប់ភ្នំពេញប៉ុស្ដិ៍ពីម្សិលមិញថា បុរសជនជាតិចិនដែលឆ្លងវីរុសកូរ៉ូណាដែលបានរកឃើញជាករណីដំបូងនៅកម្ពុជាគឺមានសុខភាពល្អធម្មតាឡើងវិញហើយ។ លោកថា៖ «វីរុសហ្នឹងវានៅក្នុងសំបោរ ហើយបើឆ្លងពីមាត់ ១ ទៅមាត់ ១ ទៀតគឺវាបានឆ្លងបាត់ទៅហើយ។ នៅកម្ពុជាយើងគឺអាចឆ្លងពីមនុស្សម្នាក់ ទៅមនុស្សម្នាក់ទៀត អ៊ីចឹងបានយើងត្រូវប្រុងប្រយ័ត្ន»។
ប៉ុន្តែលោកថា នៅកម្ពុជាពុំទាន់រកឃើញវីរុសកូរ៉ូណាដែលជាករណីថ្មីនៅឡើយទេ ក្រៅតែពីបានរកឃើញមួយករណីកាលពីថ្ងៃទី ២៥ ខែមករានៅលើបុរសជនជាតិចិនម្នាក់ដែលធ្វើដំណើរមកពីខេត្តវូហាន ប្រទេសចិន ចូលមកខេត្តព្រះសីហនុកាលពីថ្ងៃទី ២៣ ខែមករា។
លោកបន្ថែមថា ក្រោយដាក់ឱ្យនៅដាច់ដោយឡែកដើម្បីព្យាបាលគឺបុរសជនជាតិចិននេះមានស្ថានភាពសុខភាពល្អធម្មតា ប៉ុន្តែត្រូវបន្តដាក់ឱ្យនៅដាច់ដោយឡែក ដើម្បីតាមដានពីសុខភាពរហូតគ្រប់ចំនួន ១៤ ថ្ងៃទើបសម្រេចថា តើបុរសនោះត្រូវអនុញ្ញាតឱ្យចេញពីមន្ទីរពេទ្យឬយ៉ាងណា? លោក ប៊ុនហេង បញ្ជាក់ថាចំពោះការលើកឡើងពីវីរុសកូរ៉ូណាថ្មីមិនអាចរស់នៅក្នុងសីតុណ្ហភាពក្នុងប្រទេសកម្ពុជាបាន គឺដោយសារវីរុសនោះត្រូវស្ថិតនៅកណ្ដាលវាលហើយត្រូវរងនូវកម្ដៅថ្ងៃយូរ។
លោក ជឹម ភ័ក្ត្រា ដែលធ្លាប់ធ្វើការនៅមន្ទីរពិសោធន៍ស្រាវជ្រាវវេជ្ជសាស្ដ្រនៅវិទ្យាស្ថានប៉ាស្ទ័រអស់រយៈពេលជាង ១០ ឆ្នាំលើកឡើងថា ការពាក់ម៉ាស់គឺមិនអាចការពារការឆ្លងវីរុសកូរ៉ូណាថ្មីបាន ១០០% នោះទេដោយសារវីរុសនេះមានទំហំ ០,១២៥ មីក្រូម៉ែត្រដែលមានទំហំតូចជាងបាក់តេរី (Bacteri)។ ប៉ុន្តែលោកថា ពលរដ្ឋនៅកម្ពុជាមិនចាំបាច់ពាក់ម៉ាស់នោះទេ ដោយសារតែសីតុណ្ហភាពនៅកម្ពុជាគឺមិនអាចឱ្យវីរុសកូរ៉ូណាថ្មីរស់បាន និងចម្លងពីមនុស្សម្នាក់ទៅមនុស្សម្នាក់ទៀតបានឡើយ។
លោកថា ជាទូទៅមានកត្តាចំនួន ៣ ដែលអាចឱ្យមានការឆ្លងវីរុសកូរ៉ូណាគឺចំនួនវីរុស សីតុណ្ហភាពក្រោម ២០ អង្សាសេ និងការប៉ះពាល់ និងនៅទល់មុខអ្នកជំងឺផ្ទាល់ដោយគ្មានរបាំងការពារ។ «កត្តាដែលមិនងាយឆ្លងរាលដាលនៅក្នុងប្រទេសយើងគឺ ១- ប្រទេសយើងមានសីតុណ្ហភាពលើសពី ៣០ អង្សាសេ ដែលជាកត្តា Virus មិនអាចរស់បាន នៅពេលខ្ទាតចេញពីអ្នកជំងឺណាម្នាក់ទៅមនុស្សម្នាក់ទៀតដោយរក្សាចម្ងាយពីគ្នា ១ ម៉ែត្រ។ ២- មិនទាន់មានអ្នកផ្ទុក Virus នេះច្រើននៅឡើយ (នៅកម្ពុជា)។ ដូច្នេះអ្នកដែលមិននៅក្នុងតំបន់ប្រឈម មិនចាំបាច់ពាក់ម៉ាស់ឡើយ»។
តាមសេចក្ដីណែនាំរបស់ក្រសួងសុខាភិបាលបញ្ជាក់ថា ដើម្បីបង្ការការឆ្លងវីរុសកូរ៉ូណានេះគឺត្រូវចៀសវាងការប៉ះពាល់ជិតស្និទ្ធជាមួយអ្នកជំងឺផ្លូវដង្ហើមស្រួចស្រាល់ ដូចជាគ្រុនក្ដៅ ក្អក និងកណ្ដាស់ ឬផ្ដាសាយ និងត្រូវប្រញាប់លាងដៃជាមួយសាប៊ូ ឬអាល់កុលជែល បន្ទាប់ពីប៉ះពាល់ផ្ទាល់ ឬស្ថិតនៅក្នុងបរិវេណជុំវិញអ្នកជំងឺទាំងនេះ។ ចៀសវាងការធ្វើដំណើរទៅកាន់ទីក្រុងវូហានដែលជាទីក្រុងផ្ទុះជំងឺវីរុសកូរ៉ូណានៅក្នុងប្រទេសចិន។
ត្រូវបរិភោគអាហារមានអនាម័យដែលត្រូវបានចម្អិនឆ្អិនល្អ ជាពិសេសសាច់ និងស៊ុត និងត្រូវប្រើកន្សែង ក្រមា ក្រដាសខ្ទប់មាត់ និងច្រមុះនៅពេលក្អក ឬកណ្ដាស់ និងរក្សាចម្ងាយជាង ១ ម៉ែត្រពីបុគ្គលដែលមានរោគសញ្ញាផ្លូវដង្ហើមស្រួចស្រាល់។ ចៀសវាងយកដៃប៉ះពាល់ភ្នែក ច្រមុះ និងមាត់ បន្ទាប់ពីប៉ះពាល់សត្វ និងផលិតផលសត្វ សត្វឈឺ សាច់ខូចគុណភាព កាកសំណល់សត្វ ឬទឹកសរីរៈសត្វក្នុងផ្សារ និងមិនត្រូវខាកស្ដោះនៅទីសាធារណៈ។
ក្រៅពីនេះការប្រើប្រាស់ជ្រញ់ និងកាំបិតត្រូវបែងចែកដាច់ពីគ្នារវាងអាហារឆៅ និងឆ្អិន និងត្រូវលាងដៃបន្ទាប់ពីចាប់កាន់អាហារឆៅ និងឆ្អិន ហើយឧបករណ៍និងកន្លែងដាក់លក់សត្វរស់ គឺត្រូវលាងសម្អាតយ៉ាងតិច ១ ដងក្នុង ១ ថ្ងៃ។
ក្រសួងសុខាភិបាលបានបញ្ជាក់ទៀតថា អ្នកដែលមានអាការគ្រុនក្ដៅ ៣៨ អង្សាសេ និងមានរោគសញ្ញា ១ យ៉ាងតិចក្នុងចំណោម ក្អក ហូរសំបោរ ឈឺបំពង់ក ដង្ហើមខ្លី និងពិបាកដកដង្ហើម ហើយទើបធ្វើដំណើរវិលត្រឡប់មកពីប្រទេសចិនត្រូវរាយការណ៍បន្ទាន់ទៅកាន់លេខទូរស័ព្ទទាន់ហេតុការណ៍ ១១៥ ដោយមិនគិតថ្លៃ៕