.jpg)
លោក នាយករដ្ឋមន្ត្រី ហ៊ុន សែន និង លោក យន្ត មីន នាពេលកន្លងមក។ រូបថត សហការី
ព្រះសីហនុ ៖ លោកនាយករដ្ឋមន្ត្រី ហ៊ុន សែន បានយល់ព្រមទៅតាមការស្នើសុំលាលែងពីអភិបាលខេត្តព្រះសីហនុ របស់លោក យន្ត មីន និងក៏បានប្រកាសដកលោក ញឹម វណ្ណដា ចេញពីតំណែង ពាក់ព័ន្ធនឹងការរលំបាក់អគារ ៧ ជាន់ នៅខេត្តជាប់មាត់សមុទ្រមួយនេះ ដែលបណ្តាលឲ្យមនុស្សស្លាប់យ៉ាងហោចណាស់ ២៥ នាក់ គិតមកដល់ត្រឹមម៉ោង ២ កន្លះ រសៀលថ្ងៃទី ២៤ ខែ មិថុនា នេះ។
លោក ហ៊ុន សែន បានសរសេរបង្ហោះនៅលើហ្វេសប៊ុករបស់លោកនៅប៉ុន្មានម៉ោងមុននេះថា ក្នុងពេលដែលលោកបំពេញការងារនៅខេត្តព្រះសីហនុ លោក យន្ត មីន អភិបាលខេត្តព្រះសីហនុ បានទទួលស្គាល់កំហុសលើការគ្រប់គ្រងក្នុងដែនសមត្ថកិច្ចរបស់ខ្លួន ដែលបណ្តាលឲ្យមានរឿងឈឺចាប់កើតឡើង។
លោកនាយករដ្ឋមន្ត្រីបានសរសេរទៀតថា៖ «គាត់ (យន្ត មីន) បានស្នើមកខ្ញុំដើម្បីលាលែងចេញពីអភិបាលខេត្តព្រះសីហនុ។ ខ្ញុំបានយល់ព្រមឲ្យគាត់លាលែង និងបានពិភាក្សាជាមួយ សម្តេច ស ខេង យកឯកឧត្តម គួច ចំរើន ពីអភិបាលខេត្តកំពង់ចាម មកធ្វើជាអភិបាលខេត្តព្រះសីហនុវិញ»។
ប៉ុន្តែលោក ហ៊ុន សែន បានបញ្ជាក់ថា ទោះជាមានការរៀបចំបែបនេះក៏ដោយក៏ លោកយន្ត មីន នៅបន្តដឹកនាំយុទ្ធនាការរុករក និងសង្គ្រោះតទៅទៀត រហូតចប់កិច្ចការ និងអភិបាលខេត្តថ្មី លោក គួច ចំរើន ចូលកាន់តំណែង។
ជាមួយគ្នានេះ លោកនាយករដ្ឋមន្ត្រី ក៏បានធ្វើសេចក្តីសម្រេចផងដែរថា៖ «ខ្ញុំក៏សូមបញ្ជាក់ថា ថ្ងៃនេះខ្ញុំបានសម្រេចចិត្តដក ឯកឧត្តម ញឹម វណ្ណដា ចេញពីតំណែងជាទេសរដ្ឋមន្ត្រី និងជាអនុប្រធានទី ១ នៃគណៈកម្មាធិការជាតិគ្រប់គ្រងគ្រោះមហន្តរាយ ដោយមូលហេតុខ្វះការទទួលខុសត្រូវនិងភូតភរ»។
ភ្លាមៗបន្ទាប់ពីលោកនាយករដ្ឋមន្ត្រី បានយល់ព្រមឲ្យលាលែងពីតំណែង លោក យន្ត មីន បានសរសេរនៅក្នុងទំព័រហ្វេសប៊ុករបស់លោក និងបានប្រាប់ភ្នំពេញប៉ុស្តិ៍ ដោយបង្ហាញនូវការសោកស្តាយយ៉ាងខ្លាំង និងបានសុំការអភ័យទោសពីក្រុមគ្រួសារ នៃជនរងគ្រោះទាំងអស់ ក្នុងឧបទ្ទវហេតុរលំអគារ ៧ ជាន់ ក្នុងក្រុងព្រះសីហនុនេះ។ ជាមួយគ្នានេះ លោកក៏បានប្រកាសពីការទទួលខុសត្រូវ និងបានស្នើសុំលោកនាយករដ្ឋមន្ត្រី លាលែងពីតំណែងហើយលោកនឹងនៅតែបន្តសកម្មភាពជួយសង្គ្រោះ ក្នុងឧបទ្ទវហេតុនេះឲ្យចប់ចុងចប់ដើម។
លោកបញ្ជាក់ថា៖ «សម្តេចក៏បានផ្តល់ការយល់ព្រមហើយដែរ។ ជាមួយនេះ ខ្ញុំបាទសុំការអភ័យទោសពីសម្តេចតេជោនាយករដ្ឋមន្ត្រី សម្តេចក្រឡាហោម សម្តេច ឯកឧត្តម លោកជំទាវ ចំពោះកង្វះខាត នៃការបំពេញភារៈកិច្ចរបស់ខ្ញុំបាទ កន្លងមកនេះ។ ខ្ញុំសុំការអភ័យទោស និងការអធ្យាស្រ័យពីបងប្អូនប្រជាពលរដ្ឋ មន្ត្រីរាជការ កងកំលាំងប្រដាប់អាវុធ គ្រប់ប្រភេទ ក្នុងខេត្តព្រះសីហនុទាំងអស់ ចំពោះកង្វះខាតរបស់ខ្ញុំកន្លងមក ត្បិតអីខ្ញុំបានខំប្រឹងអស់ពីលទ្ធភាពហើយ»៕
