ភ្នំពេញៈ ក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទនៃទីស្តីការគណៈរដ្ឋមន្ត្រីស្នើដល់លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មឲ្យធ្វើការត្រួតពិនិត្យគុណភាព និងវិភាគកម្រិតជាតិដែក និងជាតិស័ង្កសីនៅក្នុងទំនិញផ្សេងទៀតនៃផលិតផលទឹកដោះគោម្សៅផ្សំតាមរូបមន្តរបស់ក្រុមហ៊ុនម្សៅទឹកដោះគោនានាដែលកំពុងចរាចរលក់នៅក្នុងប្រទេសកម្ពុជា។
ការស្នើនេះបានធ្វើឡើងបន្ទាប់ពីក្រសួងពាណិជ្ជកម្មបានរកឃើញថា ផលិតផលទឹកដោះគោម្សៅផ្សំតាមរូបមន្តម៉ាក Nutrilatt មានកម្រិតជាតិដែក និងស័ង្កសីទាបឆ្ងាយខ្លាំងជាងកម្រិតដែលបានសរសេរនៅលើស្លាកសញ្ញាផលិតផល និងកម្រិតអប្បបរមាកំណត់ដោយស្តង់ដា Codex ដែលនាំឲ្យប៉ះពាល់សុខភាព ការលូតលាស់ និងការអភិវឌ្ឍរបស់ទារក និងកុមារ។
លោក យឹម ឆៃលី ឧបនាយករដ្ឋមន្ត្រី និងជាប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទនៃទីស្តីការគណៈរដ្ឋមន្ត្រីបានផ្ញើលិខិតមួយច្បាប់ជូនលោក ប៉ាន សូរស័ក្តិ កាលពីថ្ងៃទី ៣១ ខែសីហា ដែលក្នុងលិខិតនោះលោកបានបង្ហាញការគាំទ្រចំពោះចំណាត់ការដ៏តឹងរ៉ឹងរបស់ក្រសួងពាណិជ្ជកម្ម ដើម្បីឲ្យក្រុមហ៊ុន NUTRILATT MASTER LM Co,LTD ដែលជាក្រុមហ៊ុននាំចូលម្សៅផលិតផលទឹកដោះគោផ្សំតាមរូបមន្តម៉ាក Nutrilatt គោរពតាមច្បាប់កម្ពុជា និងស្តង់ដាអន្តរជាតិសំដៅធានាលើកកម្ពស់សុវត្ថិភាពចំណីអាហារនៅក្នុងប្រទេសកម្ពុជា។
លោកក៏បានស្នើផងដែរដល់ក្រសួងពាណិជ្ជកម្មត្រូវបន្តត្រួតពិនិត្យ និងវិភាគកម្រិតជាតិដែក និងជាតិស័ង្កសីនៅក្នុង Bacthes ផ្សេងទៀតនៃផលិតផលទឹកដោះគោម្សៅផ្សំតាមរូបមន្តរបស់ក្រុមហ៊ុនម្សៅទឹកដោះគោនានា ដែលកំពុងចរាចរលក់ដូរនៅក្នុងប្រទេសកម្ពុជា។
លោកបញ្ជាក់ថា៖ «ខ្ញុំបានតាមដានយ៉ាងយកចិត្តទុកដាក់លើលទ្ធផលនៃការវិភាគវិទ្យាសាស្ត្រ ចំពោះកម្រិតជាតិដែក និងជាតិស័ង្កសីដែលមានក្នុងផលិតផលនេះ (Nutrilatt) ហើយមានការព្រួយបារម្ភជាខ្លាំងចំពោះផលប៉ះពាល់ដល់សុខភាព និងការអភិវឌ្ឍសតិបញ្ញា ស្មារតី កាយសម្បទារបស់ទារក និងកុមារ»។
លោកបានបញ្ជាក់បន្តទៀតថា៖ «ដើម្បីទប់ស្កាត់បញ្ហាទាំងនេះកុំឲ្យមានផលិតផលទឹកដោះគោម្សៅផ្សំតាមរូបមន្តរបស់ក្រុមហ៊ុនផ្សេងៗទៀត ដែលកំពុងលក់លើទីផ្សារដែលអាចបង្កមហន្តរាយដល់សុខភាព និងការអភិវឌ្ឍរបស់ទារក និងកុមារ ខ្ញុំសូមគាំទ្រដល់ចំណាត់ការតាមផ្លូវច្បាប់នានារបស់ក្រសួងពាណិជ្ជកម្ម និងស្ថាប័នពាក់ព័ន្ធ និងសូមសំណូមពរឲ្យចាត់វិធានការឲ្យបានតឹងរ៉ឹងចំពោះក្រុមហ៊ុន»។
កាលពីថ្ងៃទី ២៦ ខែសីហា នាយកដ្ឋាន ក.ប.ប នៃក្រសួងពាណិជ្ជកម្ម បានរៀបចំកិច្ចប្រជុំមួយដោយមានការចូលរួមពីតំណាងក្រុមហ៊ុន NUTRILATT MASTER LM Co,LTD តំណាងគ្រួសារទារករងគ្រោះ និងអង្គការសង្គមស៊ីវិល ដើម្បីបើកស្រោមសំបុត្រពិនិត្យរួមគ្នានូវលទ្ធផលនៃការរកឃើញនេះ ប៉ុន្តែក្រោយមក លទ្ធផលទាំងនេះក៏ត្រូវបានក្រុមហ៊ុន NUTRILATT MASTER LM Co,LTD បដិសេធ។
លោក ស៊ាង ថៃ អ្នកនាំពាក្យក្រសួងពាណិជ្ជកម្មបានឲ្យដឹងកាលពីម្សិលមិញថា ការស្នើតាមលិខិតរបស់លោក យឹម ឆៃលី គឺស្របទៅនឹងចំណាត់ការរបស់ក្រសួងពាណិជ្ជកម្មនាពេលបច្ចុប្បន្នដែលកំពុងស្រាវជ្រាវរាល់ផលិតផលដែលបង្កផលប៉ះពាល់ដល់សុខភាព។ ដោយសារតែលទ្ធផលនៃការរកឃើញរបស់ក្រសួងពាណិជ្ជកម្មលើផលិតផលទឹកដោះគោ Nutrilatt នេះត្រូវបានបដិសេធដោយក្រុមហ៊ុន។
លោក ស៊ាង ថៃ បានឲ្យដឹងថែមទៀតថា ភាគីទាំងអស់នឹងស្វែងរកការពិភាក្សាគ្នាបន្តទៀត ដើម្បីឈានទៅរកការពិសោធថ្មីដែលអាចឲ្យភាគីទាំងសងខាងទទួលយកលទ្ធផលនេះបានទាំងអស់គ្នា។
លោក ស៊ាង ថៃ បានបញ្ជាក់ឲ្យដឹងទៀតថា៖ «សកម្មភាពយើង គឺមិនមែនសំដៅតែទៅលើផលិតផលទឹកដោះគោនេះទេ គឺយើងពិនិត្យទៅលើទំនិញទាំងអស់»។
លោកថ្លែងទៀតថា៖ «ប៉ុន្តែម្សៅទឹកដោះគោនេះ គឺជារឿងថ្មីមួយដែលកំពុងតែស្វែងរកឃើញ (បញ្ហា) ហើយក៏មានការជជែកគ្នារវាងក្រុមហ៊ុន និងក្រសួង ដើម្បីឲ្យច្បាស់ថា តើវាយ៉ាងម៉េច? ព្រោះធម្មតាក្រសួងបានរកឃើញថា ខ្វះជាតិដែក ប៉ុន្តែក្រុមហ៊ុនថា អត់ខ្វះទេ។ ដូច្នេះយើងនឹងជជែកគ្នារកដំណោះស្រាយនៅលើរឿងហ្នឹង»៕
វីដេអូ៖