ភ្នំពេញៈ គណបក្សប្រជាធិបតេយ្យមូលដ្ឋាន (គបម) ពីម្សិលមិញបានសម្រេចជ្រើសតាំងលោកបណ្ឌិត យ៉ង សាំងកុមារ ដែលត្រូវបានគេស្គាល់ថា ជាអ្នកមានជំនាញកសិកម្មនោះឲ្យឈរឈ្មោះជាបេក្ខជននាយករដ្ឋមន្ត្រីសម្រាប់ការបោះឆ្នោតអាណត្តិទី ៦ ចុងខែក្រោយនេះដែលលោកថា បើលោកជាប់ឆ្នោតត្រូវតែស្តាប់តំណាងរាស្ត្រហើយមិនមែនជានាយករដ្ឋមន្ត្រីឆេវឆាវ។
ក្នុងអង្គសមាជជ្រើសរើសបេក្ខភាពសម្រាប់តំណែងនាយករដ្ឋមន្ត្រីដែលធ្វើឡើងនៅទីស្នាក់ការគណបក្សនៅខណ្ឌសែនសុខ រាជធានីភ្នំពេញមានថ្នាក់ដឹកនាំរបស់គណបក្សនេះចំនួន ៣ រូបឈរជាបេក្ខជននាយករដ្ឋមន្ត្រីដើម្បីឲ្យអង្គសមាជបោះឆ្នោតជ្រើសតាំងសម្រាប់ការប្រកួតក្នុងការបោះឆ្នោតថ្ងៃទី ២៩ ខែកក្កដា ឆ្នាំ ២០១៨ ក្នុងនោះមានលោក យ៉ង សាំងកុមារ ប្រធានគណៈកម្មាធិការនាយកគណបក្សលោក សាម អ៊ីន អគ្គលេខាធិការបក្ស និងលោក ឃុន សាវឿន ប្រធានប្រតិបត្តិគណបក្សខេត្ត។ ជាលទ្ធផលចេញពីការបោះឆ្នោតរបស់ គ.ប.ម. ក្នុងសន្លឹកឆ្នោតចំនួន ១៤៦ សំឡេងលោក យ៉ង សាំងកុមារ ទទួលបានសំឡេងគាំទ្រ ១២៧ សំឡេងលោក សាម អ៊ីន ទទួលបានសំឡេងគាំទ្រ ១២ សំឡេង ឯលោក ឃុន សាវឿន ទទួលបាន ៧ សំឡេង។
តាមរយៈសំឡេងលើសលប់បែបនេះលោក យ៉ង សាំងកុមារ ត្រូវបានជ្រើសតាំងជាបេក្ខភាពនាយករដ្ឋមន្ត្រីដឹកនាំរដ្ឋាភិបាលអាណត្តិថ្មី ប្រសិនបើបក្សថ្មីថ្មោងមួយនេះទទួលបានជ័យជម្នះក្នុងការបោះឆ្នោត។ លោក កុមារ រំពឹងថា គ.ប.ម ដែលត្រៀមខ្លួនចូលរួមប្រកួតជាមួយនឹងបក្សនយោបាយចំនួន ១៩ ទៀតនោះនឹងទទួលបានអាសនៈនៅក្នុងរដ្ឋសភា។
លោក សាំងកុមារ ថ្លែងថា៖ «នេះជាសញ្ញាមួយប្រាប់ថាយើងទាំងអស់គ្នាត្រៀមខ្លួនរួចជាស្រេចដោយបានផ្តល់ទំនុកចិត្តដល់យើងខ្ញុំក្នុងការដឹកនាំក្រុម និងក្រុម (បេក្ខជន) តំណាងរាស្ត្ររបស់យើងក្នុងការចូលរួមប្រកួតការបោះឆ្នោតនៅថ្ងៃទី ២៩ ខែកក្កដា ២០១៨ ហើយខ្ញុំសូមប្រកាសទទួលយកការតែងតាំងនេះ»។
លោកបន្ថែមថា គ.ប.ម ត្រៀមខ្លួនជានិច្ចទទួលជ័យជម្នះក្នុងការបោះឆ្នោតនេះ ហើយបើមិនត្រៀមខ្លួនឈ្នះលើការបោះឆ្នោតនេះទេ ក៏ គ.ប.ម មិនរៀចចំសមាជដើម្បីជ្រើសរើសបេក្ខជននាយករដ្ឋមន្ត្រីដែរ។
លោកបញ្ជាក់ថា៖ «ខ្ញុំក្លាយទៅជានាយករដ្ឋមន្ត្រីដែលស្តាប់តំណាងរាស្ត្រមិនមែននាយករដ្ឋមន្ត្រីងាកឆេះៗទេ។ ខ្ញុំត្រូវតែមានការទទួលខុសត្រូវចំពោះតំណាងរាស្ត្រដែលរាស្ត្របោះឆ្នោតឲ្យហើយតំណាងរាស្ត្ររបស់យើងគឺខុសពីតំណាងរាស្ត្រកន្លងមកជាតំណាងរាស្ត្រទទួលខុសត្រូវចំពោះរាស្ត្រមិនមែនតំណាងរាស្ត្រទទួលខុសត្រូវចំពោះនាយករដ្ឋមន្ត្រីទេ»។
ក្នុងនាមជាបេក្ខជននាយករដ្ឋមន្ត្រី និងជាប្រធានគណបក្សលោក កុមារ បានបញ្ជាក់ថាលោកដឹងច្បាស់ការបោះឆ្នោតនេះទទួលជ័យជម្នះ ឬមិនជ័យជម្នះគឺអាស្រ័យលើក្រុម និងបេក្ខជនរបស់បក្សទាំងបម្រុង ទាំងពេញសិទ្ធិ។
លោកថ្លែងថា៖ «ខ្ញុំនឹងព្យាយាមធ្វើការពីតែនដ៏ល្អក្នុងការដឹកនាំក្រុមយើង ប៉ុន្តែយើងត្រូវចែកគ្នាលេង និងបំពេញតួនាទីឲ្យបានល្អ។ ការប្រឈមរបស់យើងដែលធំបំផុតគឺយើងធ្វើយ៉ាងណាឲ្យប្រជាពលរដ្ឋដែលជាម្ចាស់ឆ្នោត និងជាម្ចាស់ប្រទេសគាត់ទៅបោះឆ្នោត និងគាត់ទុកចិត្តថាគណបក្សប្រជាធិបតេយ្យមូលដ្ឋានជាគណបក្សឯករាជ្យពិតប្រាកដមិនមែនជាអាយ៉ងរបស់ពីណាទេ។ ជាគណបក្សចូលរួមប្រកួតដើម្បីទទួលឱកាសដឹកនាំប្រទេស»។
លោកក៏បានប្រាប់សមាជិកបក្សមិនឲ្យជេរប្រមាថ លាបពណ៌អ្នកដទៃ ឬញុះញង់ និងមួលបង្កាច់អ្នកដទៃនោះទេ ពេលវេលាដែលសំខាន់សម្រាប់ធ្វើដំណើរទៅមុខគឺអនុវត្តតាមអ្វីដែលបក្សបានចែង។
ដោយឡែកគណបក្សខ្មែររួបរួមជាតិក៏បានធ្វើសមាជថ្ងៃទី ៩ ផងដែរនៅគេហដ្ឋានរបស់លោក ញឹក ប៊ុនឆៃ នៅសង្កាត់ជ្រោយចង្វារ រាជធានីភ្នំពេញ តែងតាំងលោកជាប្រធានគណបក្សនេះឡើងវិញ បន្ទាប់ពីលោក ញឹក ប៊ុនឆៃ ត្រូវបានតុលាការដោះលែងឲ្យនៅក្រៅឃុំកាលពីថ្ងៃទី ១ ខែឧសភា។
លោកបញ្ជាក់ថា៖ «ខ្ញុំសង្ឃឹមត្រង់ថា យើងនឹងបានអាសនៈដូច្នេះយើងសង្ឃឹមថានឹងមានការកើនឡើងនៃការគាំទ្រជាងពេលមុនៗ»។
អតីតឧបនាយករដ្ឋមន្ត្រីរូបនេះដែលអតីតជាប្រធានបក្សនេះត្រូវបានចាប់ខ្លួនកាលពីខែសីហាឆ្នាំ ២០១៧ ដោយសង្ស័យថាបានជាប់ពាក់ព័ន្ធនឹងបទល្មើសគ្រឿងញៀនមួយកាលពី ១០ ឆ្នាំមុន។ បន្ទាប់ពីមានការចាប់ខ្លួនលោក ញឹក ប៊ុនឆៃ គណបក្សខ្មែររួបរួមជាតិបានតែងតាំងលោក សឹង្ហ គីរី ជាប្រធានបក្សជំនួស។
លោកបន្ថែមថា៖ «ខ្ញុំមិនបានប្រព្រឹត្តដូចការចោទប្រកាន់ហើយខ្ញុំច្បាស់ខ្លួនខ្ញុំដូច្នេះហើយបានជាខ្ញុំស៊ូប្រឈមជាមួយនឹងច្បាប់ និងជាមួយនឹងតុលាការ។ មិនមានភ័ស្តុតាងអីដាក់បន្ទុកចោទប្រកាន់ខ្ញុំជាអ្នកដែលថាបានរួមសមគំនិតទាក់ទងនឹងបញ្ហាគ្រឿងញៀនទេដូច្នេះហើយបានជាតុលាការអនុញ្ញាតឲ្យខ្ញុំមានសេរីភាព»។
មន្ត្រីអ្នកនាំពាក្យគណបក្សប្រជាជនកម្ពុជាលោក សុខ ឥសាន និងលោក សួស យ៉ារ៉ា ជាបក្សកាន់អំណាចរបស់លោកនាយករដ្ឋមន្ត្រី ហ៊ុន សែន មិនអាចទាក់ទងសុំការអត្ថាធិប្បាយតបនឹងការលើកឡើងរបស់គណបក្សខាងលើបានទេកាលពីម្សិលមិញ។
នាយកប្រតិបត្តិនៃគណៈកម្មាធិការអព្យាក្រឹត និងយុត្តិធម៌ដើម្បីការបោះឆ្នោតដោយសេរី និងត្រឹមត្រូវនៅកម្ពុជា និកហ្វិក (NICFEC) លោក សំ គន្ធាមី ថ្លែងថា គ.ប.ម មិនអាចឈ្នះគណបក្សប្រជាជនបានទេនៅក្នុងអាណត្តិនេះ ព្រោះបក្សនេះទើបតែបង្កើតថ្មីឆ្នាំ ២០១៦ ហើយគាត់ទើបតែចូលរួមបោះឆ្នោតមូលដ្ឋានឃុំសង្កាត់ឆ្នាំ ២០១៧។
លោកបញ្ជាក់ថា៖ «ដូច្នេះប្រជាប្រិយភាពគាត់នៅមានកម្រិតទេ និងមិនទាន់បានទូលំទូលាយដូចគណបក្សប្រជាជនទេ។ តាមខ្ញុំប៉ាន់ប្រមាណអាចបានអាសនៈខ្លះ។ បើយើងប្រៀបធៀបការបោះឆ្នោតជ្រើសតាំងតំណាងរាស្ត្រអាណត្តិទី ៥ ឆ្នាំ ២០១៣ យើងមើលទៅឃើញតែ ៨ គណបក្សនយោបាយដែលចូលរួមតែ ២០១៨ យើងឃើញមាន ២០ គណបក្សហើយគណបក្សខ្លះទើបតែបង្កើតថ្មីវាជាហេតុផលរបស់គេដែលរិះគន់ថាគណបក្សបង្កើតឡើងមួយចំនួនដើម្បីបង្គ្រប់កិច្ច និងហែហមដើម្បីធ្វើឲ្យមានចំនួនច្រើន»។
មជ្ឈដ្ឋានជាតិ និងអន្តរជាតិមួយចំនួនចាត់ទុកការបោះឆ្នោតខាងមុខថា មិនមានភាពសេរី ត្រឹមត្រូវ និងយុត្ដិធម៌ទេ បន្ទាប់ពីគណបក្សសង្គ្រោះជាតិ ដែលជាបក្សប្រឆាំងដ៏ធំមួយ និងជាគូប្រជែងដ៏ស័ក្តិសមនឹងបក្សកាន់អំណាចត្រូវបានរំលាយចោលហើយអាសនៈរបស់អតីតបក្សប្រឆាំងត្រូវបានបែងចែកឲ្យទៅគណបក្សផ្សេងនោះ៕