.jpg)
អ្នកតវ៉ាទាមទារឲ្យដោះលែងលោក រ៉ុង ឈុន នៅមុខតុលាការក្រុងពីម្សិលមិញ។ ហេង ជីវ័ន
ភ្នំពេញៈ រដ្ឋលេខាធិការក្រសួងយុត្តិធម៌លោក គឹម សន្តិភាព ថ្លែងថា វិធានការរបស់សមត្ថកិច្ច និងតុលាការករណីចាប់ និងឃុំខ្លួនលោក រ៉ុង ឈុន ធ្វើឡើងដោយត្រឹមត្រូវតាមច្បាប់ ខណៈអ្នកវិភាគចង់ឲ្យមានការពិភាក្សាគ្នាជាសម្ងាត់ពាក់ព័ន្ធរឿងព្រំដែន។
ចៅក្រមស៊ើបសួរលោក វ៉ាន់ សែនវិសុទ្ធ នៃអយ្យការអមសាលាដំបូងរាជធានីភ្នំពេញកាលពីល្ងាចថ្ងៃសៅរ៍បានសម្រេចឃុំខ្លួនលោក រ៉ុង ឈុន នៅពន្ធនាគារ បន្ទាប់ពីលោក រ៉ុង ឈុន ត្រូវបានព្រះរាជអាជ្ញាលោក សេង ហៀង ចោទប្រកាន់ពីបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គមតាមមាត្រា ៤៩៥ នៃក្រមព្រហ្មទណ្ឌ។ នេះបើយោងតាមលោក គុជ គឹមឡុង អ្នកនាំពាក្យនៃអយ្យការអមសាលាដំបូងរាជធានីភ្នំពេញ។
លោក រ៉ុង ឈុន គឺជាប្រធានសហភាពសហជីពកម្ពុជា និងជាសមាជិកក្រុមប្រឹក្សាឃ្លាំមើលកម្ពុជា និងធ្លាប់ជាអតីតសមាជិកគណៈកម្មាធិការជាតិរៀបចំការបោះឆ្នោតពីកូតាអតីតគណបក្សសង្គ្រោះជាតិកាលពីឆ្នាំ ២០១៣។
លោកត្រូវបានសមត្ថកិច្ចចាប់ខ្លួននៅយប់ថ្ងៃសុក្រ ទី ៣១ ខែកក្កដា គឺមានរយៈពេល ១០ ថ្ងៃ បន្ទាប់ពីលោកដែលជាតំណាងឲ្យក្រុមឃ្លាំមើលកម្ពុជាបានចេញសេចក្ដីថ្លែងការណ៍ហើយបង្ហោះនៅលើទំព័រហ្វេសប៊ុករបស់លោកពាក់ព័ន្ធនឹងបញ្ហាព្រំដែនកម្ពុជា-វៀតណាម នៅឃុំត្រពាំងផ្លុង ស្រុកពញាក្រែក ខេត្តត្បូងឃ្មុំ។
នៅមុនពេលចាប់ខ្លួនលោក រ៉ុង ឈុន បានចុះទៅមើលព្រំដែនក្នុងឃុំត្រពាំងផ្លុងនៃស្រុកពញាក្រែក ខេត្តត្បូងឃ្មុំ។ នៅថ្ងៃទី ២១ កក្កដា លោក រ៉ុង ឈុន តំណាងក្រុមប្រឹក្សាឃ្លាំមើលកម្ពុជាបានចេញសេចក្ដីថ្លែងការណ៍មួយដោយបញ្ជាក់ថា លោកបានចុះទៅជួបតំណាងពលរដ្ឋ ១០៦ គ្រួសារ នៅឃុំត្រពាំងផ្លុង ស្រុកពញាក្រែកនៅចន្លោះបង្គោលព្រំដែនលេខ ១១៤ ដល់លេខ ១១៩។
លោកបានសរសេរថា ពលរដ្ឋបានប្រាប់ក្រុមការងារលោកថា ការបោះបង្គោលព្រំដែនពីបង្គោលលេខ ១១៤ ដល់ ១១៩ មានភាពមិនប្រក្រតី ដែលធ្វើឲ្យពួកគាត់បាត់បង់ដីអាស្រ័យផលទៅខាងវៀតណាមជាច្រើនរយហិកតា ឬចូលមកក្នុងដីកម្ពុជាប្រមាណ ៥០០ ម៉ែត្រ។ លោកបានស្រង់សម្ដីមនុស្សវ័យ ៧០ ឆ្នាំ ដែលបានប្រាប់ថា បន្ទាត់ព្រំដែនត្រូវបានរំកិលបន្តិចម្ដងៗចូលមកក្នុងដីខ្មែរ ៣ គីឡូម៉ែត្រ។
ដោយស្រង់សម្ដីតំណាងពលរដ្ឋ លោក រ៉ុង ឈុន បន្តថា អាជ្ញាធរស្រុកពញាក្រែកបានរារាំងមិនឲ្យពលរដ្ឋចូលទៅបង្កបង្កើនផលលើដី ៦០ ហិកតា ដែលគណៈកម្មាធិការព្រំដែនកម្ពុជា- វៀតណាម បានប្រាប់ពលរដ្ឋឲ្យផ្អាកបង្កបង្កើនផល ដើម្បីបោះបង្គោលព្រំដែន។ ពេលពលរដ្ឋចូលទៅបង្កបង្កើនផល អាជ្ញាធរវៀតណាមបានចូលមករុញច្រានពួកគេក្នុងដីកម្ពុជា ២០០ ម៉ែត្រ ហើយអាជ្ញាធរកម្ពុជាមិនបានហាមឃាត់។ លោកលើកឡើងថា នេះជាការបំពានលើអធិបតេយ្យភាពកម្ពុជា។
នៅក្នុងថ្ងៃចាប់ខ្លួនគណៈកម្មាធិការចម្រុះកិច្ចការព្រំដែននៃទីស្ដីការគណៈរដ្ឋមន្ត្រីបានចេញសេចក្ដីថ្លែងការណ៍មួយកម្រាស់ ៣ ទំព័រដោយទាត់ចោលទាំងស្រុង ការអះអាងរបស់លោក រ៉ុង ឈុន។
គណៈកម្មាធិការនេះបានចាត់ទុកការលើកឡើងនេះថា៖ «មានចេតនាបង្កើត ប្រឌិតរឿង និងផ្សព្វផ្សាយព័ត៌មានក្លែងក្លាយដោយចេតនាទុច្ចរិតក្នុងបំណងបំភាន់សាធារណមតិជាតិ អន្តរជាតិ ដោយធ្វើការចោទប្រកាន់ដោយគ្មានមូលដ្ឋានលើការងារព្រំដែនរបស់រាជរដ្ឋាភិបាលអំពីការធ្វើឲ្យបាត់បង់ទឹកដីក៏ដូចជាការបណ្ដោយឲ្យមានការរំលោភបំពានទឹកដីពីប្រទេសជិតខាង ធ្វើឲ្យប្រជាពលរដ្ឋបាត់បង់ដីស្រែចម្ការ»។
គណៈកម្មាធិការចម្រុះកិច្ចការព្រំដែនថ្លែងថា លោក រ៉ុង ឈុន បានផ្សព្វផ្សាយ និងចែកចាយព័ត៌មានក្លែងក្លាយបំផ្លើសពីការពិត និងឃុបឃិតជាមួយជនខិលខូចដែលបានអះអាងដូចខាងលើ។
គណៈកម្មធិការបានបញ្ជាក់ថា ការកំណត់ខណ្ឌសីមា និងការបោះបង្គោលព្រំដែនរវាងកម្ពុជា និងវៀតណាមមិនបានធ្វើឲ្យបាត់បង់ទឹកដីទេ ហើយពុំមានអាជ្ញាធរវៀតណាមណារុញច្រានពលរដ្ឋខ្មែរ ២០០ ម៉ែត្រក្នុងទឹកដីកម្ពុជាទេ។
គណៈកម្មាធិការដដែលបានបញ្ជាក់ថា ការកំណត់ខណ្ឌសីមា និងការបោះបង្គោលព្រំដែនរវាងកម្ពុជា និងវៀតណាម បច្ចុប្បន្ននេះសម្រេចបាន ៨៤ ភាគរយហើយ។ ផ្ទៃដីដែលភាគីកម្ពុជាទទួលបាន បន្ទាប់ពីការចរចាខណ្ឌសីមា និងបោះបង្គោលព្រំដែន គឺជាដីរបស់រដ្ឋ ស្ថិតក្រោមការគ្រប់គ្រងរបស់លេខាធិការដ្ឋានអចិន្រៃ្តយ៍នៃអាជ្ញាធរជាតិទទួលបន្ទុកកិច្ចការព្រំដែននៃទីស្ដីការគណៈរដ្ឋមន្ត្រី។
គណៈកម្មាធិការកិច្ចការព្រំដែនអំពាវនាវដល់ពលរដ្ឋកុំឲ្យជឿ និងចែកចាយព័ត៌មានរបស់លោក រ៉ុង ឈុន ហើយអ្នកដែលចែកចាយព័ត៌មាននេះអាចប្រឈមនឹងផ្លូវច្បាប់។
គណៈកម្មាធិការចម្រុះកិច្ចការព្រំដែនអំពាវនាវដល់អាជ្ញាធរមានសមត្ថកិច្ចចូលរួមរក្សាទុកចំណែកដីទាំងនោះ និងទប់ស្កាត់ ចាត់វិធានការតាមផ្លូវច្បាប់ទៅលើជនទាំងឡាយណាដែលមានចេតនាចង់បំពានយកដីរដ្ឋនោះដោយបង្កើតព័ត៌មានក្លែងក្លាយ បន្លំធ្វើឯកសារខុសច្បាប់ក្នុងគោលបំណងបំភ័ន្តដល់សាធារណមតិជាតិ និងអន្តរជាតិ។
វីដេអូ៖
លោក គឹម សន្តិភាព រដ្ឋលេខាធិការក្រសួងយុត្តិធម៌បានថ្លែងពីម្សិលមិញថា ជនណាដែលផ្សព្វផ្សាយព័ត៌មានមិនពិតករណីព្រំដែន គឺជាអំពើញុះញង់បង្កឲ្យមានភាពវិកវរធ្ងន់ធ្ងរដល់សន្តិសុខសង្គមតាមមាត្រា ៤៩៥ នៃក្រមព្រហ្មទណ្ឌ។
លោកថ្លែងថា៖ «ជាក់ស្តែងលោក រ៉ុង ឈុន បានប្រព្រឹត្តបទល្មើសជាក់ស្តែង តាមរយៈសកម្មភាពផ្សព្វផ្សាយលើទំព័រហ្វេសប៊ុកផ្ទាល់ខ្លួនអំពីព័ត៌មានមិនពិត ទាក់ទងនឹងករណីព្រំដែនដូចអ្វីដែលមានក្នុងសេចក្តីថ្លែងការណ៍របស់គណៈកម្មាធិការចម្រុះកិច្ចការព្រំដែន។ ហេតុនេះការអនុវត្តវិធានការច្បាប់លើសកម្មភាពល្មើសច្បាប់នេះមិនមានអ្វីចម្លែកនោះទេ សម្រាប់កម្ពុជាក៏ដូចជាបណ្តាប្រទេសនានាលើសកលលោកយើងនេះ»។
លោកបន្តថា៖ «ដូចនេះ ការអនុវត្តវិធានការច្បាប់របស់អាជ្ញាធរមានសមត្ថកិច្ច និងអយ្យការអមសាលាដំបូងរាជធានីភ្នំពេញជាការត្រឹមត្រូវធ្វើឡើងស្របតាមច្បាប់ និងនីតិវិធីជាធរមាន ដើម្បីធានាបាននូវសន្តិសុខ និងសណ្តាប់ធ្នាប់សង្គម។ វិធានការច្បាប់ចំពោះទង្វើល្មើសច្បាប់បែបនេះនឹងបន្តអនុវត្តដោយខានពុំបាន។ ហេតុនេះ ខ្ញុំសូមអំពាវនាវដល់អ្នកដែលកំពុងលង់ខ្លួននឹងអំពើល្មើសច្បាប់នេះ បញ្ឈប់ជាបន្ទាន់ចៀសវាងការប្រឈមមុខនឹងវិធានការច្បាប់»។
យោងតាមមាត្រា ៤៩៤ និង ៤៩៥ នៃក្រមព្រហ្មទណ្ឌអំពើញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គមនឹងត្រូវផ្ដន្ទាទោសដាក់ពន្ធនាគារពី ៦ ខែទៅ ២ ឆ្នាំ និងពិន័យប្រាក់ពី ១ លានទៅ ៤ លានរៀល ប្រសិនបើការញុះញង់នោះគ្មានប្រសិទ្ធភាព។
កាលពីថ្ងៃសៅរ៍ និងថ្ងៃអាទិត្យម្សិលមិញក្រុមអ្នកគាំទ្រលោក រ៉ុង ឈុន បានបន្តប្រមូលផ្ដុំគ្នា ២ ថ្ងៃជាប់គ្នាធ្វើការតវ៉ានៅមុខសាលាដំបូងរាជធានីភ្នំពេញ ទាមទារឲ្យតុលាការដោះលែងលោក រ៉ុង ឈុន ឲ្យមានសេរីភាពវិញ ដោយពួកគេអះអាងថា លោកគ្មានកំហុសទេ។
អ្នកវិភាគនយោបាយលោក ឡៅ ម៉ុងហៃ បានថ្លែងពីម្សិលមិញថា៖ «បើ រ៉ុង ឈុន និយាយការពិត ឥតមានអីសម្រាប់ចោទថា គាត់ញុះញង់ និងចាប់ខ្លួនគាត់នោះទេ។ រ៉ុង ឈុន និងខ្មែរឯទៀតមានសិទ្ធិទទួលការកាត់ទោសដោយតុលាការឯករាជ្យ និងឥតលម្អៀង ដែលត្រូវការពារសិទ្ធិមនុស្ស (រដ្ឋធម្មនុញ្ញ)»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានថ្លែងពីម្សិលមិញថា ខុស ឬត្រូវអ្នកនយោបាយខ្មែរគួរពិភាក្សាគ្នាជាសម្ងាត់រឿងព្រំដែនកុំឲ្យប្រទេសជិតខាងគេសើច នៅពេលដែលខ្មែរឈ្លោះគ្នាឯងរឿងព្រំដែន។
លោកថ្លែងថា៖ «គួរឲ្យខ្មាសគេណាស់ នៅពេលខ្មែរឈ្លោះគ្នាជាមួយនឹងខ្មែរគ្នាឯង អំពីរឿងរបងព្រំដែន ហើយខ្ញុំគិតថា វៀតណាមប្រហែលគេសើច នៅពេលគេឃើញខ្មែរឈ្លោះគ្នាដោយសារតែព្រំដែនខ្លួនឯង។ អ្នកប្រឆាំងថា នៅខាងនេះ ឯអ្នកដឹកនាំថា នៅខាងនេះ។ បើគ្រាន់តែគ្រួសារខ្លួនឯង មិនទាន់ឯកភាពគ្នាផង តើយើងទៅនិយាយពីបញ្ហាព្រំដែនជាមួយអ្នកជិតខាងយ៉ាងម៉េច»៕
