កណ្តាលៈ ប្រធានសហភាពសហជីពកម្ពុជា លោក រ៉ុង ឈុន បានចូលទៅបំភ្លឺនៅសាលាដំបូងខេត្តកណ្តាល អស់រយៈពេលជិត ៣ ម៉ោង កាលពីម្សិលមិញ ដើម្បីឆ្លើយបំភ្លឺ និងបណ្តឹងពីបទញុះញង់ និងបរិហាកេរ្តិ៍ ពាក់ព័ន្ធនឹងការចូលរួមធ្វើបាតុកម្មជាមួយកម្មករនៅរោងចក្រ Tai Yang ។
បើយោងតាមលោក រ៉ុង ឈុន ការចូលបំភ្លឺរបស់លោក គឺពាក់ព័ន្ធនឹងបណ្តឹងមួយដែលចោទប្រកាន់ថា លោកបានញុះញង់កម្មករឲ្យធ្វើកូដកម្ម និងបានបរិហាកេរ្តិ៍ថ្នាក់ដឹកនាំរោងចក្រ Tai Yang ដែលបានដាក់ពាក្យបណ្តឹងលើរូបលោក បន្ទាប់ពីលោក បានចូលអន្តរាគមន៍ នៅក្នុងកូដកម្ម មានរយៈពេលពីរខែ ដែលចាប់ផ្តើមតាំងពីចុងខែមិថុនា។ លោក រ៉ុង ឈុន ដែលអះអាងថា ការចូលរួមធ្វើកូដកម្មរបស់លោក គឺដើម្បីកម្មករនោះ បានថ្លែងថា៖ «ខ្ញុំបានប្រាប់ព្រះរាជអាជ្ញាថា អ្វីដែលក្រុមហ៊ុនចោទប្រកាន់ខ្ញុំ គឺខុសពី[អ្វីដែលខ្ញុំបានធ្វើ]»។ «ខ្ញុំមិនបានញុះញង់កម្មករឲ្យធ្វើកូដកម្មទេ ប៉ុន្តែពួកគេ បានដាក់លិខិតមួយមកខ្ញុំ ដើម្បីស្នើសុំឲ្យខ្ញុំជួយពួកគេ។ ខ្ញុំបានជួយពួកគេស្វែងរកដំណោះស្រាយ ដោយសន្តិវិធី ពីព្រោះពួកគេត្រូវការ ការជួយពីខ្ញុំ»។ លោក រ៉ុង ឈុន ដែលត្រូវបានកោះហៅកាលពីដំបូងនៅថ្ងៃទី ២៩ សីហា បានថ្លែងថា លោកមិនទាន់ត្រូវបានចោទប្រកាន់ជាផ្លូវការនៅឡើយទេ ហើយលោកថា លោកមិនប្រាកដនោះទេ ថាតើលោកនឹងត្រូវបានកោះហៅឲ្យចូលទៅបំភ្លឺម្តងទៀត ឬយ៉ាងណា។
លោកថ្លែងបន្តថា៖ «ខ្ញុំបានស្នើសុំទៅព្រះរាជអាជ្ញាឲ្យបញ្ចប់បណ្តឹងនេះ ពីព្រោះថា អ្វីដែលក្រុមហ៊ុនបានចោទប្រកាន់ខ្ញុំគឺខុស»។ លោកថ្លែងបន្តថា លោកគិតថា បញ្ហានឹងត្រូវបានបញ្ចប់។
លោក បន្តទៀតថា៖ «ព្រះរាជអាជ្ញា មិនទាន់ឆ្លើយតបមកខ្ញុំ អំពីអ្វីដែលខ្ញុំបានស្នើសុំពីគាត់នៅឡើយទេ»។ លោកបន្ថែមថា៖ «វាជារឿងអយុត្តិធម៌ណាស់ ប្រសិនបើខ្ញុំ ត្រូវបានចោទប្រកាន់ជាផ្លូវការឬចាប់ខ្លួន»។
លោក ទេព ម៉ូនីន ព្រះរាជអាជ្ញារង សាលាដំបូងខេត្តកណ្តាល ដែលបានសាកសួរលោក រ៉ុង ឈុន មិនអាចទាក់ទងសុំការធ្វើអត្ថាធិប្បាយបានទេពីម្សិលមិញ។
លោក ម៉ែន មករា មន្រ្តីសម្របសម្រួលអង្គការសិទ្ធិមនុស្សអាដហុកប្រចាំខេត្តកណ្តាល បានថ្លែងថា តុលាការ ត្រូវបានតម្រូវឲ្យចាត់វិធានការផ្លូវច្បាប់តាមបណ្តឹងរបស់ ថ្នាក់ដឹកនាំក្រុមហ៊ុន បើទោះបីជាគាត់មិនមានបំណងចោទប្រកាន់លោក រ៉ុង ឈុនក៏ដោយ៕ PS
