ភ្នំពេញៈ អគ្គលេខាធិការសហភាពសហជីពកម្ពុជាលោក រ៉ុង ឈុន បានដាក់បណ្តឹងទៅសាលាឧទ្ធរណ៍កាលពីម្សិលមិញដើម្បីប្តឹងប្រឆាំងនឹងសាលក្រមសាលាដំបូងពាក់ព័ន្ធករណីហិង្សាលើផ្លូវវេងស្រេងកាលពីចុងឆ្នាំ ២០១៣ ខណៈមេសហជីពខ្លះដែលរងបណ្តឹងនេះដែរ កំពុងរង់ចាំការកោះហៅពីសាលាឧទ្ធរណ៍។
កាលពីថ្ងៃទី១១ ខែធ្នូ ឆ្នាំ ២០១៨ សាលាដំបូងរាជធានីភ្នំពេញបានប្រកាសសាលក្រមសម្រេចឲ្យប្រធានសហជីពចំនួន ៦ រូប រួមមាន លោក រ៉ុង ឈុង អគ្គលេខាធិការសហភាពសហជីពកម្ពុជា,លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា,លោក ជា មុនី ប្រធានសម្ព័ន្ធសហជីពចលនាកម្មករកម្ពុជា,លោកស្រី យ៉ាង សុភ័ណ្ឌ ប្រធានសម្ព័ន្ធសហជីពកម្ពុជា, លោក ប៉ាវ ស៊ីណា ប្រធានសហជីពចលនាកម្មករកម្ពុជា និង លោកស្រី ម៉ម ញឹម ប្រធានសហព័ន្ធសហជីពជាតិនៃឧស្សាហកម្មវាយនភ័ណ្ឌឲ្យជាប់ពន្ធនាគារក្នុងម្នាក់ៗ ២ ឆ្នាំ ៦ ខែតែត្រូវព្យួរទោសនិងត្រូវបង់ប្រាក់ជំងឺចិត្តទៅជនរងគ្រោះ ២ នាក់ សរុបចំនួន ៣៥ លានរៀល ឬជិត ១ ម៉ឺនដុល្លារ។
លោក រ៉ុង ឈុន បានប្រាប់ភ្នំពេញប៉ុស្តិ៍ក្រោយដាក់បណ្ដឹងកាលពីម្សិលមិញថា ការប្តឹងប្រឆាំងនឹងសាលក្រមនេះព្រោះតែលោកមិនបានប្រព្រឹត្តដូចការចោទប្រកាន់របស់សាលាដំបូងនោះទេ ដោយលោកអះអាងថា ក្នុងអំឡុងពេលកើតហេតុនៅផ្លូវវេងស្រេងនោះ រូបលោកគ្មានវត្តមាននៅកន្លែងកើតហេតុទេ។
យ៉ាងណាក្ដី លោកថ្លែងថា គោលបំណងនៃការធ្វើបាតុកម្មរបស់កម្មករនាពេលនោះបើតាមលោកដឹងគឺដើម្បីទាមទារប្រាក់ឈ្នួលជូនកម្មករឲ្យបាន ១៦០ ដុល្លារប៉ុណ្ណោះ ហើយចំពោះអំពើហិង្សានោះ បែរជាពួកលោក រួមទាំងក្រុមកម្មករជាអ្នករងគ្រោះទៅវិញ។
លោកថា៖ «ខ្ញុំមកប្តឹងទៅឧទ្ធរណ៍ ដោយសារខ្ញុំមិនអាចទទួលយកបានលទ្ធផលនៃការសម្រេចរបស់តុលាការរាជធានីភ្នំពេញបានទេ ព្រោះសេចក្តីសម្រេចនេះជារឿងមួយអយុត្តិធម៌សម្រាប់ខ្ញុំក៏ដូចជាមេសហជីព ៥ នាក់ផ្សេងទៀត»។
លោកបន្តថា៖ «បើតាមផ្លូវច្បាប់ អ្នកណាដែលប្រព្រឹត្តហើយនៅទីកន្លែងហ្នឹង (កន្លែងកើតហេតុ) ត្រូវតែចាប់អ្នកហ្នឹងយកមកផ្តន្ទាទោសតាមច្បាប់ ប៉ុន្តែអ្វីដែលយើងសោកស្តាយ មានវីដេអូ មានអីច្រើនណាស់ ដែលអាជ្ញាធរកម្លាំងនគរបាល ទៅបាញ់បង្ក្រាបលើកម្មករបាតដៃទទេ បង្កឲ្យបាត់បង់ជីវិតហើយមិនត្រូវបាននាំខ្លួនជនដៃដល់ និងអ្នកនៅក្រោយខ្នងជនដៃដល់យកមកផ្តន្ទាទោសទេ»។
ក្រោយដាក់បណ្ដឹងនៅសាលាឧទ្ធរណ៍រួច លោក រ៉ុង ឈុន សម្ដែងក្ដីរំពឹងថា នឹងទទួលបានយុត្តិធម៌ ហើយថា សាលាឧទ្ធរណ៍ នឹងលើកលែងការចោទប្រកាន់លោក ប្រសិនបើអនុវត្តតាមនីតិវិធីវិជ្ជាជីវៈ។
ដោយឡែកនៅក្នុងសំណុំរឿងនេះដែរ មេដឹកនាំសហជីពមួយចំនួនដូចជា លោក អាត់ ធន់ លោកប៉ាវ ស៊ីណា និងអ្នកស្រីយ៉ាង សុភ័ណ្ឌ ក្នុងចំណោមមេសហជីពដទៃទៀត ក៏បានដាក់ពាក្យបណ្តឹងប្រឆាំងនឹងសាលក្រមនេះរួចហើយដែរ ខណៈពេលនេះ នៅកំពុងរង់ចាំការកោះហៅ និងការផ្ដល់យុត្តិធម៌ពីសាលាឧទ្ធរណ៍។
លោក អាត់ ធន់ ដែលបានដាក់ពាក្យបណ្ដឹងទៅឧទ្ធរណ៍ម្នាក់ ក្នុងចំណោមមេសហជីព ៣ នាក់ដែលបានដាក់បណ្តឹងប្រឆាំងសាលក្រមដូចគ្នា បានថ្លែងថា លោកកំពុងរង់ចាំការកោះហៅពីសាលាឧទ្ធរណ៍ ក្រោយពីបានដាក់ពាក្យបណ្តឹងតាំងពីថ្ងៃ ១២ ខែធ្នូ ឆ្នាំមុន។ លោក អាត់ ធន់ បានរំពឹងថា សាលាឧទ្ធរណ៍នឹងផ្តល់យុត្តិធម៌ជូនលោក ខណៈលោកហៅការចោទប្រកាន់លើរូបលោកគឺជារឿងមិនសមហេតុសមផល។
លោកថ្លែងថា៖ «សាលាឧទ្ធរណ៍មកដល់ពេលហ្នឹង មិនទាន់បានហៅយើងដើម្បីទៅធ្វើសវនាការលើសំណុំរឿងហ្នឹងទេ។ យើងរង់ចាំនីតិវិធីហ្នឹង ហើយយើងមិនប្តឹងតែមួយទេ គឺប្តឹងគ្រប់ដំណាក់កាល ដរាបណាគេទម្លាក់ចោលថាយើងគ្មានទោសតែមិនដឹងថាសាលាឧទ្ធរណ៍ចាប់ផ្តើមហៅយើងនៅពេលណា?ខ្ញុំរំពឹងថា សាលាឧទ្ធរណ៍នឹងផ្តល់យុត្តិធម៌សម្រាប់យើង»។
ភ្នំពេញប៉ុស្តិ៍មិនអាចសុំការអត្ថាធិប្បាយពីលោកលី សុផាណា អ្នកនាំពាក្យសាលាដំបូងរាជធានីភ្នំពេញ និងលោក ទូច ថារិទ្ធ អ្នកនាំពាក្យសាលាឧទ្ធរណ៍បានទេ កាលពីម្សិលមិញ។
ដោយសំអាងថាមានភ័ស្ដុតាងបញ្ជាក់នោះ លោកនាយករដ្ឋមន្ត្រី ហ៊ុន សែន ធ្លាប់បានថ្លែងជាសាធារណៈកាលពីថ្ងៃទី ១២ ខែធ្នូ ឆ្នាំមុនថា ប្រធានសហជីព ៣ រូប រួមមាន លោក អាត់ ធន់ លោក ប៉ាវ ស៊ីណា និងលោក ជា មុនី មិនពាក់ព័ន្ធករណីបាតុកម្មលើផ្លូវវេងស្រេងក្រោយការបោះឆ្នោតថ្នាក់ជាតិកាលពីចុងឆ្នាំ ២០១៣ ទេ ប៉ុន្តែអ្នកក្រៅពីនោះលោកមិនហ៊ានធានាឡើយ៕