.jpg)
លោក លឹម គានហោ ថ្លែងប្រាប់អ្នកកាសែតនៅរដ្ឋសភាកាលពីឆ្នាំ ២០១៤។ ហេង ជីវ័ន
ភ្នំពេញៈ លោក លឹម គានហោ រដ្ឋមន្ត្រី ក្រសួងធនធានទឹក និងឧតុនិយមបានសម្ដែងនូវក្ដីព្រួយកង្វល់អំពីលទ្ធភាពនៃការរំដោះគ្រោះទឹកជំនន់ដែលបង្កឡើងពីសកម្មភាពរំលោភច្បាប់របស់ក្រុមជនឱកាសនិយមមួយចំនួន តាមរយៈការចាក់ដីលុបចំណីមាត់ច្រាំងទន្លេ ស្ទឹង ព្រែក អូរ ប្រឡាយ អាងទឹក បឹងបួ។ ជាមួយនឹងក្ដីបារម្ភនេះលោកបានស្នើដល់អភិបាលរាជធានី-ខេត្ត ចូលរួមជួយចាត់វិធានការទប់ស្កាត់នូវរាល់សកម្មភាពរំលោភបំពានទាំងនេះឲ្យបានសមស្រប។
យោងតាមលិខិតជម្រាបជូនអភិបាលរាជធានី-ខេត្ត ស្ដីពី «សំណើសុំជួយទប់ស្កាត់ការរំលោភ ចាក់ដីលុបចំណីមាត់ច្រាំងទន្លេ ស្ទឹង ព្រែក អូរ ប្រឡាយ អាងទឹក បឹងបួ» ចុះថ្ងៃទី ៨ ខែឧសភា ឆ្នាំ ២០២០ ដែលភ្នំពេញប៉ុស្តិ៍ទទួលបានកាលពីម្សិលមិញលោក លឹម គានហោ បានកត់សម្គាល់ថា ស្របពេលមានការអភិវឌ្ឍរីកចម្រើនលើគ្រប់វិស័យនាពេលប៉ុន្មានឆ្នាំមកនេះ ពិសេសវិស័យសំណង់ និងហេដ្ឋារចនាសម្ព័ន្ធ ក្រសួងក៏បានសង្កេតឃើញមានសកម្មភាពអវិជ្ជមានមួយចំនួនដូចជាការរំលោភ ចាក់ដីលុបចំណីមាត់ច្រាំងទន្លេ ស្ទឹង ព្រែក អូរ ប្រឡាយ អាងទឹក បឹងបួ ដែលជាសម្បត្តិសាធារណៈរបស់រដ្ឋផងដែរ។
ក្នុងលិខិតនោះលោក គានហោ បានគូសបញ្ជាក់ថា៖ «ផ្តើមចេញពីសកម្មភាព (រំលោភដោយខុសច្បាប់នេះ) ក្រសួងធនធានទឹក និងឧតុនិយមមានការព្រួយបារម្ភជាខ្លាំង ចំពោះបញ្ហាដែលកើតឡើងដល់លទ្ធភាពនៃការរំដោះទឹក និងបង្កជាគ្រោះមហន្តរាយទឹកជំនន់ដោយសារចំណីមាត់ច្រាំងទន្លេ ស្ទឹង ព្រែក អូរ ប្រឡាយ អាងទឹក បឹងបួ និងតំបន់ផ្ទៃរងទឹកភ្លៀងមួយចំនួនត្រូវបានរំលោភចាក់ដីលុប និងការសាងសង់បិទផ្លូវទឹកនានា ដោយពុំស្របតាមលិខិតបទដ្ឋានគតិយុត្តជាធរមាន»។
លោក គានហោ ក៏បានស្នើដល់អភិបាលរាជធានីខេត្តទាំងអស់ចូលរួមចាត់វិធានការទប់ស្កាត់នូវរាល់សកម្មភាពទាំងនេះឲ្យបានសមស្រប។
អង្គការសមាគមធាងត្នោតកាលពីខែចុងខែធ្នូ ឆ្នាំ ២០១៩ បានចេញផ្សាយរបាយការណ៍ចុងឆ្នាំរបស់ខ្លួនមួយដោយអំពាវនាវកុំឲ្យរដ្ឋាភិបាលបន្តការលុបបឹង និងតំបន់ដីសើមផ្សេងទៀតដោយលើកឡើងអំពីការបាត់បង់កន្លែងស្តុកទឹកដ៏សំខាន់សម្រាប់ទីក្រុង។
របាយការណ៍ដដែលបានឲ្យដឹងថា៖ «បឹង និងតំបន់ដីសើមក្នុងរាជធានីភ្នំពេញ ជិតត្រូវបានបាត់បង់ទាំងស្រុង ហើយប្រសិនបើស្ថានភាពនេះ នៅតែបន្តដូចការស្មានទុក ទីក្រុង និងតំបន់នៅជុំវិញអាចនឹងត្រូវរងគ្រោះពីទឹកជំនន់ធ្ងន់ធ្ងរ ការបាត់បង់ពូជត្រី ការបាត់បង់អាងប្រព្រឹត្តិកម្មទឹកកខ្វក់បែបធម្មជាតិ និងការបាត់បង់ជីវភាពរស់នៅរបស់ប្រជាពលរដ្ឋនៅមូលដ្ឋាន»។
របាយការណ៍បន្តថាចាប់តាំងពីឆ្នាំ ១៩៩០ មកក្នុងចំណោមបឹងចំនួន ២៦ ក្នុងរាជធានីភ្នំពេញមានបឹងចំនួន ១៦ គឺស្មើនឹង ៦០ ភាគរយនៃផ្ទៃដីបឹងទាំងអស់ ត្រូវបានចាក់ដីលុប និងបឹងចំនួន ១០ ទៀតត្រូវបានចាក់ដីលុបខ្លះៗ រួចហើយ។ មូលហេតុចម្បងនៃការលុបបឹងនោះគឺ «បណ្ដាលមកពីការសាងសង់បុរី តំបន់លំនៅឋាន និងទីក្រុងរណប»។
លោក សឿង សារ៉ន នាយកប្រតិបត្តិនៃអង្គការសមាគមធាងត្នោតបានឲ្យដឹងថា លោកបានជំរុញឲ្យក្រសួងនេះបន្តតាមដាន និងឃ្លាំមើលចំពោះយន្តការនៃការអនុវត្តច្បាប់របស់មន្ត្រីជំនាញ និងអាជ្ញាធរមូលដ្ឋាន ដោយលើកឡើងថា ករណីលុបបឹងនេះគឺទាក់ទងនឹងផលប្រយោជន៍ និងកើតចេញពីអ្នកមានលុយ មានអំណាច។
លោកថា៖ «ក្រសួងគួរបង្កើតយន្តការ និងការលើកទឹកចិត្តឲ្យសាធារណជនរាយការណ៍ពីករណីលុបបឹង ប្រឡាយ និងផ្តល់រង្វាន់ដល់អ្នករាយការណ៍ពីករណីលុបនេះ។ បន្ថែមពីនេះត្រូវមានចំណាត់ការឱ្យបានតឹងតែងបំផុតចំពោះអ្នកមានលុយមានអំណាចណាដែលរំលោភលើដីបឹង»៕
