.jpg)
លោក លឺ ឡាយស្រេង នាពេលកន្លងមក។ លោក ថ្លែងថា លោកនឹងវិលចូលស្រុកវិញបន្ទាប់ពីលោកនាយករដ្ឋមន្ត្រីហ៊ុន សែន ប្រកាសមិនយកទោសពៃរ៍ កាលពីម្សិលមិញ។ ហេង ជីវ័ន
ភ្នំពេញៈ លោក លឺ ឡាយស្រេង នឹងវិលត្រឡប់ចូលមកប្រទេសកម្ពុជាវិញ ក្រោយពីជួបគ្រូពេទ្យពិនិត្យជំងឺនៅក្រុងបាងកក បន្ទាប់ពីលោកនាយករដ្ឋមន្ត្រី ហ៊ុន សែន ប្រកាសមិនយកទោសពៃរ៍ រឿងបរិហារកេរ្តិ៍ និងប្រមាថព្រះមហាក្សត្រ។
លោក លឺ ឡាយស្រេង បានថ្លែងតាមទូរស័ព្ទពីប្រទេសថៃកាលពីម្សិលមិញថា៖ «អរគុណសម្ដេចណាស់ដែលបានអនុញ្ញាតឲ្យទៅវិញ ព្រោះនៅស្រុកគេវាពិបាក នឹកស្រុកចង់ងាប់ហើយ។ ប៉ុន្តែមុនទៅវិញ ខ្ញុំត្រូវទៅពេទ្យសិនព្រោះសុខភាពខ្ញុំ ត្រូវការទៅពេទ្យ ១ ខែម្ដង។ ឥឡូវទៅសួរពេទ្យសិនថា ពេទ្យឲ្យទៅថ្ងៃណា ព្រោះជំងឺបេះដូង ស្ត្រូក និងខួរក្បាល ត្រូវទៅជួបពេទ្យ ១ ខែម្ដង»។
លោកបន្តថា៖ «ប៉ុន្តែយ៉ាងណាឥឡូវធូរស្រាលណាស់បានសម្ដេចឲ្យទៅវិញ បែបចង់ជាវិញហើយនេះ»។
លោកថា លោកកំពុងស្នាក់នៅប្រទេស ថៃ ជាមួយចៅ ២ នាក់។ ភ្លាមៗ ក្រោយពេលភ្លើងខៀវ ពីលោក ហ៊ុន សែន លោក លឺ ឡាយស្រេង បានថ្លែងតាមហ្វេសប៊ុកថា លោកបាននិយាយខុសហើយសន្យាមិនធ្វើឲ្យមានកំហុសទៀតទេ។
លោកថា៖ «បាទ ជាមួយព្រះកូណា លែងនិយាយលែងអីហើយ ព្រោះនិយាយទៅ វារត់ចោលស្រុក វាប៉ះពាល់ដល់កិត្តិនាម ព្រះនាមព្រះកូណាម្ដងទៀត សុំខមាទោសសុំព្រះរាជទានទោស ដល់ទូលព្រះបង្គំដែលធ្លាប់បម្រើតាំងពីព្រះរាជបិតា រហូតដល់ព្រះអង្គសព្វថ្ងៃនេះព្រោះចង់បានឲ្យព្រះអង្គចេញមកដោះស្រាយឲ្យចប់ឆាប់ៗ។ ឥឡូវគឺថា តាមដំណើរអ៊ីចឹងទៅ»។
ក្នុងពិធីចែកសញ្ញាបត្រដល់និស្សិតវិទ្យាស្ថានវ៉ាន់ដា ជាង ៣ ពាន់នាក់ កាលពីថ្ងៃចន្ទ លោក ហ៊ុន សែន បានថ្លែងថា លោកអនុញ្ញាតឲ្យលោក លឺ ឡាយស្រេង មកស្រុកខ្មែរវិញ ដោយមិនមានការចាប់ខ្លួន។
លោកថ្លែងថា៖ «អញ្ជើញមកលោកតា គ្មានអាណាគេចាប់ទេទៅ។ ខ្ញុំក៏មិនបាច់ធ្វើសំបុត្រលើកលែងទោសឲ្យតាឯងដែរ។ លោកឯង តាឯងអ្នកនិយាយ ខ្ញុំក៏និយាយទៅវិញ។ ឥឡូវបើក លឺ ឡាយស្រេង ចូលស្រុកមក។ ខ្ញុំហៅប្រកាសហៅ បក់ដៃហៅតាឯងមើលទៅ។ ខ្ញុំបក់ដៃមក តាអើយតា ត្រឡប់មកវិញមក ហើយគ្រាន់តែសុំកុំឡប់តទៅទៀត»។
លោកបានប្រាប់ទៅរដ្ឋមន្ត្រីក្រសួងយុត្តិធម៌លោក អង្គ វង្សវឌ្ឍនា ឲ្យពិនិត្យមើលសំណុំរឿងរបស់លោក ឡាយស្រេង ដោយក្នុងសំណុំរឿង ដែលត្រូវបង់ប្រាក់សំណង គឺត្រូវធ្វើលិខិតស្នើសុំព្រះរាជទានទោស ដើម្បីឲ្យសំណងនោះចប់សព្វគ្រប់។
ប៉ុន្តែលោកនាយករដ្ឋមន្ត្រី បញ្ជាក់ថា លោក ឡាយស្រេង អាចមកស្រុកខ្មែរវិញសូម្បីមុនការចេញព្រះរាជក្រឹត្យលើកលែងទោស ហើយលោកផ្ទាល់ នឹងជួបលោកឡាយស្រេងដើម្បីពិសាបាយជាមួយគ្នា។ លោកថា លោក ឡាយស្រេង តែងសរសើរលោកថា ជាមនុស្សមានអំណាចបញ្ជា។
លោក លឺ ឡាយស្រេង ជាប់ក្នុងសំណុំរឿងចំនួន ៣ ក្រោយពេលការសន្ទនារបស់លោក តាមទូរស័ព្ទត្រូវបានគេថត ហើយយកទៅបង្ហោះជាសាធារណៈ។ លោក ឡាយស្រេង ត្រូវបានប្ដឹងដោយ មេធាវីតំណាងលោក ហ៊ុន សែន ហើយតុលាការកាត់ទោសលោកឲ្យបង់ប្រាក់ ៥០០ លានរៀល ។ លោកនៅជាប់បណ្ដឹងបទប្រមាថព្រះមហាក្សត្រ និងបទបរិហារកេរ្តិ៍គណបក្សហ្វ៊ុនស៊ិនប៉ិច រឿងទទួលយកកៅអីសភាអតីតគណបក្សសង្គ្រោះជាតិ។
លោកនាយករដ្ឋមន្ត្រី ហ៊ុន សែន នៅក្នុងពិធីចែកសញ្ញាបត្រកាលពីថ្ងៃម្សិលមិញ។ SPM
បើទោះជាលោក ហ៊ុន សែន បង្ហាញក្ដីអាណិតដល់លោក ឡាយស្រេង ក៏ដោយ ក៏លោកបានប្ដេជ្ញាចិត្តថា លោកមិនអាចលើកលែងដល់មនុស្សមួយក្រុមដែលប្រមាថដល់ភរិយាលោក និងកូនប្រុស ហ៊ុន ម៉ាណែត ដោយពួកគេចោទថា ហ៊ុន ម៉ាណែត ជាកូនរបស់មេដឹកនាំវៀតណាម។
លោកថ្លែងថា៖ «វាជេរយើងជេរស្អី ជេរតាមចិត្ត វាគូររូបយកពូថៅកាប់ក្បាលយើងវាធ្វើតាមចិត្ត។ រួចមេវាអ្នកណែនាំឲ្យធ្វើ។ ឃើញមេវាដែលណែនាំថា ណែត្រូវមានគុណធម៌ ឃើញដែលមេវា (ធ្វើ) ទេ? រហូតដល់ការប្រមាថមួយដែលខ្ញុំមិនអាចអត់ឱនឲ្យពួកអាឆ្កែអស់ហ្នឹង (ដឹង) ប្រមាថស្អីទេ? ប្រមាថ ប្រពន្ធខ្ញុំទៅជាប្រពន្ធរបស់មេដឹកនាំវៀតណាម និង ហ៊ុន ម៉ាណែត ក្លាយទៅជាកូនរបស់មេដឹកនាំវៀតណាម។ រឿងមួយនេះអាហែ្អងត្រូវចាំម៉ាជីវិតរបស់អញអត់អត់ឱនឲ្យអាហ្អែងទេ»។
លោកបន្តថា លោកនឹងកម្ទេចអ្នកដែលប្រមាថបែបនេះឲ្យដូចអ្វីដែលលោកបានដាក់គោលដៅកម្ចាត់ប៉ុល ពត។
លោកបញ្ជាក់ថា៖ «អញបញ្ជូនឃ្លីបហ្នឹងទៅឲ្យស្ថានទូតនានា រឿងហ្នឹងហើយ ដែលអញមិនអត់ឱនឲ្យអាហ្អែង ហើយអាហ្អែងកុំថា យករឿងបុគ្គលធ្វើជាបញ្ហាធំ បុគ្គលឬជាតិហើយអាហែ្អងហ៊ានធ្វើចំពោះអញប៉ុណ្ណឹង អញក៏មិនអត់ឱនឲ្យអាហែ្អងដែរ។ អញដាក់គោលដៅកម្ចាត់ឯង ស្មើនឹងអញដាក់គោលដៅកម្ចាត់ ប៉ុល ពត ដូចគ្នាអាហែ្អងចាំឲ្យច្បាស់កន្លែងនេះ»។
លោកបញ្ជាក់យ៉ាងច្បាស់ថា ការប្រមាថមួយនេះ មិនអាចយោគយល់បានទេ ហើយក៏មិនអាចនិយាយគ្នាកើតដែរ។ លោកបានទុកឱកាសឲ្យមេដឹកនាំរូបនោះសុំទោស ហើយសុំឲ្យគេធ្វើការប្រកាសថ្កោលទោសចំពោះក្រុមដែលធ្វើ ប៉ុន្តែលោកថា មេដឹកនាំរូបនោះ មិនអាចថ្កោលទោសកើតទេ ព្រោះគាត់ជាអ្នកណែនាំឲ្យកូនចៅគេធ្វើរបៀបហ្នឹង។
លោកថ្លែងថា៖ «ប៉ុនអាពត ខ្លាំងប៉ុណ្ណឹង ហ៊ុន សែន វាយដួលទាំងអស់។ ឥឡូវអាធុនប៉ុនណេះ ទៅនៅលែងនៅក្រៅទៅ អញហៅតែ លឺ ឡាយស្រេង បានហើយ។ ផ្ដល់ឲ្យតែ លឺ ឡាយស្រេង ទៅបានហើយ អាប៉ុន្មានទៀត ទុកអាហែ្អងនៅចង្រៃនៅហ្នឹង»។
ទោះបីមិនបញ្ចេញឈ្មោះក៏ដោយ លោក ហ៊ុន សែន ទំនងសំដៅដល់លោក សម រង្ស៊ី ដែលជាគូបដិបក្ខជាយូរឆ្នាំមកហើយ។ កាលពីឆ្នាំ ២០១៦ អតីតគណបក្សសង្គ្រោះជាតិ បានបណ្ដេញសមាជិកបក្សម្នាក់ឈ្មោះ យ៉ង ណុយ ហៅ Brady Young ចំពោះការចោទប្រកាន់ដូចគ្នានេះ។ លោក សម រង្ស៊ី កាលពីពេលនោះក៏បានចេញលិខិតថ្កោលទោសមួយចំពោះការចោទប្រកាន់ដែលធ្វើឲ្យប៉ះពាល់ដល់លោក ហ៊ុន សែន។
តាមអីុមែលកាលពីម្សិលមិញ លោក សម រង្ស៊ី បានថ្លែងថា លោកមិនដែលយកចិត្តទុកដាក់លើការងារឯកជនរបស់អ្នកណាម្នាក់ទេ។
លោកថ្លែងថា៖ «លោក ហ៊ុន សែន ជាមេដឹកនាំមិនទទួលខុសត្រូវ ដែលចង់បង្វែរការចាប់អារម្មណ៍របស់សាធារណជនលើរឿងជាតិ ដែលគាត់មិនអាចដោះស្រាយបានទៅលើរឿងផ្ទាល់ខ្លួនដោយចោទប្រកាន់ទៅលើអ្នកផ្សេងហើយយកការចោទប្រកាន់បែបនេះ ទៅបង្ក្រាបលើអ្នកនយោបាយប្រឆាំង»។
លោក ឡៅ ម៉ុងហៃ អ្នកវិភាគនយោបាយថ្លែងថា កំហុសរបស់លោក លឺ ឡាយស្រេង ជាកំហុសតិចតួចប៉ុណ្ណោះ។ អ្នកដែលមានហេតុផលច្បាស់លាស់មិនគួរឈឺចិត្តដោយសារតែការសន្ទនាឯកជនរបស់លោកទេ។
ប៉ុន្តែគេអាចមានការឈឺចាប់ ដោយការបាត់បង់កិត្តិយសជាបុរស នៅពេលមានគេនិយាយជាសាធារណៈថា កូនរបស់ខ្លួនត្រូវបានបង្កាត់ពូជដោយបុរសផ្សេង ដែលមើលទៅហាក់ដូចជាបុរសដែលមានប្រពន្ធក្បត់ប្ដី។
លោកថ្លែងថា៖ «អ្នកដែលចោទប្រកាន់បែបនេះ សមនឹងទទួលបានការលើកឡើងបែបនេះ ពីលោកនាយករដ្ឋមន្ត្រី។ ប៉ុន្តែរដ្ឋបុរសដែលមានទំនុកចិត្តលើខ្លួនឯងនឹងយកបញ្ហាសីលធម៌ជារឿងសំខាន់ ហើយមិនខ្វល់ខ្វាយពីពួកគេទេ ទោះបីជាមតិយោបល់របស់ពួកគេធ្វើឲ្យមានការឈឺចាប់ប៉ុនណាក៏ដោយ»៕
