.jpg)
លោក លឺ ឡាយស្រេង នៅពេលមកដល់ព្រលានយន្តហោះអន្តរជាតិភ្នំពេញ កាលពីម្សិលមិញ។ រូបថត DAP
ភ្នំពេញៈ លោក លឺ ឡាយស្រេង អតីតមន្ត្រីជាន់ខ្ពស់ នៃគណបក្សហ្វ៊ុនស៊ិនប៉ិច បានវិលត្រឡប់មកដល់ប្រទេស កម្ពុជា វិញហើយកាលពីម្សិលមិញ បន្ទាប់ពីមានការសន្ដោសប្រណីពីលោកនាយករដ្ឋមន្ត្រី ហ៊ុន សែន ដែលប្រកាសមិនយកទោសពៃរ៍ចំពោះរូបលោក។
នៅពេលមកដល់ព្រលានយន្តហោះអន្តរជាតិភ្នំពេញ កាលពីវេលាម៉ោង ៩ ព្រឹកថ្ងៃអាទិត្យម្សិលមិញលោក ឡាយស្រេង បានថ្លែងថា លោកមានការត្រេកអរជាខ្លាំងដែលបានវិលត្រឡប់មកកាន់មាតុប្រទេសកំណើតវិញ។
លោកបានថ្លែងប្រាប់ភ្នំពេញប៉ុស្តិ៍នូវអារម្មណ៍របស់លោកថា៖ «គ្មានភាពរីករាយឯណា ជាងការរស់នៅក្នុងស្រុកកំណើតខ្លួននោះទេ»។
នៅពេលសួរថា តើលោកនឹងមានគម្រោងអ្វីសម្រាប់ជីវិត ចុងក្រោយរបស់លោក បន្ទាប់ពីទទួលបានការសន្ដោសប្រណីពីលោកនាយករដ្ឋមន្ត្រី ហ៊ុន សែន លោក ឡាយស្រេង បានថ្លែងថា លោកនឹងរក្សាភាពស្ងៀមស្ងាត់ក្នុងភាពជានិវត្តជន។
ក្រៅពីនេះលោក ស្រេង បានឲ្យដឹងថា៖ «ខ្ញុំនឹងរៀបចំមជ្ឈមណ្ឌល និងមូលនិធិថែទាំមនុស្សចាស់មួយនៅតំបន់ភ្នំស្រង់ដើម្បីចូលរួមចំណែកកាត់បន្ថយការលំបាករបស់រាជរដ្ឋាភិបាល»។
លោក លឺ ឡាយស្រេង បានភៀសខ្លួនទៅរស់នៅឯទីក្រុងបាងកក ប្រទេស ថៃ កាលពីដើមឆ្នាំ ២០១៨ បន្ទាប់ពីមានការបែកធ្លាយនូវសារសន្ទនាតាមប្រព័ន្ធទូរស័ព្ទជាមួយលោកស្រី គី លំអង អតីតមន្រ្តីជាន់ខ្ពស់នៃគណបក្សហ៊្វុនស៊ិនប៉ិចប្រមាថដល់អង្គព្រះមហាក្សត្រ ដែលត្រូវបានគេលួចថត ហើយត្រូវបានគេយកទៅបង្ហោះជាសាធារណៈ។
លោក ឡាយស្រេង ជាប់ក្នុងសំណុំរឿងចំនួន ៣។ លោក ឡាយស្រេង ត្រូវបានប្ដឹងដោយមេធាវីតំណាងលោក ហ៊ុន សែន ហើយតុលាការបានកាត់ទោសលោកឲ្យបង់ប្រាក់ដោយផាកពិន័យចំនួន ៨ លានរៀល ចូលជាថវិការដ្ឋ និងតម្រូវឲ្យបង់សំណងជំងឺចិត្ត ៥០០ លានរៀល។ លោកនៅជាប់បណ្ដឹងបទប្រមាថព្រះមហាក្សត្រ និងបទបរិហារកេរ្តិ៍គណបក្សហ្វ៊ុនស៊ិនប៉ិច រឿងទទួលយកអាសនៈរដ្ឋសភា របស់អតីតគណបក្សសង្គ្រោះជាតិ។
ប៉ុន្តែ កាលពីថ្ងៃទី ១ ខែ មេសា ឆ្នាំ ២០១៩ នៅក្នុងពិធីប្រគល់សញ្ញាបត្រដល់និស្សិតវិទ្យាស្ថាន វ៉ាន់ដា លោក ហ៊ុន សែន បានប្រកាសបើកផ្លូវឲ្យលោក ឡាយស្រេង វិលត្រឡប់មកកម្ពុជាវិញ ដោយថ្លែងថា នឹងមិនមានការចាប់ចង ឬយកទោសពៃរិ៍អ្វីនោះឡើយ បន្ទាប់ពីលោកបានឃើញសារអំពាវនាវមួយរបស់លោក ឡាយស្រេង ដែលបានរៀបរាប់អំពីភាពលំបាកនៃការរស់នៅស្រុកគេ [ប្រទេស ថៃ] ដោយគ្មានសាច់ញាតិ និងពីគោលបំណងនៃការចង់វិលត្រឡប់ចូលមករស់នៅនៃជីវិតចុងក្រោយរបស់លោក ក្នុងប្រទេស កម្ពុជា ដែលជាស្រុកកំណើតប្រសិនបើមានការសន្តោសប្រណី និងលើកលែងទោសពីលោកនាយករដ្ឋមន្ត្រី។
លោក ហ៊ុន សែន បានថ្លែងថា៖ «អញ្ជើញមកលោកតា គ្មានអាណាគេចាប់ទេទៅ។ ខ្ញុំក៏មិនបាច់ធ្វើសំបុត្រលើកលែងទោសឲ្យតាឯងដែរ។ លោកឯង តាឯង អ្នកនិយាយ ខ្ញុំក៏និយាយទៅវិញ។ ឥឡូវបើកឲ្យ លឺ ឡាយស្រេង ចូលស្រុកមក។ ខ្ញុំហៅ ប្រកាសហៅ បក់ដៃហៅតាឯងមើលទៅ។ ខ្ញុំបក់ដៃមក តាអើយតា ត្រឡប់មកវិញមក ហើយគ្រាន់តែសុំកុំឡប់តទៅទៀត»។
ជាមួយគ្នានេះ លោកនាយករដ្ឋមន្ត្រី ក៏បានប្រាប់ទៅរដ្ឋមន្ត្រីក្រសួងយុត្តិធម៌ លោក អង្គ វង្សវឌ្ឍានា ឲ្យពិនិត្យមើលសំណុំរឿងរបស់លោកឡាយស្រេង ដោយក្នុងសំណុំរឿង ដែលត្រូវបង់ប្រាក់សំណង គឺត្រូវធ្វើលិខិតស្នើសុំព្រះរាជទានទោស ដើម្បីឲ្យសំណងនោះចប់សព្វគ្រប់។
ប៉ុន្តែលោក ហ៊ុន សែន បញ្ជាក់ថា លោក ឡាយស្រេង អាចមកស្រុកខ្មែរវិញសូម្បីមុនការចេញព្រះរាជក្រឹត្យលើកលែងទោស ហើយលោកផ្ទាល់នឹងជួបលោក ឡាយស្រេង ដើម្បីពិសាបាយជាមួយគ្នា៕
