.jpg)
លោក វឌ្ឍនាសាប៊ុង ពិនិត្យពាក្យបណ្ដឹងរំលោភដីធ្លី ប្ដឹងដោយពលរដ្ឋ។ រូបថត William Gang
ភ្នំពេញៈ លោក សុខសុវណ្ណ វឌ្ឍនាសាប៊ុង ប្រធានគណបក្សខ្មែរក្រោក និងជាសមាជិកឧត្តមក្រុមប្រឹក្សាពិគ្រោះ និងផ្តល់យោបល់ដែលបង្កើតឡើងដោយរាជរដ្ឋាភិបាលបានចាប់ផ្ដើមស៊ើបអង្កេតភាពមិនប្រក្រតីពាក់ព័ន្ធការរួមគំនិតរំលោភយកដីរដ្ឋ និងអំពើបំពានអំណាចប្រព្រឹត្តដោយមន្ត្រីនៅក្នុងរាជរដ្ឋាភិបាល។
សមាជិកឧត្តមក្រុមប្រឹក្សាពិគ្រោះ និងផ្តល់យោបល់រូបនេះបានឲ្យដឹងថា ក្រុមការងាររបស់លោកកាលពីម្សិលមិញបានចាប់ផ្ដើមស៊ើបអង្កេតភាពមិនប្រក្រតីចំនួន ១៧ ដែលទទួលបានពីពលរដ្ឋតាមបណ្ដាខេត្តផ្សេងៗចំនួន ១០ ខេត្តហើយការស៊ើបអង្កេតនេះនឹងបញ្ចប់នៅថ្ងៃទី ១២ ខែតុលា ឆ្នាំ ២០១៩។
លោក វឌ្ឍនាសាប៊ុង បានឲ្យដឹងថាភាពមិនប្រក្រតីចំនួន ១៧ ករណីនោះគឺពាក់ព័ន្ធនឹងការរំលោភបំពាន ជិះជាន់ ភូតកុហកថ្នាក់ដឹកនាំ រួមគំនិតយកដីរដ្ឋ អំពើបំពានអំណាច និងភាពអសកម្មរបស់មន្ត្រីអ្នកមានអំណាច និងអ្នកធំ។
វឌ្ឍនាសាប៊ុង ថ្លែងថា៖ «រឿងនេះវាពុំងាយស្រួលនោះទេ ព្រោះគ្រប់ករណីនីមួយៗសុទ្ធសឹងចុះដល់មូលដ្ឋានដាច់ស្រយាល និងឆ្លងកាត់ឧបសគ្គ។ ប៉ុន្តែយើងចុះនេះគឺមានលិខិតបញ្ជាបេសកកម្មពីរដ្ឋាភិបាលត្រឹមត្រូវហើយខ្ញុំយល់ថា បើយើងខ្លាចស្លាប់ដដែលមិនបាច់មកធ្វើការបម្រើប្រជាជនទេមិនបាច់មកធ្វើការបោសសម្អាតមន្ត្រីពុករលួយក្នុងសង្គមខ្មែរដែរ»។
លោក វឌ្ឍនាសប៊ុង បានឲ្យដឹងទៀតថា បន្ទាប់ពីធ្វើការសិក្សារយៈពេល ៩ ថ្ងៃនៅក្នុង ១០ ខេត្តនេះក្នុងរយៈពេល ២១ ថ្ងៃទៀតគណបក្សខ្មែរក្រោកនឹងធ្វើការប្រមូលអង្គហេតុ អង្គសេចក្ដីដែលប្រមូលបានយកទៅផ្ទៀងផ្ទាត់ និងអង្គច្បាប់ ដើម្បីរៀបចំរបាយការណ៍ដាក់ជូនលោកនាយករដ្ឋមន្ត្រី ដើម្បីពិនិត្យ និងសម្រេច។
លោក វឌ្ឍនាសាប៊ុង ថ្លែងថា៖ «បើរកឃើញខុសប្រាប់ថាខុស បើរកឃើញត្រូវថាត្រូវព្រោះរបាយការណ៍នីមួយៗមុននឹងឆ្លងទៅដល់សម្ដេចតេជោ ឆ្លងកាត់ការសិក្សាមួយតង់ទៀតពីលេខាធិការដ្ឋានឧត្តមក្រុមប្រឹក្សាពិគ្រោះ និងផ្តល់យោបល់។ របាយការណ៍ដែលយើងរកឃើញទៅសិក្សាបន្តទៀត ហើយផុតពីហ្នឹងបានបញ្ចូលទៅទីស្តីការគណៈរដ្ឋមន្ត្រីដើម្បីធ្វើការត្រួតពិនិត្យមួយតង់ទៀតបានន័យថារបាយការណ៍នីមួយៗ បើឈរលើគោលការណ៍សុក្រឹតមិនលម្អៀងគឺវាយតម្លៃរហូតទៅដល់ ៣ ស្ថាប័ន»។
លោក ម៉ៅ ឌុង ពីនាយករដ្ឋបាលសាលាខេត្តត្បូងឃ្មុំបានថ្លែងថា រដ្ឋបាលខេត្តស្វាគមន៍ចំពោះការចុះបេសកកម្មរបស់សមាជិកឧត្តមក្រុមប្រឹក្សាឲ្យតែគោរពទៅតាមច្បាប់ដោយមិនបម្រើឲ្យផលប្រយោជន៍បក្សរបស់ខ្លួន។ ទោះយ៉ាងណាលោកជំរុញឲ្យប្រជាពលរដ្ឋគួរស្វែងរកយន្តការរបស់អាជ្ញាធរក្នុងការដោះស្រាយជូនពួកគាត់។
លោកថ្លែងថា៖ «ការងារតវ៉ា និងជម្លោះខ្លះៗនៅក្នុងខេត្ត វាតែងតែមានហើយ។ ដូច្នេះក្នុងនាមអាជ្ញាធរគឺពឹងទៅលើថ្នាក់ជាតិហ្នឹងហើយ ព្រោះគាត់មានសមត្ថកិច្ច ហើយរឿងខ្លះអាចថា ថ្នាក់ក្រោមជាតិដោះមិនបានមានតែពឹងទៅលើរចនាសម្ព័ន្ធថ្នាក់ជាតិដែលមានស្ថាប័នផ្សេងៗ»។
លោកស្រី ធីម ណារិន មន្ត្រីសម្របសម្រួលអង្គការសមាគមអាដហុក ប្រចាំខេត្តត្បូងឃ្មុំ និងខេត្តកំពង់ចាមបានប្រាប់ភ្នំពេញប៉ុស្តិ៍ពីម្សិលមិលថា បើសិនជាគណបក្សនេះមានឆន្ទៈពិតប្រាកដក្នុងការស្វែងរកយុត្តិធម៌ជូនប្រជាពលរដ្ឋមែននោះ វាគឺជាការល្អសម្រាប់សង្គមសម្រាប់ប្រជាពលរដ្ឋ។ លោកស្រីស្នើឲ្យគ្រប់គណបក្សនយោបាយទាំងអស់គួរមានឆន្ទៈពិតជួយរដ្ឋាភិបាល៕
