.jpg)
លោក វឌ្ឍនាសាប៊ុង (អាវខ្មៅ) ជួបពលរដ្ឋក្នុងដំណើរស៊ើបអង្កេតភាពមិនប្រក្រតីតាមខេត្ត។ រូបថត William
ស្ទឹងត្រែងៈ លោក សុខសុវណ្ណ វឌ្ឍនាសាប៊ុង សមាជិកឧត្តមក្រុមប្រឹក្សាពិគ្រោះ និងផ្ដល់យោបល់របស់រាជរដ្ឋាភិបាលកាលពីដើមសប្តាហ៍នេះបានបញ្ចេញនូវឯកសារ ២ របស់លោក អៀង វ៉ាន់ឌី មេបញ្ជាការកងរាជអាវុធហត្ថ ខេត្តស្ទឹងត្រែងដែលបានយកសម្ភាររបស់ពលរដ្ឋរងគ្រោះម្នាក់ដោយខុសច្បាប់ក្នុងប្រតិបត្តិការឆែកឆេរកាលពីអំឡុងឆ្នាំ ២០១៣។
ឯកសារនៃការរឹបអូសយកសម្ភារដោយខុសច្បាប់របស់លោក វ៉ាន់ឌី ត្រូវបានបញ្ចេញបន្ទាប់ពីមានការស៊ើបអង្កេតរបស់សមាជិកឧត្តមក្រុមប្រឹក្សាពិគ្រោះ និងផ្ដល់យោបល់ ក្រោយពីទទួលបានបណ្ដឹងពីជនរងគ្រោះម្នាក់ឈ្មោះ សែ ម៉េងជា រស់នៅក្នុងភូមិកណ្ដាល ឃុំ-ស្រុក ស្ទឹងត្រែង ខេត្តស្ទឹងត្រែង។
លោក សែ ម៉េងជា ជាម្ចាស់ផ្ទះបានប្រាប់ភ្នំពេញប៉ុស្តិ៍កាលពីថ្ងៃចន្ទថា សម្ភារដែលបញ្ជាការដ្ឋានកងរាជអាវុធហត្ថខេត្តស្ទឹងត្រែងបានដកហូតពីផ្ទះរបស់លោកដោយខ្លះមិនបានចុះក្នុងកំណត់ហេតុក្នុងអំឡុងឆ្នាំ ២០១៣ គឺមានរថយន្តជិត ១០ គ្រឿង ម៉ូតូចំនួន ១៤ គ្រឿង រួមទាំងឯកសារជំពាក់ប្រាក់ និងសម្ភារនៅក្នុងផ្ទះទាំងស្រុងដែលមានទំហំទឹកប្រាក់ជាង ២០ ម៉ឺនដុល្លា។ ប៉ុន្តែលោកអះអាងថាទំហំទឹកប្រាក់ដែលនៅសល់មិនទាន់បានទទួលប្រមាណជាង ៦ ម៉ឺនដុល្លារប៉ុណ្ណោះ។
លោក ម៉េងជា បានអះអាងថាការដកហូតទ្រព្យសម្បត្តិរបស់លោកបានធ្វើឡើងក្រោយពីអាវុធហត្ថខេត្តបានចុះឆែកឆេរដោយបានចោទប្រកាន់ពីការផ្តល់ទីតាំងប្រព្រឹត្តល្បែងស៊ីសង ហើយតុលាការខេត្តបានឃុំខ្លួនលោក ៧ ខែ និងប្រពន្ធលោក ១ ខែរហូតសាលាឧទ្ធរណ៍បានសម្រេចលើកលែងការចោទប្រកាន់ក្រោយមានការមិនសុខចិត្ត និងប្តឹងទាស់។
លោក ម៉េងជា បានថ្លែងថា៖ «ពេលនោះគេចុះមកភ្លាមៗ មកប្រមូលសម្ភារនៅក្នុងផ្ទះទាំងអស់ទាំងដែលខ្ញុំមិនបានប្រព្រឹត្តដូចការចោទប្រកាន់»។
លោក ម៉េងជា បានឲ្យដឹងទៀតថា៖ «ក្រោយមកពេលខ្ញុំចេញពីពន្ធនាគារវិញ ខ្ញុំក៏ស្វែងរកអន្តរាគមន៍ដល់អ្នកធំៗ និងស្ថាប័នជាច្រើនរហូតទៅដល់លោក សៅ សុខា ទៀត។ ក្រោយមកលោក អៀង វ៉ាន់ឌី បានប្រគល់ឲ្យខ្ញុំតែ ៥ ពាន់ដុល្លារប៉ុណ្ណោះ។ ខ្ញុំមិនដឹងទៅរកឯណាទៀតទេ ហើយអង្គភាពប្រឆាំងអំពើពុករលួយបានចេញលិខិតប្រគល់ឲ្យខ្ញុំដល់ទៅ ២ លើក តែមេបញ្ជាការរូបនោះនៅតែមិនអនុវត្តតាម»។
យោងតាមលិខិតចំនួន ២ ច្បាប់ដាច់ដោយឡែកពីគ្នាចុះកាលពីឆ្នាំ ២០១៦ និងឆ្នាំ ២០១៨ របស់អង្គភាពប្រឆាំងអំពើពុករលួយ (អ.ប.ព) បានដាក់ជូន លោក អៀង វ៉ានឌី មេបញ្ជាការកងរាជអាវុធហត្ថខេត្តស្ទឹងត្រែងបានអះអាងថាកាលពីអំឡុងខែតុលាឆ្នាំ ២០១៣ កម្លាំងកងរាជអាវុធហត្ថបានចុះទៅឆែកឆេរផ្ទះ (ហាងកាហ្វេ) ដោយបានចាប់យកវត្ថុតាងមួយចំនួនក្នុងនោះវត្ថុតាងមួយចំនួនបានធ្វើកំណត់ហេតុត្រឹមត្រូវដោយឡែកវត្ថុតាងមួយចំនួនទៀត មិនបានធ្វើកំណត់ហេតុនោះទេ បើទោះជាព្រះរាជអាជ្ញាបានបញ្ជាឲ្យសរសេរកំណត់ហេតុក៏ដោយ។
លិខិតនោះអះអាងបន្តថា ចំណែកវត្ថុតាងមិនបានកត់ចូលក្នុងកំណត់ហេតុ ហើយមិនបានប្រគល់ត្រឡប់ឲ្យម្ចាស់ដើមវិញមានដូចជា ប្រាក់ដុល្លារ ១៧០០ ដុល្លារ ប្រាក់រៀល ៣០ លានរៀល ម៉ូតូចំនួន ២ គ្រឿងជាដើម។
យោងតាមលិខិតលើកទី ២ របស់អង្គភាពប្រឆាំងអំពើពុករលួយជូនលោក អៀង វ៉ាន់ឌី នៅថ្ងៃទី ២ ខែកុម្ភៈ ឆ្នាំ ២០១៨ បានឲ្យដឹងថាលោក អៀង វ៉ាន់ឌី មិនបានអនុវត្តប្រគល់សម្ភារដែលបានយកដោយខុសច្បាប់ជូនលោក សែ ម៉េងជា វិញទេ។
យោងតាមលិខិតដដែលនេះបានឲ្យដឹងថា៖ «ករណីមិនអនុវត្តលិខិតលេខរបស់ អ.ប.ព មិនមែន អ.ប.ព មិនបានទទួលព័ត៌មានពីទីនោះដែលលោក មេបញ្ជាការបានអះអាងថា នៅស្រុកខ្មែរមានតែមនុស្ស ៣ នាក់គត់ដែលលោកខ្លាចក្រែងទី ១ សម្តេចតេជោនាយករដ្ឋមន្ត្រីទី ២ លោក គិត ម៉េង និងទី ៣ លោក សៅ សុខា ក្រៅពីនោះលោកមិនខ្លាចអ្នកណាទាំងអស់»។
លិខិតនេះបញ្ជាក់ថា៖ «ខ្ញុំយល់ថា ការនិយាយបែបនេះគឺធ្វើឲ្យខូចខាតកិត្តិយសដល់ថ្នាក់ដឹកនាំនៅទីនេះ។ អង្គភាពប្រឆាំងអំពើពុករលួយ សូមបញ្ជាក់ថាកន្លងមកលោក សៅ សុខា ធ្លាប់បានទុកឱកាសឲ្យលោកមេបញ្ជាការកែតម្រូវចំណុចខ្វះខាត និងពង្រឹងសមត្ថភាពការងារឲ្យប្រសើរជាងទង្វើដែលបានអនុវត្តឆ្គាំឆ្គងដែលមិនយកមូលដ្ឋានច្បាប់ជាគោល ហើយ អ.ប.ព នៅតែបន្តរង់ចាំមើលការផ្លាស់ប្តូរឥរិយាបថការងាររបស់លោកមេបញ្ជាការមុននឹងសម្រេចនីតិវិធីបន្ត»។
លោក ឱម យ៉ិនទៀង ប្រធានអង្គភាពប្រឆាំងអំពើពុករលួយមិនអាចសុំការអត្ថាធិប្បាយជុំវិញករណីនេះបានទេកាលពីថ្ងៃម្សិលមិញ។
ខណៈលោក អៀង វ៉ាន់ឌី ក៏មិនអាចទាក់ទងសុំអត្ថាធិប្បាយបានដែរកាលពីម្សិលមិញ ប៉ុន្តែបុរសដែលលើកទូរស័ព្ទអះអាងថា ជាអ្នកបើកឡានបានឲ្យដឹងថាលោក អៀង វ៉ាន់ឌី បានចូលវះកាត់ និងសម្រាកនៅមន្ទីរពេទ្យ។
អ្នកបើកបរបានឲ្យដឹងថា៖ «សុំទោស ខ្ញុំតៃកុងឡានគាត់ទេ។ គាត់នៅក្នុងមន្ទីរពេទ្យ គាត់ឈឺ គាត់វះកាត់ខ្ញុំមិនដឹងទេ»។
លោក សុខសុវណ្ណ វឌ្ឍនាសាប៊ុង ប្រធានគណបក្សខ្មែរក្រោក និងជាសមាជិកឧត្តមក្រុមប្រឹក្សាពិគ្រោះ និងផ្តល់យោបល់ដែលកំពុងស្រាវជ្រាវករណីនេះ ដើម្បីដាក់ជូនលោកនាយករដ្ឋមន្ត្រី ហ៊ុន សែន បានប្រាប់ភ្នំពេញប៉ុស្តិ៍ពីថ្ងៃចន្ទថា លោក អៀង វ៉ាន់ឌី បានប្រើអំណាចខុសច្បាប់ក្នុងការរឹបអូសទ្រព្យសម្បត្តិ ចាប់ជនរងគ្រោះ និងភរិយាដាក់ពន្ធនាគារដោយអយុត្តិធម៌ និងមិនគោរពតាមលិខិតគតិយុត្តរបស់តុលាការថែមទាំងបិទបាំងភ័ស្តុតាងផងដែរ។
លោក វឌ្ឍនាសាប៊ុង បានអះអាងទៀតថាមេបញ្ជាការរូបនេះមានភាពអសកម្មក្នុងការអនុវត្តតាមសេចក្ដីជូនដំណឹងរបស់អង្គភាពប្រឆាំងអំពើពុករលួយ ដែលបញ្ជាឲ្យមេបញ្ជាការរូបនេះប្រគល់ទ្រព្យសម្បត្តិឲ្យជនរងគ្រោះវិញ។
លោក វឌ្ឍនាសាប៊ុង ថ្លែងថា៖ «ករណីនេះយើងខ្ញុំចាត់ទុកជាករណីពិសេសបំផុត ព្រោះមេបញ្ជាការរូបនេះតែងយកឈ្មោះថ្នាក់ដឹកនាំរាជរដ្ឋាភិបាលទៅធ្វើរឿងមិនគប្បី ហើយលោកមេបញ្ជាការរូបនេះក៏មានពាក់ព័ន្ធ និងករណីផ្សេងទៀតផងដែរដែលមានលក្ខណៈស្រដៀងនេះជាច្រើនទៀតផង»។
កាលពីអំឡុងខែ មិថុនា ឆ្នាំ ២០១៦ លោក អៀង វ៉ាន់ឌី មេបញ្ជាការដ្ឋានកងរាជអាវុធហត្ថរូបនេះធ្លាប់ត្រូវបានលោក សៅ សុខា ចេញសេចក្តីសម្រេចដាក់ទណ្ឌកម្មផ្នែកវិន័យម្តងរួចមកហើយ ដោយសារតែមានកំហុសខុសឆ្គងក្នុងការបំពេញប្រតិបត្តិការតួនាទី ភារកិច្ច ហើយបានបញ្ជាឲ្យមេបញ្ជាការរូបនេះប្រគល់វត្ថុតាងឲ្យឈ្មោះ សែ ម៉េងជា វិញផងដែរ។
លោក សៅ សុខា មេបញ្ជាការកងរាជអាវុធហត្ថលើផ្ទៃប្រទេសបានប្រាប់ភ្នំពេញប៉ុស្តិ៍ពីម្សិលមិញថា សមត្ថកិច្ចដែលបានទទួលពាក្យបណ្តឹងនេះពីជនរងគ្រោះនឹងធ្វើការតាមវិជ្ជាជីវៈរបស់ខ្លួន ដើម្បីផ្តល់ភាពត្រឹមត្រូវដល់ជនរងគ្រោះ ព្រោះថាបើករណីនេះជារឿងបុគ្គលប្រព្រឹត្តកំហុសគឺត្រូវតែអនុវត្តទៅតាមច្បាប់ ដោយមិនមានការយោគយល់ ឬខ្លាចរអា។
លោក សុខា ថ្លែងថា៖ «ជាមួយបញ្ហាមិនខ្លាចអ្នកនេះមិនខ្លាចអ្នកនោះ ខ្ញុំក៏មិនដឹងដែរ ព្រោះខ្ញុំក៏ពលរដ្ឋម្នាក់ដែរ រស់នៅក្នុងប្រទេសមានច្បាប់ដែលតម្រូវឲ្យគោរពទាំងអស់គ្នា។ បើយើងធ្វើខុសត្រូវទទួលទោសតាមច្បាប់ទៅ ហើយអង្គភាពប្រឆាំងអំពើពុករលួយលោកមានសិទ្ធិរបស់លោកពិនិត្យមើលអំពើពុករលួយ អ្នកប្រព្រឹត្តអំពើពុករលួយ លោកមានសិទ្ធិចាប់តើផ្អែកលើភ័ស្តុតាងទៅ។ មិនទៅភ័យអី ព្រោះមិនមែនអង្គភាពទាំងមូលនាំគ្នាទៅធ្វើណា? បុគ្គលណាធ្វើខុស ត្រូវបុគ្គលហ្នឹងទទួលខុសត្រូវតាមច្បាប់ទៅ»៕
