ភ្នំពេញ: លោក វន់ ពៅ ប្រធានសមាគមសេដ្ឋកិច្ចក្រៅប្រព័ន្ធហៅកាត់ថា IDEA ត្រូវបានសាលាដំបូងរាជធានីភ្នំពេញកោះហៅឲ្យចូលបំភ្លឺក្នុងនាមសាក្សីក្នុងសំណុំរឿងលោក កឹម សុខា ខណៈអង្គការមួយអំពាវនាវឲ្យមានការដោះលែងអតីតមេដឹកនាំគណបក្សប្រឆាំងនៅថ្ងៃគម្រប់ខួប ១ ឆ្នាំនៃការចាប់ខ្លួនរបស់លោក។
លោក គី ឫទ្ធី ចៅក្រមស៊ើបសួរសាលាដំបូងរាជធានីភ្នំពេញបានចេញដីកាកោះហៅលោក វន់ ពៅ កាលពីថ្ងៃទី ២៨ ខែសីហាថ្មីៗនេះឲ្យចូលបំភ្លឺក្នុងនាមសាក្សីនៅព្រឹកថ្ងៃទី ១០ ខែកញ្ញាខាងមុខនេះ។ ការកោះហៅនេះគឺដើម្បីបំភ្លឺករណីចោទប្រកាន់លោក កឹម សុខា បទ «សន្ទិដ្ឋិភាពជាមួយបរទេស»។
លោក វន់ ពៅ បានថ្លែងកាលពីម្សិលមិញថាលោកបានទទួលដីកានោះហើយ ដោយលោកនឹងចូលទៅបំភ្លឺតាមកាលកំណត់។ ទោះយ៉ាងណាលោកថា លោកមិនអាចរំពឹងគិតមុនថា តើតុលាការនឹងសួរលោកពីបញ្ហាអ្វីទេ ខណៈលោកមិនដឹងមូលហេតុនៃការកោះហៅផងនោះ។
លោកបានបញ្ជាក់ថា៖ «ខ្ញុំមិនដឹងថាហេតុអ្វីបានតុលាការកោះហៅខ្ញុំធ្វើជាសាក្សី?» ។
កាលពីដើមខែមករាឆ្នាំ ២០១៤ មានបាតុកម្មទាមទារដំឡើងប្រាក់ខែកម្មករកាត់ដេរឱ្យដល់ ១៦០ ដុល្លារនៅតាមផ្លូវវេងស្រេង ខណៈពេលនោះប្រាក់ខែកម្មករមានតែ ៩៥ ដុល្លារ។
ប៉ុន្តែបាតុកម្មនោះបានឈានដល់ហិង្សា ដុតឡាន វាយកម្ទេចទ្រព្យសម្បត្តិមួយចំនួន ហើយមានកម្មករយ៉ាងតិច ៤ នាក់បានស្លាប់ និងម្នាក់បាត់ខ្លួន។ បាតុកម្មនោះត្រូវបានមន្ត្រីរដ្ឋាភិបាលថា កើតឡើងដោយមានការជំរុញពីអតីតគណបក្សសង្គ្រោះជាតិ ហើយថាជារូបភាពនៃបដិវត្តន៍ពណ៌។
លោក វន់ ពៅ បានថ្លែងពីម្សិលមិញថា លោកមិនបាននៅក្នុងក្បួនបាតុកម្មនោះទេ ប៉ុន្តែលោកថាបានឃ្លាំមើលនៅមុខរោងចក្រយ៉ាក់ជីងក្នុងខណ្ឌពោធិ៍សែនជ័យតាមផ្លូវជាតិលេខ ៤។ លោកក៏ត្រូវបានចាប់ខ្លួនជាមួយនឹងបាតុករ ២២ នាក់ផ្សេងទៀត ហើយលោកត្រូវបានកាត់ទោសដាក់ពន្ធនាគារ ៤ ឆ្នាំកន្លះ ប៉ុន្តែទោសនេះត្រូវព្យួរក្រោយពេលជាប់ពន្ធនាគារបាន ៥ ខែ។
លោកថ្លែងថា៖ «ខ្ញុំមិនបានទៅធ្វើបាតុកម្មនៅផ្លូវវេងស្រេងទេ។ ខ្ញុំគ្រាន់តែបានឃ្លាំមើលបាតុកម្មនៅរោងចក្រយ៉ាក់ជីងតាមផ្លូវជាតិលេខ ៤។ បាតុកម្មនៅយ៉ាក់ជីងគឺនៅថ្ងៃទី ២ មករា ២០១៤ ចំណែកនៅផ្លូវវេងស្រេងគឺថ្ងៃទី ៣ មករាក្រោយពេលត្រូវគេចាប់ខ្លួនខ្ញុំ»។
ទាក់ទិននឹងករណីលោក កឹម សុខា នេះដែរកាលពីម្សិលមិញ អង្គការមួយឈ្មោះថា សហព័ន្ធអន្តរជាតិសម្រាប់សិទ្ធិមនុស្ស (FIDH) បានចេញសេចក្តីប្រកាសអំពាវនាវឲ្យមានការដោះលែងលោក កឹម សុខា ដោយឥតលក្ខខណ្ឌខណៈលោកបានជាប់ឃុំគម្រប់ ១ ឆ្នាំ គិតពីពេលចាប់ខ្លួនកាលពីរំលងអធ្រាត្រឈានថ្ងៃទី ៣ ខែកញ្ញា ឆ្នាំមុន។
អ្នកស្រី Debbie Stothard អគ្គលេខាធិការអង្គារ FIDH បានថ្លែងថា៖ «បន្ទាប់ពីចាប់លោក កឹម សុខា ដាក់ពន្ធនាគារដើម្បីដកគាត់ និងបក្សរបស់គាត់ចេញពីការបោះឆ្នោតក្លែងក្លាយកាលពីពេលថ្មីៗនេះគាត់កំពុងត្រូវបានបន្តការឃុំឃាំងដើម្បីតម្កល់សម្រាប់ការចរចាចៀសវាងទណ្ឌកម្មអន្តរជាតិ។ ការបន្តឃុំខ្លួនលោក កឹម សុខា តាមអំពើចិត្ត...ត្រូវតែបញ្ចប់ជាបន្ទាន់»។
ប៉ុន្តែលោក ជិន ម៉ាលីន អ្នកនាំពាក្យក្រសួងយុត្តិធម៌ថ្លែងកាលពីម្សិលមិញថា ការអំពាវនាវឲ្យដោះលែងលោក កឹម សុខា មិនអាចទៅរួចទេដោយសារតុលាការកម្ពុជាជាស្ថាប័នឯករាជ្យ។
លោកបានបញ្ជាក់ថា៖ «ដើម្បីជួយដល់លោក កឹម សុខា មានតែចូលរួមក្នុងនីតិវិធីតែប៉ុណ្ណោះ។ បានន័យថាធ្វើម៉េចខិតខំប្រមែប្រមូលភ័ស្តុតាង ឬក៏សាក្សី ទឡ្ហីករណ៍ផ្សេងៗដើម្បីដោះបន្ទុកគាត់នៅពេលសវនាការ។ អានេះជាមធ្យោបាយដែលល្អបំផុត»។
កាលពីថ្ងៃព្រហស្បតិ៍សប្តាហ៍មុនលោក គី ឫទ្ធី ចៅក្រមស៊ើបសួរបានសម្រេចពន្យារការឃុំខ្លួនលោក កឹម សុខា រយៈពេល ៦ ខែទៀតដើម្បីបន្តស៊ើបអង្កេតលើបទចោទ «សន្ទិដ្ឋិភាពជាមួយបរទេស» ដែលបទចោទនេះធ្វើឲ្យលោក កឹម សុខា ត្រូវប្រឈមមុខនឹងការជាប់ពន្ធនាគាររហូតដល់ទៅ ៣០ ឆ្នាំ។
លោក ជិន ម៉ាលីន ថ្លែងថាបើទោះបីជាចៅក្រមស៊ើបសួរបានសម្រេចបន្តការឃុំខ្លួន ៦ ខែទៀតក៏ដោយ ក៏លោក កឹម សុខា នៅតែអាចបន្តដាក់ពាក្យបណ្ដឹងទៅតុលាការជាន់ខ្ពស់ដើម្បីសុំនៅក្រៅឃុំបណ្ដោះអាសន្នបាន៕